Mangala Jyothi
Diocesan Biblical, Catechetical and Liturgical Center
Diocese of Mangalore
Mangala Jyothi
Diocesan Biblical, Catechetical and Liturgical Center
Diocese of Mangalore
Home
Departments
Prayers
News
Photo Gallery
Results
Magazines
Sunday Reading
Contact
Select a date
keyboard_arrow_down
Choose a year...
2025
keyboard_arrow_down
Choose a month...
November
October
24 November
ದಸೆಂಬರ್ 29 - ಭಾಗೆವಂತ್ ಕುಟ್ಮಾಚಿ ಪರಬ್ - ಪಯ್ಲೆಂ ವಾಚಪ್
ಸಿರಾ.3:3-7,14-17 ಭುಗ್ರ್ಯಾಂನಿ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿಂವ್ಕ್ ಜಾಯ್ ಮ್ಹಣ್ ಸರ್ವೆಸ್ಪರಾನ್ ಆದೇಶ್ ದಿಲಾ, ಆನಿ ಪುತಾಂನಿ ಆಪ್ಲೆ ಆವಯ್ಚಿಂ ಹಕ್ಕಾಂ ಮಾನುನ್ ಘೆಂವ್ಕ್ ಜಾಯ್ ಮ್ಹಣ್ ಥಾರಾಯ್ಲಾಂ. ಜೊ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿತಾ, ತೊ ಆಪ್ಲ್ಯಾ ಪಾತ್ಕಾಂಚೆಂ ಫಾರಿಕ್ಪಣ್ ದಿತಾ; ಜೊ ಆಪ್ಲೆ ಆವಯ್ಕ್ ಮಾನ್ ದಿತಾ, ತೊ ದಿರ್ವೆಂ ಜಮಯ್ತಲ್ಯಾ ಮನ್ಶಾ ಪರಿಂ. ಜೊ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿತಾ, ತಾಕಾ ತಾಚ್ಯಾ ಖಾಶಾ ಭುಗ್ರ್ಯಾಂ ಉದೆಶಿಂ ಸಂತೊಸ್ ಮೆಳ್ತಲೊ, ಆನಿ ತೊ ಪ್ರಾರ್ಥನ್ ಕರ್ತಲೊ ತೆದ್ನಾ ದೇವ್ ತೆಂ ಆಯ್ಕತಲೊ. ಜೊ ಆಪ್ಲ್ಯಾ ಬಾಪಾಯ್ಕ್ ಮಾನ್ ದಿತಾ, ತಾಕಾ ಲಾಂಬ್ ಆವ್ಕ್ ಮೆಳ್ತಲೆಂ, ಜೊ ಸರ್ವೆಸ್ಪರಾಕ್ ವಿದೇಯ್ ಜಾವ್ನ್ ಚಲ್ತಾ, ತೊ ಆಪ್ಲೆ ಆವಯ್ಕ್ ಸಂತೊಸ್ಭರಿತ್ ಕರ್ತಾ, ಮ್ಹಜ್ಯಾ ಪುತಾ, ತುಜ್ಯಾ ಬಾಪಾಯ್ಚೆ ಉತಾರ್ ಪ್ರಾಯೆರ್ ತಾಚೊ ಸಾಂಬಾಳ್ ಕರ್, ತೊ ವಾಂಚ ಪರ್ಯಾಂತ್ ತಾಕಾ ದೂಖ್ ದಿನಾಕಾ. ತಾಚೆಂ ಗಿನ್ಯಾನ್ ಅಸ್ಕತ್ ಜಾಯ್ತ್ ಜಾಲ್ಯಾರ್ಯಿ, ತುಂ ತಾಕಾ ಸೊಸ್ಣಿಕಾಯೆನ್ ಸಮ್ಜುನ್ ಘೆ; ತುಕಾ ಭಲಾಯ್ಕಿ ಆನಿ ಘಟಾಯ್ ಆಸಾ ಮ್ಹಣ್ ತಾಚಿ ಬೆಪರ್ವಾ ಕರಿನಾಕಾ, ಕಿತ್ಯಾಕ್ ಬಾಪಾಯ್ಕ್ ದಾಕಯ್ಲ್ಲೊ ಮಯ್ಪಾಸ್ ಕೆದಿಂಚ್ ವಿಸ್ರೊನ್ ವೆಚೊ ನಾ, ಬಗರ್ ತುಜ್ಯಾ ಪಾತ್ಕಾಂಚೆಂ ಫಾರಿಕ್ಪಣ್ ದಿಂವ್ಕ್ ತೊ ಉಪ್ಕಾರಾಕ್ ಪಡ್ತಲೊ.
