Mangala Jyothi

Diocesan Biblical, Catechetical and Liturgical Center
Diocese of Mangalore

Mangala Jyothi

Diocesan Biblical, Catechetical and Liturgical Center
Diocese of Mangalore
Home Departments Prayers News Photo Gallery Results Magazines Sunday Reading Contact

Select a date

24 February

ಮಾರ್ಚ್ 29 - ಸೊಮ್ಯಾಚ್ಯಾ ಕಷ್ಟಾಂಚೊ ಆಯ್ತಾರ್ - ಪಯ್ಲೆಂ ವಾಚಪ್

ಇಸಾಯಿಯಾ 50:4-7 ಥಕ್ಲಲ್ಯಾಂಕ್ ಧಯ್ರ್ ದಿಂವ್ಚೆಂ ಏಕ್ ಉತರ್ ಸಾಂಗುಂಕ್ ಹಾಂವೆಂ ಜಾಣಾ ಜಾಂವ್ಚ್ಯಾಕ್ ಸರ್ವೆಸ್ಪರಾ ದೆವಾನ್ ಮ್ಹಾಕಾ ಎಕಾ ಶಿಸಾಚಿ ಜೀಬ್ ದಿಲ್ಯಾ. ಎಕಾ ಶಿಸಾ ಭಾಶೆನ್ ಆಪ್ಣಾಕ್ ಚೀತ್ ದಿಂವ್ಕ್ ಹರ್ ಸಕಾಳಿಂ ತೊ ಮ್ಹಜೊ ಕಾನ್ ಜಾಗೃತ್ ಕರ್ತಾ. ಸರ್ವೆಸ್ಪರಾ ದೆವಾನ್ ಮ್ಹಜೊ ಕಾನ್ ಉಗಡ್ಲಾ, ಆನಿ ಹಾಂವ್ ಉಪ್ರಾಟುಂಕ್ ನಾ, ಹಾಂವ್ ಪಾಟಿಂ ಸರುಂಕ್ ನಾ. ಮ್ಹಾಕಾ ಮಾರ್ತಲ್ಯಾಂಕ್ ಹಾಂವೆಂ ಮ್ಹಜಿ ಪಾಟ್ ದಾಕಯ್ಲಿ, ಮ್ಹಜೆಂ ಖಾಡ್ ವಡ್ತಲ್ಯಾಂಕ್ ಹಾಂವೆಂ ಮ್ಹಜೆ ಪೊಲೆ ದಾಕಯ್ಲೆ; ಕೆಂಡ್ಣ್ಯಾಂ ಆನಿ ಥಿಂಪಿಯೆ ಮುಕಾರ್ ಹಾಂವೆಂ ಮ್ಹಜೆಂ ತೋಂಡ್ ಲಿಪೊಂವ್ಕ್ ನಾ. ಸರ್ವೆಸ್ಪರ್ ದೇವ್ ಮ್ಹಜ್ಯಾ ಆಧಾರಾಕ್ ಯೆತಾ, ದೆಕುನ್ ಹಾಂವೆಂ ಅಕ್ಮಾನಾಚಿ ಪರ್ವಾ ಕರುಂಕ್ ನಾ; ದೆಕುನ್ ಹಾಂವೆಂ ಮ್ಹಜೆಂ ತೋಂಡ್ ಫಾತ್ರಾ ಭಾಶೆನ್ ಘಟ್ ಕೆಲಾಂ, ಹಾಂವ್ ಲಜೆಕ್ ಪಡ್ಚೊ ನಾ ಮ್ಹಣ್ ಹಾಂವ್ ಜಾಣಾಂ.

24 February

ಮಾರ್ಚ್ 29 - ಸೊಮ್ಯಾಚ್ಯಾ ಕಷ್ಟಾಂಚೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 21 ಶ್ಲೋಕ್ : ಮ್ಹಜ್ಯಾ ದೆವಾ, ಮ್ಹಜ್ಯಾ ದೆವಾ, ಕಿತ್ಯಾಕ್ ತುವೆಂ ಮ್ಹಾಕಾ ಸಾಂಡ್ಲಾಯ್? 1. ಮ್ಹಾಕಾ ಪಳೆತಾತ್ ತಿಂ ಮ್ಹಜ್ಯೊ ಖೆಳ್ಕುಳಾಂ ಕರ್ತಾತ್, ಓಂಠ್ ವೊಳಾಯ್ತಾತ್, ತಕ್ಲಿ ಧಲಯ್ತಾತ್. ಆತಾಂ ತೊಚ್ ತಾಕಾ ನಿವಾರುಂದಿ! ಜರ್ ತಾಚೊ ತಾಕಾ ಮೋಗ್ ಆಸಾ ತರ್ ತೊಚ್ ತಾಕಾ ಸುಟ್ಕಾ ದಿಂವ್ದಿ” - ಅಶೆಂ ತಿಂ ಮ್ಹಣ್ತಾತ್. 2. ವ್ಹಯ್, ಸುಣ್ಯಾಂನಿ ಮ್ಹಾಕಾ ವೆಡೊ ಘಾಲಾ, ಖೊಟ್ಯಾ ಮನ್ಶಾಂನಿ ಮ್ಹಜೆರ್ ದಾಡ್ ಘಾಲ್ಯಾ; ತಾಂಣಿಂ ಫಾಪ್ಸಿಲ್ಯಾತ್ ಮ್ಹಜೆ ಹಾತ್ ಆನಿ ಮ್ಹಜೆ ಪಾಂಯ್, ಕಿ ಸಕ್ಕಡ್ ಮ್ಹಜಿಂ ಹಾಡಾಂ ಹಾಂವೆಂಚ್ ಮೆಜ್ಯೆತ್. 3. ಮ್ಹಜ್ಯಾ ಆಂಗ್-ವಸ್ತ್ರಾಕ್ ಸೊಡ್ತಿ ಘಾಲ್ನ್ ಆಸಾತ್, ಆನಿ ಕೊಣಾಕ್ ಕಿತೆಂ ಮೆಳ್ತಾ ಮ್ಹಣ್ ರಾಖುನ್ ಆಸಾತ್. ಪುಣ್ ತುಂ, ಸರ್ವೆಸ್ಪರಾ, ಮ್ಹಜ್ಯೆ ಥಾವ್ನ್ ಪಯ್ಸ್ ರಾವನಾಕಾ, ಮ್ಹಜ್ಯಾ ಆಧಾರಾ, ತುರ್ತಾನ್ ಮ್ಹಜ್ಯೆ ಕುಮ್ಕೆಕ್ ಯೆ. 4. ಮ್ಹಜ್ಯಾ ಭಾಂವ್ಡಾಂ ಮದೆಂ ತುಜೆಂ ನಾಂವ್ ಹಾಂವ್ ವರ್ಣಿತಲೊಂ, ತಾಂಚ್ಯೆ ಜಮಾತೆಂತ್ ತುಜಿ ಕೀರ್ತ್ ಗಾಯ್ತಲೊಂ. ಸರ್ವೆಸ್ಪರಾಚ್ಯಾ ಭಕ್ತಾಂನೊ, ತಾಚಿ ಸ್ತುತಿ ಕರಾ, ಜಾಕೊಬಾಚ್ಯಾ ಸಂತತೆಚ್ಯಾಂನೊ, ತಾಚಿ ಮಹಿಮಾ ನಾಂವಾಡಾ, ಇಸ್ರಾಯೆಲಾಚ್ಯಾ ಭುಗ್ರ್ಯಾಂನೊ, ತಾಚೆಂ ವಂದನ್ ಕರಾ.

24 February

ಮಾರ್ಚ್ 29 - ಸೊಮ್ಯಾಚ್ಯಾ ಕಷ್ಟಾಂಚೊ ಆಯ್ತಾರ್ – ದುಸ್ರೆಂ ವಾಚಪ್

ಫಿಲಿಪ್ಪಿ 2:6-11 ಸಂಯ್ಭಾನ್ ತೊ ದೇವ್. ತರ್ಯೀ ತ್ಯಾ ಸಮಸಮ್ಪಣಾಕ್ ತೊ ಲಬ್ದೊನ್ ರಾವ್ಲೊನಾ. ಬಗರ್ ಮನ್ಶಾಸಾರ್ಕೊ ಜಾವ್ನ್, ಗುಲಾಮಾಚೆಂ ರೂಪ್ ಘೆವ್ನ್, ತಾಣೆಂ ಆಪ್ಣಾಕ್ಚ್ ಪೂರ್ಣ್ಪಣಿಂ ಖಾಲಿ ಕೆಲೊ ಮನ್ಶಾ ರುಪಾನ್ ತೊ ದಿಷ್ಟಿ ಪಡ್ಲೊ, ಆನಿ ಆಪ್ಣಾಕ್ಚ್ ಖಾಲ್ತೊ ಕರ್ನ್, ಮೊರ್ನಾ ಪರ್ಯಾನ್ - ಖುರ್ಸಾಚ್ಯಾ ಮೊರ್ನಾ ಪರ್ಯಾನ್! - ತೊ ವಿಧೇಯ್ ಜಾಲೊ. ದೆಕುನ್ ದೆವಾನ್ ತಾಕಾ ಅತಿ ಊಂಚ್ ಉಬಾರ್ಲೊ ಆನಿ ಸರ್ವ್ ನಾಂವಾಂ ಪ್ರಾಸ್ ವರ್ತೆಂ ನಾಂವ್ ತಾಕಾ ದಿಲೆಂ. ಅಶೆಂ ತಾಣೆಂ ಖುಶಿ ವ್ಹೆಲಿ ಬಾಗ್ವಜಯ್ ಮ್ಹಣ್ ಹ್ಯಾ ನಾಂವಾಕ್ ಹರ್ಯೇಕ್ ದಿಂಬಿ. ಸರ್ಗಿಂ, ಸಂಸಾರಿಂ ಆನಿ ಪಾತಾಳಿಂ ಆನಿ ಪರ್ಗಟಿಜಯ್ ಮ್ಹಣ್ ಹರ್ಯೇಕ್ ಜಿಬೆನ್ ದೆವಾ ಬಾಪಾಚೇ ಮಹಿಮೆಕ್ ಜೆಜು ಕ್ರೀಸ್ತ್ ಮ್ಹಣ್ ಸೊಮಿ.

24 February

ಮಾರ್ಚ್ 29 - ಸೊಮ್ಯಾಚ್ಯಾ ಕಷ್ಟಾಂಚೊ ಆಯ್ತಾರ್ – ಸುವಾರ್ತಾ

ಮಾತೆವ್ 26:14-27, 66 ಉಪ್ರಾಂತ್ ಬಾರಾಂತ್ಲೊ ಎಕ್ಲೊ, ಜುದಾಸ್ ಇಸ್ಕಾರಿಯೊತ್ ನಾಂವಾಚೊ, ಪ್ರಧಾನ್ ಯಾಜಕಾ ಸರ್ಶಿಂ ಗೆಲೊ ಆನಿ ಮ್ಹಣಾಲೊ: “ಹಾಂವ್ ತಾಕಾ ತುಮ್ಚೇ ಅಧೀನ್ ಕರಿನ್ ಜಾಲ್ಯಾರ್, ತುಮಿ ಮ್ಹಾಕಾ ಕಿತೆಂ ದಿಶಾತ್?” ತಾಂಣಿ ತಾಕಾ ರುಪ್ಯಾಚಿಂ ತೀಸ್ ನಾಣಿಂ ಮೆಜ್ಲಿಂ. ಆನಿ ತ್ಯಾ ದಿಸಾ ಥಾವ್ನ್ ತಾಕಾ ಧರ್ನ್ ದಿಂವ್ಕ್ ಏಕ್ ಬರೊ ಸಂದ್ರಾಪ್ ತೊ ಸೊಧ್ತಾಲೊ. ಜೆಜು ಶಿಸಾಂಕ್ ಪಾಸ್ಖಾಚೆಂ ಜೆವಣ್ ತಯಾರ್ ಕರುಂಕ್ ಸಾಂಗ್ತಾ (ಮಾರ್ಕ್ 14:12-16; ಲೂಕ್ 22:7-13) ಫುಗ್ ನಾತ್ಲ್ಲ್ಯಾ ಉಂಡ್ಯಾಚೇ ಪರ್ಬೆಚ್ಯಾ ಪಯ್ಲ್ಯಾ ದಿಸಾ, ಶಿಸ್ ಜೆಜು ಸರ್ಶಿಂ ಯೇವ್ನ್ ಮ್ಹಣಾಲೆ : “ಆಮಿ ಖಂಯ್ ವಚುನ್ ತುಕಾ ಪಾಸ್ಖಾಚೆಂ ಜೆವಣ್ ತಯಾರ್ ಕರಿಜಯ್ ಮ್ಹಣ್ ತುಜಿ ಖುಶಿ?” ಜೆಜುನ್ ತಾಂಕಾಂ ಸಾಂಗ್ಲೆಂ: “ಶಹರಾ ಭಿತರ್ ಫಲಾಣ್ಯಾ ಮನ್ಶಾಸರ್ಶಿಂ ವಚಾ ಆನಿ ತಾಕಾ ಸಾಂಗಾ: ‘ಮೆಸ್ತ್ರಿ ಮ್ಹಣ್ತಾ; ಮ್ಹಜೊ ವೇಳ್ ಲಾಗಿಂ ಪಾವ್ಲಾ; ಹಾಂವ್ ಮ್ಹಜ್ಯಾ ಶಿಸಾಂ ಸಾಂಗಾತಾ ತುಜ್ಯಾ ಘರಾ ಪಾಸ್ಖಾಚಿ ಪರ್ವಣ್ ಕರ್ತಾಂ.’” ಜೆಜುನ್ ಸಾಂಗ್ಲಲ್ಯಾ ಪರ್ಮಾಣೆಂ ಶಿಸ್ ಗೆಲೆ ಆನಿ ಪಾಸ್ಖಾಚೆಂ ಜೆವಣ್ ತಾಂಣಿಂ ತಯಾರ್ ಕೆಲೆಂ. ಘಾತಾನ್ ಪರಾಧೀನ್ ಕರ್ತಲ್ಯಾ ವಿಶ್ಯಾಂತ್ ಜೆಜು ಉಲಯ್ತಾ (ಮಾರ್ಕ್ 14:17-21; ಲೂಕ್ 22:14, 21-23; ಜುವಾಂವ್ 13:21-30) ಸಾಂಜ್ ಜಾತಚ್, ಆಪ್ಲ್ಯಾ ಬಾರಾ ಶಿಸಾಂ ಸಾಂಗಾತಾ ಜೆಜು ಜೆವ್ಣಾಕ್ ಬಸ್ಲೊ. ಜೆವ್ಣಾರ್ ಆಸ್ತಾನಾ ತೊ ಮ್ಹಣಾಲೊ: “ಸತ್ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ, ತುಮ್ಚೇ ಮಧ್ಲೊ ಎಕ್ಲೊ ಮ್ಹಾಕಾ ಘಾತಾನ್ ಪರಾಧೀನ್ ಕರ್ತಲೊ.” ಶಿಸ್ ಆಕಾಂತ್ಲೆ ಆನಿ ಎಕೆಕ್ಲೊಚ್ “ಹಾಂವ್ವೆ ತೊ, ಸೊಮಿಯಾ?” ಅಶೆಂ ವಿಚಾರಿಲಾಗ್ಲೊ. ತಾಣೆಂ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ : “ಜಾಣೆಂ ಮ್ಹಜೇ ಸಾಂಗಾತಾ ಪಂಲ್ಗಣಾಂತ್ ಹಾತ್ ಘಾಲಾ, ತೊ ಮ್ಹಾಕಾ ಪರಾಧೀನ್ ಕರ್ತಲೊ. ಮನ್ಶಾಪೂತ್ ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ ತ್ಯಾ ಪರ್ಮಾಣೆಂ ವೆತಾ ತೆಂ ಖರೆಂ; ಪುಣ್ ಜ್ಯಾ ಕೊಣಾ ಮುಖಾಂತ್ರ್ ಮನ್ಶಾಪೂತ್ ಪರಾಧೀನ್ ಜಾತಾ, ತಾಕಾ ಹಾಯ್ ಕಟಾ ಕಟಾ! ಜಲ್ಮೊಂಕ್ಚ್ ನಾತ್ಲ್ಲೊ ಜಾಲ್ಯಾರ್, ತ್ಯಾ ಮನ್ಶಾಕ್ ಕಿತ್ಲೆಂ ಬರೆಂ ಆಸ್ತೆಂ!” ತಿತ್ಲ್ಯಾರ್ ಘಾತಾನ್ ಪರಾಧೀನ್ ಕರುಂಕ್ ವೆತಲ್ಯಾ ಜುದಾಸಾನ್ ಮ್ಹಳೆಂ : “ಹಾಂವ್ ತೊ ಮೆಸ್ತ್ರೀ?” ಜೆಜುನ್ ಜಾಪ್ ದಿಲಿ: “ತುಂಚ್ ತೆಂ ಸಾಂಗ್ತಾಯ್.” ನಿಮಾಣೆಂ ಜೆವಣ್ (ಮಾರ್ಕ್ 14:22-25; ಲೂಕ್ 22:15-20 ಕೊರಿಂದ್ ಪಯ್ಲೆಂ 11:23-26) ತೆ ಜೆವ್ಣಾರ್ ಆಸ್ತಾನಾ ಜೆಜುನ್ ಉಂಡೊ ಘೆತ್ಲೊ ಆನಿ ಆರ್ಗಾಂ ದಿತಚ್ ತೊ ಮೊಡ್ಲೊ ಆನಿ ಆಪ್ಲ್ಯಾ ಶಿಸಾಂಕ್ ದೀವ್ನ್ ಮ್ಹಳೆಂ : “ಘೆಯಾ ಆನಿ ಖಾಯಾ, ಹಿ ಮ್ಹಜಿ ಕೂಡ್.” ಉಪ್ರಾಂತ್ ತಾಣೆಂ ಕಾಲ್ಸ್ ಘೆತ್ಲಿ ಆನಿ ದೆವಾಕ್ ಆರ್ಗಾಂ ದಿತಚ್, ತಾಂಕಾಂ ತಿ ವಾಂಟ್ಲಿ, ಮ್ಹಣುನ್ : “ತುಮಿ ಸಮೆಸ್ತ್ ಹಾಂತ್ಲೆಂ ಪಿಯೆಯಾ; ಕಿತ್ಯಾಕ್ ಹೆಂ ಮ್ಹಜೆ ರಗತ್, ಸೊಲ್ಲೊ ಥಿರ್ ಕರ್ತಾ ತೆಂ, ಸಮೆಸ್ತ್ ಮನ್ಶಾಂ ಪಾಸತ್, ಪಾತ್ಕಾಂಚ್ಯಾ ಭೊಗ್ಸಣ್ಯಾ ಖಾತಿರ್ ತೆಂ ವಾರೊವ್ತಲೆಂ. ತಾಂಣಿಂ ಜಾಪ್ ದಿಲಿ: “ತಾಕಾ ಮರಣ್ ಫಾವೊ.”

24 February

ಮಾರ್ಚ್ 22 - ಪ್ರಾಚಿತ್ ಕಾಳಾಚೊ ಪಾಂಚ್ವೊ ಆಯ್ತಾರ್ - ಪಯ್ಲೆಂ ವಾಚಪ್

ಎಜೆ.37:12-14 ಸರ್ವೆಸ್ಪರ್ ದೇವ್ ಅಶೆಂ ಮ್ಹಣ್ತಾ: ಮ್ಹಜೆ ಪರ್ಜೆ, ಹಾಂವ್ ತುಮ್ಚೆ ಫೊಂಡ್ ಉಗ್ತೆ ಕರ್ತಲೊಂ ಆನಿ ತುಮ್ಚ್ಯಾ ಫೊಂಡಾಂತ್ಲಿಂ ತುಮ್ಕಾಂ ಭಾಯ್ರ್ ಕಾಡ್ತಲೊಂ; ಹಾಂವ್ ತುಮ್ಕಾಂ ಇಸ್ರಾಯೆಲಾಚ್ಯಾ ದೆಶಾಂತ್ ಪರ್ತುನ್ ಹಾಡ್ತಲೊಂ. ಮ್ಹಜೆ ಪರ್ಜೆ, ಹಾಂವ್ ತುಮ್ಚೆ ಫೊಂಡ್ ಉಗ್ತೆ ಕರ್ತಲೊಂ ತೆದ್ನಾ ಹಾಂವ್ ಸರ್ವೆಸ್ಪರ್ ಮ್ಹಣ್ ತುಮ್ಕಾಂ ಕಳಿತ್ ಜಾತಲೆಂ. ಹಾಂವ್ ಮ್ಹಜೊ ಅತ್ಮೊ ತುಮ್ಚೆ ಭಿತರ್ ಘಾಲ್ತಲೊಂ ಆನಿ ತುಮಿ ಜಿವಂತ್ ಜಾತಲ್ಯಾತ್, ಆನಿ ಹಾಂವ್ ತುಮ್ಕಾಂ ನವ್ಯಾನ್ ತುಮ್ಚ್ಯಾ ದೆಶಾಂತ್ ಹಾಡ್ತಲೊಂ. ತೆದ್ನಾ ಹಾಂವ್, ಸರ್ವೆಸ್ಪರ್, ಉಲಯ್ಲಾಂ ಆನಿ ಹಾಂವೆಂ ಹೆಂ ಕೆಲಾಂ ಮ್ಹಣ್ ತುಮ್ಕಾಂ ಕಳಿತ್ ಜಾತಲೆಂ, ಉಲಯ್ತಾ ತೊ ಸರ್ವೆಸ್ಪರ್ ದೇವ್.

24 February

ಮಾರ್ಚ್ 22 - ಪ್ರಾಚಿತ್ ಕಾಳಾಚೊ ಪಾಂಚ್ವೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 129 ಶ್ಲೋಕ್ : ಸರ್ವೆಸ್ಪರಾ ಸವೆಂ ಆಸಾ ಕಾಕುಳ್ತ್, ಸಂಪೂರ್ಣ್ ಸುಟ್ಕಾ ತಾಚ್ಯೆ ಥಾವ್ನ್ಚ್ ಯೆತಾ. 1. ಪಾತಾಳಾ ಥಾವ್ನ್, ಸೊಮಿಯಾ, ಹಾಂವ್ ತುಕಾ ಬೊಬ್ ಮಾರ್ತಾಂ: ಸೊಮಿಯಾ, ಆಯ್ಕ್ ಮ್ಹಜೊ ತಾಳೊ, ತುಜೆ ಕಾನ್ ಚೀತ್ ದಿಂವ್ದಿತ್ ಮ್ಹಜ್ಯಾ ಖಾಲ್ತ್ಯೆ ವಿನಂತೆಚ್ಯಾ ತಾಳ್ಯಾಕ್. 2. ತುಂ ಸೊಮಿಯಾ, ಜರ್ ಖೊಟೆಪಣಾಂ ಲೆಖ್ಶಿ, ಸೊಮಿಯಾ, ತುಜ್ಯೆ ಮುಖಾರ್ ರಾವತ್ ಕೊಣ್? ತುಜ್ಯೆ ಲಾಗಿಂ ಆಸಾ ದೆಕುನ್ ಪಾತ್ಕಾಚೆಂ ಭೊಗ್ಸಾಣೆಂ ಆಮ್ಕಾಂ ಆಸಾ ತುಜಿ ಭಯಾ-ಭಕ್ತ್. 3. ಮ್ಹಜೊ ಅತ್ಮೊ ಸೊಮಿಯಾಚಿ ವಾಟ್ ಪಳೆವ್ನ್ಚ್ ಆಸಾ, ತಾಚ್ಯಾ ಉತ್ರಾಚೆರ್ ಮ್ಹಜೊ ಅತ್ಮೊ ಭರ್ವಸುನ್ ರಾವ್ಲಾ; ‘ಕೆದ್ನಾ ಫಾಂತೆಂ ಜಾಯ್ತ್?’ ಅಶೆಂ ಮ್ಹಣುನ್ ಪಾರ್ಯಾಗಾರ್ ಆಶೆವ್ನ್ ಆಸ್ತಾ, ತ್ಯಾ ವರ್ನ್ ಚಡ್ ಮ್ಹಜೊ ಅತ್ಮೊ ಮ್ಹಜ್ಯಾ ಧನಿಯಾಕ್ ಆಂವ್ಡೆವ್ನ್ ಆಸಾ. 4. ಏ ಇಸ್ರಾಯೆಲಾ, ಸೊಮಿಯಾಚಿ ವಾಟ್ ಪಳೆವ್ನ್ ರಾವ್, ಕಿತ್ಯಾಕ್ ತಾಚ್ಯೆಲಾಗಿಂ ಆಸಾ ಕಾಕುಳ್ತ್. ಸಂಪೂರ್ಣ್ ಸುಟ್ಕಾ ತಾಚ್ಯೆ ಥಾವ್ನ್ಚ್ ಲಾಭ್ತಾ, ತೊಚ್ ಇಸ್ರಾಯೆಲಾಕ್ ತಿಚ್ಯಾ ಸರ್ವ್ ಖೊಟೆಪಣಾಂತ್ಲಿಂ ಸೊಡಯ್ತಲೊ.

24 February

ಮಾರ್ಚ್ 22 - ಪ್ರಾಚಿತ್ ಕಾಳಾಚೊ ಪಾಂಚ್ವೊ ಆಯ್ತಾರ್ – ದುಸ್ರೆಂ ವಾಚಪ್

ರೊಮಾ.8:8-11 ರಗ್ತಾಮಾಸಾಕ್ ಖಾಲ್ಜಾತಾತ್ ತಿಂ ದೆವಾಕ್ ಮಾನ್ವನಾತ್. ದೆವಾಚೊ ಪವಿತ್ರ್ ಅತ್ಮೊ ತುಮ್ಚೇ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ತುಮಿ ರಗ್ತಾಮಾಸಾಚೇ ಅಪೇಕ್ಷೇ ಪರ್ಮಾಣೆಂ ನ್ಹಯ್, ಬಗರ್ ಪವಿತ್ರ್ ಅತ್ಮ್ಯಾಚೇ ಖುಶೇ ಪರ್ಮಾಣೆಂ ಜಿಯೆತಾತ್; ಆನಿ ಜಾಚೇ ಥಂಯ್ ಕ್ರಿಸ್ತಾಚೊ ಅತ್ಮೊ ನಾ, ತೊ ಕ್ರಿಸ್ತಾಚೊ ನ್ಹಯ್. ಆನಿ ಕ್ರೀಸ್ತ್ ತುಮ್ಚೇ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ತುಮ್ಚಿ ಕೂಡ್ ಪಾತ್ಕಾ ನಿಮ್ತಿಂ ಮೆಲ್ಯಾ ತರ್ಯೀ ದೆವಾ ಥಂಯ್ ತುಮಿ ನಿತಿವಂತ್ಪಣ್ ಜೊಡ್ಲಾಂ ದೆಕುನ್, ಅತ್ಮೊಚ್ ತುಮ್ಕಾಂ ಜೀವ್ದಿವ್ಪಿ ಸಕತ್ ಜಾತಾ. ತಿತ್ಲೆಂಚ್ ನ್ಹಯ್, ಜೆಜುಕ್ ಮೆಲ್ಲ್ಯಾಂತ್ಲೊ ಉಠಯ್ಲಲ್ಯಾ ದೆವಾಚೊ ಅತ್ಮೊ ತುಮ್ಚೇ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ಜೆಜು ಕ್ರಿಸ್ತಾಕ್ ಮೆಲ್ಲ್ಯಾಂತ್ಲೊ ಉಠಯ್ಲಲೊ ದೇವ್ ತ್ಯಾಚ್ ಅತ್ಮ್ಯಾ ಉದೆಶಿಂ ತುಮ್ಚ್ಯೊ ವಿನಾಶಿ ಕುಡಿ ನವ್ಯಾ ಜಿವಾನ್ ಭರ್ತಲೊ.

24 February

ಮಾರ್ಚ್ 22 - ಪ್ರಾಚಿತ್ ಕಾಳಾಚೊ ಪಾಂಚ್ವೊ ಆಯ್ತಾರ್ - ಸುವಾರ್ತಾ

ಜುವಾಂವ್ 11:1-45 ಬೆಥಾನಿಯಾಂತ್ ಲಾಜರ್ ನಾಂವಾಚೊ ಕೊಣ್ ಎಕ್ಲೊ ಪಿಡೆಂತ್ ಪಡ್ಲ್ಲೊ. ಮರಿ ಆನಿ ತಿಚಿ ಭಯ್ಣ್ ಮಾರ್ಥಾ ಥಂಯ್ ಜಿಯೆತಾಲಿಂ. ಮರಿ ಮ್ಹಳ್ಯಾರ್ ಸೊಮಿಯಾಚ್ಯಾ ಪಾಂಯಾಂಕ್ ಸುಗಂಧ್ ತೇಲ್ ಮಾಖುನ್ ಆಪ್ಲ್ಯಾ ಕೆಸಾಂನಿ ತಾಚೆ ಪಾಂಯ್ ಪುಸ್ಲ್ಲಿ ತಿ; ವಾಯ್ಟಾಂತ್ ಪಡ್ಲ್ಲೊ ಲಾಜರ್ ಮರಿಯೆಚೊ ಭಾವ್. “ಸೊಮಿಯಾ ತುಜೊ ಮೊಗಾಚೊ ಈಷ್ಟ್ ಪಿಡೆಂತ್ ಆಸಾ” ಮ್ಹಣುನ್ ಭಯ್ಣಿಂನಿ ಜೆಜುಕ್ ಸಾಂಗುನ್ ಧಾಡ್ಲೆಂ. ಹಿ ಖಬರ್ ಆಯ್ಕತಚ್ ಜೆಜು ಮ್ಹಣಾಲೊ: “ಹಿ ಪಿಡಾ ತಾಕಾ ಮರಣ್ ಹಾಡ್ಚ್ಯಾಕ್ ನ್ಹಯ್, ತಿಚೇ ವರ್ವಿಂ ದೆವಾಚಿ ಮಹಿಮಾ ಉಜ್ವಾಡಾವ್ಚಿ ಆಸಾ; ದೆವಾಚ್ಯಾ ಪುತಾಕ್ ತಿಚೇ ವರ್ವಿಂ ಮಹಿಮಾ ಲಾಭೊಂಕ್ ಆಸಾ.” ಜೆಜುಕ್ ಮಾರ್ಥಾಚೊ ಆನಿ ತಿಚೇ ಭಯ್ಣಿ ಮರಿಯೆಚೊ ಆನಿ ಲಾಜರಾಚೊ ಮೋಗ್ ಆಸ್ಲೊ. ತರ್ಯೀ ಲಾಜರ್ ಪಿಡೆಂತ್ ಆಸಾ ಮ್ಹಳ್ಳಿ ಖಬರ್ ಮೆಳ್ಳ್ಯಾ ಉಪ್ರಾಂತ್ಯೀ ಜೆಜು ಆಸ್ಲೊ ತೇಚ್ ಸುವಾತೆರ್ ಆನಿಕ್ ದೋನ್ ದೀಸ್ ರಾವ್ಲೊ. ಉಪ್ರಾಂತ್ ತಾಣೆಂ ಆಪ್ಲ್ಯಾ ಶಿಸಾಂಲಾಗಿಂ ಮ್ಹಳೆಂ: “ಯೆಯಾ, ಆಮಿ ಜುದೇಯಾಕ್ ಪಾಟಿಂ ಯಾ.” ಶಿಸ್ ಮ್ಹಣಾಲೆ: “ಮೆಸ್ತ್ರಿ, ಆತ್ತಾಂ ಜುದೆವ್ ತುಕಾ ಫಾತ್ರಾಂವ್ಕ್ ಸೊಧ್ತಾಲೆ; ಆನಿ ತುಂ ಥಂಯ್ಚ್ ಪಾಟಿಂ ವೆತಾಯ್?” ಜೆಜುನ್ ಜಾಪ್ ದಿಲಿ: “ಏಕ್ ದಿಸಾಕ್ ಬಾರಾ ಘಂಟೆ ಆಸಾತ್ ನ್ಹಯ್? ದಿಸಾ ಉಜ್ವಾಡಾಕ್ ಚಲ್ತಾ ತೊ ಮನಿಸ್ ಆದ್ಳೊನ್ ಪಡನಾ, ಕಿತ್ಯಾಕ್ ತಾಕಾ ಹ್ಯಾ ಸಂಸಾರಾಚೊ ಉಜ್ವಾಡ್ ದಿಸ್ತಾ. ಪುಣ್ ರಾತಿಕ್ ಚಲ್ತಾ ತೊ ಆದ್ಳೊನ್ ಪಡ್ತಾ; ಕಿತ್ಯಾಕ್ ತಾಕಾ ಉಜ್ವಾಡ್ ದಿಸನಾ.” ಇತ್ಲೆಂ ಸಾಂಗುನ್ ತಾಣೆಂ ಪತ್ರ್ಯಾನ್ ಮ್ಹಳೆಂ: “ಆಮ್ಚೊ ಈಷ್ಟ್ ಲಾಜರ್ ನಿದ್ಲಾ; ಹಾಂವೆಂ ವಚುನ್ ತಾಕಾ ಉಠಯ್ಜಯ್.” ತಾಚೆ ಶಿಸ್ ತಾಕಾ ಮ್ಹಣಾಲೆ: “ಸೊಮಿಯಾ, ತಾಕಾ ನೀದ್ ಪಡ್ಲಾ ಜಾಲ್ಯಾರ್ ತೊ ಬರೊ ಜಾತಲೊ.” ಪುಣ್ ಜೆಜು ಲಾಜರಾಚ್ಯಾ ಮರಣಾ ವಿಶ್ಯಾಂತ್ ಉಲಯ್ಲ್ಲೊ; ಪುಣ್ ಶಿಸ್ ನಿದೆಚ್ಯಾ ವಿಶೆವಾ ವಿಶ್ಯಾಂತ್ ಮ್ಹಣ್ ಸಮ್ಜಲೆ. ದೆಕುನ್ ಜೆಜುನ್ ತಾಂಕಾಂ ಸ್ಪಷ್ಟ್ ಸಾಂಗ್ಲೆಂ: “ಲಾಜರ್ ಮರಣ್ ಪಾವ್ಲಾ. ಪುಣ್ ಹಾಂವ್ ಥಂಯ್ ನಾತ್ಲೊಂ ದೆಕುನ್ ತುಮ್ಚೇ ಪಾಸತ್ ಸಂತೊಸ್ ಪಾವ್ತಾಂ. ಹೆಂ ಸರ್ವ್ ತುಮಿಂ ಸತ್ಮಾನಿಶೆಂ ಘಡ್ಲಾಂ. ಯೆಯಾ, ಆಮಿ ಆತಾಂ ತಾಚೇ ಸರ್ಶಿಂ ವಚುಂಯಾ.” ತವಳ್ ಜವ್ಳೊ ಮ್ಹಣ್ತಾತ್ ತೊ ತೊಮಾಸ್ ಆಪ್ಲ್ಯಾ ಸಾಂಗಾತಿ ಶಿಸಾಂಲಾಗಿಂ ಮ್ಹಣಾಲೊ: “ಆಮಿಯೀ ವಚುನ್ ತಾಚೇ ಸಾಂಗಾತಾ ಮರುಂಯಾ!” ಜೆಜು ಯೇವ್ನ್ ಪಾವ್ತಾನಾ, ಲಾಜರಾಕ್ ಫೊಂಡಾಂತ್ ದವರ್ನ್ ಚಾರ್ ದೀಸ್ ಜಾಲೆ ಮ್ಹಣ್ ತಾಕಾ ಕಳಿತ್ ಜಾಲೆಂ. ಬೆಥಾನಿಯಾ ಜೆರುಜಲೆಮಾಕ್ ಪಯ್ಸ್ ನಾತ್ಲ್ಲೆಂ - ಸುಮಾರ್ ದೋನ್ ಮೈಲಾಂ ಭಿತರ್ ಆಸ್ಲ್ಲೆಂ ಮ್ಹಣ್ಯೆತ್. ಶಹರಾಚೆ ಸಬಾರ್ ಜುದೆವ್ ಮಾರ್ಥಾ ಆನಿ ಮರಿಯೆಕ್ ಮೆಳುನ್ ತಾಂಚ್ಯಾ ಭಾವಾಚ್ಯಾ ಮೊರ್ನಾ ಉಪ್ರಾಂತ್ ತಾಂಕಾ ಭುಜಂವ್ಕ್ ಮ್ಹಣ್ ಆಯ್ಲ್ಲೆ. ಜೆಜು ಯೆತಾ ಮ್ಹಣ್ ಆಯ್ಕತಚ್, ಮಾರ್ಥಾ ತಾಕಾ ಮೆಳುಂಕ್ ಮ್ಹಣ್ ಫುಡೆಂ ಗೆಲಿ. ಪುಣ್ ಮರಿ ಘರಾಚ್ ರಾವ್ಲಿ. ಜೆಜುಕ್ ಪಳೆವ್ನ್ ಮಾರ್ಥಾನ್ ಮ್ಹಳೆಂ: “ಸೊಮಿಯಾ, ತುಂ ಹಾಂಗಾ ಅಸ್ಲ್ಲೊಯ್ ಜಾಲ್ಯಾರ್ ಮ್ಹಜೊ ಭಾವ್ ಮರ್ಚೊ ನಾತ್ಲೊ; ಪುಣ್ ಆತಾಂ ಜಾಲ್ಯಾರ್ಯೀ ದೆವಾಲಾಗ್ಚೆಂ ತುವೆಂ ಮಾಗ್ಲಲೆಂ ಸಗ್ಳೆಂ ದೇವ್ ತುಕಾ ದಿತಲೊ ಮ್ಹಣ್ ಹಾಂವ್ ಜಾಣಾಂ. ಜೆಜುನ್ ತಿಕಾ ಮ್ಹಳೆಂ: “ತುಜೊ ಭಾವ್ ಜಿವಂತ್ ಉಠ್ತಲೊ” ಮಾರ್ಥಾ ಮ್ಹಣಾಲಿ: “ತೊ ನಿಮಾಣ್ಯಾ ದಿಸಾ ಪುನರ್ಜಿವಂತ್ಪಣಾ ವೆಳಾರ್, ಜಿವಂತ್ ಉಠ್ತಲೊ ಮ್ಹಣ್ ಹಾಂವ್ ಜಾಣಾಂ.” ಜೆಜುನ್ ತಿಕಾ ಸಾಂಗ್ಲೆಂ: “ಹಾಂವ್ಚ್ಚ್ ಪುನರ್ಜಿವಂತ್ಪಣ್ ಆನಿ ಜೀವ್. ಜೊ ಕೊಣ್ ಮ್ಹಾಕಾ ಸತ್ಮಾನ್ತಾ ತೊ ಮರತ್ ಜಾಲ್ಯಾರ್ಯೀ ಜಿಯೆತಲೊ. ಆನಿ ಜೊ ಕೊಣ್ ಜಿವಂತ್ ಆಸಾ ಆನಿ ಮ್ಹಾಕಾ ಸತ್ಮನ್ತಾ ತೊ ಸಾಸ್ಣಾಕ್ ಮೊರಸೊನಾ. ಹೆಂ ತುಂ ಸತ್ಮಾನ್ತಾಯ್?” ತಿಣೆಂ ಜಾಪ್ ದಿಲಿ: “ವ್ಹಯ್, ಸೊಮಿಯಾ, ಸಂಸಾರಾಂತ್ ಯೆಂವ್ಚೊ ಆಸ್ಲೊ ತೊ ಕ್ರೀಸ್ತ್, ದೆವಾಚೊ ಪೂತ್ ತುಂಚ್ ಮ್ಹಣ್ ಹಾಂವ್ ಸತ್ಮಾನ್ತಾಂ.” ಇತ್ಲೆಂ ಮ್ಹಣುನ್ ತಿ ಪಾಟಿಂ ಗೆಲಿ ಆನಿ ಆಪ್ಲೇ ಭಯ್ಣಿಕ್ ಮರಿಯೆಕ್ ಕುಶಿನ್ ಆಪವ್ಣ್, “ಮೆಸ್ತ್ರಿ ಆಯ್ಲಾ; ತುಕಾ ಆಪಯ್ತಾ” ಮ್ಹಣಾಲಿ. ಇತ್ಲೇಂ ಆಯ್ಕತಚ್ ಮರಿ ಸಟ್ಟ್ ಕರ್ನ್ ಉಠುನ್ ತೊ ಆಸ್ಲಲೇಕಡೆನ್ ಗೆಲಿ. (ತೆದ್ವಾಂ ಜೆಜು ವಾಡ್ಯಾಂತ್ ಯೇವ್ನ್ ಪಾವುಂಕ್ ನಾತ್ಲೊ; ತೊ ಆನಿಕ್ಯೀ ಮಾರ್ಥಾ ತಾಕಾ ಭೆಟ್ಲ್ಲಿ ತ್ಯಾ ಜಾಗ್ಯಾರ್ಚ್ ಆಸ್ಲೊ.) ಘರಾಂತ್ ಮರಿಯೆಚೊ ಸಾಂಗಾತ್ ಕರ್ನ್ ತಿಕಾ ಬುಜೊಂವ್ಕ್ ಮ್ಹಣ್ ಆಯ್ಲ್ಲೆ ಜುದೆವ್, ಮರಿ ಸಟ್ಟ್ ಕರ್ನ್ ಉಠುನ್ ಭಾಯ್ರ್ ಗೆಲಿ ತೆಂ ಪಳೆವ್ನ್, ತಿಚೇ ಪಾಟ್ಲ್ಯಾನ್ ಗೆಲೆ. ತಿ ಕಾಂಯ್ ಫೊಂಡಾ ಸರ್ಶಿಂ ರಡುಂಕ್ ವೆತಾ ಜಾಯ್ಜಯ್ ಮ್ಹಣ್ ತಾಂಣಿಂ ಚಿಂತ್ಲೆಂ. ಜೆಜು ಆಸ್ಲಲೇಕಡೆನ್ ಯೇವ್ನ್ ತಾಕಾ ಪಳೆತಚ್, ಮರಿ ತಾಚ್ಯಾ ಪಾಂಯಾಂಕ್ ಪಡುನ್ ಮ್ಹಣಾಲಿ: “ಸೊಮಿಯಾ, ತುಂ ಹಾಂಗಾ ಆಸ್ಲ್ಲೊಯ್ ಜಾಲ್ಯಾರ್, ಮ್ಹಜೊ ಭಾವ್ ಮೊರ್ಚೊನಾತ್ಲೊ.” ತಿ ಆನಿ ತಿಚೇ ಸಾಂಗಾತಾ ಆಯ್ಲ್ಲೆ ಜುದೆವ್ ರಡ್ತಾತ್ ತೆಂ ಪಳೆವ್ನ್ ಜೆಜುಚೆಂ ಕಾಳಿಜ್ ಕಳ್ವಳ್ಲೆಂ ಆನಿ ತೊ ಸುಸ್ಕಾರ್ಲೊ. “ತಾಕಾ ತುಮಿ ಖಂಯ್ ಮಾತಿಯೆಕ್ ಪಾಯ್ಲಾ?” ಮ್ಹಣ್ ತಾಣೆಂ ವಿಚಾರ್ಲೆಂ. “ಸೊಮಿಯಾ ಯೇವ್ನ್ ಪಳೆ” ಮ್ಹಣುನ್ ತಾಂಣಿಂ ಜಾಪ್ ದಿಲಿ. ತವಳ್ ಜುದೆವ್ ಮ್ಹಣಾಲೆ: “ಹಾಕಾ ತಾಚೊ ಕಿತ್ಲೊ ಮೋಗ್ ಆಸ್ಲಲೊ ಪಳೆಯಾ!” ತಾಂಚೇ ಭಿತರ್ಲ್ಯಾ ಥೊಡ್ಯಾಂನಿ ಮ್ಹಳೆಂ: “ತಾಣೆಂ ಕುಡ್ರ್ಯಾಚೆ ದೊಳೆ ಉಗ್ತೆ ಕೆಲೆ, ತರ್ ತಾಚ್ಯಾನ್ ಲಾಜರ್ ಮೊರನಾಶೆಂ ಕರುಂಕ್ ಜಾಲೆಂನಾಗಾಯ್?” ಜೆಜು ಪತ್ರ್ಯಾನ್ ಕಳ್ವಳ್ಯಾಂನಿ ಭರೊನ್ ಫೊಂಡಾ ಸರ್ಶಿಂ ಆಯ್ಲೊ. ಮಾಟ್ಯಾಬರಿ ಆಸ್ಲಲೇ ತೇ ಸಮಾಧೆಚ್ಯಾ ಬಾಗ್ಲಾಕ್ ಏಕ್ ಶಿಳಾ ಆಡ್ ದವರ್ಲ್ಲಿ. ಜೆಜುನ್ ಮ್ಹಳೆಂ: “ತಿ ಶಿಳಾ ಪೆಲ್ಯಾನ್ ಕಾಡಾ.” ಮರಣ್ ಪಾವ್ಲ್ಲ್ಯಾಚಿ ಭಯ್ಣ್ ಮಾರ್ಥಾ ಮ್ಹಣಾಲಿ: “ಸೊಮಿಯಾ, ತೊ ಮರೊನ್ ಚಾರ್ ದೀಸ್ ಜಾಲೆ; ಎದೊಳ್ಚ್ ತಾಕಾ ಘಾಣ್ ಪಡ್ಲ್ಯಾ ಆಸ್ತಲಿ.” ಜೆಜು ತಿಕಾ ಮ್ಹಣಾಲೊ: “ತುಂ ಸತ್ಮಾನ್ಶಿ ಜಾಲ್ಯಾರ್, ದೆವಾಚಿ ಮಹಿಮಾ ದೆಖ್ತಲಿಯ್ ಮ್ಹಣ್ ಹಾಂವೆಂ ತುಕಾ ಸಾಂಗ್ಲಾಂ ನ್ಹಯ್?” ತಿತ್ಲ್ಯಾರ್ ತಾಂಣಿಂ ತಿ ಶಿಳಾ ಕಾಡ್ಲಿ. ತವಳ್ ಜೆಜುನ್ ಆಪ್ಲೆ ದೊಳೆ ವಯ್ರ್ ಲಾವ್ನ್ ಮ್ಹಳೆಂ: “ಬಾಪಾ, ತುಂ ಮ್ಹಾಕಾ ಆಯ್ಕತಾಯ್ ದೆಕುನ್ ಹಾಂವ್ ತುಜೊ ಉಪ್ಕಾರ್ ಮಾನ್ತಾಂ. ಸದಾಂಚ್ ಜಾಲ್ಯಾರ್ಯೀ ತುಂ ಮ್ಹಾಕಾ ಆಯ್ಕಾತಾಯ್ ಮ್ಹಣ್ ಹಾಂವ್ ಜಾಣಾಂ; ಪುಣ್ ತುವೆಂ ಮ್ಹಾಕಾ ಧಾಡ್ಲಾಯ್ ಮ್ಹಣ್ ಹಾಂಗಾ ಭೊಂವ್ತಿಂ ಉಬೊ ಆಸ್ಲಲ್ಯಾ ಲೊಕಾನ್ ಸತ್ಮಾನ್ಚೇ ಖಾತಿರ್ ಹಾಂವ್ ಅಶೆಂ ಉಲಯ್ತಾಂ.” ಇತ್ಲೆಂ ಮ್ಹಣ್ತಚ್, ವ್ಹಡ್ಲ್ಯಾ ತಾಳ್ಯಾನ್, “ಲಾಜರಾ, ಭಾಯ್ರ್ ಯೆ” ಮ್ಹಣುನ್ ತಾಣೆಂ ಬೊಬ್ ಮಾರ್ಲಿ. ಮೆಲ್ಲೊ ಮನಿಸ್ ಭಾಯ್ರ್ ಆಯ್ಲೊ. ತಾಚೆ ಹಾತ್ಪಾಂಯ್ ಫಾಳಿಯಾಂನಿ ರೆವ್ಡಾಯ್ಲ್ಲೆ ಆನಿ ತಾಚೆಂ ಮುಖಮಳ್ ಲೆಸಾನ್ ಗುಟ್ಲಾಯ್ಲ್ಲೆಂ. ಜೆಜು ಮ್ಹಣಾಲೊ: “ತಾಕಾ ಸೊಡಯಾ, ತೊ ವಚುಂ.” ಮರಿಯೆಚಿ ಭೆಟ್ ಕರುಂಕ್ ಆಯ್ಲ್ಲೆ ಸಬಾರ್ ಜಣ್ ಜುದೆವ್ ಜೆಜುನ್ ಕೆಲ್ಲೆಂ ತೆಂ ಪಳೆವ್ನ್, ತಾಕಾ ಸತ್ಮಾನುಂಕ್ ಲಾಗ್ಲೆ.

24 February

ಮಾರ್ಚ್ 15 - ಪ್ರಾಚಿತ್ ಕಾಳಾಚೊ ಚೊವ್ತೊ ಆಯ್ತಾರ್ - ಪಯ್ಲೆಂ ವಾಚಪ್

1 ಸಾಮು.16:1,6-7,10-13 ತ್ಯಾ ದಿಸಾಂನಿ, ಸರ್ವೆಸ್ಪರಾನ್ ಸಾಮುಯೆಲಾಕ್ ಮ್ಹಳೆಂ: “ತುಜ್ಯಾ ಶಿಂಗಾಂತ್ ತೇಲ್ ಭರ್ ಅನಿ ತುಜೆ ವಾಟೆಕ್ ಲಾಗ್. ಹಾಂವ್ ತುಕಾ ಬೆತ್ಲೆಹೆಮಾಚ್ಯಾ ಜೆಸ್ಸೆ ಸರ್ಶಿಂ ಧಾಡ್ತಾಂ, ಕಿತ್ಯಾಕ್ ಮ್ಹಜ್ಯಾ ರಾಯಾಕ್ ಹಾಂವೆಂ ತಾಚ್ಯಾ ಪುತಾಂ ಮಧ್ಲೊ ವಿಂಚ್ಲಾ.” ತೆ ಥಂಯ್ ಪಾವ್ತಚ್ ತಾಣೆಂ ಎಲಿಯಾಬಾಕ್ ದೆಕ್ಲೊ ಆನಿ ಚಿಂತ್ಲೆಂ: “ದುಭಾವಾವೀಣ್ ಸರ್ವೆಸ್ಪರಾಚೊ ಅಭಿಷಿಕ್ತ್ ಹಾಂಗಾ ತಾಚೆ ಮುಕಾರ್ ಆಸಾ.” ಪೂಣ್ ಸರ್ವೆಸ್ಪರಾನ್ ಸಾಮುಯೆಲಾಕ್ ಮ್ಹಳೆಂ: “ತಾಚೆಂ ರೂಪ್ ವಾ ತಾಚಿ ಉಂಚಾಯ್ ಪಳೆನಾಕಾ, ಕಿತ್ಯಾಕ್ ಹಾಂವೆಂ ತಾಚೊ ತಿರಸ್ಕಾರ್ ಕೆಲಾ. ಮನಿಸ್ ಪಳೆತಾ ತಶೆಂ ದೇವ್ ಪಳೆನಾ, ಕಿತ್ಯಾಕ್ ಮನಿಸ್ ಭಾಯ್ಲೆಂ ರೂಪ್ ಪಳೆತಾ, ಪೂಣ್ ಸರ್ವೆಸ್ಪರ್ ಕಾಳಿಜ್ ಪಳೆತಾ.” ಅಶೆಂ ಜೆಸ್ಸೆನ್ ಆಪ್ಲ್ಯಾ ಸಾತ್ಯೀ ಪುತಾಂಕ್ ಸಾಮುಯೆಲಾಕ್ ದಾಕಯ್ಲೆ, ಪೂಣ್ ಸಾಮುಯೆಲಾನ್ ಜೆಸ್ಸೆಕ್ ಮ್ಹಳೆಂ: “ಹಾಂಚೆ ಮಧ್ಲ್ಯಾ ಎಕ್ಲ್ಯಾಕ್ಯೀ ಸರ್ವೆಸ್ಪರಾನ್ ವಿಂಚುನ್ ಕಾಡುಂಕ್ ನಾ.” ಉಪ್ರಾಂತ್ ಸಾಮುಯೆಲಾನ್ ಜೆಸ್ಸೆಕ್ ವಿಚಾರ್ಲೆಂ: “ತುಜೆ ಸಕ್ಕಡ್ ಪೂತ್ ಇತ್ಲೆಚ್?” ಜೆಸ್ಸೆನ್ ಜಾಪ್ ದಿಲಿ: “ಸಕ್ಟಾಂ ಪ್ರಾಸ್ ಲ್ಹಾನ್ ಎಕ್ಲೊ ಆಸಾ, ಪೂಣ್ ತೊ ಬಕ್ರ್ಯಾಂಕ್ ಚರಯ್ತಾ.” ಸಾಮುಯೆಲಾನ್ ಜೆಸ್ಸೆಕ್ ಮ್ಹಳೆಂ: “ತಾಕಾ ಆಪೊಂವ್ಕ್ ಧಾಡ್; ತೊ ಯೆಸರ್ ಆಮಿ ಜೆವ್ಣಾಕ್ ಬಸ್ಚೆ ನಾಂವ್.” ಜೆಸ್ಸೆನ್ ತಾಕಾ ಆಪೊಂವ್ಕ್ ಧಾಡ್ಲೊ. ತೊ ತಾಂಬ್ಶೆ ಕುಡಿಚೊ, ಸೊಬಿತ್ ದೊಳ್ಯಾಂಚೊ ಆನಿ ಸುಂದರ್ ರುಪಾಚೊ ಆಸ್ಲೊ. ಸರ್ವೆಸ್ಪರಾನ್ ಮ್ಹಳೆಂ: “ಊಟ್, ತಾಕಾ ಅಭಿಷೆಕ್ ಕರ್; ಹೊಚ್ ತೊ.” ಸಾಮುಯೆಲಾನ್ ತೆಲಾಚೆಂ ಶಿಂಗ್ ಘೆತ್ಲೆಂ ಆನಿ ತಾಕಾ ತಾಚ್ಯಾ ಭಾವಾಂ ಮಧೆಂ ಮಾಖ್ಲೊ; ಆನಿ ತ್ಯಾ ದಿಸಾ ಸರ್ವೆಸ್ಪರಾಚೊ ಅತ್ಮೊ ದಾವಿದಾಚೆರ್ ದೆಂವ್ಲೊ ಆನಿ ಉಪ್ರಾಂತ್ ಸದಾಂಚ್ ತಾಚೆ ಸವೆಂ ರಾವ್ಲೊ. ಸಾಮುಯೆಲ್ ಭಾಯ್ರ್ ಸರುನ್ ರಾಮಾಕ್ ಗೆಲೊ.

24 February

ಮಾರ್ಚ್ 15 - ಪ್ರಾಚಿತ್ ಕಾಳಾಚೊ ಚೊವ್ತೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 22 ಶ್ಲೋಕ್ : ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ ಉಣೆಂ ನಾ. 1. ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ ಉಣೆಂ ನಾ, ಪಾಚ್ವೊ ಚರೊವ್ ಮೆಳ್ತಾ ಥಂಯ್ ತೊ ಮ್ಹಾಕಾ ವಿಶೆವ್ ದಿತಾ; ನಿಶಾಂತ್ ಉದ್ಕಾ ಸರ್ಶಿಂ ಮ್ಹಾಕಾ ತೊ ಆಪೊವ್ನ್ ವ್ಹರ್ತಾ, ಮ್ಹಜ್ಯಾ ಜಿವಾಕ್ ನವ್ಯಾನ್ ಘಟಾಯ್ ದಿತಾ. 2. ಆಪ್ಲ್ಯಾ ನಾಂವಾ ಸರಿ ತೊ ಮ್ಹಾಕಾ ನೀಟ್ ವಾಟೆನ್ ಚಲಯ್ತಾ, ಕಾಳೊಕಾಚ್ಯಾ ಭುಂಯಾರಾಂತ್ಲ್ಯಾನ್ ಹಾಂವ್ ಚಲ್ತಾಂ ತರ್ಯಿ ಕಸಲ್ಯಾಚ್ ವಾಯ್ಟಾಕ್ ಹಾಂವ್ ಭಿಯೆಂವ್ಚೊ ನಾಂ; ಕಿತ್ಯಾಕ್ ತುಂ ಮ್ಹಜ್ಯೆ ಸವೆಂ ಆಸಾಯ್: ತುಜೊ ದಾಂಡೊ ಆನಿ ಬೆತ್ ಆಸಾತ್ ತಿಂ ಮ್ಹಾಕಾ ಧಯ್ರ್ ದಿತಾತ್. 3. ಗಡ್ದ್ ಜೆವಣ್ ಮ್ಹಜ್ಯಾ ದುಸ್ಮಾನಾಂ ಹುಜಿರ್ ತುವೆಂ ತಯಾರ್ ಕೆಲಾಂಯ್, ತೆಲಾನ್ ಮ್ಹಜೆಂ ಮಾತೆಂ ತುಂ ಮಾಖ್ತಾಯ್, ಮ್ಹಜೆಂ ಕೊಪ್ ಭರುನ್ ವೊಮ್ತತಾ. 4. ಖಂಡಿತ್ ಜಾವ್ನ್ ಸಗ್ಳ್ಯಾ ಮ್ಹಜ್ಯಾ ಜಿವಿತಾಂತ್, ತುಜಿ ದಯಾಮಯಾ ಮ್ಹಜ್ಯೆ ಸವೆಂ ಆಸ್ತಲಿ, ಆನಿ ಸರ್ವೆಸ್ಪರಾಚ್ಯೆ ಘರಿಂ ಸದಾಂಕಾಲ್ ಹಾಂವ್ ಜಿಯೆತಲೊಂ.

24 February

ಮಾರ್ಚ್ 15 - ಪ್ರಾಚಿತ್ ಕಾಳಾಚೊ ಚೊವ್ತೊ ಆಯ್ತಾರ್ – ದುಸ್ರೆಂ ವಾಚಪ್

ಎಫೆಜ್ 5:8-14 ಭಾವಾಂ-ಭಯ್ಣಿಂನೊ, ಏಕ್ ಕಾಳಾರ್ ತುಮಿ ಅಂಧ್ಕಾರ್ ಜಾವ್ನಾಸ್ಲ್ಲ್ಯಾತ್, ಆತಾಂ ಸೊಮಿಯಾ ಥಂಯ್ ತುಮಿ ಉಜ್ವಾಡ್ ಜಾಂವ್ಕ್ ಪಾವ್ಲ್ಯಾತ್. ದೆಕುನ್ ಉಜ್ವಾಡಾಚ್ಯಾ ಭುರ್ಗ್ಯಾಂಪರಿಂ ಚಲಾ. ಕಿತ್ಯಾಕ್ ಸರ್ವ್ ಬರೆಪಣ್, ಪವಿತ್ರ್ಪಣ್ ಆನಿ ಸಾತ್ವಿಕ್ಪಣ್ ಉಬ್ಜತಾ ಉಜ್ವಾಡಾ ಥಾವ್ನ್. ಸೊಮಿಯಾಕ್ ಕಿತೆಂ ಮಾನ್ವತಾ ತೆಂ ಸೊಧುನ್ ಕಾಡುಂಕ್ ಶಿಕಾ. ಕಾಳೊಕಾಚ್ಯಾ ನಿರ್ಫಳ್ ಕಾಮಾಂನಿ ಹಾತ್ ಘಾಲುಂಕ್ ವಚನಾಕಾತ್; ತಿತ್ಲೆಂಚ್ ನ್ಹಯ್, ತಸಲ್ಯಾ ಕಾಮಾಂಚೆರ್ ತುಮಿ ನಿಷೇಧ್ ಉಚಾರಾ. ತಿಂ ಗುಟಾನ್ ಕರ್ತಾತ್ ತೇ ವಿಶಿಂ ಉಲೊಂವ್ಕ್ ಪರ್ಯಾನ್ ಲಜ್ ದಿಸ್ತಾ. ಪುಣ್ ಸಗ್ಳ್ಯೊ ವಸ್ತು ಉಜ್ವಾಡಾ ಹಾಡ್ತಚ್ ತಾಂಚೆಂ ನೀಜ್ ಸ್ವರೂಪ್ ಆಮ್ಕಾಂ ಕಳ್ತಾ, ಕಿತ್ಯಾಕ್ ಕಸಲಿಯೀ ವಸ್ತ್ ಉಜ್ವಾಡಾ ಹಾಡ್ತಚ್ ತಿ ಉಜ್ವಳ್ತಾ. ದೆಕುನ್ ಆಮಿ ಅಶೆಂ ಗಾಯನ್ ಕರ್ತಾಂವ್: “ನಿದೊನ್ ಪಡ್ಲಲ್ಯಾ, ಜಾಗೊ ಜಾ, ಮೆಲ್ಲ್ಯಾಂತ್ಲೊ ಊಠ್; ಕ್ರೀಸ್ತ್ ತುಜೆರ್ ಪರ್ಜಳ್ ಘಾಲ್ತಲೊ.”

24 February

ಮಾರ್ಚ್ 15 - ಪ್ರಾಚಿತ್ ಕಾಳಾಚೊ ಚೊವ್ತೊ ಆಯ್ತಾರ್ - ಸುವಾರ್ತಾ

ಜುವಾಂವ್ 9:1-41 ಜೆಜು ಆಪ್ಲಿ ವಾಟ್ ಧರ್ನ್ ವೆತಾಸ್ತಾನಾ, ಜಲ್ಮಾ ಥಾವ್ನ್ ಕುರ್ಡೊ ಜಾವ್ನಾಸ್ಲಲ್ಯಾ ಎಕ್ಲ್ಯಾಕ್ ತಾಣೆಂ ದೆಖ್ಲೊ. ತಾಚ್ಯಾ ಶಿಸಾಂನಿ ತಾಚೆಲಾಗಿಂ ವಿಚಾರ್ಲೆಂ: “ಮೆಸ್ತ್ರಿ, ಹೊ ಕುರ್ಡೊ ಜಾವ್ನ್ ಜಲ್ಮೊಂಕ್ ಕೊಣಾಚೆಂ ಪಾತಕ್ ಕಾರಣ್? ತಾಚೆಂ ಕೀ ತಾಚ್ಯಾ ಆವಯ್ಬಾಪಾಯ್ಚೆಂ?” ಜೆಜುನ್ ತಾಂಕಾ ಜಾಪ್ ದಿಲಿ: “ಹ್ಯಾ ಮನ್ಶಾನ್ ವಾ ತಾಚ್ಯಾ ಆವಯ್ ಬಾಪಾಯ್ನ್ ಪಾತಕ್ ಕೆಲೆಂ ಮ್ಹಣ್ ನ್ಹಯ್ ಪುಣ್ ದೆವಾಚಿ ಪದ್ವಿ ತಾಚೆ ಥಂಯ್ ಕಾರ್ಯಾನ್ ದಿಸೊನ್ ಯೆಂವ್ಚೆ ಪಾಸತ್ ತೊ ಆಸೊ ಜಲ್ಮಲೊ. ದೀಸ್ ಬುಡಸರ್ ಮ್ಹಾಕಾ ಧಾಡ್ಲಲ್ಯಾಚಿಂ ಕಾಮಾಂ ಆಮಿ ಕರುಂಕ್ ಜಾಯ್, ರಾತ್ ಯೆಂವ್ಚಿ ಜಾಲಿ. ತವಳ್ ಕೊಣಾಯ್ಚಾನ್ಯಿ ಕಾಮ್ ಕರುಂಕ್ ಜಾಯ್ನಾ. ಹಾಂವ್ ಸಂಸಾರಾಂತ್ ಆಸಸರ್ ಹಾಂವ್ ಸಂಸಾರಾಚೊ ಉಜ್ವಾಡ್.” ಇತ್ಲೆಂ ಮ್ಹಣುನ್ ತಾಣೆಂ ಧರ್ಣಿರ್ ಥಿಂಪಿ ಉಡಯ್ಲಿ. ಥಿಂಪಿಯೆನ್ ಮಾತಿ ಕಾಲಯ್ಲಿ, ಆನಿ ಕಾಲಯ್ಲಲಿ ಮಾತಿ ಕುಡ್ರ್ಯಾಚ್ಯಾ ದೊಳ್ಯಾಂಕ್ ಸಾರೊವ್ನ್, “ವಚ್ ಆನಿ ಸಿಲೊಆಮ್ ತಳ್ಯಾಂತ್ ಧುವ್ನ್ ಕಾಡ್” ಮ್ಹಣ್ ಸಾಂಗ್ಲೆಂ. (ಸಿಲೊಆಮ್ ಮ್ಹಳ್ಯಾರ್ ‘ಧಾಡ್ಲಲೊ’ ಮ್ಹಣ್ ಅರ್ಥ್) ಕುರ್ಡೊ ಗೆಲೊ ಆನಿ ತಾಣೆಂ ಧುಲೆಂ; ಆನಿ ದೀಷ್ಟ್ ಮೆಳೊನ್ ತೊ ಪಾಟಿಂ ಪರ್ತಲೊ. ತವಳ್ ತಾಚ್ಯಾ ಸೆಜಾರ್ಚಿಂ ಆನಿ ಹಾಚ್ಯಾ ಆದಿಂ ತೊ ಭಿಕ್ ಮಾಗ್ತಾನಾ ತಾಕಾ ಪಳೆಲ್ಲಿಂ ಮ್ಹಣಾಲಿಂ: “ಭಿಕ್ ಮಾಗುಂಕ್ ಬಸುನ್ ಆಸ್ತಾಲೊ ಹೊಚ್ ನ್ಹಯ್?” ಥೊಡಿಂ ಮ್ಹಣಾಲಿಂ: “ಹೊಚ್ ತೊ.” ಹೆರ್ ಮ್ಹಣಾಲಿಂ: “ನ್ಹಯ್, ಹೊ ನ್ಹಯ್, ಹೊ ತಾಚೇಬರಿ ದಿಸ್ತಾ ಮಾತ್ರ್.” ತವಳ್ ತ್ಯಾ ಮನ್ಶಾನ್ಚ್ ಮ್ಹಳೆಂ: “ಹಾಂವ್ಚ್ ತೊ.” ತಾಂಣಿಂ ತಾಕಾ ವಿಚಾರ್ಲೆಂ: “ತರ್ ತುಜೆ ದೊಳೆ ಕಶೆ ಉಗ್ತೆ ಜಾಲೆ?” ತಾಣೆಂ ಜಾಪ್ ದಿಲಿ: “ಜೆಜು ನಾಂವಾಚ್ಯಾ ಎಕ್ಲ್ಯಾನ್ ಇಲ್ಲಿ ಮಾತಿ ಕಾಲೊವ್ನ್ ಮ್ಹಜ್ಯಾ ದೊಳ್ಯಾಂಕ್ ಲಾಯ್ಲಿ. ಉಪ್ರಾಂತ್ ‘ಸಿಲೊಆಮ್ ತಳ್ಯಾಕ್ ವಚ್ ಆನಿ ಧು’ ಮ್ಹಣ್ ತಾಣೆಂ ಮ್ಹಾಕಾ ಸಾಂಗ್ಲೆಂ. ಹಾಂವೆಂ ವಚುನ್ ಧುತಚ್ ಮ್ಹಾಕಾ ದೀಷ್ಟ್ ಮೆಳ್ಳಿ.” ತಾಂಣಿಂ ವಿಚಾರ್ಲೆಂ: “ತೊ ಖಂಯ್ ಆಸಾ?” ತಾಣೆಂ ಮ್ಹಳೆಂ: “ಹಾಂವ್ ನೆಣಾಂ.” ತವಳ್ ತಾಂಣಿಂ ಆದಿಂ ಕುರ್ಡೊ ಆಸ್ಲಲ್ಯಾಕ್ ಫಾರಿಜೆವಾಂ ಹುಜಿರ್ ವ್ಹೆಲೊ. ಜೆಜುನ್ ಮಾತಿ ಕಾಲೊವ್ನ್ ತಾಚೆ ದೊಳೆ ಉಘಡ್ಲಲೆ ತೊ ದೀಸ್ ಸನ್ವಾರ್. ತಾಕಾ ದೀಷ್ಟ್ ಕಶಿ ಮೆಳ್ಳಿ ಮ್ಹಣುನ್ ಫಾರಿಜೆವಾಂನಿ ತಾಚೇಲಾಗಿಂ ಪತ್ರ್ಯಾನ್ ವಿಚಾರ್ಲೆಂ. ತಾಣೆಂ ಮ್ಹಳೆಂ: “ತಾಣೆಂ ಇಲ್ಲಿ ಮಾತಿ ಕಾಲೊವ್ನ್ ಮ್ಹಜ್ಯಾ ದೊಳ್ಯಾಂಕ್ ಲಾಯ್ಲಿ. ಹಾಂವೆಂ ಧುಲೆಂ ಆನಿ ಆತಾಂ ಮ್ಹ್ಹಾಕಾ ದಿಸ್ತಾ.” ತವಳ್ ಫಾರಿಜೆವಾಂ ಮಧ್ಲೆ ಥೊಡೆ ಮ್ಹಣಾಲೆ: “ಹೊ ದೆವಾಚೊ ಮನಿಸ್ ನ್ಹಯ್, ಕಿತ್ಯಾಕ್ ತೊ ಸಾಬ್ಬಾತ್ ಪಾಳಿನಾ.” ಪುಣ್ ಹೆರ್ ಮ್ಹಣಾಲೆ: “ಏಕ್ ಪಾತ್ಕಿ ಮನ್ಶಾನ್ ಅಸಲಿಂ ಆಚರ್ಯಾಂ ಕರ್ಚಿಂ ಜಾಲ್ಯಾರ್ಯೀ ಕಶೆಂ?” ಆಶೆಂ ತಾಂಚೇ ಮಧೆಂ ವಿವಾದ್ ಉಬ್ಜಲೊ. ದೆಕುನ್ ಫಾರಿಜೆವ್ ಪತ್ರ್ಯಾನ್ ತಾಚೇಲಾಗಿಂ ವಿಚಾರಿ: “ತಾಣೆಂ ತುಜೆ ದೊಳೆ ಉಘಡ್ಲೆ ಮ್ಹಣ್ತಾಯ್ ನ್ಹಯ್? ಆಸುಂ, ತರ್ ಹ್ಯಾ ಮನ್ಶಾ ವಿಶ್ಯಾಂತ್ ತುಂ ಕಿತೆಂ ಮ್ಹಣ್ತಾಯ್?” ತಾಣೆಂ ಮ್ಹಳೆಂ: “ತೊ ಏಜ್ ಪ್ರವಾದಿ.” ತೊ ಮನಿಸ್ ನಿಜಾಕ್ಯೀ ಆದಿಂ ಕುರ್ಡೊ ಆನಿ ಉಪ್ರಾಂತ್ ತಾಕಾ ದೀಷ್ಟ್ ಮೆಳ್ಳಿ ಮ್ಹಣ್ ಪಾತ್ಯೆಂವ್ಕ್ ಜುದೆವ್ ಕಬೂಲ್ ಜಾಲೆನಾತ್. ದೆಕುನ್ ತಾಚ್ಯಾ ಆವಯ್ ಬಾಪಾಯ್ಕ್ ಆಪೊಂವ್ಕ್ ಧಾಡ್ನ್, “ಹೊ ತುಮ್ಚೊ ಪೂತ್ಮೂ? ಜಲ್ಮಾ ಥಾವ್ನ್ ಕುರ್ಡೊ ಮ್ಹಣ್ ತುಮಿ ಮ್ಹಣ್ತಾತ್ ಹೊಚ್ವೆ? ತರ್ ಆತಾಂ ತಾಕಾ ದೊಳೆ ದಿಸ್ತಾತ್ ಕಶೆ?” ಮ್ಹಣುನ್ ತಾಂಣಿಂ ಸವಲಾಂ ಕೆಲಿಂ. ತಾಚ್ಯಾ ಆವಯ್ಬಾಪಾಯ್ನ್ ಜಾಪ್ ದಿಲಿ: "ಹೊ ಆಮ್ಚೊ ಪೂತ್, ಆನಿ ತೊ ಜಲ್ಮಾ ಥಾವ್ನ್ ಕುರ್ಡೊ ಹೆಂ ಆಮಿಂ ಜಾಣಾಂವ್. ಪುಣ್ ತಾಕಾ ಆತಾಂ ದಿಸ್ತಾ ಕಶೆಂ ಆನಿ ಕೊಣೆಂ ತಾಚೆ ದೊಳೆ ಉಗ್ತೆ ಕೆಲೆ ಹೆಂ ಆಮಿ ನೆಣಾಂವ್. ತಾಚೇಲಾಗಿಂಚ್ ವಿಚಾರಾ; ತೊ ಪ್ರಾಯೆಚೊ. ಆಪ್ಣಾ ವಿಶ್ಯಾಂತ್ ತೊಚ್ ಸಾಂಗ್ತಲೊ.” ಜುದೆವಾಂಚ್ಯಾ ಭಿಯಾನ್ ತಾಚ್ಯಾ ಆವಯ್ ಬಾಪಾಯ್ನ್ ಆಶೆಂ ಮ್ಹಳೆಂ; ಕಿತ್ಯಾಕ್ ಕೊಣೆಯೀ ಜೆಜುಕ್ ಕ್ರೀಸ್ತ್ ಮ್ಹಣುನ್ ಪಾಚಾರಿತ್ ಜಾಲ್ಯಾರ್, ತಾಕಾ ಸಿನಾಗೊಗಾ ಭಾಯ್ರ್ ಘಾಲಿಜಾಯ್ ಮ್ಹಣ್ ಜುದೆವಾಂನಿ ಹಾಚೇ ಆದಿಂಚ್ ಠರಾಯ್ಲ್ಲೆಂ. ದೆಕುನ್‍ಂಚ್ ತಾಚ್ಯಾ ಆವಯ್ಬಾಪಾಯ್ನ್ “ತೊ ಪ್ರಾಯೆಚೊ; ತಾಚೇಲಾಗಿಂಚ್ ವಿಚಾರಾ” ಮ್ಹಣ್ ಮ್ಹಳ್ಳೆಂ. ಆಶೆಂ ಆದಿಂ ಕುರ್ಡೊ ಆಸ್ಲ್ಲ್ಯಾ ತ್ಯಾ ಮನ್ಶಾಕ್ ಜುದೆವಾಂನಿ ದುಸ್ರೇ ಪಾವ್ಟಿ ಆಪಯ್ಲೊ ಆನಿ ತಾಕಾ ಸಾಂಗ್ಲೆಂ: “ದೆವಾಚೇ ನಾಂವಿಂ ಸಪುತ್ ಘಾಲ್ನ್ ಸತ್ ಸಾಂಗ್! ತೊ ಮನಿಸ್ ಪಾತ್ಕಿ ಮ್ಹಣ್ ಆಮಿ ಜಾಣಾಂವ್.” ತಾಣೆಂ ಜಾಪ್ ದಿಲಿ: “ತೊ ಪಾತ್ಕಿ ವಾ ನ್ಹಯ್ ತೆಂ ಹಾಂವ್ ನೆಣಾಂ; ಇತ್ಲೆಂ ಮಾತ್ರ್ ಹಾಂವ್ ಜಾಣಾಂ: ಹಾಂವ್ ಆದಿಂ ಕುರ್ಡೊ ಆಸ್ಲ್ಲೊಂ, ಪುಣ್ ಆತಾಂ ಮ್ಹಾಕಾ ದಿಸ್ತಾ.” ತಾಂಣಿಂ ತಾಕಾ ವಿಚಾರ್ಲೆಂ: “ತಾಣೆಂ ತುಕಾ ಕಿತೆಂ ಕೆಲೆಂ? ತುಜೆ ದೊಳೆ ತಾಣೆ ಕಶೆಂ ಉಗ್ತೆ ಕೆಲೆ?” ತಾಣೆಂ ಜಾಪ್ ದಿಲಿ: “ಏಕ್ ಪಾವ್ಟಿಂ ಹಾಂವೆಂ ತುಮ್ಕಾಂ ಸಾಂಗುನ್ ಜಾಲೆಂ; ಪುಣ್ ತುಮಿ ತಾಕಾ ಕಾನ್ ದಿಲೆನಾತ್. ಪತ್ರ್ಯಾನ್ ತುಮ್ಕಾಂ ಕಿತ್ಯಾಕ್ ತೆಂ ಆಯ್ಕಜಾಯ್ ಜಾಲಾಂ? ತುಮಿಯೀ ತಾಚೆ ಶಿಸ್ ಜಾಂವ್ಕ್ ಖುಶಿ ವ್ಹರ್ತಾತ್ ಕಿತೆಂ?” ತಿತ್ಲ್ಯಾರ್ ತೆ ತಾಕಾ ಕೆಂಡುನ್ ಮ್ಹಣಾಲೆ: “ತುಂ ತಾಚೊ ಶಿಸ್! ಆಮಿ ಮೊಯ್ಜೆಚೆ ಶಿಸ್! ಮೊಯ್ಜೆಲಾಗಿಂ ದೇವ್ ಉಲಯ್ಲ್ಲೊ ಮ್ಹಣ್ ಆಮಿ ಜಾಣಾಂವ್; ಪುಣ್ ಹೊ ಮನಿಸ್ ಖಂಯ್ ಥಾವ್ನ್ ಆಯ್ಲಾ ತೆಂ ಆಮಿ ನೆಣಾಂವ್.” ತ್ಯಾ ಮನ್ಶಾನ್ ಜಾಪ್ ದಿಲಿ: “ವಿಚಿತ್ರ್ ಸಂಗತ್ ಹಿ! ಮ್ಹಜೆ ದೊಳೆ ಉಘಡ್ಲಲೊ ಮನಿಸ್ ಹೊ. ತರ್ಯೀ ತೊ ಖಂಯ್ಚೊ ಮ್ಹಣ್ ತುಮಿ ನೆಣಾತ್. ದೇವ್ ಪಾತ್ಕ್ಯಾಂಕ್ ಆಯ್ಕನಾ ಮ್ಹಣ್ ಆಮಿ ಜಾಣಾಂವ್; ಪುಣ್ ಆಪ್ಣಾಚಿ ಭಕ್ತ್ ಆಧಾರ್ನ್, ಆಪ್ಣಾಚಿ ಖುಶಿ ಕರ್ತಲ್ಯಾಕ್ ತೊ ಖಂಡಿತ್ ಆಯ್ಕಾತಾ. ಕುರ್ಡೊ ಜಾವ್ನ್ ಜಲ್ಮಲ್ಯಾಂಚೆ ದೊಳೆ ಕೊಣೆಂಯೀ ಉಗ್ತೆ ಕೆಲೆ ಮ್ಹಣ್ ಆಮಿ ಎದೊಳ್ ಪರ್ಯಾನ್ ಆಯ್ಕಾಲ್ಲೆಂ ನಾ. ಹೊ ದೆವಾಚೊ ಮನಿಸ್ ನ್ಹಂಯ್ ಜಾಲ್ಲೊ ಜಾಲ್ಯಾರ್. ತೊ ಕಿತೆಂಚ್ ಕರುಂಕ್ ಸಕ್ತೊ ನಾ.” ತಾಂಣಿಂ ತಾಕಾ ಮ್ಹಳೆಂ: “ಪಾತ್ಕಾಂತ್ಚ್ ಜಲ್ಮುನ್ ಲ್ಹಾನ್ವ್ಹಡ್ ಜಾಲ್ಲೊ ತುಂ, ಆಮ್ಕಾಂ ಶಿಕೊಂವ್ಕ್ ಭಾಯ್ರ್ ಸರ್ಲಾಯ್ ಕಿತೆಂ?” ಆನಿ ತಾಂಣಿಂ ತಾಕಾ ಭಾಯ್ರ್ ಘಾಲೊ. ತಾಕಾ ಭಾಯ್ರ್ ಘಾಲ್ಲಿ ಖಬರ್ ಜೆಜುಚ್ಯಾ ಕಾನಾಂತ್ ಪಡ್ಲಿ. ತೊ ತಾಕಾ ಮೆಳ್ಳೊ ತೆದ್ನಾ ಜೆಜುನ್ ತಾಕಾ ವಿಚಾರ್ಲೆಂ: “ದೆವಾಚ್ಯಾ ಪುತಾಕ್ ತುಂ ಸತ್ಮಾನ್ತಾಯ್?” ತಾಣೆಂ ಜಾಪ್ ದಿಲಿ: “ಸಾಯ್ಬಾ ತೊ ಕೊಣ್ ಮ್ಹಣ್ ಮ್ಹಾಕಾ ಸಾಂಗ್, ಹಾಂವ್ ಸತ್ಮಾನ್ತಾಂ.” ಜೆಜುನ್ ತಾಕಾ ಮ್ಹಳೆಂ: “ತುಂವೆಂ ತಾಕಾ ಪಳೆಲಾಯ್; ತುಜೆಲಾಗಿಂ ಉಲಯ್ತಾ ತೊಚ್ ತೊ.” ತಾಣೆಂ ಮ್ಹಳೆಂ: “ಹಾಂವ್ ಸತ್ಮಾನ್ತಾಂ, ಸೊಮಿಯಾ” ಆನಿ ಸರ್ಪಡುನ್ ಜೆಜುಕ್ ತಾಣೆಂ ನಮಸ್ಕಾರ್ ಕೆಲೊ. ತಿತ್ಲ್ಯಾರ್ ಜೆಜುನ್ ಮ್ಹಳೆಂ: “ನಿತಿಚೆಂ ಫೈಸಲ್ ದೀಂವ್ಕ್ ಮ್ಹಣ್ ಹಾಂವ್ ಹ್ಯಾ ಸಂಸಾರಾಂತ್ ಆಯ್ಲಾಂ; ಕುಡ್ರ್ಯಾಂಕ್ ದೀಷ್ಟ್ ಮೆಳ್ಚಾಕ್ ಆನಿ ದೀಷ್ಟ್ ಆಸ್ಲಲ್ಯಾಂನಿ ಕುರ್ಡೆ ಜಾವ್ಚ್ಯಾಕ್ ಹಾಂವ್ ಆಯ್ಲಾಂ.” ತಾಂಚೇ ಸಾಂಗಾತಾ ಆಸ್ಲಲ್ಯಾ ಥೊಡ್ಯಾ ಫಾರಿಜೆವಾಂನಿ ಹೆಂ ಆಯ್ಕುನ್ ತಾಚೇಲಾಗಿಂ ವಿಚಾರ್ಲೆಂ: “ತರ್ ಆಮಿಯೀ ಕುರ್ಡೆಗಾಯ್?” ಜೆಜು ತಾಂಕಾಂ ಮ್ಹಣಾಲೊ: “ತುಮಿ ಕುರ್ಡೆ ಜಾಲ್ಲೆ ಜಾಲ್ಯಾರ್ ತುಮಿ ಗುನ್ಯಾಂವ್ಕಾರ್ ಜಾತೆನಾತ್. ಪುಣ್ ‘ಆಮ್ಕಾಂ ಸಾರ್ಕೆಂ ದಿಸ್ತಾ’ ಮ್ಹಣ್ ತುಮಿ ಮ್ಹಣ್ತಾತ್ ಜಾಲ್ಲ್ಯಾನ್, ತುಮಿ ಪಾತ್ಕಾಂತ್ಚ್ ಆಸಾತ್.”