Show more
24 November
ದಸೆಂಬರ್ 29 - ಭಾಗೆವಂತ್ ಕುಟ್ಮಾಚಿ ಪರಬ್ – ಕೀರ್ತನ್
ಕೀ.127 ಶ್ಲೋಕ್: ಸೊಮಿಯಾಕ್ ಭಿಯೆತಾತ್ ಆನಿ ತಾಚ್ಯೆ ವಾಟೆನ್ ಚಲ್ತಾತ್ ತಿಂ ಸುಭಾಗಿ! 1. ಸೊಮಿಯಾಕ್ ಭಿಯೆತಾತ್ ಆನಿ ತಾಚ್ಯೆ ವಾಟೆನ್ ಚಲ್ತಾತ್ ತಿಂ ಸುಭಾಗಿ! ತುಜ್ಯಾ ಹಾತಾಂಚ್ಯಾ ಕಷ್ಟಾಂಚೆಂ ತುಕಾ ಖಾಂವ್ಕ್ ಮೆಳ್ತಲೆಂ, ತುಂ ಸುಖೆಸ್ತ್ ಆನಿ ತುಜೆಂ ಸಗ್ಳೆಂ ನಂದನ್ ಜಾತಲೆಂ. 2. ತುಜ್ಯಾ ಘರಾಚ್ಯಾ ಭಿತರ್ಲ್ಯಾ ಕುಡಾಂತ್ ತುಜಿ ಪತಿಣ್ ಫಳದಾಯೆಕ್ ದಾಕ್ವಾಲಿಬರಿ ಆಸ್ತಲಿ, ತುಜಿಂ ಭುರ್ಗಿಂ ತುಜ್ಯಾ ಮೆಜಾ ಭೊಂವ್ತಿಂ ಜೈತುನಾಚ್ಯಾ ಕೊಂಬ್ರ್ಯಾಂ ಸಾರ್ಕಿಂ ವಸ್ತಲಿಂ. 3. ಸರ್ವೆಸ್ಪರಾಚಿ ಭೈಂ-ಭಿರಾಂತ್ ಆಸ್ಲಲ್ಯಾಕ್ ಆಸಲೆಂ ಭಾಗ್ ಫಾವೊ ಜಾತಲೆಂ. ಸಿಯೊನಾಂತ್ಲೊ ಸರ್ವೆಸ್ಪರ್ ತುಜೆರ್ ಆಶೀರ್ವಾದ್ ಘಾಲುಂ! ಸಗ್ಳ್ಯಾ ತುಜ್ಯಾ ಜಿವಿತಾಂತ್ ಜೆರುಜಲೆಮಾಚೆಂ ಸುಭಾಮ್ಪಣ್ ಪಳೆಂವ್ಕ್ ತುಕಾ ಫಾವೊ ಜಾಂವ್!
Show more
24 November
ದಸೆಂಬರ್ 29 - ಭಾಗೆವಂತ್ ಕುಟ್ಮಾಚಿ ಪರಬ್ – ದುಸ್ರೆಂ ವಾಚಪ್
ಕೊಲೊಸ್ಸೆ. 3:12-21 ದೆವಾನ್ ವಿಂಚುನ್ ಕಾಡ್ಲಲಿಂ ತುಮಿ, ಪವಿತ್ರ್ ಆನಿ ತಾಕಾ ಮೊಗಾಚಿಂ. ದೆಕುನ್ ಕಣ್ವಾಳಾಯೆಚೆಂ, ದಯಾಳಾಯೆಚೆಂ, ದೀನ್ಪಣಾಚೆಂ, ಮೊವಾಳಾಯೆಚೆಂ ಆನಿ ಸೊಸ್ಣಿಕಾಯೆಚೆಂ ಕಾಳಿಜ್ ತುಮ್ಕಾಂ ಆಸುಂಕ್ಜಾಯ್. ಎಕಾಮೆಕಾಕ್ ಸೊಸುನ್ ವ್ಹರಾ, ಆನಿ ಎಕಾಮೆಕಾಕ್ ದುರ್ಸೊಂಕ್ ಕಾರಣ್ ಆಸಾ ತರ್ಯೀ ಎಕಾಮೆಕಾಕ್ ಭೊಗ್ಸಿಯಾ; ತುಮಿ ದಿತಾತ್ ತೆಂ ಭೊಗ್ಸಣೆಂ ಸೊಮಿಯಾನ್ ತುಮ್ಕಾಂ ದಿಲಾಂ ತ್ಯಾ ಭೊಗ್ಸಣ್ಯಾ ಬರಿ ಜಾಂವ್. ಪುಣ್ ಹ್ಯಾ ಸರ್ವ್ ಶೆಗುಣಾಂ ಪ್ರಾಸ್ ಚಡ್ ತುಮ್ಚೇ ಥಂಯ್ ಆಸುಂಕ್ಜಾಯ್ ಮೋಗ್. ಮೋಗ್ ಹೆ ಶೆಗುಣ್ ಸಂಪೂರ್ಣ್ ಕರ್ತಾ ಆನಿ ತೆ ಎಕ್ವಟಾಯ್ತಾ. ಕ್ರಿಸ್ತಾಚೆಂ ಸಮಾಧಾನ್ ತುಮ್ಚ್ಯಾ ಕಾಳ್ಜಾಂನಿ ರಾಜ್ ಕರುಂ. ಏಕ್ ಕುಡಿಚೆ ಸಾಂದೆ ತುಮಿ ಜಾಲ್ಲ್ಯಾನ್, ತ್ಯಾ ಸಮಾಧಾನಾಕ್ ತುಮ್ಕಾಂ ಆಪೊವ್ಣೆಂ ಮೆಳ್ಳಾಂ. ಹ್ಯಾ ಶಿವಾಯ್, ಉಪ್ಕಾರಿ ಮನಾಚಿಂ ತುಮಿ ಜಾಯಾ. ಕ್ರಿಸ್ತಾಚೆಂ ಉತರ್ ತುಮ್ಚ್ಯಾ ಕಾಳ್ಜಾಂನಿ ಉದಂಡ್ ಭರೊನ್ ಆಸುಂ; ಖರೇ ಜಾಣ್ವಾಯೆನ್ ಎಕಾಮೆಕಾಕ್ ಶಿಕಯಾ ಆನಿ ಬೂದ್ಬಾಳ್ ಸಾಂಗಾ; ಕೀರ್ತನಾಂನಿ, ಗಿತಾಂನಿ ಆನಿ ಆತ್ಮೀಕ್ ಕಾವ್ಯಾಂನಿ ಗಾಯನ್ ಕರ್ನ್ ತುಮ್ಚ್ಯಾ ಕಾಳ್ಜಾಂತ್ ಥಾವ್ನ್ ದೆವಾಕ್ ಅರ್ಗಾಂ ದಿಯಾ. ಉತ್ರಾನ್ ಜಾಂವ್, ಕರ್ನೆನ್ ಜಾಂವ್, ಜೆಂ ಕಿತೆಂ ತುಮಿ ಕರ್ತಾತ್ ತೆಂ ಸಕ್ಕಡ್ ಸೊಮಿಯಾ ಜೆಜುಚೇ ನಾಂವಿಂ ಕರಾ; ತಾಚೇ ಮಾರಿಪತ್ ದೆವಾ ಬಾಪಾಕ್ ಅರ್ಗಾಂ ದಿಯಾ. ಪತಿಣಿಂನೋ, ತುಮ್ಚ್ಯಾ ಪತಿಂಕ್ ತುಮಿ ಖಾಲ್ ಜಾಯಾ. ಸೊಮಿಯಾ ಥಂಯ್ ತುಮ್ಕಾಂ ತೆಂ ಸಹಜ್ಲ್ಲೆಂ. ಪತಿಂನೋ, ತುಮ್ಚ್ಯಾ ಪತಿಣಿಂಚೊ ಮೋಗ್ ಕರಾ ಆನಿ ತಾಂಕಾಂ ಕಠಿಣಾಯೆನ್ ಚಲಯ್ನಾಕಾತ್. ಭುರ್ಗ್ಯಾಂನೊ, ಸರ್ವ್ ಸಂಗ್ತಿಂನಿ ತುಮ್ಚ್ಯಾ ವ್ಹಡಿಲಾಂಕ್ ಖಾಲ್ ಜಾಯಾ. ಹೆಂ ಸೊಮಿಯಾಕ್ ಖರೆಂಚ್ ಮಾನ್ತಾ. ಬಾಪಯಾಂನೋ, ತುಮ್ಚ್ಯಾ ಭುರ್ಗ್ಯಾಂಕ್ ಭೆಷ್ಟೆಂಚ್ ಚಿಡಾಯ್ನಾಕಾತ್ ಆನಿ ತಿಂ ಭಿಜುಡ್ ಜಾಂವ್ಕ್ ಕಾರಣ್ ಜಾಯ್ನಾಕಾತ್.
Show more
24 November
ದಸೆಂಬರ್ 28 - ಭಾಗೆವಂತ್ ಕುಟ್ಮಾಚಿ ಪರಬ್ - ಸುವಾರ್ತಾ
ಮಾತೆವ್ 2:13-15,19-23 ತೆ ಗೆಲ್ಯಾ ಉಪ್ರಾಂತ್ ಸರ್ವೆಸ್ಪರಾಚೊ ಏಕ್ ದೂತ್ ಜುಜೆಕ್ ಸೊಪ್ಣಾಂತ್ ದಿಷ್ಟಿ ಪಡುನ್ ಮ್ಹಣಾಲೊ: “ಊಠ್, ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆ, ಆನಿ ಎಜಿಪ್ತಾಕ್ ಪೋಳ್ನ್ ವಚ್. ಪತ್ರ್ಯಾನ್ ಹಾಂವ್ ತುಕಾ ಸಾಂಗ್ತಲೊಂ ತ್ಯಾ ಪರ್ಯಾನ್ ಥಂಯ್ಚ್ ರಾವ್. ಬಾಳ್ಕಾಚೊ ಜೀವ್ ಕಾಡ್ಚೇ ಖಾತಿರ್ ಹೆರೊದ್ ತಾಚಿ ಸೊಧ್ನಾ ಕರ್ಚ್ಯಾರ್ ಆಸಾ.” ಜುಜೆ ತಕ್ಷಣ್ ಉಠ್ಲೊ, ಆವಯ್ ಭುರ್ಗ್ಯಾಕ್ ಘೆವ್ನ್ ರಾತಾರಾತಿಂ ಎಜಿಪ್ತಾಕ್ ಭಾಯ್ರ್ ಸರ್ನ್ ಗೆಲೊ ಆನಿ ಹೆರೊದಿಚ್ಯಾ ಮರಣಾ ಪರ್ಯಾನ್ ಥಂಯ್ಚ್ ರಾವ್ಲೊ. ಅಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಸರ್ವೆಸ್ಪರಾನ್ ಮ್ಹಳ್ಳೆಂ ತೆಂ: “ಎಜಿಪ್ತಾ ಥಾವ್ನ್ ಮ್ಹಜ್ಯಾ ಪುತಾಕ್ ಹಾಂವೆಂ ಆಪೊವ್ನ್ ಹಾಡ್ಲೊ.” ಹೆರೊದ್ ಮೊರ್ತಚ್ ಸರ್ವೆಸ್ಪರಾಚೊ ದೂತ್ ಎಜಿಪ್ತಾಂತ್ ಜುಜೆಕ್ ಸೊಪ್ಣಾಂತ್ ದಿಷ್ಟಿ ಪಡುನ್ ಸಾಂಗಿಲಾಗ್ಲೊ: “ಊಠ್, ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆ ಆನಿ ಇಸ್ರಾಯೆಲಾಚ್ಯಾ ಗಾಂವಾಕ್ ಪಾಟಿಂ ವಚ್, ಕಿತ್ಯಾಕ್ ಭುರ್ಗ್ಯಾಚೊ ಜೀವ್ ಕಾಡುಂಕ್ ಸೊಧ್ತಾಲೆ ತೆ ಆತಾಂ ಮೊರ್ನ್ ಪಾವ್ಲ್ಯಾತ್”. ಜುಜೆ ಉಠ್ಲೊ ಆನಿ ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆವ್ನ್ ಇಸ್ರಾಯೆಲಾಚ್ಯಾ ಗಾಂವಾಕ್ ಪಾಟಿಂ ಆಯ್ಲೊ. ಪುಣ್ ಹೆರೊದಿ ಉಪ್ರಾಂತ್ ತಾಚೊ ಪೂತ್ ಆರ್ಖೆಲಾವ್ ಜುದೇಯಾಚೊ ರಾಯ್ ಜಾಲಾ ಮ್ಹಣ್ ಆಯ್ಕುನ್, ಥಂಯ್ ವಚುಂಕ್ ತೊ ಭಿಯೆಲೊ. ಆನಿ ಏಕ್ ಸೊಪ್ಣಾಂತ್ ತಾಕಾ ಕಳಿತ್ ಕೆಲ್ಲೇ ಪರ್ಮಾಣೆಂ ತೊ ಗಾಲಿಲೆಯಾ ಪ್ರಾಂತಾಕ್ ಗೆಲೊ ಆನಿ ಥಂಯ್ ನಜರೆತ್ ನಾಂವಾಚ್ಯಾ ಶಹರಾಂತ್ ವಚುನ್ ರಾವ್ಲೊ. ಅಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಮ್ಹಳ್ಳೆಂ ತೆಂ: “ತಾಕಾ ನಜರೆತ್ಗಾರ್ ಮ್ಹಣ್ ಆಪಯ್ತಲೆ.”
Show more
24 November
ದಸೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ - ಪಯ್ಲೆಂ ವಾಚಪ್
ಇಸಾ. 62:1-5 ಸಿಯೊನಾಂತ್ ಫಾಂತ್ಯಾ ಪರಿಂ ಪ್ರಾಮಾಣಿಕ್ಪಣ್ ಪರ್ಜಳಸರ್ ಆನಿ ಜಳ್ತೆ ದಿವ್ಟೆ ಪರಿಂ ತಿಚೆಂ ತಾರಣ್ ಪ್ರಕಾಸ್ ಫಾಂಕಯ್ಸರ್ ಹಾಂವ್ ಸಿಯೊನಾ ಪಾಸತ್ ವೊಗೊ ರಾಂವ್ಚೊ ನಾಂ, ಜೆರುಸಾಲೆಮಾ ಪಾಸತ್ ಹಾಂವ್ ವಿಶೆವ್ ಘೆಂವ್ಚೊ ನಾಂ. ತೆದ್ನಾ ರಾಷ್ಟ್ರಾಂ ತುಜೆಂ ಪ್ರಾಮಾಣಿಕ್ಪಣ್ ಪಳೆತಲಿಂ, ಆನಿ ಸರ್ವ್ ರಾಯ್ ತುಜಿ ಮಹಿಮಾ ದೆಕ್ತಲೆ, ಆನಿ ಸರ್ವೆಸ್ಪರಾಚೆಂ ತೋಂಡ್ ತುಕಾ ದಿತಲೊ ತ್ಯಾ ಎಕಾ ನವ್ಯಾ ನಾಂವಾನ್ ತುಕಾ ಉಲೊ ಕರ್ತಲಿಂ. ಸರ್ವೆಸ್ಪರಾಚ್ಯಾ ಹಾತಾಂತ್ ತುಂ ಮಹಿಮೆಚೊ ಮುಕುಟ್ ಜಾತಲಿಯ್, ತುಜ್ಯಾ ದೆವಾಚ್ಯಾ ಹಾತಾಂತ್ ಏಕ್ ರಾಯಾಳ್ ಕಿರೀಟ್. ತುಕಾ ಆನಿಕ್ “ಸೊಡ್ಲಲಿ” ಮ್ಹಣ್ ಉಲೊ ಕರ್ಚಿಂ ನಾಂತ್ ಆನಿ ತುಜ್ಯಾ ದೆಶಾಕ್ “ಪಾಡ್ ಪಡ್ಲಲೊ” ಮ್ಹಣ್ಚಿಂ ನಾಂತ್, ಬಗರ್ ತುಕಾ “ಮ್ಹಜೊ ಸಂತೊಸ್” ಮ್ಹಣ್ ಉಲೊ ಕರ್ತಲಿಂ ಆನಿ ತುಜ್ಯಾ ದೆಶಾಕ್ “ಲಗ್ನ್ ಜಾಲ್ಲೊ” ಮ್ಹಣ್ ಪಾಚಾರ್ತಲಿಂ; ಕಿತ್ಯಾಕ್ ಸರ್ವೆಸ್ಪರ್ ತುಜೆ ಥಂಯ್ ಸಂತೊಸ್ತಾ ಆನಿ ತಾಚೆ ಕಡೆ ತುಜ್ಯಾ ದೆಶಾಚೆಂ ಲಗ್ನ್ ಜಾತಲೆಂ. ಜಶೆಂ ಏಕ್ ತರ್ನಾಟೊ ಎಕೆ ಆಂಕ್ವಾರ್ ಚಲಿಯೆ ಕಡೆ ಲಗ್ನ್ ಜಾತಾ, ತಶೆಂ ತುಜೊ ರಚ್ಣಾರ್ ತುಜೆ ಕಡೆ ಲಗ್ನ್ ಜಾತಲೊ, ಆನಿ ಜಶೆಂ ಏಕ್ ನೊವ್ರೊ ಆಪ್ಲೆ ಹೊಕ್ಲೆ ಥಂಯ್ ಸಂತೊಸ್ತಾ, ತಶೆಂ ತುಜೊ ದೇವ್ ತುಜೆ ಥಂಯ್ ಸಂತೊಸ್ತಾ.
Show more
24 November
ದಸೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ – ಕೀರ್ತನ್
ಕೀ. 88 ಶ್ಲೋಕ್: ತುಜಿ ದಯಾ, ಸರ್ವೆಸ್ಪರಾ, ಸದಾಂಕಾಲ್ ಗಾಯನಾಂನಿ ವಾಖಾಣ್ತಲೊಂ. 1. ಹಾಂವೆಂ ವಿಂಚುನ್ ಕಾಡ್ಲಲ್ಯಾ ಸವೆಂ ಹಾಂವೆಂ ಕರಾರ್ ಕೆಲಾ, ದಾವಿದಾಕ್, ಮ್ಹಜ್ಯಾ ಸೆವಕಾಕ್ ಹಾಂವೆಂ ಸಪುತ್ ದಿಲಾ: “ತುಜಿ ಸಂತತ್ ಸಾಸ್ಣಾಕ್ ಸ್ಥಾಪಿತ್ ಕರ್ತಲೊಂ, ಸದಾಂ ಸರ್ವದಾಂ ಬಾಳ್ತಾ ತಸಲೆಂ ಸಿಂಹಾಸನ್ ತುಕಾ ದಿತಲೊಂ”. 2. ತುಜೆಂ ನಾಂವ್ ಘೆವ್ನ್ ಸಂತೊಸ್ತಾ ತಿ ಪರ್ಜಾ ಭಾಗಿ! ತುಜ್ಯಾ ಮುಖಮಳಾಚ್ಯಾ ಉಜ್ವಾಡಾಂತ್ ತಿಂ ಚಲ್ತಲಿಂ, ಸರ್ವೆಸ್ಪರಾ; ದೀಸ್ಭರ್ ತುಜ್ಯಾ ನಾಂವಾಚೆರ್ ಆಸ್ತಲೊ ತಾಂಚೊ ಸಂತೊಸ್, ತುಜ್ಯಾ ನಿತಿವಂತ್ಪಣಾಂತ್ ಆಸ್ತಲೆಂ ತಾಂಚೆಂ ಸುಖ್. 3. “ತೊ ಮ್ಹಾಕಾ ಮ್ಹಣ್ತಲೊ: ‘ತುಂ ಮ್ಹಜೊ ಬಾಪ್, ಮ್ಹಜೊ ದೇವ್ ಆನಿ ಮ್ಹಜ್ಯೆ ಬಚಾವೆಚೆಂ ಖಡಪ್.’ ಸದಾಂಕಾಲ್ ತಾಕಾ ಮ್ಹಜೆಂ ಭೊಳೆಪಣ್ ದಾಖಯ್ತಲೊಂ. ಮ್ಹಜ್ಯಾ ಸೊಲ್ಲ್ಯಾನ್ ಹಾಂವ್ ತಾಕಾ ವಿಶ್ವಾಸಿ ರಾವ್ತಲೊಂ.”