24 February

ಮಾರ್ಚ್ 8 - ಪ್ರಾಚಿತ್ ಕಾಳಾಚೊ ತಿಸ್ರೊ ಆಯ್ತಾರ್ - ಪಯ್ಲೆಂ ವಾಚಪ್

ನಿರ್ಗ.17:3-7 ಪೂಣ್ ತ್ಯಾ ವೆಳಿಂ ಇಸ್ರಾಯೆಲ್ ಪರ್ಜಾ ಉದಕ್ ನಾಸ್ತಾನಾ ತಾನೆನ್ ವಳ್ವಳ್ಳೊ, ಆನಿ ಮೊಯ್ಜೆ ವಿರೋಧ್ ಶಿಣ್ ಉಲೊವ್ನ್ ಸಾಂಗಿಲಾಗ್ಲೊ: “ಆಮ್ಕಾಂ ತುವೆಂ ಎಜಿಪ್ತಾಂತ್ಲಿಂ ಕಿತ್ಯಾಕ್ ಭಾಯ್ರ್ ಹಾಡ್ಲಿಂಯ್? ಆಮಿ ಆಮ್ಚ್ಯಾ ಭುರ್ಗ್ಯಾಂಬಾಳಾಂ ಆನಿ ಜಾನ್ವಾರಾಂ ಸಾಂಗಾತಾ ಹಾಂಗಾ ತಾನೆನ್ ಮರ್ಚೆ ಖಾತಿರ್?” ಮೊಯ್ಜೆನ್ ಸರ್ವೆಸ್ಪರಾಕ್ ಬೋಬ್ ಮಾರ್ಲಿ ಆನಿ ಮ್ಹಳೆಂ: “ಹ್ಯಾ ಲೊಕಾಕ್ ಹಾಂವೆಂ ಕಿತೆಂ ಕರ್ಚೆಂ? ಆನಿ ಥೊಡ್ಯಾ ವೆಳಾನ್ ತಿಂ ಮ್ಹಾಕಾ ಫಾತ್ರಾಂವ್ಚ್ಯಾರ್ ಆಸಾತ್!” ತೆದ್ನಾ ಸರ್ವೆಸ್ಪರಾನ್ ಮೊಯ್ಜೆಕ್ ಮ್ಹಳೆಂ: “ಇಸ್ರಾಯೆಲಿತಾಂಚ್ಯಾ ಥೊಡ್ಯಾ ಮಾಲ್ಗಡ್ಯಾಂಕ್ ಘೆವ್ನ್ ಲೊಕಾ ಮುಕ್ಲ್ಯಾನ್ ಚಲ್; ನೀಲ್ ನ್ಹಂಯ್ಕ್ ಮಾರ್ಲ್ಲಿ ತಿ ಬೆತ್ಕಾಟಿ ಹಾತಾಂತ್ ಧರ್ ಆನಿ ವಚ್. ಹಾಂವ್ ಹೊರೆಬಾಚ್ಯಾ ಖಡ್ಪಾಚೆರ್ ತುಮ್ಚೆ ಮುಕಾರ್ ಉಬೊ ರಾವ್ತಲೊಂ. ಖಡ್ಪಾಕ್ ಮಾರ್ ಆನಿ ಲೊಕಾನ್ ಪಿಯೆಂವ್ಚೆ ಖಾತಿರ್ ತಾಂತ್ಲೆಂ ಉದಕ್ ಭಾಯ್ರ್ ಸರ್ತಲೆಂ. ಇಸ್ರಾಯೆಲಿತಾಂಚ್ಯಾ ಮಾಲ್ಗಡ್ಯಾಂ ಮುಕಾರ್ ಮೊಯ್ಜೆನ್ ತಶೆಂಚ್ ಕೆಲೆಂ. ತಾಣೆಂ ತ್ಯಾ ಜಾಗ್ಯಾಕ್ ಮಾಸ್ಸ್ಹಾ ಆನಿ ಮೆರಿಬ್ಹಾ ಮ್ಹಣ್ ನಾಂವ್ ದಿಲೆಂ, ಕಿತ್ಯಾಕ್ ಇಸ್ರಾಯೆಲಿತಾಂನಿ ಥಂಯ್ ಝಗ್ಡೆಂ ಕೆಲ್ಲೆಂ ಆನಿ ಸರ್ವೆಸ್ಪರಾಚಿ ಪರಿಕ್ಷಾ ಕೆಲ್ಲಿ ಮ್ಹಣುನ್: “ಸರ್ವೆಸ್ಪರ್ ಆಮ್ಚೆ ಮಧೆಂ ಆಸಾಗಿ ನಾ?”

24 February

ಮಾರ್ಚ್ 8 - ಪ್ರಾಚಿತ್ ಕಾಳಾಚೊ ತಿಸ್ರೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 94 ಶ್ಲೋಕ್ : ಆಜ್ ಸರ್ವೆಸ್ಪರಾಚೊ ತಾಳೊ ತುಮ್ಕಾಂ ಆಯ್ಕತ್ ಜಾಲ್ಯಾರ್, ತುಮ್ಚಿಂ ಕಾಳ್ಜಾಂ ಧಾರುಣ್ ಕರಿನಾಕಾತ್. 1. ಯೆಯಾ, ಸಂತೊಸಾನ್ ಸರ್ವೆಸ್ಪರಾಕ್ ಉಲ್ಲಾಸ್ಯಾಂ, ಆಮ್ಚ್ಯಾ ತಾರಣಾಚೆಂ ಖಡಪ್ ಜಾವ್ನಾಸ್ಲಲ್ಯಾಕ್ ವಾಖಾಣ್ಯಾಂ, ಅರ್ಗಾಂ-ಸ್ತುತಿ ಕರುಂಕ್ ತಾಚ್ಯೆ ಸಮೊರ್ ಯೆವ್ಯಾಂ, ಗಿತಾಂ-ಗಾಯನಾಂನಿ ತಾಚಿ ಕೀರ್ತ್ ಗಾವ್ಯಾಂ. 2. ಯೆಯಾ, ಸರ್ಪಡುನ್ ತಾಕಾ ಆರಾಧನ್ ಕರ್ಯಾಂ, ಆಮ್ಕಾಂ ರಚ್ಲಲ್ಯಾ ದೆವಾ ಹುಜಿರ್ ದಿಂಬಿಯಾಂನಿ ಪಡ್ಯಾಂ. ತೊ ಆಮ್ಚೊ ದೇವ್, ಆಮಿ ತಾಚ್ಯಾ ಚರವಾಚ್ಯೊ ಶೆಳಿಯೊ, ತೊ ಪೋಸ್ ಕರುನ್ ಸಾಂಬಾಳ್ತಾ ತೊ ಹಿಂಡ್. 3. ಆಜ್ ತಾಚೊ ತಾಳೊ ತುಮ್ಕಾಂ ಆಯ್ಕತ್ ಜಾಲ್ಯಾರ್, ಅರಣ್ಯಾಂತ್ ಕೆಲ್ಲ್ಯೆ ಬರಿ ತುಮ್ಚಿಂ ಕಾಳ್ಜಾಂ ಧಾರುಣ್ ಕರಿನಾಕಾತ್. ಥಂಯ್ ಮೆರೀಬಾಂತ್ ಆನಿ ಮಾಸ್ಸಾಂತ್ ತುಮ್ಚ್ಯಾ ಪುರ್ವಜಾಂನಿ, ಮ್ಹಜಿಂ ಮಹತ್ಕಾರ್ಯಾಂ ದೆಖ್ಲ್ಲ್ಯಾಂನಿ, ಮ್ಹಾಕಾ ಪಾರ್ಕಿಲೊ ಆನಿ ಮ್ಹಜಿ ಪರೀಕ್ಷಾ ಕೆಲಿ.

24 February

ಮಾರ್ಚ್ 8 - ಪ್ರಾಚಿತ್ ಕಾಳಾಚೊ ತಿಸ್ರೊ ಆಯ್ತಾರ್ – ದುಸ್ರೆಂ ವಾಚಪ್

ರೊಮಾ.5:1-2,5-8 ಭಾವಾಂ-ಭಯ್ಣಿಂನೊ, ಭಾವಾರ್ಥಾ ವರ್ವಿಂ ಆಮಿ ನಿತಿವಂತ್ಪಣ್ ಜೊಡ್ಲಾಂ ಆಸ್ತಾಂ, ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾ ಉದೆಶಿಂ ಆಮಿ ಆತಾಂ ದೆವಾ ಥಂಯ್ ಶಾಂತಿನ್ ಜಿಯೆತಾಂವ್. ಆಮಿ ಆತಾಂ ಆಸ್ಲಲ್ಯಾ ಕುರ್ಪೆಚ್ಯಾ ಪಾಂವ್ಡ್ಯಾರ್ ಆಮಿ ಪಾವಾಶೆಂ ಆಮ್ಕಾಂ ವಾಟ್ ವ್ಹೆಲ್ಲಿ ಜೆಜು ಕ್ರಿಸ್ತಾನ್ಚ್; ಆನಿ ತಾಚೇಚ್ ಉದೆಶಿಂ ದೆವಾಸವೆಂ ಆಮ್ಕಾಂ ವೈಭವ್ ಲಾಭ್ತಲೊ ಮ್ಹಣ್ ಭರ್ವಸೊ ಧರ್ನ್ ಉಲ್ಲಾಸ್ ಪಾವ್ತಾಂವ್. ಅಸಲೊ ಭರ್ವಸೊ ಆಮ್ಕಾಂ ನಿರಾಶಿ ಕರಿನಾ; ಕಿತ್ಯಾಕ್ ಆಪ್ಲೆಂ ದೆಣೆಂ ಮ್ಹಣ್ ಆಮ್ಕಾಂ ದಿಲ್ಲ್ಯಾ ಪವಿತ್ರ್ ಆತ್ಮ್ಯಾ ಮುಖಾಂತ್ರ್ ದೆವಾನ್ ಆಪ್ಲೊ ಮೋಗ್ ಆಮ್ಚ್ಯಾ ಕಾಳ್ಜಾಂನಿ ಧಾರಾಳ್ ವೊತ್ಲಾ. ಕಿತ್ಯಾಕ್ ಆಮ್ಕಾಂ ಆನಿಕ್ಯೀ ಕಿತೆಂಚ್ ಕರುಂಕ್ ಸಕತ್ ನಾತ್ಲಲ್ಯಾ ಕಾಳಾರ್, ಕ್ರಿಸ್ತಾನ್ ತಾಚೊ ನೆಮ್ಲಲೊ ವೇಳ್ ಪಾವ್ತಚ್, ಖೊಟ್ಯಾಂ ಖಾತಿರ್ ಆಪ್ಲೊ ಜೀವ್ ದಿಲೊ. ಏಕ್ ವರ್ತ್ಯಾ ಮನ್ಶಾ ಪಾಸತ್ ಮೊರೊಂಕ್ ಕೊಣ್ಯೀ ಎಕ್ಲೊ ಮುಖಾರ್ ಸರ್ಲ್ಯಾರ್ಯೀ ಸರ್ಲೊ. ಪುಣ್ ನಿತಿವಂತ್ ಮನ್ಶಾ ಪಾಸತ್ ಸಸಾರಾಯೆನ್ ಮೊರೊಂಕ್ ಕೊಣ್ ತೊ ತಯಾರ್? ಪುಣ್ ಆಮಿ ಪಾತ್ಕಿ ಆಸ್ಲ್ಲ್ಯಾಂವ್ ತೆದ್ನಾ ಕ್ರೀಸ್ತ್ ಆಮ್ಚೇ ಖಾತಿರ್ ಮೆಲೊ ಆನಿ ಹಾಚೇ ವರ್ವಿಂ ದೆವಾನ್ ಆಪುಣ್ ಕಿತ್ಲೊ ಆಮ್ಚೊ ಮೋಗ್ ಕರ್ತಾ ತೆಂ ದಾಖೊವ್ನ್ ದಿಲೆಂ.

24 February

ಮಾರ್ಚ್ 8 - ಪ್ರಾಚಿತ್ ಕಾಳಾಚೊ ತಿಸ್ರೊ ಆಯ್ತಾರ್ - ಸುವಾರ್ತಾ

ಜುವಾಂವ್ 4:5-42 ಜೆಜು ಸಾಮಾರಿಯಾಂತ್ಲ್ಯಾ ಸಿಖಾರ್ ನಾಂವಾಚ್ಯಾ ಏಕ್ ಶಹರಾಂತ್ ತೊ ಪಾವ್ಲೊ. ಜಾಕೊಬಾನ್ ಆಪ್ಲ್ಯಾ ಪುತಾ ಜುಜೆಕ್ ದಿಲ್ಲ್ಯಾ ಜಾಗ್ಯಾ ಲಾಗ್ಶಿಲೊ ಗಾಂವ್ ತೊ. ಥಂಯ್ ಜಾಕೊಬಾಚಿ ಬಾಂಯ್ ಆಸ್ಲ್ಲಿ. ಜೆಜು ಪಯ್ಣಾಚೆ ಪುರಾಸಣೆನ್ ಆಯ್ಲೊ ತಸೊಚ್ ತ್ಯಾ ಬಾಂಯ್ಚ್ಯಾ ಕಾಟ್ಯಾರ್ ಬಸ್ಲೊ. ಸುಮಾರ್ ದೊನ್ಪಾರಾಂಚೊ ವೇಳ್ ತೊ. ತೆದ್ವಾಂ ಸಾಮರಿಯಾಚಿ ಏಕ್ ಸ್ತ್ರೀ ಥಂಯ್ ಉದಕ್ ವೊಡುಂಕ್ ಆಯ್ಲಿ. ಜೆಜುನ್ ತಿಚೇಲಾಗಿಂ ವಿಚಾರ್ಲೆಂ: “ಮ್ಹಾಕಾ ಪಿಯೆಂವ್ಕ್ ಇಲ್ಲೆಂ ಉದಕ್ ದೀ.” (ತಾಚೆ ಶಿಸ್ ಖಾಣ್ ಮೊಲಾಕ್ ಘೆಂವ್ಕ್ ಮ್ಹಣ್ ಶಹರಾಕ್ ಗೆಲ್ಲೆ.) ತಿಣೆಂ ಮ್ಹಳೆಂ: “ತುಂ ಜುದೆವ್, ಆನಿ ಹಾಂವ್ ಏಕ್ ಸಾಮಾರಿಯಾಗಾರ್ನ್, ತರ್ ತುವೆಂ ಮ್ಹಜೆಲಾಗಿಂ ಪಿಯೆಂವ್ಕ್ ಮಾಗ್ಚೆಂ ಮ್ಹಳ್ಯಾರ್ಯಿ ಕಶೆಂ?” (ಜುದೆವಾಂಕ್ ಆನಿ ಸಾಮಾರಿಯಾಗಾರಾಂಕ್ ಎಕಾಮೆಕಾ ಪಂಗ್ತಿ ಸಂಪರ್ಕ್ ನಾತ್ಲ್ಲೊ.) ಜೆಜುನ್ ತಿಕಾ ಜಾಪ್ ದಿವ್ನ್ ಮ್ಹಳೆಂ: “ದೆವಾಚೆಂ ದೆಣೆಂ ಮ್ಹಳ್ಯಾರ್ ಕಿತೆಂ, ಆನಿ ತುಜೇಲಾಗಿಂ ಪಿಯೆಂವ್ಕ್ ವಿಚಾರ್ತಾ ತೊ ಕೊಣ್ - ಇತ್ಲೆಂ ತುಂ ಸಮ್ಜಲ್ಲಿಯ್ ಜಾಲ್ಯಾರ್, ತುಂಚ್ ತಾಚೇಲಾಗಿಂ ಮಾಗ್ತಿ ಆಸ್ಲಿಯ್; ಆನಿ ತೊ ತುಕಾ ಝರಿಚೆಂ ಉದಕ್ ದಿತೊ ಆಸ್ಲೊ.” ಸ್ತ್ರೀಯೆನ್ ತಾಕಾ ಮ್ಹಳೆಂ: “ಸಾಯ್ಬಾ, ತುಜೇಲಾಗಿಂ ಕೊಳ್ಸೊ ನಾ; ಬಾಂಯ್ಯೀ ಬರಾಬರ್ ಗೂಂಡ್ ಆಸಾ. ತರ್ ತುಜೇಲಾಗಿಂ ಝರಿಚೆಂ ಉದಕ್ ಖಂಯ್ಚೆಂ? ಆಮ್ಕಾಂ ಹಿ ಬಾಂಯ್ ದಿಲ್ಲಿ ಆಮ್ಚ್ಯಾ ಪುರ್ವಜಾ ಜಾಕೊಬಾನ್. ತೊ, ತಾಚಿಂ ಭುರ್ಗಿಂಬಾಳಾಂ ಆನಿ ತಾಚಿಂ ಗೊರ್ವಾಂಪಸ್ರಾಂ ಹೇಚ್ ಬಾಂಯ್ಚೆಂ ಉದಕ್ ಪಿಯೆಲ್ಲಿಂ. ತಸಲ್ಯಾ ಪುರ್ವಜಾ ಪ್ರಾಸ್ ತುಂ ವರ್ತೊಗಾಯ್ ಕಿತೆಂ?” ಜೆಜುನ್ ಜಾಪ್ ದಿಲಿ: “ಹೆಂ ಉದಕ್ ಪಿಯೆಲ್ಲೊ ಹರ್ಯೆಕ್ಲೊ ಪತ್ರ್ಯಾನ್ ತಾನೆತಾ. ಪುಣ್ ಹಾಂವ್ ದಿತಾಂ ತೆಂ ಉದಕ್ ಪಿಯೆತಾ ತೊ ಪತ್ರ್ಯಾನ್ ಕೆದಿಂಚ್ ತಾನೆಂವ್ಚೊ ನಾ. ಹಾಂವ್ ತಾಕಾ ದಿತಾಂ ತೆಂ ಉದಕ್ ತಾಚೇ ಭಿತರ್ ಏಕ್ ಝರ್ ಜಾವ್ನ್, ಸಾಸ್ಣಿಕ್ ಜಿವಿತಾಕ್ ಉಮಾಳುನ್ ವ್ಹಾಳ್ತಲೆಂ.” ತಿ ಸ್ತ್ರೀ ತಾಚೇ ಲಾಗಿಂ ಮ್ಹಣಾಲಿ: “ಸಾಯ್ಬಾ, ದೀ ಮ್ಹಾಕಾ ಹೆಂ ಉದಕ್. ತವಳ್ ಮ್ಹಾಕಾ ತಾನ್ ಲಾಗ್ಚಿನಾ; ಆನಿ ಉದಕ್ ವೊಡುಂಕ್ ಹಾಂಗಾ ಯೆಂವ್ಕ್ಯೀ ಪಡ್ಚೆಂನಾ.” ಜೆಜುನ್ ತಿಕಾ ಮ್ಹಳೆಂ: “ವಚ್, ತುಜ್ಯಾ ಘೊವಾಕ್ ಆಪೊವ್ನ್ ಹಾಡ್ನ್ ಯೆ.” ತಿಣೆಂ ಜಾಪ್ ದೀವ್ನ್ ಮ್ಹಳೆಂ: “ಮ್ಹಾಕಾ ಘೊವ್ ನಾ.” ಜೆಜು ತಿಕಾ ಮ್ಹಣಾಲೊ: “ತುಕಾ ಘೊವ್ ನಾ ಮ್ಹಣುನ್ ತುಂ ಸಾಂಗ್ತಾಯ್ ತೆಂ ಸಾರ್ಕೆಂ, ಎದೊಳ್ಚ್ಯಾಕ್ ತುಕಾ ಪಾಂಚ್ ಘೊವ್ ಜಾಲೆ, ಆನಿ ಆತಾಂ ತುಕಾ ಎಕ್ಲೊ ಆಸಾ ತೊ ತುಜೊ ಘೊವ್ ನ್ಹಯ್.” ಸ್ತ್ರೀಯೆನ್ ತಾಕಾ ಮ್ಹಳೆಂ: “ಸಾಯ್ಬಾ, ತುಂ ಪ್ರವಾದಿ ಮ್ಹಣ್ ಮ್ಹಾಕಾ ಆತಾಂ ಕಳ್ಳೆಂ. ಆಮ್ಚೆ ಪುರ್ವಜ್ ಹ್ಯಾಚ್ ದೊಂಗ್ರಾರ್ ದೆವಾಕ್ ಆರಾಧನ್ ಕರ್ತಾಲೆ. ಪುಣ್ ತುಮಿ ಜುದೆವ್ ತಾಕಾ ಜೆರುಜಲೆಮಾಂತ್ ಮಾತ್ರ್ ಆರಾಧನ್ ಕರ್ಚೆಂ ಮ್ಹಣ್ ಸಾಂಗ್ತಾತ್.” ಜೆಜುನ್ ತಿಕಾ ಮ್ಹಳೆಂ: “ಮ್ಹಜೆಂ ಉತಾರ್ ಸತ್ಮಾನ್ ಬಾಯೆ. ಹ್ಯಾ ದೊಂಗ್ರಾಕ್ ಜಾಂವ್, ಜೆರುಜಲೆಮಾಕ್ ಜಾಂವ್ ವಚನಾಸ್ತಾನಾ ಆರಾಧನ್ ಕರ್ಚೊ ವೇಳ್ ಯೆಂವ್ಚೊ ಜಾಲೊ. ತುಮಿ ನೆಣಾಸ್ಲಲ್ಯಾಕ್ ಆರಾಧನ್ ಕರ್ತಾತ್, ಆಮಿ ಜಾಲ್ಯಾರ್ ಜಾಣಾಸ್ಲಲ್ಯಾಕ್ ಆರಾಧನ್ ಕರ್ತಾಂವ್ - ಕಾರಣ್ ಸೊಡ್ವಣ್ ಯೆವ್ಚಿ ಜುದೆವ್ ಲೊಕಾಥಾವ್ನ್. ಪುಣ್ ಖರ್ಯಾ ಆರಾಧಕಾಂನಿ ಆತ್ಮ್ಯಾನ್ ಆನಿ ಸತಾನ್ ಬಾಪಾಕ್ ಆರಾಧನ್ ಕರ್ಚೊ ವೇಳ್ ಯೆತಲೊ - ತೊ ಯೇವ್ನ್ ಜಾಲಾ ಮ್ಹಳ್ಯಾರ್ಯಿ ಸಮ. ಅಸಲೆ ಆರಾಧಕ್ ಬಾಪಾಕ್ ಜಾಯ್. ದೇವ್ ಆತ್ಮೊ ದೆಕುನ್ ತಾಕಾ ಆರಾಧನ್ ಕರ್ತಲ್ಯಾಂನಿ ಆತ್ಮ್ಯಾನ್ ಆನಿ ಸತಾನ್ ತಾಕಾ ಆರಾಧನ್ ಕರಿಜಯ್.” ಸ್ತ್ರಿಯೆನ್ ತಾಕಾ ಮ್ಹಳೆಂ: “ಕ್ರೀಸ್ತ್ ಮ್ಹಣ್ತಾತ್ ತೊ ಮಾಖ್ಲಲೊ ಯೆತಾ ಮ್ಹಣ್ ಹಾಂವ್ ಜಾಣಾಂ. ತೊ ಯೆತಚ್ ಸಕ್ಕಡ್ ಸಂಗ್ತಿಂ ಆಮ್ಕಾಂ ಸಾಂಗ್ತಲೊ.” ಜೆಜುನ್ ಮ್ಹಳೆಂ: “ಹಾಂವ್ಚ್ ತೊ, ತುಜೇಲಾಗಿಂ ಉಲಯ್ತಾಂ ತೊ.” ತಿತ್ಲ್ಯಾರ್ ತಾಚೆ ಶಿಸ್ ಪಾಟಿಂ ಆಯ್ಲೆ. ಎಕ್ಲೇ ಸ್ತ್ರಿಯೆಲಾಗಿಂ ತೊ ಉಲಯ್ತಾ ತೆಂ ಪಳೆವ್ನ್ ತೆ ಅಜಾಪ್ ಜಾಲೆ. ಪುಣ್ ತಾಂಣಿಂ ಕೊಣೆಂಯಿ “ತುಕಾ ಕಿತೆಂ ಜಾಯ್?” ಮ್ಹಣುನ್ ಜಾಂವ್, ವಾ “ತುಂ ತಿಚೇಲಾಗಿಂ ಕಿತ್ಯಾಕ್ ಉಲಯ್ತಾಯ್?” ಮ್ಹಣುನ್ ಜಾಂವ್ ತಾಚೆಲಾಗಿಂ ವಿಚಾರ್ಲೆಂನಾ. ತವಳ್ ತಿ ಸ್ತ್ರೀ ಆಪ್ಲೊ ಕೊಳ್ಸೊ ಥಂಯ್ಚ್ ಸೊಡ್ನ್ ಶಹರಾಕ್ ಗೆಲಿ ಆನಿ ಥಂಯ್ಚ್ಯಾ ಲೊಕಾಕ್ ಸಾಂಗಿಲಾಗ್ಲಿ: “ಯೆಯಾ, ಹಾಂವೆಂ ಕೆಲಾಂ ತೆಂ ಸಗ್ಳೆಂ ಮ್ಹಾಕಾ ಸಾಂಗ್ಲಲ್ಯಾ ಏಕ್ ಮನ್ಶಾಕ್ ಪಳೆಯಾ; ಹೊಚ್ ಕ್ರಿಸ್ ಜಾಯ್ತ್ಗಾಯ್?” ಇತ್ಲೆಂ ಆಯ್ಕುನ್ ಶಹರಾಚೊ ಲೋಕ್ ಜೆಜು ಸರ್ಶಿಂ ಆಯ್ಲೊ. ಹೆಣೆಂ, “ಮೆಸ್ತ್ರಿ, ಇಲ್ಲೆಂ ಪುಣ್ಯೀ ಜೇವ್” ಮ್ಹಣುನ್ ಶಿಸ್ ಜೆಜುಕ್ ಒತ್ತಾಯ್ ಕರ್ನ್ ಆಸ್ಲೆ. ಪುಣ್ ಜೆಜು ತಾಂಕಾಂ ಮ್ಹಣಾಲೊ: “ತುಮ್ಕಾಂ ಕಳಿತ್ ನಾ ತೆಂ ಖಾಣ್ ಆನಿ ಜೆವಣ್ ಮ್ಹಜೇಲಾಗಿಂ ಆಸಾ.” “ಕೊಣೆಂಯೀ ತಾಕಾ ಜೆಂವ್ಕ್ ಹಾಡ್ನ್ ದಿಲೆಂಗಾಯ್?” ಮ್ಹಣುನ್ ಶಿಸ್ ಎಕಾಮೆಕಾ ವಿಚಾರುಂಕ್ಲಾಗ್ಲೆ. ಪುಣ್ ಜೆಜುನ್ ತಾಂಕಾಂ ಸಾಂಗ್ಲೆಂ: “ಮ್ಹಾಕಾ ಧಾಡ್ಲಲ್ಯಾಚಿ ಖುಶಿ ಜ್ಯಾರಿ ಕರುನ್, ಮ್ಹಾಕಾ ಕರುಂಕ್ ದಿಲ್ಲೆಂ ಕಾಮ್ ಸಂಪೊಂವ್ಚೆಂ ತೆಂಚ್ ಮ್ಹಜೆಂ ಖಾಣ್ ಆನಿ ಜೆವಣ್. ‘ಆನಿ ಚಾರ್ ಮಹಿನೆ, ಉಪ್ರಾಂತ್ ಲುಂವೊಣ್’ ಮ್ಹಣ್ ತುಮಿಚ್ ಮ್ಹಣ್ತಾತ್ ನ್ಹಯ್? ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮ್ಚೆ ದೊಳೆ ಉಬಾರ್ನ್ ಪಳೆಯಾ. ಪಿಕೊನ್ ಧವಿಂ ಜಾವ್ನ್ ಲುಂವ್ಣೆಕ್ ತಯಾರ್ ಜಾಲ್ಲಿಂ ಶೆತಾಂ ಪಳೆಯಾ. ಲುಂವ್ತಾ ತೊ ಆತಾಂಚ್ ಮಜುರಿ ಘೆತಾ ಆನಿ ಸಾಸ್ಣಿಕ್ ಜಿಣಿಯೆಕ್ ಪೀಕ್ ರಾಸ್ ಕರ್ತಾ. ಅಶೆಂ ಒಂಪ್ಪಿ ಆನಿ ಲುಂವ್ಪಿ ಮ್ಹಣ್ ದೊಗ್ಯೀ ಸಂತೊಸ್ ಪಾವ್ತಾತ್. ‘ಒಂಪುಂಕ್ ಎಕ್ಲೊ, ಲುಂವುಂಕ್ ಆನ್ಯೆಕ್ಲೊ’ ಹಿ ಸಾಂಗ್ಣಿ ಖರಿ. ತುಮಿ ಘೊಳೊಂಕ್ ನಾ ತ್ಯಾ ಶೆತಾಂತ್ ಲುಂವುಂಕ್ ತುಮ್ಕಾಂ ಹಾಂವೆಂ ಧಾಡ್ಲ್ಯಾತ್. ಘೊಳ್ಲ್ಲೆ ದುಸ್ರೆಚ್, ಆನಿ ತಾಂಚೇ ವಾಂವ್ಟಿಚೊ ಫಳ್ ತುಮಿ ಭೊಗ್ತಾತ್.” “ಹಾಂವೆಂ ಕೆಲಾಂ ತೆಂ ಸಕ್ಕಡ್ ತಾಣೆಂ ಮ್ಹಾಕಾ ಸಾಂಗ್ಲೆಂ” ಮ್ಹಣ್ ತೆ ಸ್ತ್ರೀಯೆನ್ ಮ್ಹಳ್ಳೆಂ ಆಯ್ಕುನ್, ತ್ಯಾ ಶಹರಾಂತ್ಲ್ಯಾ ಸಬಾರ್ ಸಾಮಾರಿಯಾಗಾರಾಂನಿ ಜೆಜುಕ್ ಸತ್ಮಾನ್ಲೊ. ದೆಕುನ್ ತೆ ಸಾಮಾರಿಯಾಗಾರ್ ತಾಚೇ ಸರ್ಶಿಂ ಆಯ್ಲ್ಲ್ಯಾ ವೆಳಾರ್, ಆಪ್ಣಾಶಿಂ ರಾವ್ ಮ್ಹಣುನ್ ತಾಂಣಿಂ ಜೆಜುಲಾಗಿಂ ಪರಾತ್ಲೆಂ; ದೆಕುನ್ ಥಂಯ್ ತೊ ದೋನ್ ದೀಸ್ ರಾವ್ಲೊ. ಜೆಜುಚಿ ಶಿಕೊವ್ಣ್ ತಾಚ್ಯಾಚ್ ತೊಂಡಾ ಥಾವ್ನ್ ಆಯ್ಕಲ್ಲೇ ವರ್ವಿಂ ಆನಿಕ್ಯೀ ಜಾಯ್ತ್ಯಾ ಜಣಾಂನಿ ತಾಕಾ ಸತ್ಮಾನ್ಲೊ. ತವಳ್ ತೇ ಸ್ತ್ರೀಯೆಕ್ ತೆ ಮ್ಹಣಾಲೆ: “ತುಂ ಸಾಂಗ್ತಾಯ್ ದೆಕುನ್ ಆಮಿ ಆತಾಂ ಸತ್ಮಾನ್ತಾಂವ್ ನ್ಹಯ್, ತಾಣೆಂ ಉಲಯ್ಲ್ಲೆಂ ಆಮಿಚ್ ಅಮ್ಚ್ಯಾ ಕಾನಾಂನಿ ಆಯ್ಕಲೆಂ ದೆಕುನ್. ಸಂಸಾರಾಚೊ ಸೊಡ್ವಣ್ದಾರ್ ತೊಚ್ ಮ್ಹಣ್ ಆತಾಂ ಆಮ್ಕಾಂ ಸ್ಪಷ್ಟ್ ಜಾಲೆಂ.”