Show more
24 November
ದಸೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ – ದುಸ್ರೆಂ ವಾಚಪ್
ಧ.ಕೃ. 13:16-17, 22-25 ತೆದ್ವಾಂ ಪಾವ್ಲ್ ಉಠ್ಲೊ ಆನಿ ಲೊಕಾಕ್ ಮೌನ್ ರಾವುಂಕ್ ಹಾತಾನ್ ಗುರ್ತ್ ಕರ್ನ್ ಹೇ ಪರಿಂ ಉಲೊಂವ್ಕ್ ಲಾಗ್ಲೊ: “ಇಸ್ರಾಯೆಲಾಚ್ಯಾ ಭಾವಾಂನೋ ಆನಿ ತುಮಿ ದೆವಾಕ್ ಭಿಯೆವ್ನ್ ಚಲ್ತಲ್ಯಾಂನೋ, ಆಯ್ಕಾ: ಇಸ್ರಾಯೆಲ್ ಪರ್ಜೆಚ್ಯಾ ದೆವಾನ್ ಆಮ್ಚ್ಯಾ ಪುರ್ವಜಾಂಕ್ ವಿಂಚುನ್ ಕಾಡ್ಲೆ ಆನಿ ಎಜಿಪ್ತಾಂತ್ ತೆ ವಿದೇಶಿ ಜಾವ್ನ್ ಆಸ್ತಾಂ ತಾಂಕಾಂ ತಾಣೆಂ ವರ್ತೆ ಕೆಲೆ ಆನಿ ಆಪ್ಲೇ ವ್ಹಡ್ ಪದ್ವೆನ್ ತಾಂಕಾಂ ಎಜಿಪ್ತಾ ಥಾವ್ನ್ ಭಾಯ್ರ್ ಹಾಡ್ಲೆ. ಉಪ್ರಾಂತ್ ದೆವಾನ್ ತಾಕಾ ಸಾಂಡ್ಲೊ ಆನಿ ದಾವಿದಾಕ್ ತಾಂಚೊ ರಾಯ್ ಕರ್ನ್ ಉಬಾರ್ಲೊ. ತಾಚೇ ವಿಶ್ಯಾಂತ್ ಸಾಕ್ಸ್ ದೀವ್ನ್ ದೆವಾನ್ ಮ್ಹಳೆಂ: ‘ಯೆಸ್ಸೆಚೊ ಪೂತ್, ದಾವಿದ್, ಮ್ಹಜ್ಯಾ ಮನಾಸಾಂಗ್ಡೊ ಮ್ಹಾಕಾ ಮೆಳ್ಳಾ. ಸರ್ವ್ ಮ್ಹಜ್ಯೊ ಅಪೇಕ್ಷಾ ತೊ ಜ್ಯಾರಿ ಕರ್ತಲೊ.’ ಆಪ್ಣೆಂ ಭಾಸಾಯ್ಲಲೇ ಪರ್ಮಾಣೆಂ ದಾವಿದಾಚೇ ಸಂತತೆ ಥಾವ್ನ್ ದೆವಾನ್ ಇಸ್ರಾಯೆಲಾಕ್ ಏಕ್ ಸೊಡ್ವಣ್ದಾರ್ ದಿಲೊ. ತೊಚ್ ತೊ ಜೆಜು. ಜುವಾಂವ್ಕ್ ಸಗ್ಳೇ ಇಸ್ರಾಯೆಲ್ ಪರ್ಜೆಕ್ ಆಪ್ಲೆಂ ಪಾತಕ್ ರಡೊನ್ ದೆವಾ ಥಂಯ್ ಪಾಟಿಂ ಪರ್ತಲ್ಲ್ಯಾಚೊ ಗುರ್ತ್ ಮ್ಹಣ್ ಸ್ನಾನ್ ಪರ್ಗಟ್ ಕೆಲೆಂ. ಅಶೆಂ ತಾಚ್ಯಾ ಯೆಣ್ಯಾಚಿ ತಯಾರಾಯ್ ಕೆಲಿ. ಆಪ್ಲೆಂ ಮಣಿಯಾರ್ಪಣ್ ಅಖೇರ್ ಜಾವ್ನ್ ಯೆತಾಸ್ತಾನಾ ಜುವಾಂವ್ನ್ ಲೊಕಾಲಾಗಿಂ ಮ್ಹಳೆಂ: ‘ಹಾಂವ್ ಕೊಣ್ ಮ್ಹಣ್ ತುಮಿ ಚಿಂತ್ತಾತ್? ತುಮಿ ಕೊಣಾ ವಿಶ್ಯಾಂತ್ ಚಿಂತ್ತಾತ್ ತೊ ಹಾಂವ್ ನ್ಹಯ್, ತರ್ ಆಯ್ಕಾ: ಮ್ಹಜೇ ಉಪ್ರಾಂತ್ ಯೆತಾ ಎಕ್ಲೊ; ತಾಚ್ಯಾ ಪಾಂಯಾಂಚ್ಯೊ ವ್ಹಾಣೋ ಕಾಡುಂಕ್ ಸಯ್ತ್ ಹಾಂವ್ ಯೋಗ್ಯ್ ನ್ಹಯ್.’