24 February

ಮಾರ್ಚ್ 8 - ಪ್ರಾಚಿತ್ ಕಾಳಾಚೊ ತಿಸ್ರೊ ಆಯ್ತಾರ್ - ಸುವಾರ್ತಾ

ಜುವಾಂವ್ 4:5-42 ಜೆಜು ಸಾಮಾರಿಯಾಂತ್ಲ್ಯಾ ಸಿಖಾರ್ ನಾಂವಾಚ್ಯಾ ಏಕ್ ಶಹರಾಂತ್ ತೊ ಪಾವ್ಲೊ. ಜಾಕೊಬಾನ್ ಆಪ್ಲ್ಯಾ ಪುತಾ ಜುಜೆಕ್ ದಿಲ್ಲ್ಯಾ ಜಾಗ್ಯಾ ಲಾಗ್ಶಿಲೊ ಗಾಂವ್ ತೊ. ಥಂಯ್ ಜಾಕೊಬಾಚಿ ಬಾಂಯ್ ಆಸ್ಲ್ಲಿ. ಜೆಜು ಪಯ್ಣಾಚೆ ಪುರಾಸಣೆನ್ ಆಯ್ಲೊ ತಸೊಚ್ ತ್ಯಾ ಬಾಂಯ್ಚ್ಯಾ ಕಾಟ್ಯಾರ್ ಬಸ್ಲೊ. ಸುಮಾರ್ ದೊನ್ಪಾರಾಂಚೊ ವೇಳ್ ತೊ. ತೆದ್ವಾಂ ಸಾಮರಿಯಾಚಿ ಏಕ್ ಸ್ತ್ರೀ ಥಂಯ್ ಉದಕ್ ವೊಡುಂಕ್ ಆಯ್ಲಿ. ಜೆಜುನ್ ತಿಚೇಲಾಗಿಂ ವಿಚಾರ್ಲೆಂ: “ಮ್ಹಾಕಾ ಪಿಯೆಂವ್ಕ್ ಇಲ್ಲೆಂ ಉದಕ್ ದೀ.” (ತಾಚೆ ಶಿಸ್ ಖಾಣ್ ಮೊಲಾಕ್ ಘೆಂವ್ಕ್ ಮ್ಹಣ್ ಶಹರಾಕ್ ಗೆಲ್ಲೆ.) ತಿಣೆಂ ಮ್ಹಳೆಂ: “ತುಂ ಜುದೆವ್, ಆನಿ ಹಾಂವ್ ಏಕ್ ಸಾಮಾರಿಯಾಗಾರ್ನ್, ತರ್ ತುವೆಂ ಮ್ಹಜೆಲಾಗಿಂ ಪಿಯೆಂವ್ಕ್ ಮಾಗ್ಚೆಂ ಮ್ಹಳ್ಯಾರ್ಯಿ ಕಶೆಂ?” (ಜುದೆವಾಂಕ್ ಆನಿ ಸಾಮಾರಿಯಾಗಾರಾಂಕ್ ಎಕಾಮೆಕಾ ಪಂಗ್ತಿ ಸಂಪರ್ಕ್ ನಾತ್ಲ್ಲೊ.) ಜೆಜುನ್ ತಿಕಾ ಜಾಪ್ ದಿವ್ನ್ ಮ್ಹಳೆಂ: “ದೆವಾಚೆಂ ದೆಣೆಂ ಮ್ಹಳ್ಯಾರ್ ಕಿತೆಂ, ಆನಿ ತುಜೇಲಾಗಿಂ ಪಿಯೆಂವ್ಕ್ ವಿಚಾರ್ತಾ ತೊ ಕೊಣ್ - ಇತ್ಲೆಂ ತುಂ ಸಮ್ಜಲ್ಲಿಯ್ ಜಾಲ್ಯಾರ್, ತುಂಚ್ ತಾಚೇಲಾಗಿಂ ಮಾಗ್ತಿ ಆಸ್ಲಿಯ್; ಆನಿ ತೊ ತುಕಾ ಝರಿಚೆಂ ಉದಕ್ ದಿತೊ ಆಸ್ಲೊ.” ಸ್ತ್ರೀಯೆನ್ ತಾಕಾ ಮ್ಹಳೆಂ: “ಸಾಯ್ಬಾ, ತುಜೇಲಾಗಿಂ ಕೊಳ್ಸೊ ನಾ; ಬಾಂಯ್ಯೀ ಬರಾಬರ್ ಗೂಂಡ್ ಆಸಾ. ತರ್ ತುಜೇಲಾಗಿಂ ಝರಿಚೆಂ ಉದಕ್ ಖಂಯ್ಚೆಂ? ಆಮ್ಕಾಂ ಹಿ ಬಾಂಯ್ ದಿಲ್ಲಿ ಆಮ್ಚ್ಯಾ ಪುರ್ವಜಾ ಜಾಕೊಬಾನ್. ತೊ, ತಾಚಿಂ ಭುರ್ಗಿಂಬಾಳಾಂ ಆನಿ ತಾಚಿಂ ಗೊರ್ವಾಂಪಸ್ರಾಂ ಹೇಚ್ ಬಾಂಯ್ಚೆಂ ಉದಕ್ ಪಿಯೆಲ್ಲಿಂ. ತಸಲ್ಯಾ ಪುರ್ವಜಾ ಪ್ರಾಸ್ ತುಂ ವರ್ತೊಗಾಯ್ ಕಿತೆಂ?” ಜೆಜುನ್ ಜಾಪ್ ದಿಲಿ: “ಹೆಂ ಉದಕ್ ಪಿಯೆಲ್ಲೊ ಹರ್ಯೆಕ್ಲೊ ಪತ್ರ್ಯಾನ್ ತಾನೆತಾ. ಪುಣ್ ಹಾಂವ್ ದಿತಾಂ ತೆಂ ಉದಕ್ ಪಿಯೆತಾ ತೊ ಪತ್ರ್ಯಾನ್ ಕೆದಿಂಚ್ ತಾನೆಂವ್ಚೊ ನಾ. ಹಾಂವ್ ತಾಕಾ ದಿತಾಂ ತೆಂ ಉದಕ್ ತಾಚೇ ಭಿತರ್ ಏಕ್ ಝರ್ ಜಾವ್ನ್, ಸಾಸ್ಣಿಕ್ ಜಿವಿತಾಕ್ ಉಮಾಳುನ್ ವ್ಹಾಳ್ತಲೆಂ.” ತಿ ಸ್ತ್ರೀ ತಾಚೇ ಲಾಗಿಂ ಮ್ಹಣಾಲಿ: “ಸಾಯ್ಬಾ, ದೀ ಮ್ಹಾಕಾ ಹೆಂ ಉದಕ್. ತವಳ್ ಮ್ಹಾಕಾ ತಾನ್ ಲಾಗ್ಚಿನಾ; ಆನಿ ಉದಕ್ ವೊಡುಂಕ್ ಹಾಂಗಾ ಯೆಂವ್ಕ್ಯೀ ಪಡ್ಚೆಂನಾ.” ಜೆಜುನ್ ತಿಕಾ ಮ್ಹಳೆಂ: “ವಚ್, ತುಜ್ಯಾ ಘೊವಾಕ್ ಆಪೊವ್ನ್ ಹಾಡ್ನ್ ಯೆ.” ತಿಣೆಂ ಜಾಪ್ ದೀವ್ನ್ ಮ್ಹಳೆಂ: “ಮ್ಹಾಕಾ ಘೊವ್ ನಾ.” ಜೆಜು ತಿಕಾ ಮ್ಹಣಾಲೊ: “ತುಕಾ ಘೊವ್ ನಾ ಮ್ಹಣುನ್ ತುಂ ಸಾಂಗ್ತಾಯ್ ತೆಂ ಸಾರ್ಕೆಂ, ಎದೊಳ್ಚ್ಯಾಕ್ ತುಕಾ ಪಾಂಚ್ ಘೊವ್ ಜಾಲೆ, ಆನಿ ಆತಾಂ ತುಕಾ ಎಕ್ಲೊ ಆಸಾ ತೊ ತುಜೊ ಘೊವ್ ನ್ಹಯ್.” ಸ್ತ್ರೀಯೆನ್ ತಾಕಾ ಮ್ಹಳೆಂ: “ಸಾಯ್ಬಾ, ತುಂ ಪ್ರವಾದಿ ಮ್ಹಣ್ ಮ್ಹಾಕಾ ಆತಾಂ ಕಳ್ಳೆಂ. ಆಮ್ಚೆ ಪುರ್ವಜ್ ಹ್ಯಾಚ್ ದೊಂಗ್ರಾರ್ ದೆವಾಕ್ ಆರಾಧನ್ ಕರ್ತಾಲೆ. ಪುಣ್ ತುಮಿ ಜುದೆವ್ ತಾಕಾ ಜೆರುಜಲೆಮಾಂತ್ ಮಾತ್ರ್ ಆರಾಧನ್ ಕರ್ಚೆಂ ಮ್ಹಣ್ ಸಾಂಗ್ತಾತ್.” ಜೆಜುನ್ ತಿಕಾ ಮ್ಹಳೆಂ: “ಮ್ಹಜೆಂ ಉತಾರ್ ಸತ್ಮಾನ್ ಬಾಯೆ. ಹ್ಯಾ ದೊಂಗ್ರಾಕ್ ಜಾಂವ್, ಜೆರುಜಲೆಮಾಕ್ ಜಾಂವ್ ವಚನಾಸ್ತಾನಾ ಆರಾಧನ್ ಕರ್ಚೊ ವೇಳ್ ಯೆಂವ್ಚೊ ಜಾಲೊ. ತುಮಿ ನೆಣಾಸ್ಲಲ್ಯಾಕ್ ಆರಾಧನ್ ಕರ್ತಾತ್, ಆಮಿ ಜಾಲ್ಯಾರ್ ಜಾಣಾಸ್ಲಲ್ಯಾಕ್ ಆರಾಧನ್ ಕರ್ತಾಂವ್ - ಕಾರಣ್ ಸೊಡ್ವಣ್ ಯೆವ್ಚಿ ಜುದೆವ್ ಲೊಕಾಥಾವ್ನ್. ಪುಣ್ ಖರ್ಯಾ ಆರಾಧಕಾಂನಿ ಆತ್ಮ್ಯಾನ್ ಆನಿ ಸತಾನ್ ಬಾಪಾಕ್ ಆರಾಧನ್ ಕರ್ಚೊ ವೇಳ್ ಯೆತಲೊ - ತೊ ಯೇವ್ನ್ ಜಾಲಾ ಮ್ಹಳ್ಯಾರ್ಯಿ ಸಮ. ಅಸಲೆ ಆರಾಧಕ್ ಬಾಪಾಕ್ ಜಾಯ್. ದೇವ್ ಆತ್ಮೊ ದೆಕುನ್ ತಾಕಾ ಆರಾಧನ್ ಕರ್ತಲ್ಯಾಂನಿ ಆತ್ಮ್ಯಾನ್ ಆನಿ ಸತಾನ್ ತಾಕಾ ಆರಾಧನ್ ಕರಿಜಯ್.” ಸ್ತ್ರಿಯೆನ್ ತಾಕಾ ಮ್ಹಳೆಂ: “ಕ್ರೀಸ್ತ್ ಮ್ಹಣ್ತಾತ್ ತೊ ಮಾಖ್ಲಲೊ ಯೆತಾ ಮ್ಹಣ್ ಹಾಂವ್ ಜಾಣಾಂ. ತೊ ಯೆತಚ್ ಸಕ್ಕಡ್ ಸಂಗ್ತಿಂ ಆಮ್ಕಾಂ ಸಾಂಗ್ತಲೊ.” ಜೆಜುನ್ ಮ್ಹಳೆಂ: “ಹಾಂವ್ಚ್ ತೊ, ತುಜೇಲಾಗಿಂ ಉಲಯ್ತಾಂ ತೊ.” ತಿತ್ಲ್ಯಾರ್ ತಾಚೆ ಶಿಸ್ ಪಾಟಿಂ ಆಯ್ಲೆ. ಎಕ್ಲೇ ಸ್ತ್ರಿಯೆಲಾಗಿಂ ತೊ ಉಲಯ್ತಾ ತೆಂ ಪಳೆವ್ನ್ ತೆ ಅಜಾಪ್ ಜಾಲೆ. ಪುಣ್ ತಾಂಣಿಂ ಕೊಣೆಂಯಿ “ತುಕಾ ಕಿತೆಂ ಜಾಯ್?” ಮ್ಹಣುನ್ ಜಾಂವ್, ವಾ “ತುಂ ತಿಚೇಲಾಗಿಂ ಕಿತ್ಯಾಕ್ ಉಲಯ್ತಾಯ್?” ಮ್ಹಣುನ್ ಜಾಂವ್ ತಾಚೆಲಾಗಿಂ ವಿಚಾರ್ಲೆಂನಾ. ತವಳ್ ತಿ ಸ್ತ್ರೀ ಆಪ್ಲೊ ಕೊಳ್ಸೊ ಥಂಯ್ಚ್ ಸೊಡ್ನ್ ಶಹರಾಕ್ ಗೆಲಿ ಆನಿ ಥಂಯ್ಚ್ಯಾ ಲೊಕಾಕ್ ಸಾಂಗಿಲಾಗ್ಲಿ: “ಯೆಯಾ, ಹಾಂವೆಂ ಕೆಲಾಂ ತೆಂ ಸಗ್ಳೆಂ ಮ್ಹಾಕಾ ಸಾಂಗ್ಲಲ್ಯಾ ಏಕ್ ಮನ್ಶಾಕ್ ಪಳೆಯಾ; ಹೊಚ್ ಕ್ರಿಸ್ ಜಾಯ್ತ್ಗಾಯ್?” ಇತ್ಲೆಂ ಆಯ್ಕುನ್ ಶಹರಾಚೊ ಲೋಕ್ ಜೆಜು ಸರ್ಶಿಂ ಆಯ್ಲೊ. ಹೆಣೆಂ, “ಮೆಸ್ತ್ರಿ, ಇಲ್ಲೆಂ ಪುಣ್ಯೀ ಜೇವ್” ಮ್ಹಣುನ್ ಶಿಸ್ ಜೆಜುಕ್ ಒತ್ತಾಯ್ ಕರ್ನ್ ಆಸ್ಲೆ. ಪುಣ್ ಜೆಜು ತಾಂಕಾಂ ಮ್ಹಣಾಲೊ: “ತುಮ್ಕಾಂ ಕಳಿತ್ ನಾ ತೆಂ ಖಾಣ್ ಆನಿ ಜೆವಣ್ ಮ್ಹಜೇಲಾಗಿಂ ಆಸಾ.” “ಕೊಣೆಂಯೀ ತಾಕಾ ಜೆಂವ್ಕ್ ಹಾಡ್ನ್ ದಿಲೆಂಗಾಯ್?” ಮ್ಹಣುನ್ ಶಿಸ್ ಎಕಾಮೆಕಾ ವಿಚಾರುಂಕ್ಲಾಗ್ಲೆ. ಪುಣ್ ಜೆಜುನ್ ತಾಂಕಾಂ ಸಾಂಗ್ಲೆಂ: “ಮ್ಹಾಕಾ ಧಾಡ್ಲಲ್ಯಾಚಿ ಖುಶಿ ಜ್ಯಾರಿ ಕರುನ್, ಮ್ಹಾಕಾ ಕರುಂಕ್ ದಿಲ್ಲೆಂ ಕಾಮ್ ಸಂಪೊಂವ್ಚೆಂ ತೆಂಚ್ ಮ್ಹಜೆಂ ಖಾಣ್ ಆನಿ ಜೆವಣ್. ‘ಆನಿ ಚಾರ್ ಮಹಿನೆ, ಉಪ್ರಾಂತ್ ಲುಂವೊಣ್’ ಮ್ಹಣ್ ತುಮಿಚ್ ಮ್ಹಣ್ತಾತ್ ನ್ಹಯ್? ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮ್ಚೆ ದೊಳೆ ಉಬಾರ್ನ್ ಪಳೆಯಾ. ಪಿಕೊನ್ ಧವಿಂ ಜಾವ್ನ್ ಲುಂವ್ಣೆಕ್ ತಯಾರ್ ಜಾಲ್ಲಿಂ ಶೆತಾಂ ಪಳೆಯಾ. ಲುಂವ್ತಾ ತೊ ಆತಾಂಚ್ ಮಜುರಿ ಘೆತಾ ಆನಿ ಸಾಸ್ಣಿಕ್ ಜಿಣಿಯೆಕ್ ಪೀಕ್ ರಾಸ್ ಕರ್ತಾ. ಅಶೆಂ ಒಂಪ್ಪಿ ಆನಿ ಲುಂವ್ಪಿ ಮ್ಹಣ್ ದೊಗ್ಯೀ ಸಂತೊಸ್ ಪಾವ್ತಾತ್. ‘ಒಂಪುಂಕ್ ಎಕ್ಲೊ, ಲುಂವುಂಕ್ ಆನ್ಯೆಕ್ಲೊ’ ಹಿ ಸಾಂಗ್ಣಿ ಖರಿ. ತುಮಿ ಘೊಳೊಂಕ್ ನಾ ತ್ಯಾ ಶೆತಾಂತ್ ಲುಂವುಂಕ್ ತುಮ್ಕಾಂ ಹಾಂವೆಂ ಧಾಡ್ಲ್ಯಾತ್. ಘೊಳ್ಲ್ಲೆ ದುಸ್ರೆಚ್, ಆನಿ ತಾಂಚೇ ವಾಂವ್ಟಿಚೊ ಫಳ್ ತುಮಿ ಭೊಗ್ತಾತ್.” “ಹಾಂವೆಂ ಕೆಲಾಂ ತೆಂ ಸಕ್ಕಡ್ ತಾಣೆಂ ಮ್ಹಾಕಾ ಸಾಂಗ್ಲೆಂ” ಮ್ಹಣ್ ತೆ ಸ್ತ್ರೀಯೆನ್ ಮ್ಹಳ್ಳೆಂ ಆಯ್ಕುನ್, ತ್ಯಾ ಶಹರಾಂತ್ಲ್ಯಾ ಸಬಾರ್ ಸಾಮಾರಿಯಾಗಾರಾಂನಿ ಜೆಜುಕ್ ಸತ್ಮಾನ್ಲೊ. ದೆಕುನ್ ತೆ ಸಾಮಾರಿಯಾಗಾರ್ ತಾಚೇ ಸರ್ಶಿಂ ಆಯ್ಲ್ಲ್ಯಾ ವೆಳಾರ್, ಆಪ್ಣಾಶಿಂ ರಾವ್ ಮ್ಹಣುನ್ ತಾಂಣಿಂ ಜೆಜುಲಾಗಿಂ ಪರಾತ್ಲೆಂ; ದೆಕುನ್ ಥಂಯ್ ತೊ ದೋನ್ ದೀಸ್ ರಾವ್ಲೊ. ಜೆಜುಚಿ ಶಿಕೊವ್ಣ್ ತಾಚ್ಯಾಚ್ ತೊಂಡಾ ಥಾವ್ನ್ ಆಯ್ಕಲ್ಲೇ ವರ್ವಿಂ ಆನಿಕ್ಯೀ ಜಾಯ್ತ್ಯಾ ಜಣಾಂನಿ ತಾಕಾ ಸತ್ಮಾನ್ಲೊ. ತವಳ್ ತೇ ಸ್ತ್ರೀಯೆಕ್ ತೆ ಮ್ಹಣಾಲೆ: “ತುಂ ಸಾಂಗ್ತಾಯ್ ದೆಕುನ್ ಆಮಿ ಆತಾಂ ಸತ್ಮಾನ್ತಾಂವ್ ನ್ಹಯ್, ತಾಣೆಂ ಉಲಯ್ಲ್ಲೆಂ ಆಮಿಚ್ ಅಮ್ಚ್ಯಾ ಕಾನಾಂನಿ ಆಯ್ಕಲೆಂ ದೆಕುನ್. ಸಂಸಾರಾಚೊ ಸೊಡ್ವಣ್ದಾರ್ ತೊಚ್ ಮ್ಹಣ್ ಆತಾಂ ಆಮ್ಕಾಂ ಸ್ಪಷ್ಟ್ ಜಾಲೆಂ.”

24 February

ಮಾರ್ಚ್ 1 - ಪ್ರಾಚಿತ್ ಕಾಳಾಚೊ ದುಸ್ರೊ ಆಯ್ತಾರ್ - ಪಯ್ಲೆಂ ವಾಚಪ್

ಉತ್ಪತ್ತಿ 12;1-4 ಸರ್ವೆಸ್ಪರಾನ್ ಆಬ್ರಾಮಾಕ್ ಮ್ಹಳೆಂ: “ತುಜ್ಯಾ ದೆಶಾಂತ್ಲೊ, ತುಜ್ಯಾ ದಾಯ್ಜ್ಯಾಂ ಗೊತ್ರ್ಯಾಂ ಮಧ್ಲೊ ಆನಿ ತುಜ್ಯಾ ಬಾಪಾಯ್ಚ್ಯಾ ಘರಾಂತ್ಲೊ ಭಾಯ್ರ್ ಸರ್ ಆನಿ ಹಾಂವ್ ತುಕಾ ದಾಕಯ್ತಲೊಂ ತ್ಯಾ ದೆಶಾಕ್ ವಚ್. ಹಾಂವ್ ತುಜೆ ಥಾವ್ನ್ ಏಕ್ ವ್ಹಡ್ ಪರ್ಜಾ ಉಪ್ಜಯ್ತಲೊಂ. ತುಜೆರ್ ಹಾಂವ್ ಆಶಿರ್ವಾದ್ ಘಾಲ್ತಲೊಂ ಆನಿ ತುಜೆಂ ನಾಂವ್ ವರ್ತೆಂ ಕರ್ತಲೊಂ ಆನಿ ತುಂ ಜಾತಲೊಯ್ ಏಕ್ ಆಶಿರ್ವಾದ್. ತುಜೆರ್ ಆಶಿರ್ವಾದ್ ಘಾಲ್ತಲ್ಯಾಂಚೆರ್ ಹಾಂವ್ಯೀ ಆಶಿರ್ವಾದ್ ಘಾಲ್ತಲೊಂ, ತುಜೆರ್ ಶಿರಾಪ್ ಘಾಲ್ತಲ್ಯಾಂಚೆರ್ ಹಾಂವ್ಯೀ ಶಿರಾಪ್ ಘಾಲ್ತಲೊಂ. ಸಂಸಾರಾಚಿಂ ಸರ್ವ್ ರಾಷ್ಟ್ರಾಂ ತುಜೆ ಉದೆಶಿಂ ಆಪ್ಣಾಚೆರ್ ಆಶಿರ್ವಾದ್ ಮಾಗ್ತಲಿಂ.” ಸರ್ವೆಸ್ಪರಾಚ್ಯಾ ಉತ್ರಾಕ್ ಪಾಳೊ ದಿವ್ನ್ ಅಬ್ರಾಮ್ ಭಾಯ್ರ್ ಸರ್ಲೊ.

24 February

ಮಾರ್ಚ್ 1 - ಪ್ರಾಚಿತ್ ಕಾಳಾಚೊ ದುಸ್ರೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 32 ಶ್ಲೋಕ್ : ಜಸೊ ತುಜೆರ್ ಆಮ್ಚೊ ವಿಶ್ವಾಸ್, ಸರ್ವೆಸ್ಪರಾ, ತಶಿ ಆಮ್ಚೆರ್ ದೆಂವುಂ ತುಜಿ ದಯಾ. 1. ಸರ್ವೆಸ್ಪರಾಚೆಂ ಉತರ್ ಖರೆಂಚ್ ಖರೆಂ, ಸಗ್ಳಿಂ ತಾಚಿಂ ಕರ್ತುವಾಂ ವಿಶ್ವಾಸೀಪಣಾಚಿಂ. ನ್ಯಾಯ್-ನಿತಿಚೊ ಸರ್ವೆಸ್ಪರ್ ಮೋಗ್ ಕರ್ತಾ, ತಾಚ್ಯಾ ವಿಶ್ವಾಸಿ ಮೊಗಾನ್ ಸಂಸಾರ್ ಸಗ್ಳೊ ಭರ್ಲಾ. 2. ಸರ್ವೆಸ್ಪರ್ ಜಾಲ್ಯಾರ್ ಆಪ್ಲಿ ಭಯ-ಭಕ್ತ್ ಆಸ್ಲಲ್ಯಾಂಚೆರ್, ಆಪ್ಲ್ಯಾ ವಿಶ್ವಾಸಿ ಮೊಗಾಚೆರ್ ಭರ್ವಸ್ತಲ್ಯಾಂಚೆರ್ ಜತ್ನೆನ್ ನದರ್ ಘಾಲ್ತಾ. ತೊಚ್ ತಾಂಕಾಂ ಮರ್ಣಾಂತ್ಲಿಂ ನಿವಾರ್ತಾ, ದುಕಳಾಚ್ಯಾ ಕಾಳಾರ್ ತಾಂಚೊ ಜೀವ್ ವಾಟಾಯ್ತಾ. 3. ಆಮಿ ಸರ್ವೆಸ್ಪರಾಚಿ ವಾಟ್ ಪಳೆವ್ನ್ಚ್ ಆಸಾಂವ್, ತೊಚ್ ಆಮ್ಚೊ ಆಧಾರ್ ಆನಿ ಆಮ್ಚೆಂ ಢಾಲ್. ಜಸೊ ತುಜೆರ್ ಆಮ್ಚೊ ವಿಶ್ವಾಸ್, ಸರ್ವೆಸ್ಪರಾ, ತಶಿ ಆಮ್ಚೆರ್ ದೆಂವುಂ ತುಜಿ ದಯಾ.

24 February

ಮಾರ್ಚ್ 1 - ಪ್ರಾಚಿತ್ ಕಾಳಾಚೊ ದುಸ್ರೊ ಆಯ್ತಾರ್ – ದುಸ್ರೆಂ ವಾಚಪ್

2 ತಿಮೊತಿ 1:8-10 ಭೊವ್ ಮೊಗಾಚ್ಯಾ ಇಷ್ಟಾ, ದೆವಾಚೆ ಸಕ್ತಿಚೆರ್ ಪಾತ್ಯೆವ್ನ್ ಸುವಾರ್ತಾ ಪರ್ಗಟ್ಚ್ಯಾ ಕಷ್ಟಾಂ ವಾಂವ್ಟಿಂತ್ ಮ್ಹಜೆ ಸವೆಂ ಭಾಗಿದಾರ್ ಜಾ. ದೆವಾನ್ ಆಮ್ಚಿ ಸೊಡ್ವಣ್ ಕೆಲಿ ಆನಿ ಆಮ್ಕಾಂ ಪವಿತ್ರ್ ಜಾಂವ್ಕ್ ಆಪವ್ಣೆಂ ದಿಲೆಂ, ಆಮ್ಚ್ಯಾ ಕರ್ನ್ಯಾಂಕ್ ಲಾಗುನ್ ನ್ಹಯ್, ಬಗರ್ ಆಪ್ಣೆಂ ಕೆಲ್ಲೆ ಮಾಂಡಾವಳೆ ಆನಿ ಕುರ್ಪೆ ಖಾತಿರ್. ಹಿ ಕುರ್ಪಾ ವೆಳಾ-ಕಾಳಾ ಪುರ್ವಿಂಚ್ ಕ್ರಿಸ್ತಾ ಜೆಜು ಮಾರಿಫಾತ್ ತಾಣೆಂ ಆಮ್ಕಾಂ ದಿಲ್ಲಿ, ಆನಿ ಆತಾಂ ಆಮ್ಚ್ಯಾ ಸೊಡ್ವಣ್ದಾರಾ ಜೆಜು ಕ್ರಿಸ್ತಾಚ್ಯಾ ದರ್ಶನಾ ಮುಖಾಂತ್ರ್ ತಾಣೆಂ ತಿ ಉಗ್ಡಾಪಿ ಕೆಲಿ. ತಾಣೆಂ ಮೊರ್ನಾಚಿ ಪದ್ವಿ ನಾಸ್ ಕೆಲಿ ಆನಿ ಸ್ಥಾಪಿತ್ ಕೆಲ್ಲೆಂ ಜಿವಿತ್ ಆನಿ ಅಮರ್ಪಣ್ ಸುವಾರ್ತೇ ಮಾರಿಫಾತ್ ಉಜ್ವಾಡಾ ಹಾಡ್ಲೆಂ.

24 February

ಮಾರ್ಚ್ 1 - ಪ್ರಾಚಿತ್ ಕಾಳಾಚೊ ದುಸ್ರೊ ಆಯ್ತಾರ್ - ಸುವಾರ್ತಾ

ಮಾತೆವ್ 17:1-9 ಆಪ್ಲ್ಯಾ ಕಷ್ಟಾಂ-ಮರಣಾಚಿ ಖಬರ್ ಸಾಂಗುನ್ ಸುಮಾರ್ ಸ ದಿಸಾಂ ಉಪ್ರಾಂತ್ ಜೆಜು ಪೆದ್ರುಕ್, ಜಾಕೊಬಾಕ್ ಆನಿ ತಾಚ್ಯಾ ಭಾವಾ ಜುವಾಂವ್ಕ್ ಆಪ್ಣಾ ಸಾಂಗಾತಾ ಘೆವ್ನ್, ಏಕ್ ಉಬಾರ್ ದೊಂಗ್ರಾರ್ ವ್ಹೊರೆ ವಿಂಗಡ್ ಸುವಾತೆರ್ ಆಪವ್ಣ್ ವ್ಹರ್ನ್ ಗೆಲೊ. ಥಂಯ್ ತಾಂಚೆ ಮುಖಾರ್ ತೊ ರುಪಾಂತರ್ ಜಾಲೊ. ತಾಚೆಂ ಮುಖಮಳ್ ಸುರ್ಯಾಬರಿ ಪರ್ಜಳ್ಳೆಂ ಆನಿ ತಾಚೆಂ ವಸ್ತುರ್ ಉಜ್ವಾಡಾಬರಿ ಧವೆಂ ಜಾಲೆಂ. ಆನಿ ಅಬ್ಳೆ, ಮೊಯ್ಜೆ ಆನಿ ಎಲಿಯಾ ತಾಚೇಲಾಗಿಂ ಉಲೊವ್ನ್ ಆಸ್ಲಲೆ ತಾಂಕಾಂ ದಿಸ್ಲೆ. ತವಳ್ ಪೆದ್ರು ಜೆಜು ಲಾಗಿಂ ಮ್ಹಣಾಲೊ: “ಸೊಮಿಯಾ, ಆಮಿ ಹಾಂಗಾಚ್ ಆಸ್ಚೆಂ ಕಿತ್ಲೆಂ ಬರೆಂ! ತುಕಾ ಖುಶಿ ಜಾಲ್ಯಾರ್ ಹಾಂವ್ ಹಾಂಗಾ ತೀನ್ ತಂಬು ಮಾರ್ತಾಂ: ಏಕ್ ತುಕಾ, ಏಕ್ ಮೊಯ್ಜೆಕ್ ಆನಿ ಏಕ್ ಎಲಿಯಾಕ್.” ಅಶೆಂ ತೊ ಉಲಯ್ತಾಲೊ ತಿತ್ಲೊಚ್, ಏಕ್ ಪ್ರಕಾಶಿತ್ ಕುಪಾನ್ ತಾಂಚೆರ್ ಧಾಂಪಣ್ ಘಾಲೆಂ ಆನಿ ತ್ಯಾ ಕುಪಾಂತ್ಲ್ಯಾನ್ ಆಯ್ಕಲೊ ಎಕ್ ತಾಳೊ: “ಹೊ ಮ್ಹಜೊ ಮೊಗಾಚೊ ಪೂತ್, ತೊ ಮ್ಹಾಕಾ ಮಾನ್ವಲಾ. ತಾಕಾ ತುಮಿ ಆಯ್ಕಾ”. ತಾಳೊ ಆಯ್ಕುನ್ ಶಿಸ್ ಇತ್ಲೆ ಭಿಯೆಲೆ ಕೀ, ತೆ ಧರ್ಣಿರ್ ವೊಮ್ತೆಚ್ ಶೆವ್ಟಲೆ. ತವಳ್ ಜೆಜು ತಾಂಚೇ ಸರ್ಶಿಂ ಯೇವ್ನ್, ತಾಂಕಾಂ ಆಪಡ್ನ್ ಮ್ಹಣಾಲೊ: “ಉಠಾ, ಭಿಯೆನಾಕಾತ್.” ತಾಂಣಿಂ ಆಪ್ಲೆ ದೊಳೆ ಉಬಾರ್ನ್ ಪಳೆತಾನಾ ಜೆಜು ಎಕ್ಲೊ ಶಿವಾಯ್ ದುಸ್ರೊ ಕೊಣ್ಯಿ ತಾಂಕಾಂ ದಿಸ್ಲೊನಾ. ದೊಂಗ್ರಾವಯ್ಲೆ ತೆ ದೆಂವುನ್ ಯೆತಾನಾ ಜೆಜುನ್ ತಾಂಕಾಂ ತಾಕಿದ್ ದಿಲಿ: “ಮನ್ಶಾಪುತಾಕ್ ಮೆಲ್ಲ್ಯಾಂತ್ಲೊ ಉಠಯ್ಸರ್ ತುಮಿ ಪಳೆಲ್ಲೆಂ ಕೊಣಾಕ್ಚ್ ಸಾಂಗಿನಾಕಾತ್.”

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ - ಪಯ್ಲೆಂ ವಾಚಪ್

ಉತ್ಪತ್ತಿ 2:7-9; 3:1-7 ತೆದ್ನಾ ಸರ್ವೆಸ್ಪರಾ ದೆವಾನ್ ಧರ್ಣಿಚೆ ಮಾತಿಯೆಚೊ ಮನ್ಶಾಕ್ ಕೆಲೊ ಆನಿ ತಾಚ್ಯಾ ನಾಕಾಚ್ಯಾ ಪುಡಾಂನಿ ಜಿವಾಚೊ ಸ್ವಾಸ್ ಫುಂಕ್ಲೊ ಆನಿ ಮನಿಸ್ ಏಕ್ ಜಿವೊ ಪ್ರಾಣಿ ಜಾಲೊ. ಸರ್ವೆಸ್ಪರಾ ದೆವಾನ್ ಉದೆಂತಿಕ್ ಆಸ್ಲಲ್ಯಾ ಏದೆನಾಂತ್ ಏಕ್ ಬಾಗ್ ಕೆಲಿ ಆನಿ ಆಪ್ಣೆಂ ರಚ್ಲ್ಲ್ಯಾ ಮನ್ಶಾಕ್ ತಾಂತುಂ ದವರ್ಲೊ. ಸರ್ವೆಸ್ಪರಾ ದೆವಾನ್ ತೆ ಬಾಗೆಂತ್ ಸರ್ವ್ ಜಿನ್ಸಾಂಚೆ ರೂಕ್ ವಾಡೊಂಕ್ ಸೊಡ್ಲೆ. ಪಳೆಂವ್ಕ್ ತೆ ಸೊಭಿತ್ ಆಸ್ಲೆ ಆನಿ ತಾಂಚಿಂ ಫಳಾಂ ರುಚಿಕ್ ಆಸ್ಲಿಂ. ಬಾಗೆಚ್ಯಾ ಮಧೆಕತ್ ಜಿವಿತಾಚೊ ರೂಕ್ ಆಸ್ಲೊ ಆನಿ ಬರ್ಯಾ ವಾಯ್ಟಾಚೆ ಸಮ್ಜಣೆಚೊ ರೂಕ್ಯೀ ಆಸ್ಲೊ. ಸರ್ವೆಸ್ಪರಾ ದೆವಾನ್ ರಚ್ಲ್ಲ್ಯಾ ಸರ್ವ್ ಮೊನ್ಜಾತಿಂ ಪಯ್ಕಿ ಸೊರಪ್ ಭೋವ್ ಹುಶಾರ್. ತಾಣೆಂ ಸ್ತ್ರಿಯೆಕ್ ವಿಚಾರ್ಲೆಂ: “ಬಾಗೆಂತ್ಲ್ಯಾ ಖಂಯ್ಚ್ಯಾಯ್ ರುಕಾಚೆಂ ಫಳ್ ತುಮಿ ಖಾಂವ್ಕ್ ನಜೊ ಮ್ಹಣ್ ದೆವಾನ್ ತುಮ್ಕಾಂ ಖರೆಂಚ್ ಸಾಂಗ್ಲಾಂ?” ಸ್ತ್ರಿಯೆನ್ ಸೊರ್ಪಾಕ್ ಜಾಪ್ ದಿಲಿ: “ಬಾಗೆಚ್ಯಾ ರುಕಾಂಚಿಂ ಪಳಾಂ ಆಮಿ ಖಾವ್ಯೆತ್; ಪೂಣ್ ಬಾಗೆಚ್ಯಾ ಮಧೆಕತ್ ಆಸಾ ತ್ಯಾ ರುಕಾಚ್ಯಾ ಫಳಾಂ ವಿಶಿಂ ದೆವಾನ್ ಆಮ್ಕಾಂ ಸಾಂಗ್ಲಾಂ: ‘ತಿಂ ತುಮಿ ಖಾಂವ್ಕ್ ನಜೊ, ಮಾತ್ರ್ ನ್ಹಯ್ ತಿಂ ಆಪ್ಡುಂಕ್ ಲೆಗುನ್ ನಜೊ; ತಶೆಂ ಕೆಲ್ಯಾರ್ ತುಮಿ ಮರ್ತಲ್ಯಾತ್.’ ” ತೆದ್ನಾ ಸೊರ್ಪಾನ್ ಸ್ತ್ರಿಯೆಕ್ ಮ್ಹಳೆಂ: “ನಾ, ತುಮಿ ಮರ್ಚಿಂ ನಾಂತ್. ದೇವ್ ಹೆಂ ಜಾಣಾ; ಜೆದ್ನಾ ತುಮಿ ತೆಂ ಖಾತಾತ್, ತೆದ್ನಾ ತುಮ್ಚೆ ದೊಳೆ ಉಗ್ತೆ ಜಾತಲೆ. ದೆವಾ ಸಾರ್ಕಿಂ ತುಮಿ ಜಾತಲ್ಯಾತ್ ಆನಿ ಬರೆಂ ಆನಿ ವಾಯ್ಟ್ ತುಮಿ ಸಮ್ಜತಲ್ಯಾತ್.” ಸ್ತ್ರಿಯೆಕ್ ತ್ಯಾ ರುಕಾಚಿಂ ಫಳಾಂ ಖಾಂವ್ಕ್ ರುಚಿಕ್ ಮ್ಹಣ್ ದಿಸ್ಲಿಂ ಆನಿ ತೊ ರೂಕ್ ಪಳೆಂವ್ಕ್ ಸೊಭಿತ್ ಆನಿ ಜಾಣ್ವಾಯ್ ಜೊಡುನ್ ಘೆಂವ್ಚೆ ಖಾತಿರ್ ಆಶೆಂವ್ಕ್ ಯೋಗ್ಯ್ ಜಾಲ್ಲೊ ಮ್ಹಣ್ ಭೊಗ್ಲೆಂ. ದೆಕುನ್ ತಾಚೆಂ ಏಕ್ ಫಳ್ ತಿಣೆಂ ಕಾಡ್ಲೆಂ ಆನಿ ಖೆಲೆಂ. ಉಪ್ರಾಂತ್ ಆಪ್ಲ್ಯಾ ಪತಿಕ್ಯೀ ತಿಣೆಂ ತೆಂ ದಿಲೆಂ ಆನಿ ತಾಣೆಂಯ್ ತೆಂ ಖೆಲೆಂ. ತೆದ್ನಾ ತಾಂಚೆ ದೊಗಾಂಯ್ಚೆ ದೊಳೆ ಉಗ್ತೆ ಜಾಲೆ ಆನಿ ಆಪುಣ್ ವಿಣ್ಗಿಂ ಆಸಾತ್ ಮ್ಹಣ್ ತಾಂಕಾಂ ಸಮ್ಜಲೆಂ. ದೆಕುನ್ ತಾಂಣಿಂ ಆಂಜುರಾಚ್ಯಾ ರುಕಾಚಿಂ ಪಾನಾಂ ಗುಂತುನ್ ತಿಂ ಆಪ್ಲ್ಯಾ ಪೆಂಕ್ಟಾಕ್ ಬಾಂದ್ಲಿಂ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ – ಕೀರ್ತನ್

ಕೀರ್ತನ್ : 50 ಶ್ಲೋಕ್ : ಆಮಿ ಪಾತ್ಕಿ, ಸೊಮಿಯಾ, ತುಜಿ ಕಾಕುಳ್ತ್ ಮಾಗ್ತಾಂವ್. 1. ಕಾಕುಳ್ದಾರಾ ದೆವಾ, ಮ್ಹಜಿ ಕಾಕುಳ್ತ್ ಕರ್, ಭೋವ್ ಕಣ್ವಾಳ್ಯಾ ದೆವಾ, ಮ್ಹಜೆ ಗುನ್ಯಾಂವ್ ಪುಸುನ್ ಕಾಡ್. ಧು ತುಂ ಮ್ಹಾಕಾ ಮ್ಹಜ್ಯಾ ಅಪ್ರಾಧಾಚ್ಯಾ ಖತಾಂತ್ಲೊ, ನಿತಳ್ ಕರ್ ಮ್ಹಾಕಾ ಮ್ಹಜ್ಯಾ ಪಾತ್ಕಾಚ್ಯಾ ಚಿಕ್ಲಾಂತ್ಲೊ. 2. ಮ್ಹಜೊ ಗುನ್ಯಾಂವ್ ಹಾಂವ್ ಒಳ್ಕುನ್ ಘೆತಾಂ, ಮ್ಹಜೆಂ ಪಾತಕ್ ಸದಾಂಚ್ ಮ್ಹಜ್ಯೆ ಮುಖಾರ್ ದವರ್ತಾಂ. ತುಜೆರ್, ವ್ಹಯ್ ತುಜೆರ್ಚ್ ಹಾಂವ್ ಚುಕ್ಲಾಂ, ಆನಿ ತುಜ್ಯೆ ಮುಖಾರ್ ವಾಯ್ಟ್ ಜಾವ್ನಾಸ್ಲಲೆಂ ಹಾಂವೆಂ ಕೆಲಾಂ. 3. ಏಕ್ ನಿತಳ್ ಕಾಳಿಜ್ ಮ್ಹಾಕಾ ರಚುನ್ ದಿ, ದೆವಾ; ಆನಿ ನವ್ಯಾನ್ ಏಕ್ ದೃಢ್ ಮನ್ ಮ್ಹಜ್ಯೆ ಥಂಯ್ ಆಸಾ ಕರ್. ತುಜ್ಯಾ ದೊಳ್ಯಾಂ ಮುಖಾ ವಯ್ಲೊ ಮ್ಹಾಕಾ ಪಯ್ಸ್ ಉಡಯ್ನಾಕಾ, ತುಜೊ ಪವಿತ್ರ್ ಅತ್ಮೊ ಮ್ಹಜ್ಯೆ ಥಾವ್ನ್ ಕಾಡ್ನ್ ವ್ಹರಿನಾಕಾ. 4. ತುಜ್ಯೆ ಸೊಡ್ವಣೆಚೊ ಸಂತೊಸ್ ಪತ್ರ್ಯಾನ್ ಹಾಂವೆಂ ಭೊಗಿಸೊ ಕರ್, ಏಕ್ ಉದಾರ್ ಮನ್ ದಿವ್ನ್ ಮ್ಹಾಕಾ ಥಿರ್ ಕರ್. ಸರ್ವೆಸ್ಪರಾ, ಉಘಡ್ ಮ್ಹಜೆ ಓಂಠ್, ಆನಿ ಮ್ಹಜೆಂ ತೊಂಡ್ ತುಜಿ ಕೀರ್ತ್ ನಾಂವಾಡುಂ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ – ದುಸ್ರೆಂ ವಾಚಪ್

ರೊಮಾ. 5:12-19 ಪಳೆಯಾ ತರ್: ಏಕ್ ಮನ್ಶಾ ವರ್ವಿಂ ಸಂಸಾರಾಂತ್ ಪಾತಕ್ ಭಿತರ್ ಸರ್ಲೆಂ ಆನಿ ತ್ಯಾ ಪಾತ್ಕಾ ಬರಾಬರ್ ಮೊರ್ನ್ಯೀ ಆಯ್ಲೆಂ. ಅಶೆಂ ಸರ್ವ್ ಮನ್ಶಾಂನಿ ಪಾತಕ್ ಆಧಾರ್ಲೆಂ ಜಾಲ್ಲ್ಯಾನ್, ಮೊರ್ನ್ ಸಗ್ಳ್ಯಾ ಮನ್ಶಾಕುಳಾಚೆರ್ ವಿಸ್ತಾರ್ಲೆಂ. ನಿಯಮ್ಶಾಸ್ತ್ರ್ ನಾತ್ಲ್ಲೇ ವರ್ವಿಂ ಕಾಯ್ದ್ಯಾ ವಿರೋಧ್ ಪಾತಕ್ ಜಾಲೆಂ ಮ್ಹಣ್ ಅಪ್ರಾಧ್ ಲೆಖುಂಕ್ ಜಾಯ್ನಾತ್ಲೆಂ. ಆದಾಂವ್ಚ್ಯಾ ಕಾಳಾ ಥಾವ್ನ್ ಮೊಯ್ಜೆಚ್ಯಾ ಕಾಳಾ ಪರ್ಯಾನ್ ಮೊರ್ನಾನ್ ಆಪ್ಲಿ ರಾಜ್ವಟ್ಕಿ ಚಲಯ್ಲಿ. ಆದಾಂವ್ಬರಿ ದೆವಾಚೆಂ ಸ್ವಷ್ಟ್ ಫರ್ಮಾಣ್ ಮೋಡ್ನ್ ಪಾತಕ್ ಆಧಾರಿ ನಾತ್ಲಲ್ಯಾಂಚೆರ್ ಸಯ್ತ್ ಮೊರ್ನಾನ್ D¥ÉÆè ಅಧಿಕಾರ್ ಚಲಯ್ಲೊ. ಪುಣ್ ಹೊ ಆದಾಂವ್ ಉಪ್ರಾಂತ್ ಯೆಂವ್ಚೊ ಆಸ್ಲಲ್ಯಾಚೊ ಏಕ್ ರುಪ್ಕಾರ್ ಮ್ಹಣ್ಯೆತ್. ಪುಣ್ ದೆವಾಚ್ಯಾ ಧರ್ಮಾರ್ಥ್ ದೆಣ್ಯಾ ಆನಿ ಆದಾಂವ್ಚ್ಯಾ ಪಾತ್ಕಾ ಮಧೆಂ ಕಸಲಿಚ್ ಸರ್ ನಾ. ಏಕ್ ಮನ್ಶಾಚ್ಯಾ ಪಾತ್ಕಾ ವರ್ವಿಂ ಸಮೆಸ್ತ್ ಮೆಲೆ ವ್ಹಯ್, ಹಾಚ್ಯಾ ಪರಿಣಾಮಾ ಪ್ರಾಸ್, ದೆವಾಚಿಂ ಕುರ್ಪೆದೆಣಿಂ ಆನಿ ತ್ಯಾ ಬರಾಬರ್ ಏಕ್ ಮನ್ಶಾಚೇ, ಮ್ಹಣ್ಜೆ ಜೆಜು ಕ್ರಿಸ್ತಾಚೇ ಕುರ್ಪೆ ಉದೆಶಿಂ ಮನ್ಶಾಕ್ ಮೆಳ್ಳಲಿಂ ದೆಣಿಂ ಅನಿಕ್ಯೀ ಚಡ್ ವರ್ತಿಂ ಮ್ಹಣ್ಯೆತ್. ತಶೆಂಚ್ ದೆವಾಚೆಂ ಧರ್ಮಾರ್ಥ್ ದೆಣೆಂ ತ್ಯಾ ಏಕ್ ಮನ್ಶಾಚ್ಯಾ ಪಾತ್ಕಾಚ್ಯಾ ಪರಿಣಾಮಾಕ್ ಸರಿ ಕರುಂಕ್ ಜಾಯ್ನಾ. ಏಕ್ ಪಾತ್ಕಾ ಉಪ್ರಾಂತ್ ಝಡ್ತೆಚೊ ಪರಿಣಾಮ್ ಜಾವ್ನ್ ‘ಅಪ್ರಾದಿ’ ಮ್ಹಳ್ಳೆಂ ಫೈಸಲ್ ಜಾಲೆಂ. ಪುಣ್ ಸಬಾರ್ ಪಾತ್ಕಾಂ ಉಪ್ರಾಂತ್ ಫುಂಕ್ಯಾಕ್ ದಿಲ್ಲೆಂ ಕುರ್ಪೆ ದೆಣೆಂ ‘ನಿರಾಪ್ರಾದಿ’ ಮ್ಹಳ್ಳೆಂ ಫೈಸಲ್ ಹಾಡುಂಕ್ ಪಾವ್ಲೆಂ. ಏಕ್ ಮನ್ಶಾವರ್ವಿಂ, ತಾಚ್ಯಾ ಪಾತ್ಕಾಕ್ ಲಾಗುನ್ ಮೊರ್ನಾನ್ ಆಪ್ಲಿ ರಾಜ್ವಾಟ್ಕಿ ಚಲಯ್ಲಿ ತೆಂ ಖರೆಂ ಜಾಲ್ಯಾರ್ಯೀ, ಏಕ್ ಮನ್ಶಾ ಜೆಜು ಕ್ರಿಸ್ತಾನ್ ಕೆಲ್ಲ್ಯಾಚೊ ಪರಿಣಾಮ್ ಆನಿಕ್ಯೀ ಕಿತ್ಲೊ ವರ್ತೊ! ದೆವಾ ಥಾವ್ನ್ ಧಾರಾಳ್ ಕುರ್ಪಾ ಆನಿ ನಿತಿವಂತ್ಪಣಾಚೆಂ ಧರ್ಮಾರ್ಥ್ ದೆಣೆಂ ಜೊಡ್ಲಲಿಂ ತ್ಯಾಚ್ ಕ್ರಿಸ್ತಾ ಮಾರಿಫತ್ ಜಿವಿತ್ ಜೊಡ್ತಲಿಂ ಆನಿ ರಾಜ್ವಟ್ಕಿ ಚಲಯ್ತಲಿಂ. ತರ್ ಜಶೆಂ ಏಕ್ ಮನ್ಶಾಚ್ಯಾ ಪಾತ್ಕಾ ವರ್ವಿಂ ಸಗ್ಳ್ಯಾ ಮನ್ಶಾಕುಳಾಕ್ ಖ್ಯಾಸ್ತಿಚೆಂ ಫರ್ಮಾಣ್ ಫಾವೊ ಜಾಲೆಂ, ತಶೆಂ ಆನ್ಯೇಕ್ ಮನ್ಶಾಚೆ ನಿತಿಚೆ ಕರ್ನೆ ವರ್ವಿಂ ಸಗ್ಳ್ಯಾ ಮನ್ಶಾಕುಳಾಕ್ ಸುಟ್ಕಾ ಆನಿ ಜಿವಿತ್ ಲಾಭ್ತಾ. ಜಶೆಂ ಏಕ್ ಮನ್ಶಾಚ್ಯಾ ಅವಿಧೇಯ್ಪಣಾ ವರ್ವಿಂ ಸರ್ವ್ ಮನಿಸ್ ಪಾತ್ಕಿ ಜಾಂವ್ಕ್ ಪಾವ್ಲೆ, ತಶೆಂ ಏಕ್ ಮನ್ಶಾಚ್ಯಾ ವಿಧೇಯ್ಪಣಾ ವರ್ವಿಂ ಸರ್ವ್ ಮನಿಸ್ ನಿತಿವಂತ್ ಜಾಂವ್ಕ್ ಪಾವ್ತಲೆ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ - ಸುವಾರ್ತಾ

ಮಾತೆವ್ 4:1-11 ತಾಚೆ ಉಪ್ರಾಂತ್ ದೆಂವ್ಚಾರಾನ್ ತಾಳ್ಚೆ ಖಾತಿರ್ ಪವಿತ್ರ್ ಅತ್ಮೊ ಜೆಜುಕ್ ಅರಣ್ಯಾಕ್ ವ್ಹರ್ನ್ ಗೆಲೊ. ಥಂಯ್ ಚಾಳೀಸ್ ದೀಸ್ ಆನಿ ಚಾಳೀಸ್ ರಾತಿಂ ಉಪಾಸ್ ಕೆಲ್ಯಾ ಉಪ್ರಾಂತ್ ತೊ ಭುಕೆಲೊ. ತೆದ್ವಾಂ ತಾಳ್ತಲೊ ತಾಚೆ ಸರ್ಶಿಂ ಯೇವ್ನ್ ಮ್ಹಣಾಲೊ: “ಜರ್ ತುಂ ದೆವಾಚೊ ಪೂತ್, ತರ್ ಹೆ ಫಾತರ್ ಉಂಡೆ ಜಾಂವ್ ಮ್ಹಣುನ್ ಫರ್ಮಾಯ್.” ಪುಣ್ ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ: “ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ಮನಿಸ್ ಉಂಡ್ಯಾನ್ ಮಾತ್ರ್ ನ್ಹಯ್, ಬಗರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ ಹರ್ಯೆಕ್ ಉತ್ರಾನ್ ಜಿಯೆತಾ’.” ಉಪ್ರಾಂತ್ ದೆಂವ್ಚಾರ್ ತಾಕಾ ಪವಿತ್ರ್ ಶಹರಾಕ್ ವ್ಹರ್ನ್ ಗೆಲೊ. ಥಂಯ್ ದೆವಾಳಾಚ್ಯಾ ಶಿಖರಾಚೆರ್ ತಾಕಾ ಉಬೊ ಕರ್ನ್ ಮ್ಹಣಾಲೊ: “ತುಂ ದೆವಾಚೊ ಪೂತ್ ಜಾಲ್ಯಾರ್ ಸಕ್ಲಾ ಉಡಿ ಮಾರ್; ಕಿತ್ಯಾಕ್ ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ದೇವ್ ಆಪ್ಲ್ಯಾ ದುತಾಂಕ್ ತುಜೇ ವಿಶ್ಯಾಂತ್ ತಾಕಿದ್ ದಿತಲೊ: ಆನಿ ತುಜೊ ಪಾಂಯ್ ಫಾತ್ರಾಕ್ ಆದಳ್ನಾಶೆಂ ಆಪ್ಲ್ಯಾ ಹಾತಾಂನಿ ತೆ ತುಕಾ ಸಾಂಬಾಳ್ನ್ ಧರ್ತಲೆ’.” ಜೆಜುನ್ ತಾಕಾ ಜಾಪ್ ದಿಲಿ: “ಹೆಂಯಿ ಬರೊವ್ನ್ ಆಸಾ: ‘ಸರ್ವೆಸ್ಪರಾ ತುಜ್ಯಾ ದೆವಾಚಿ ಪರೀಕ್ಷಾ ಕರಿನಾಕಾ’.” ಉಪ್ರಾಂತ್ ದೆಂವ್ಚಾರ್ ಜೆಜುಕ್ ಏಕ್ ಭೋವ್ ಉಬಾರ್ ಪರ್ವತಾರ್ ವ್ಹರ್ನ್ ಗೆಲೊ ಆನಿ ಸಂಸಾರಾಚಿಂ ಸರ್ವ್ ರಾಜ್ಯಾಂ ತಾಂಚ್ಯಾ ವೈಭವಾ ಸಮೇತ್ ದಾಖೊವ್ನ್ ಮ್ಹಣಾಲೊ: “ಮ್ಹಜ್ಯಾ ಪಾಂಯಾಂಕ್ ಪಡುನ್ ಮ್ಹಾಕಾ ನಮಸ್ಕಾರ್ ಕರ್ಶಿ ಜಾಲ್ಯಾರ್ ಹಾಂವ್ ಹೆಂ ಸಗ್ಳೆಂ ತುಕಾ ದಿತಲೊಂ.” ತೆದ್ವಾಂ ಜೆಜುನ್ ಮ್ಹಳೆಂ : “ಚಲ್ ಹಾಂಗಾಚೊ ಸೈತಾನಾ, ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ : ‘ಸರ್ವೆಸ್ಪರಾಕ್, ತುಜ್ಯಾ ದೆವಾಕ್ ಆರಾಧನ್ ಕರ್, ತಾಚಿ ಎಕ್ಲ್ಯಾಚಿ ಮಾತ್ರ್ ಸೆವಾ ಕರ್’.” ತಿತ್ಲ್ಯಾರ್ ದೆಂವ್ಚಾರ್ ತಾಕಾ ಸೊಡ್ನ್ ಗೆಲೊ. ಆನಿ ತೊ ವೆತಚ್ ದೇವ್ದೂತ್ ಯೇವ್ನ್ ತಾಚಿ ಸೆವಾ ಕರುಂಕ್ ಲಾಗ್ಲೆ.

29 January

ಫೆಬ್ರೆರ್ 22 - ಪ್ರಾಚಿತ್ ಕಾಳಾಚೊ ಪಯ್ಲೊ ಆಯ್ತಾರ್ - ಸುವಾರ್ತಾ

ಮಾತೆವ್ 4:1-11 ತಾಚೆ ಉಪ್ರಾಂತ್ ದೆಂವ್ಚಾರಾನ್ ತಾಳ್ಚೆ ಖಾತಿರ್ ಪವಿತ್ರ್ ಅತ್ಮೊ ಜೆಜುಕ್ ಅರಣ್ಯಾಕ್ ವ್ಹರ್ನ್ ಗೆಲೊ. ಥಂಯ್ ಚಾಳೀಸ್ ದೀಸ್ ಆನಿ ಚಾಳೀಸ್ ರಾತಿಂ ಉಪಾಸ್ ಕೆಲ್ಯಾ ಉಪ್ರಾಂತ್ ತೊ ಭುಕೆಲೊ. ತೆದ್ವಾಂ ತಾಳ್ತಲೊ ತಾಚೆ ಸರ್ಶಿಂ ಯೇವ್ನ್ ಮ್ಹಣಾಲೊ: “ಜರ್ ತುಂ ದೆವಾಚೊ ಪೂತ್, ತರ್ ಹೆ ಫಾತರ್ ಉಂಡೆ ಜಾಂವ್ ಮ್ಹಣುನ್ ಫರ್ಮಾಯ್.” ಪುಣ್ ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ: “ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ಮನಿಸ್ ಉಂಡ್ಯಾನ್ ಮಾತ್ರ್ ನ್ಹಯ್, ಬಗರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ ಹರ್ಯೆಕ್ ಉತ್ರಾನ್ ಜಿಯೆತಾ’.” ಉಪ್ರಾಂತ್ ದೆಂವ್ಚಾರ್ ತಾಕಾ ಪವಿತ್ರ್ ಶಹರಾಕ್ ವ್ಹರ್ನ್ ಗೆಲೊ. ಥಂಯ್ ದೆವಾಳಾಚ್ಯಾ ಶಿಖರಾಚೆರ್ ತಾಕಾ ಉಬೊ ಕರ್ನ್ ಮ್ಹಣಾಲೊ: “ತುಂ ದೆವಾಚೊ ಪೂತ್ ಜಾಲ್ಯಾರ್ ಸಕ್ಲಾ ಉಡಿ ಮಾರ್; ಕಿತ್ಯಾಕ್ ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ: ‘ದೇವ್ ಆಪ್ಲ್ಯಾ ದುತಾಂಕ್ ತುಜೇ ವಿಶ್ಯಾಂತ್ ತಾಕಿದ್ ದಿತಲೊ: ಆನಿ ತುಜೊ ಪಾಂಯ್ ಫಾತ್ರಾಕ್ ಆದಳ್ನಾಶೆಂ ಆಪ್ಲ್ಯಾ ಹಾತಾಂನಿ ತೆ ತುಕಾ ಸಾಂಬಾಳ್ನ್ ಧರ್ತಲೆ’.” ಜೆಜುನ್ ತಾಕಾ ಜಾಪ್ ದಿಲಿ: “ಹೆಂಯಿ ಬರೊವ್ನ್ ಆಸಾ: ‘ಸರ್ವೆಸ್ಪರಾ ತುಜ್ಯಾ ದೆವಾಚಿ ಪರೀಕ್ಷಾ ಕರಿನಾಕಾ’.” ಉಪ್ರಾಂತ್ ದೆಂವ್ಚಾರ್ ಜೆಜುಕ್ ಏಕ್ ಭೋವ್ ಉಬಾರ್ ಪರ್ವತಾರ್ ವ್ಹರ್ನ್ ಗೆಲೊ ಆನಿ ಸಂಸಾರಾಚಿಂ ಸರ್ವ್ ರಾಜ್ಯಾಂ ತಾಂಚ್ಯಾ ವೈಭವಾ ಸಮೇತ್ ದಾಖೊವ್ನ್ ಮ್ಹಣಾಲೊ: “ಮ್ಹಜ್ಯಾ ಪಾಂಯಾಂಕ್ ಪಡುನ್ ಮ್ಹಾಕಾ ನಮಸ್ಕಾರ್ ಕರ್ಶಿ ಜಾಲ್ಯಾರ್ ಹಾಂವ್ ಹೆಂ ಸಗ್ಳೆಂ ತುಕಾ ದಿತಲೊಂ.” ತೆದ್ವಾಂ ಜೆಜುನ್ ಮ್ಹಳೆಂ : “ಚಲ್ ಹಾಂಗಾಚೊ ಸೈತಾನಾ, ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ : ‘ಸರ್ವೆಸ್ಪರಾಕ್, ತುಜ್ಯಾ ದೆವಾಕ್ ಆರಾಧನ್ ಕರ್, ತಾಚಿ ಎಕ್ಲ್ಯಾಚಿ ಮಾತ್ರ್ ಸೆವಾ ಕರ್’.” ತಿತ್ಲ್ಯಾರ್ ದೆಂವ್ಚಾರ್ ತಾಕಾ ಸೊಡ್ನ್ ಗೆಲೊ. ಆನಿ ತೊ ವೆತಚ್ ದೇವ್ದೂತ್ ಯೇವ್ನ್ ತಾಚಿ ಸೆವಾ ಕರುಂಕ್ ಲಾಗ್ಲೆ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ - ಪಯ್ಲೆಂ ವಾಚಪ್

ಸಿರಾಕ್ 15:16-20 ಖೊಟೆಪಣಾಚಿ ವಾಟ್ ಧರುಂಕ್ ಕೊಣಾಕ್ಚ್ ತಾಣಿಂ ಫರ್ಮಾಂವ್ಕ್ ನಾ. ಸಿರಾಖಾಚ್ಯಾ ಪುಸ್ತಕಾಂತ್ಲೆಂ ವಾಚಪ್ ತುಜೆ ಮುಕಾರ್ ತಾಣೆಂ ಉಜೊ ಆನಿ ಉದಕ್ ದವರ್ಲ್ಯಾಂತ್, ಖಂಯ್ಚೆಂ ತುಂ ವಿಂಚ್ತಾಯ್, ತಾಕಾ ಹಾತ್ ಘಾಲ್. ಮನ್ಶಾ ಮುಕಾರ್ ಜಿವಿತ್ ಆನಿ ಮರಣ್ ಆಸಾತ್, ಖಂಯ್ಚೆಂ ತೊ ವಿಂಚ್ತಾ, ತೆಂ ತಾಕಾ ಮೆಳ್ತಲೆಂ. ಸರ್ವೆಸ್ಪರಾಚಿ ಜಾಣ್ವಾಯ್ ಭೋವ್ ವ್ಹಡ್, ತೊ ಪದ್ವೆನ್ ಬಳ್ವಂತ್ ಆನಿ ಸಗ್ಳೆಂ ಪಳೆತಾ. ತಾಚಿ ಭಿರಾಂತ್ ಧರ್ತಲ್ಯಾಂಚೆರ್ ತಾಚೆ ದೊಳೆ ಆಸಾತ್, ಆನಿ ಮನ್ಶಾಚಿ ಹರೇಕ್ ಕರ್ಣಿ ತೊ ಜಾಣಾ. ಖೊಟೊ ಜಾಂವ್ಕ್ ತೊ ಕೊಣಾಕ್ಚ್ ಫರ್ಮಾಯ್ನಾ, ಪಾತಕ್ ಕರುಂಕ್ ತೊ ಕೊಣಾಕ್ಚ್ ಪರ್ವಣ್ಗಿ ದಿನಾ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ – ಕೀರ್ತನ್

ಅಂತರ್ ಗೀತ್: ಕೀರ್ತನ್ : 118 ಶ್ಲೋಕ್ : ಸರ್ವೆಸ್ಪರಾಚೆ ಉಪದೆಸ್ ಪಾಳ್ತಾತ್ ತಿಂ ಭಾಗಿ! 1. ಖತಾವಿಣ್ ಜಿಣಿಯೆನ್ ಸರ್ವೆಸ್ಪರಾಚೆಂ ಧರ್ಮ್ಶಾಸ್ತ್ರ್ ಪಾಳ್ತಾತ್ ತಿಂ ಭಾಗಿ, ತಾಚಿಂ ನಿಯಮಾಂ ವಿಶ್ವಾಸಾನ್ ಪಾಳುನ್ ಸಗ್ಳ್ಯಾ ಕಾಳ್ಜಾನ್ ತಾಕಾ ಸೊಧ್ತಾತ್ ತಿಂ ಭಾಗಿ! 2. ತುಜೆ ಕಾಯ್ದೆ ಆಮಿ ಚತ್ರಾಯೆನ್ ಪಾಳುಂಕ್ ಜಾಯ್ ಮ್ಹಣ್ ತುವೆಂ ತೆ ಪರ್ಗಟ್ ಕೆಲ್ಯಾಯ್, ತುಜ್ಯೆ ಖುಶೆಕ್ ಪಾಳೊ ದಿಂವ್ಕ್ ಮ್ಹಜೆ ಪಾಂಯ್, ಮ್ಹಜಿ ಚಾಲ್, ಸದಾಂಚ್ ಥಿರ್ ಆಸುಂ. 3. ತುಜ್ಯಾ ಚಾಕ್ರಾಕ್ ದಯಾ ದಾಖಯ್, ತೆದ್ವಾಂ ಜಿವಂತ್ ಆಸುನ್ ತುಜೆಂ ಉತರ್ ಹಾಂವ್ ಪಾಳ್ತಲೊಂ. ಮ್ಹಜೆ ದೊಳೆ ಉಘಡ್; ತೆದ್ವಾಂ ತುಜ್ಯಾ ಧರ್ಮ್ಶಾಸ್ತ್ರಾಚಿಂ ಅದ್ಭುತಾಂ ಹಾಂವ್ ನಿಹಾಳ್ತಲೊಂ. 4. ತುಜ್ಯಾ ನಿಯಮಾಂಚಿ ವಾಟ್ ಮ್ಹಾಕಾ ದಾಖಯ್, ಸರ್ವೆಸ್ಪರಾ, ಆಖೇರ್ ಪರ್ಯಾನ್ ಹಾಂವ್ ತ್ಯೆ ವಾಟೆನ್ ಚಲ್ತಲೊಂ. ತುಜೆ ಕಾಯ್ದೆ ಪಾಳುಂಕ್ ಮ್ಹಾಕಾ ಶಿಕಯ್, ಖರ್ಯಾ ಕಾಳ್ಜಾನ್ ಹಾಂವ್ ತೆ ಪಾಳ್ತಲೊಂ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ – ದುಸ್ರೆಂ ವಾಚಪ್

ಭಾವಾಂ-ಭಯ್ಣಿಂನೊ, ತರಿಪುಣ್ ಸಂಪೂರ್ಣ್ಕಾಯೆಕ್ ಪಾವ್ಲಲ್ಯಾಂ ಮಧೆಂ ಆಮಿ ಜಾಣ್ವಾಯೆಚಿಂ ಉತ್ರಾಂ ಉಲಯ್ತಾಂವ್; ಪುಣ್ ಹಿ ಜಾಣ್ವಾಯ್ ಸರೊನ್ ವೆಚ್ಯಾ ಹ್ಯಾ ಕಾಳಾಚಿ ನ್ಹಯ್, ವಾ ಪಾಡಾವ್ ಜಾವ್ನ್ ವೆಚ್ಯಾ ಹ್ಯಾ ಕಾಳಾಚ್ಯಾ ಅಧಿಕಾರ್ಯಾಂಚಿಯೀ ನ್ಹಯ್. ಆಮಿ ಉಲಯ್ತಾಂವ್ ತಿ ದೆವಾಚಿ ಜಾಣ್ವಾಯ್ ಎದೊಳ್ ಪರ್ಯಾನ್ ಲಿಪೊನ್ ಆಸ್ಲಲೊ ತಾಚೊ ಗುಟ್, ಸಂಸಾರಾಚ್ಯಾ ಆರಂಭಾ ಆದಿಂ ದೆವಾನ್ ಆಮ್ಚೇ ಮಹಿಮೇ ಖಾತಿರ್ ಯೆವ್ಜಿಲ್ಲೊ ತಸಲೊ. ಸಂಸಾರಾಚ್ಯಾ ಅಧಿಕಾರ್ಯಾಂ ಮಧ್ಲ್ಯಾ ಕೊಣಾಕ್ಚ್ ತೊ ಕಳಿತ್ ನಾತ್ಲ್ಲೊ; ತಾಂಕಾಂ ತೊ ಕಳಿತ್ ಆಸ್ಲ್ಲೊ ಜಾಲ್ಯಾರ್, ಮಹಿಮೆಚ್ಯಾ ದೆವಾಕ್ ತೆ ಕೆದಿಂಚ್ ಖುರ್ಸಾರ್ ಮಾರ್ತೆನಾತ್. ಪವಿತ್ರ್ ಪುಸ್ತಕಿಂಚ್ ಅಶೆಂ ಬರೊವ್ನ್ ಆಸಾ: “ದೊಳ್ಯಾಂನಿ ದೆಖುಂಕ್ ನಾ, ಕಾನಾಂನಿ ಆಯ್ಕುಂಕ್ ನಾ, ಮನ್ಶಾಂಚ್ಯಾ ಕಾಳ್ಜಾಂತ್ ರಿಗುಂಕ್ ನಾ, ಕಿತೆಂ ಸಕ್ಕಡ್ ದೆವಾನ್ ತಯಾರ್ ಕರ್ನ್ ದವರ್ಲಾಂ ಮ್ಹಣ್ ಆಪ್ಣಾಚೊ ಮೋಗ್ ಕರ್ತಲ್ಯಾಂಕ್.” ಪುಣ್ ಆಪ್ಲ್ಯಾ ಪವಿತ್ರ್ ಅತ್ಮ್ಯಾ ಉದೆಶಿಂ ದೆವಾನ್ ಆಮ್ಕಾಂ ಹ್ಯೊ ಸಂಗ್ತಿ ಉಗ್ಡಾಪೆ ಕೆಲ್ಯಾತ್. ಕಿತ್ಯಾಕ್ ಪವಿತ್ರ್ ಅತ್ಮೊ ಸರ್ವ್ ವಸ್ತುಂಚಿ, ದೆವಾಚ್ಯಾ ಗೂಂಡ್ ಸಂಗ್ತಿಂಚಿ ಲೆಗುನ್ ಸೊಧ್ನಾ ಕರ್ತಾ.

29 January

ಫೆಬ್ರೆರ್ 15 - ಸಾಧ್ಯಾ ಕಾಳಾಚೊ ಸವೊ ಆಯ್ತಾರ್ - ಸುವಾರ್ತಾ

ಮಾತೆವ್ 5:17-37 “ನಿಯಮ್ಶಾಸ್ತ್ರ್ ವಾ ಪ್ರವಾದ್ಯಾಂಚೆಂ ಉತರ್ ರದ್ಧ್ ಕರುಂಕ್ ಹಾಂವ್ ಆಯ್ಲಾಂ ಮ್ಹಣ್ ತುಮಿ ಚಿಂತಿನಾಕಾತ್; ರದ್ಧ್ ಕರುಂಕ್ ನ್ಹಯ್, ಬಗರ್ ತೆಂ ಸಂಪೂರ್ಣ್ ಕರುಂಕ್ ಮ್ಹಣ್ ಹಾಂವ್ ಆಯ್ಲಾಂ. ಸತ್ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಆಕಾಸ್ ಆನಿ ಭುಮಿ ಸರ ಪರ್ಯಾನ್ ಘಡ್ಚೆಂ ಆಸಾ ತೆಂ ಘಡ್ಲ್ಯಾ ಶಿವಾಯ್ ನಿಯಮ್ಶಾಸ್ತ್ರಾಂತ್ಲೆಂ ಎಕ್ಚ್ ಏಕ್ ಅಕ್ಷರ್ ವಾ ತಿಬೊ ಪುಸುನ್ ವೆಚೊನಾ. ದೆಕುನ್ ಜೊ ಕೊಣ್ ಹ್ಯಾ ನಿಯಮ್ಶಾಸ್ತ್ರಾಂತ್ಲೆಂ ಏಕ್ ಅತೀ ಲ್ಹಾನ್ ನಿಯಮ್ ಮೊಡ್ತಾ ವಾ ತಶೆಂ ಮೊಡುಂಕ್ ಹೆರಾಂಕ್ ಶಿಕಯ್ತಾ, ತಸಲ್ಯಾಕ್ ಸರ್ಗಿಂಚ್ಯಾ ರಾಜ್ಯಾಂತ್ ನಿಮಾಣೊ ಮ್ಹಣ್ ಲೆಖ್ತಲೆ. ಪುಣ್ ಜೊ ಕೊಣ್ ನಿಯಮಾಂ ಪಾಳ್ತಾ ಆನಿ ಹೆರಾಂಕ್ಯೀ ಪಾಳುಂಕ್ ಶಿಕಯ್ತಾ ತಾಕಾ ಸರ್ಗಿಂಚ್ಯಾ ರಾಜ್ಯಾಂತ್ ವರ್ತೊ ಮ್ಹಣ್ ಲೆಖ್ತಲೆ. ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: “ಶಾಸ್ತ್ರ್ಯಾಂ ಆನಿ ಫಾರಿಜೆವಾಂಚೇ ಧರ್ಮ್ದಿಷ್ಟಿ ಪ್ರಾಸ್ ತುಮ್ಚಿ ಧರ್ಮ್ದೀಷ್ಟ್ ಚಡ್ ಬರಿ ಜಾಲ್ಲೇಖರಿತ್ ತುಮಿ ಸರ್ಗಿಂಚ್ಯಾ ರಾಜ್ಯಾಂತ್ ರಿಗ್ಚಿಂನಾತ್. “ಆಮ್ಚ್ಯಾ ಪುರ್ವಜಾಂಕ್ ಸಾಂಗ್ಲ್ಲೆಂ ತುಮಿ ಆಯ್ಕಲಾಂ: ‘ಜಿವೆಶಿಂ ಮಾರಿನಾಕಾ; ಜೊ ಕೊಣ್ ಜಿವೆಶಿಂ ಮಾರ್ತಾ ತಾಕಾ ನಿತಿಸಭೆಚೇ ಝಡ್ತೆಕ್ ಉಬೊ ಕರಿಜಯ್.’ ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೊ ಕೊಣ್ ಆಪ್ಲ್ಯಾ ಭಾವಾಚೆರ್ ರಾಗಾರ್ ರಾವ್ತಾ, ತಾಕಾ ನಿತಿಸಭೇ ಮುಖಾರ್ ಹಾಡಿಜಯ್; ಆನಿ ಜೊ ಕೊಣ್ ಆಪ್ಲ್ಯಾ ಭಾವಾಕ್ ‘ಅರೇ ಪೆದ್ದಾ’ ಮ್ಹಣ್ತಾ, ತಾಕಾ ಸಾನ್ಹೆದ್ರಿನ್ ಸಭೇ ಮುಖಾರ್ ಹಾಡಿಜಯ್. ಆನಿ ಜೊ ಕೊಣ್ ತಾಕಾ ‘ಅರೇ ಪಿಶಾ’ ಮ್ಹಣ್ತಾ, ತಾಣೆಂ ಯೆಮ್ಕೊಂಡಾಚ್ಯಾ ಉಜ್ಯಾಂತ್ ಲಾಸಜಯ್. “ದೆಕುನ್ ತುಂ ವೇದಿ ಮುಖಾರ್ ತುಜಿ ಕಾಣಿಕ್ ಭೆಟೊಂವ್ಕ್ ವೆತಾನಾ, ಜರ್ ತುಜ್ಯಾ ಭಾವಾಕ್ ತುಜೇ ವಿರೋಧ್ ಕಾಂಯ್ ಆಸಾ ಮ್ಹಣ್ ತುಕಾ ಉಗ್ಡಾಸ್ ಯೆತ್, ತರ್ ತಿ ತುಜಿ ಕಾಣಿಕ್ ಥಂಯ್ಚ್ ವೇದಿ ಮುಖಾರ್ ಸೊಡ್. ಪಯ್ಲೆಂ ವಚ್ ಆನಿ ತುಜ್ಯಾ ಭಾವಾಕಡೆ ರಾಜಿ ಜಾ; ಉಪ್ರಾಂತ್, ಪಾಟಿಂ ಯೇವ್ನ್ ತುಜಿ ಕಾಣಿಕ್ ಭೆಟಯ್. “ತುಂ ಆನಿ ತುಜೊ ವಾದಿ ಕೊಡ್ತಿಚೇ ವಾಟೇರ್ ಆಸ್ತಾನಾಚ್ ತಾಚೇಲಾಗಿಂ ರಾಜಿ ಜಾ, ನಾ ಜಾಲ್ಯಾರ್ ವಾದಿ ತುಕಾ ನಿತಿಕರ್ತಾ ಆಧೀನ್ ಕರಿತ್, ಆನಿ ನಿತಿಕರ್ತ್ ತುಕಾ ಪಾರ್ಯಾಂಚ್ಯಾ ಹಾತಾಂತ್ ದೀತ್ ಆನಿ ತುಕಾ ಬಂದೆಂತ್ ಘಾಲ್ತಿತ್. ಸತ್ಚ್ ಹಾಂವ್ ತುಕಾ ಸಾಂಗ್ತಾಂ: ಪೈಶಾಕ್ ಪೈಸೊ ಫಾರಿಕ್ ಕರಿಸರ್ ಥಂಯ್ಚೊ ತುಂ ಭಾಯ್ರ್ ಸರ್ಚೊನಾಯ್. “ ‘ಪ್ರದ್ವಾರ್ ಕರಿನಾಕಾ’ ಮ್ಹಣ್ ಪುರ್ವಜಾಂಕ್ ಸಾಂಗ್ಲ್ಲೆಂ ತುಮಿ ಆಯ್ಕಲಾಂ. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೊ ಕೊಣ್ ಖೊಟೇ ಆಶೆನ್ ಏಕ್ ಸ್ತ್ರಿಯೆಚೆರ್ ದೀಷ್ಟ್ ಲಾಯ್ತಾ, ತಾಣೆಂ ಆಪ್ಲ್ಯಾ ಕಾಳ್ಜಾಂತ್ ತಿಚೇಕಡೆ ಪ್ರದ್ವಾರ್ ಕರ್ನ್ಯೀ ಜಾಲಾ. “ತುಜೊ ಉಜ್ವೊ ದೊಳೊ ತುಕಾ ಪಾತ್ಕಾಕ್ ವೊಡ್ತಾ ಜಾಲ್ಯಾರ್ ತೊ ಕೊಂಕುನ್ ಕಾಡ್ ಆನಿ ಪಯ್ಸ್ ಉಡಯ್; ತುಜಿ ಸಗ್ಳಿ ಕೂಡ್ ಯಮ್ಕೊಂಡಾಂತ್ ಘಾಲ್ನ್ ಕಾಣ್ಘೆಂವ್ಚೇ ಪ್ರಾಸ್ ತುಜೊ ಏಕ್ ವಿಸ್ವೊ ತುವೆಂ ಹೊಗ್ಡಾವ್ನ್ ಕಾಣ್ಘೆಲ್ಲೊ ಅಧಿಕ್ ಬರೆಂ. ತುಜೊ ಉಜ್ವೊ ಹಾತ್ ತುಕಾ ಪಾತ್ಕಾಕ್ ವೊಡ್ತಾ ಜಾಲ್ಯಾರ್ ತೊ ಕಾತರ್ನ್ ಕಾಡ್ ಆನಿ ಪಯ್ಸ್ ಉಡಯ್. ತುಜಿ ಸಗ್ಳಿ ಕೂಡ್ ಯಮ್ಕೊಂಡಾಕ್ ವೆಚೇ ಪ್ರಾಸ್ ತುಜೇ ಕುಡಿಚೊ ಏಕ್ ವಿಸ್ವೊ ತುವೆಂ ಹೊಗ್ಡಾವ್ನ್ ಕಾಣ್ಘೆಲ್ಲೊ ಅಧಿಕ್ ಬರೆಂ. “ಹ್ಯಾ ಶಿವಾಯ್ ಅಶೆಂಯೀ ಸಾಂಗ್ಲ್ಲೆಂ ಆಸಾ: ‘ಕೊಣ್ ತರ್ಯೀ ಆಪ್ಲೇ ಬಾಯ್ಲೆಕ್ ಸೊಡ್ತಾ, ತಾಣೆಂ ತಿಕಾ ವೆಗ್ಳಾಚಾರ್ಪತ್ರ್ ಬರೊವ್ನ್ ದೀಜಯ್. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ವ್ಯಭಿಚಾರಾ ಶಿವಾಯ್ ದುಸ್ರ್ಯಾ ಖಂಯ್ಚಾಯೀ ಕಾರಣಾನ್ ಆಪ್ಲೇ ಬಾಯ್ಲೆಕ್ ಸೊಡ್ತಾ ತೊ ಹರ್ಯೆಕ್ಲೊ ತಿ ಪ್ರದ್ವಾರಿಣ್ ಜಾಂವ್ಕ್ ಕಾರಣ್ ಜಾತಾ; ಆನಿ ಜೊ ಕೊಣ್ ಅಶೆಂ ಸೊಡ್ಲಲೇ ಲಾಗಿಂ ಲಗ್ನ್ ಜಾತಾ, ತೊಯೀ ಪ್ರದ್ವಾರ್ ಆಧಾರ್ತಾ. “ಪುರ್ವಜಾಂಕ್ ಸಾಂಗ್ಲ್ಲೆಂ ತುಮಿ ಆಯ್ಕಲಾಂ: ‘ಸಪುತ್ ಘಾಲ್ನ್ ದಿಲ್ಲೆಂ ಉತರ್ ಮೊಡಿನಾಕಾ;’ ಆನಿ ‘ಸರ್ವೆಸ್ಪರಾ ಮುಖಾರ್ ಆಣ್ ಘಾಲ್ನ್ ಭಾಸಾಯ್ಲ್ಲೆಂ ಪಾರಿಕ್ ಕರ್’. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಸಪುತ್ ಘಾಲ್ಚೊಚ್ ನ್ಹಯ್ - ಆಕಾಸಾಚ್ಯಾ ನಾಂವಾನ್ ಸಪುತ್ ಘಾಲಿನಾಕಾತ್; ಕಿತ್ಯಾಕ್ ದೆವಾಚೆಂ ಶಿಯಾಸಣ್ ತೆಂ. ಭುಮಿಚ್ಯಾನ್ ಸಪುತ್ ಘಾಲಿನಾಕಾತ್; ಕಿತ್ಯಾಕ್ ದೆವಾಚ್ಯಾ ಪಾಂಯಾಂಚಿ ಮಣಯ್ ತಿ; ಜೆರುಜಲೆಮಾಚ್ಯಾ ನಾಂವಾನ್ ಸಪುತ್ ಘಾಲಿನಾಕಾತ್; ಕಿತ್ಯಾಕ್ ವ್ಹಡ್ ರಾಯಾಚೆಂ ಶಹರ್ ತೆಂ. ಆನಿ ತುಜ್ಯಾ ಮಾತ್ಯಾಚ್ಯಾ ನಾಂವಾನ್ಯೀ ಸಪುತ್ ಘಾಲಿನಾಕಾ; ಕಿತ್ಯಾಕ್ ಎಕ್ಚ್ ಏಕ್ ಕೇಸ್ ಧವೊ ವಾ ಕಾಳೊ ಕರುಂಕ್ ತುಂ ಸಕನಾಯ್. ತುಮ್ಚೆಂ ಉಲೊವ್ಣೆಂ ಜಾಯ್ಜಯ್ ‘ವ್ಹಯ್’ ವಾ ‘ನ್ಹಯ್’; ಹಾಚೇ ಪ್ರಾಸ್ ಚಡಿತ್ ಕಿತೆಂಯೀ ಆಸ್ಲ್ಯಾರ್ ತೆಂ ದೆಂವ್ಚಾರಾ ಥಾವ್ನ್ ಯೆತಾ.

29 January

ಫೆಬ್ರೆರ್ 8 - ಸಾಧ್ಯಾ ಕಾಳಾಚೊ ಪಾಂಚ್ವೊ ಆಯ್ತಾರ್ – ಕೀರ್ತನ್

ಕೀರ್ತನ್ : 111 ಶ್ಲೋಕ್ : ನಿತಿವಂತಾಕ್ ಕಾಳೊಕಾಂತ್ ಉಜ್ವಾಡ್ ಮೆಳ್ತಾ. ವ ಸರ್ವೆಸ್ಪರಾಕ್ ಜೈ, ಜೈ! 1. ನಿತಿವಂತಾಕ್ ಕಾಳೊಕಾಂತ್ ಉಜ್ವಾಡ್ ಮೆಳ್ತಾ, ದೇವ್ ತಾಕಾ ಮೊವಾಳ್, ದಯಾಳ್ ಆನಿ ವಿಶ್ವಾಸಿ ಜಾವ್ನಾಸಾ ಬರೊ ಮನಿಸ್ ದಯಾ ದಾಖೊವ್ನ್ ಉಸ್ಣೆಂ ದಿತಾ, ತೊ ಆಪ್ಲೊ ಧಂದೊ ಪ್ರಮಾಣಿಕ್ಪಣಿಂ ಚಲಯ್ತಾ. 2. ನಿತಿವಂತ್ ಮನಿಸ್ ಕೆದಿಂಚ್ ಹಾಲ್ಚೊ ನಾ, ತಾಚೊ ಉಗ್ಡಾಸ್ ಉರ್ತಾ ಸದಾಂಕಾಲ್. ವಾಯ್ಟ್ ಖಬರ್ ಯೆತಾನಾ ತಾಕಾ ಭ್ಯೆಂ-ಭಿರಾಂತ್ ದಿಸನಾ ಕಿತ್ಯಾಕ್ ಥಿರ್ ಕಾಳ್ಜಾನ್ ಸರ್ವೆಸ್ಪರಾಚೆರ್ ತಾಣೆಂ ವಿಶ್ವಾಸ್ ದವರ್ಲಾ. 3. ದೃಢ್ ಕಾಳ್ಜಾಚ್ಯಾಕ್ ಭಿರಾಂತ್ಚ್ ನಾ; ಉದಾರ್ ಹಾತಾನ್ ದುಬ್ಳ್ಯಾ-ಧಾಕ್ಟ್ಯಾಂಕ್ ತೊ ದಿತಾ, ತಾಚೆಂ ಬರೆಪಣ್ ಸದಾಂಕಾಲ್ ಉರ್ತಾ, ಚಡ್ ಆನಿ ಚಡ್ ಮಾನ್ ತಾಕಾ ಮೆಳ್ತಾ.

29 January

ಫೆಬ್ರೆರ್ 8 - ಸಾಧ್ಯಾ ಕಾಳಾಚೊ ಪಾಂಚ್ವೊ ಆಯ್ತಾರ್ –ದುಸ್ರೆಂ ವಾಚಪ್

1 ಕೊರಿಂಥ್ 2:1-5 ಭಾವಾಂಭಯ್ಣಿಂನೋ, ಹಾಂವ್ ತುಮ್ಚೇ ಮಧೆಂ ಆಯ್ಲ್ಲೊಂ ತೆದ್ನಾ ವಾಚ್ಯಾ ಸಕ್ತೆಚ್ಯಾ ಆನಿ ಜಾಣ್ವಾಯೆಚ್ಯಾ ದರ್ಬಾರಾನ್ ಕ್ರಿಸ್ತಾಚೊ ಗುಟ್ ತುಮ್ಕಾಂ ಪರ್ಗಟ್ ಕರುಂಕ್ ಆಯ್ಲ್ಲೊ ನ್ಹಯ್. ಹಾಂವ್ ತುಮ್ಚೇ ಸವೆಂ ಆಸ್ಲಲ್ಯಾ ವೆಳಾರ್, ಜೆಜು ಕ್ರಿಸ್ತಾ ಶಿವಾಯ್ - ಖುರ್ಸಾಯ್ಲಲ್ಯಾ ಜೆಜು ಕ್ರಿಸ್ತಾ ಶಿವಾಯ್ - ದುಸ್ರೆಂ ಕಸಲೆಂಚ್ ಮನಾಂತ್ ಚಿಂತ್ಚೆಂ ನ್ಹಯ್ ಮ್ಹಣ್ ಹಾಂವೆಂ ನಿಶ್ಚಿತ್ ಕೆಲ್ಲೆಂ. ಅಶೆಂ ಅಸಕ್ತ್ಪಣಿಂ ಭಿಯೆವ್ನ್ ಆನಿ ಕಾಂಪೊನ್ ಮ್ಹಳ್ಳೇಬರಿ ಹಾಂವ್ ತುಮ್ಚೇ ಮಧೆಂ ಆಸ್ಲ್ಲೊಂ. ಮ್ಹಜ್ಯಾಚ್ ಉತ್ರಾಂನಿ ಹಾಂವೆಂ ಪರ್ಗಟ್ ಕೆಲ್ಲೊ ಸಂದೇಶ್ ಮನಾಂ ವ್ಹಯ್ ಕರ್ತಲ್ಯಾ ಮನ್ಶಾಂಚ್ಯಾ ಜಾಣ್ವಾಯೆಚ್ಯಾ ಉತ್ರಾಂಚೊ ನ್ಹಯ್; ಬಗರ್ ಪವಿತ್ರ್ ಅತ್ಮ್ಯಾಚಿ ಸಕತ್ ದಾಖೊವ್ನ್ ದಿಂವ್ಚೊ. ಕಿತ್ಯಾಕ್ ತುಮ್ಚ್ಯಾ ಭಾವಾರ್ಥಾಚಿ ಬುನ್ಯಾದ್ ಮನ್ಶಾಂಚೇ ಜಾಣ್ವಾಯೆಚೆರ್ ನ್ಹಯ್, ಬಗರ್ ದೆವಾಚೇ ಸಕ್ತೆಚೆರ್ ಪಡಜಯ್ ಮ್ಹಣ್ ಹಾಂವೆಂ ಲೆಖ್ಲೆಂ.

29 January

ಫೆಬ್ರೆರ್ 8 - ಸಾಧ್ಯಾ ಕಾಳಾಚೊ ಪಾಂಚ್ವೊ ಆಯ್ತಾರ್ - ಸುವಾರ್ತಾ

ಮಾತೆವ್ 5:13-16 “ತುಮಿ ಪೃಥ್ವಿಚೆಂ ವಿೂಟ್. ವಿೂಟ್ಚ್ ಜರ್ ಆಳ್ನಿ ಜಾಲೆಂ, ತರ್ ಕಿತ್ಯಾನ್ ತಾಕಾ ಖಾರ್ಸಾಣ್ ದಿವ್ಚಿ? ಭಾಯ್ರ್ ಉಡೊಂವ್ಕ್ ಆನಿ ಪಾಂಯಾಂಥಳಾ ಮಸ್ತುಂಕ್ ಶಿವಾಯ್ ಹೆರ್ ಕಿತ್ಯಾಕ್ಯೀ ತೆಂ ಉಪ್ಕಾರ್ನಾ. ತುಮಿ ಸಂಸಾರಾಚೊ ಉಜ್ವಾಡ್. ದೊಂಗ್ರಾಚೇ ತಾಳ್ವೆರ್ ಬಾಂಧ್ಲಾಂ ತೆಂ ಶಹರ್ ಲಿಪೊನ್ ಉರಾನಾ. ಕೊಣ್ಯೀ ಮನಿಸ್ ದಿವೊ ಪೆಟೊವ್ನ್ ಕಳ್ಶೇ ಪಂದಾ ದವರಿನಾ. ಬಗರ್ ಘರಾಂತ್ ಆಸ್ಲಲ್ಯಾ ಸಮೆಸ್ತಾಂಕ್ ಉಜ್ವಾಡ್ ಜಾಯ್ಸೊ ದಿವ್ಟೊಣೆರ್ ದವರ್ತಾ. ತಸೊಚ್ ತುಮ್ಚೊ ಉಜ್ವಾಡ್ ಮನ್ಶಾಂ ಮುಖಾರ್ ಪರ್ಜಳುಂ. ತೆ ತುಮ್ಚ್ಯೊ ಬರ್ಯೊ ಕನ್ರ್ಯೊ ಪಳೆಂವ್ ಆನಿ ತುಮ್ಚ್ಯಾ ಸರ್ಗಿಂಚ್ಯಾ ಬಾಪಾಕ್ ಮಹಿಮಾ ದಿಂವ್.

29 January

ಫೆಬ್ರೆರ್ 1 - ಸಾಧ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ - ಪಯ್ಲೆಂ ವಾಚಪ್

ಝೆಫ. 2:3; 3:12-13 ಝೆಫನೀಯಾ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್ ದೆಶಾಂತ್ಲ್ಯಾ ಸಗ್ಳ್ಯಾ ಲ್ಹಾನ್ವಿಕ್ ಮನ್ಶಾಂನೊ, ದೆವಾಚ್ಯೊ ಆಜ್ಞಾ ಪಾಳ್ತಲ್ಯಾಂನೊ, ಸರ್ವೆಸ್ಪರಾಕ್ ಸೊದಾ. ಪ್ರಾಮಾಣಿಕ್ಪಣ್ ಸೊದಾ, ಲ್ಹಾನ್ವಿಕಾಯ್ ಸೊದಾ: ಸರ್ವೆಸ್ಪರಾಚ್ಯಾ ಕ್ರೊಧಾಚ್ಯಾ ದಿಸಾ, ಎಕಾದ್ಯಾ ವೆಳಾರ್ ತುಮ್ಕಾಂ ಆಸ್ರೊ ಮೆಳತ್. ಕಿತ್ಯಾಕ್ ಹಾಂವ್ ತುಜೆ ಮದೆಂ, ಏಕ್ ಲ್ಹಾನ್ವಿಕ್ ಆನಿ ಖಾಲ್ತಿ ಪರ್ಜಾ ದವರ್ತಲೊಂ, ಆನಿ ಇಸ್ರಾಯೆಲಾಂತ್ ಉರ್ಲ್ಯಾಂತ್ ತಿಂ ಸರ್ವೆಸ್ಪರಾಚ್ಯಾ ನಾಂವಾ ಥಂಯ್ ಆಸ್ರೊ ಘೆತಲಿಂ. ವಾಯ್ಟ್ ತಿಂ ಕರ್ಚಿಂ ನಾಂವ್, ಪೊಟಿ ಮಾರ್ಚಿಂ ನಾಂತ್, ಕಪಟಿ ಜೀಬ್ ತಾಂಚ್ಯಾ ತೊಂಡಾಂತ್ ಆಸ್ಚಿ ನಾ. ಕೊಣಾಯ್ಚಿ ಭಿರಾಂತ್ ನಾಸ್ತಾಂ, ತಿಂ ಚರವಾಕ್ ವೆತಲಿಂ ಆನಿ ವಿಶೆವ್ ಘೆತಲಿಂ.

29 January

ಫೆಬ್ರೆರ್ 1 - ಸಾಧ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ – ಕೀರ್ತನ್

ಕೀರ್ತನ್ 145 ಅಂತರ್ ಗೀತ್ ಶ್ಲೋಕ್ : ಆಪುಣ್ ದುರ್ಬಳಿಂ ಮ್ಹಣ್ ಜಾಣಾ ಆಸಾತ್ ತಿಂ ಭಾಗಿ! ಸರ್ಗಿಂಚೆಂ ರಾಜ್ಯ್ ತಾಂಚೆಂ ವ ಸರ್ವೆಸ್ಪರಾಕ್ ಜೈ, ಜೈ! 1. ಸರ್ವೆಸ್ಪರ್ ಸದಾಂಚ್ ವಿಶ್ವಾಸ್ ಪುರ್ತೊ, ಅನ್ನ್ಯಾಯ್ ಜಾಲ್ಲ್ಯಾಂಕ್ ನ್ಯಾಯ್-ನೀತ್ ಜೊಡ್ನ್ ದಿತಾ ತೊ; ಭುಕೆಲ್ಲ್ಯಾಂಕ್ ತೊ ಗ್ರಾಸ್ ದಿತಾ, ಕೈದ್ಯಾಂಚ್ಯೊ ಸಾಂಕ್ಳ್ಯೊ ತೊ ತುಟೊವ್ನ್ ಉಡಯ್ತಾ 2. ಸರ್ವೆಸ್ಪರ್ ಕುಡ್ರ್ಯಾಂಚೆ ದೊಳೆ ಉಘಡ್ತಾ, ಬಾಗ್ವಲ್ಲ್ಯಾಂಕ್ ನೀಟ್ ಉಬಿಂ ಕರ್ತಾ; ಸರ್ವೆಸ್ಪರ್ ಪರ್ಗಾಂವ್ಯಾಂಕ್ ರಾಖ್ತಾ, ಅನಾಥಾಂಕ್ ಆನಿ ವಿಧ್ವಿಂಕ್ ತೊಚ್ ಸಾಂಬಾಳ್ತಾ. 3. ಸರ್ವೆಸ್ಪರ್ ನಿತಿವಂತಾಂಚಿ ಅಪುರ್ಬಾಯ್ ಕರ್ತಾ, ಪುಣ್ ಖೊಟ್ಯಾಂಚ್ಯೊ ಆಲೋಚನೋ, ನಿರ್ಫಳ್ ಕರ್ತಾ; ಸರ್ವೆಸ್ಪರ್ ಸದಾಂಕಾಲ್ ರಾಜ್ವಟ್ ಚಲಯ್ತಲೊ ಏ ಸಿಯೋನಾ, ತುಜೊ ದೇವ್ ಸಂತತೆಚ್ಯೆ ಸಂತತೆಕ್ ತುಜೊ ರಾಯ್ ಜಾತಲೊ.