Show more
24 November
ದಸೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ - ಸುವಾರ್ತಾ
ಮಾತೆವ್ 1:1-25 ಜೆಜು ಕ್ರಿಸ್ತಾಚಿ ವಂಶಾವಳ್ ಹಿ: ತೊ ಪೂತ್ ದಾವಿದಾಚೊ, ತೊ ಪೂತ್ ಆಬ್ರಾಹಾಮಾಚೊ. ಅಬ್ರಾಹಾಮ್ ಇಸಾಕಾಚೊ ಬಾಪುಯ್, ಇಸಾಕ್ ಜಾಕೊಬಾಚೊ ಆನಿ ಜಾಕೊಬ್ ಜುದಾಚೊ ಆನಿ ತಾಚ್ಯಾ ಭಾವಾಂಚೊ ಬಾಪುಯ್. ಜುದಾ ಫೆರೆಸಾಚೊ ಆನಿ ಜೆರಾಚೊ ಬಾಪುಯ್ (ತಾಮಾರ್ ತಾಂಚಿ ಆವಯ್); ಫೆರೆಸ್ ಹೆಸ್ರೊನಾಚೊ ಆನಿ ಹೆಸ್ರೊನ್ ಆರಾಮಾಚೊ ಬಾಪುಯ್. ಆರಾಮ್ ಆಮಿನದಾಬಾಚೊ ಆನಿ ಆಮಿನದಾಬ್ ನಾಆಸೊನಾಚೊ ಆನಿ ನಾಆಸೊನ್ ಸಾಲ್ಮೊನಾಚೊ ಬಾಪುಯ್. ಸಾಲ್ಮೊನ್ ಬೊಆಜಾಚೊ ಬಾಪುಯ್, (ರಾಹಾಬ್ ತಾಚಿ ಆವಯ್); ಬೊಆಜ್ ಓವೆದಾಚೊ ಬಾಪುಯ್, (ರೂತ್ ತಾಚಿ ಆವಯ್); ಓವೆದ್ ಯೆಸ್ಸೆಚೊ ಆನಿ ಯೆಸ್ಸೆ ದಾವಿದ್ ರಾಯಾಚೊ ಬಾಪುಯ್. ದಾವಿದ್ ಸಾಲ್ಮಾಂವ್ಚೊ ಬಾಪುಯ್ (ಉರಿಯಾಚಿ ಬಾಯ್ಲ್ ಸಾಲ್ಮಾಂವ್ಚಿ ಆವಯ್). ಸಾಲ್ಮಾಂವ್, ರೆಹೊಬೊಆಮಾಚೊ, ರೆಹೊಬೊಆಮ್ ಆಬಿಯಾಚೊ, ಆನಿ ಆಬಿಯಾ ಆಸಾಚೊ ಬಾಪುಯ್. ಆಸಾ ಯೊಸಾಫಾತಾಚೊ, ಯೊಸಾಫಾತ್ ಯೊರಾಮಾಚೊ, ಆನಿ ಯೊರಾಮ್ ಓಸಿಯಾಚೊ ಬಾಪುಯ್. ಓಸಿಯಾ ಯೊತಾಮಾಚೊ, ಯೊತಾಮ್ ಆಖಾಜಾಚೊ ಆನಿ ಆಖಾಜ್ ಹಿಜ್ಕಿಯಾಚೊ ಬಾಪುಯ್. ಹಿಜ್ಕಿಯಾ ಮಾನಾಸ್ಸೆಚೊ, ಮಾನಾಸ್ಸೆ ಆಮೊಸಾಚೊ, ಆನಿ ಆಮೊಸ್ ಯೊಸಿಯಾಚೊ ಬಾಪುಯ್. ಯೊಸಿಯಾ ಯೆಕೊನಿಯಾಚೊ ಆನಿ ತಾಚಾ ಭಾವಾಂಚೊ ಬಾಪುಯ್ - ಹಾಂಚ್ಯಾ ಕಾಳಾರ್ ಇಸ್ರಾಯೆಲ್ ಪರ್ಜೆಕ್ ಬಾಬಿಲೊನಾಚ್ಯಾ ಗಾಂವಾಕ್ ಗುಲಾಮ್ ಕರ್ನ್ ವ್ಹೆಲ್ಲಿ. ಬಾಬಿಲೊನಾಚೇ ಬಂಧಡೇ ಉಪ್ರಾಂತ್; ಯೆಕೊನಿಯಾ ಶಅಲ್ತಿಯೆಲಾಚೊ ಆನಿ ಶಅಲ್ತಿಯೆಲ್ ಯೆರುಬಾಬೆಲಾಚೊ ಬಾಪುಯ್. ಯೆರುಬಾಬೆಲ್ ಆಬಿಯುದಾಚೊ, ಆಬಿಯುದ್ ಎಲಿಯಾಕಿಮಾಚೊ, ಆನಿ ಎಲಿಯಾಕಿಮ್ ಆಜೊರಾಚೊ ಬಾಪುಯ್. ಆಜೊರ್ ಸಾದೊಕಾಚೊ, ಆನಿ ಸಾದೊಕ್ ಆಖಿಮಾಚೊ ಆನಿ ಆಖಿಮ್ ಎಲಿಯುದಾಚೊ ಬಾಪುಯ್. ಎಲಿಯುದ್ ಎಲೆಯಾಜರಾಚೊ, ಎಲೆಯಾಜರ್ ಮಾದಾನಾಚೊ ಆನಿ ಮಾದಾನ್ ಜಾಕೊಬಾಚೊ ಬಾಪುಯ್. ಜಾಕೊಬ್ ಜುಜೆಚೊ ಬಾಪುಯ್. ಜುಜೆಚಿ ಪತಿಣ್ ಮರಿ ಆನಿ ಮರಿಯೇ ಥಾವ್ನ್ ಜಲ್ಮಲೊ ಜೆಜು, ಜಾಕಾ ಮ್ಹಣ್ತಾತ್ ಕ್ರೀಸ್ತ್. ಅಶೆಂ ಸರ್ವ್ ಮೆಜುನ್, ಆಬ್ರಾಹಾಮಾ ಥಾವ್ನ್ ದಾವಿದ್ ಪರ್ಯಾನ್ ಚೊವ್ದಾ ತಕ್ಲ್ಯೊ: ದಾವಿದಾ ಥಾವ್ನ್ ಬಾಬಿಲೊನಾಚೇ ಬಂಧಡೇ ಪರ್ಯಾನ್ ಚೊವ್ದಾ ತಕ್ಲ್ಯೊ ಆನಿ ಬಾಬಿಲೊನಾಚೇ ಬಂಧಡೇ ಥಾವ್ನ್ ಕ್ರೀಸ್ತ್ ಪರ್ಯಾನ್ ಚೊವ್ದಾ ತಕ್ಲ್ಯೊ. ಕ್ರೀಸ್ತಾಚೆಂ ಜನನ್ ಹೇ ಪರಿಂ ಜಾಲೆಂ: ತಾಚೇ ಮಾತೇ ಮರಿಯೆಕ್ ಜುಜೆಲಾಗಿಂ ಕರಾರ್ ಜಾಲ್ಲೆಂ. ಪುಣ್ ತಾಂಚ್ಯಾ ಲಗ್ನಾ ಪಯ್ಲೆಂ ತಿ ಪವಿತ್ರ್ ಅತ್ಮ್ಯಾ ವರ್ವಿಂ ಗರ್ಭೆಸ್ತ್ ಜಾಲಿ. ತಿಚೊ ಪತಿ ಜುಜೆ ನಿತಿವಂತ್ ಮನಿಸ್. ತರ್ಯೀ ಮರಿಯೆಕ್ ಅಪಕೀರ್ತ್ ಹಾಡುಂಕ್ ತಾಕಾ ಖುಶಿ ನಾತ್ಲಿ. ದೆಕುನ್ ತಾಣೆಂ ತಿಕಾ ಗುಪ್ತಿಂ ಸೊಡ್ಚಿ ಮ್ಹಣುನ್ ಚಿಂತ್ಲೆಂ. ಪುಣ್ ತಾಣೆಂ ಅಶಿ ಆಲೋಚನ್ ಕೆಲಿ ತಿತ್ಲಿಚ್, ತಾಕಾ ಸೊಪ್ಣಾಂತ್ ಸರ್ವೆಸ್ಪರಾಚೊ ಎಕ್ ದೂತ್ ದಿಷ್ಟಿ ಪಡ್ಲೊ ಆನಿ ಮ್ಹಣಾಲೊ: “ಜುಜೆ, ದಾವಿದಾಚ್ಯಾ ಪುತಾ, ಮರಿಯೆಕ್ ತುಜಿ ಪತಿಣ್ ಮ್ಹಣ್ ತುಜ್ಯಾ ಘರಾ ಹಾಡುಂಕ್ ಭಿಯೆನಾಕಾ, ಕಿತ್ಯಾಕ್ ತಿಚೆ ಥಂಯ್ ಗರ್ಭ್ಸಂಭವ್ ಪವಿತ್ರ್ ಅತ್ಮ್ಯಾ ವರ್ವಿಂ ಜಾಲಾ. ತಿ ಏಕ್ ಪುತಾಕ್ ಪ್ರಸುತ್ ಜಾತಲಿ; ತುವೆಂ ತಾಕಾ ಜೆಜು ಮ್ಹಣ್ ನಾಂವ್ ದವರುಂಕ್ ಜಾಯ್; ಕಿತ್ಯಾಕ್ ತೊ ಆಪ್ಲೇ ಪರ್ಜೆಕ್ ತಿಚ್ಯಾ ಪಾತ್ಕಾಂತ್ಲಿ ಸೊಡಯ್ತಲೊ.” ಹೆಂ ಸಗ್ಳೆಂ ಘಡ್ಲೆಂ ಪೂರ್ಣ್ ಜಾವ್ಚ್ಯಾಕ್ ಪ್ರವಾದ್ಯಾ ಮಾರಿಫತ್ ಸರ್ವೆಸ್ಪರಾನ್ ಮ್ಹಳ್ಳೆಂ ತೆಂ : “ಏಕ್ ಆಂಕ್ವಾರ್ ಚಲಿ ಗರ್ಭೆಸ್ತ್ ಜಾತಲಿ ಆನಿ ಏಕ್ ಪುತಾಕ್ ಪ್ರಸುತ್ ಜಾತಲಿ ಆನಿ ತಾಕಾ ‘ಇಮ್ಮಾನುಎಲ್’ ಮ್ಹಣುನ್ ಆಪಯ್ತಲೆ.” ‘ಇಮ್ಮಾನುಎಲ್’ ಮ್ಹಳ್ಯಾರ್, ‘ದೇವ್ ಆಮ್ಚೇ ಸಾಂಗಾತಾ’ ಮ್ಹಣ್ ಅರ್ಥ್. ಜುಜೆನ್ ನಿದೆಂತ್ಲೊ ಉಠ್ತಚ್, ಸರ್ವೆಸ್ಪರಾಚ್ಯಾ ದುತಾನ್ ಪರ್ಮಾಯ್ಲ್ಲೇ ಪರ್ಮಾಣೆಂ ಕೆಲೆಂ. ಮರಿಯೆಕ್ ಆಪ್ಲಿ ಪತಿಣ್ ಮ್ಹಣ್ ತಾಣೆಂ ಆಪ್ಲ್ಯಾ ಘರಾ ಹಾಡ್ಲಿ.
Show more
24 November
ದಸೆಂಬರ್ 21 - ಕಿಸ್ತಾ ಯೆಣ್ಯಾಕಾಳಾಚೊ ಚವ್ತೊ ಆಯ್ತಾರ್ - ಪಯ್ಲೆಂ ವಾಚಪ್
ಇಸಾ 7:10-14 ಸರ್ವೆಸ್ಪರಾನ್ ಪರ್ತುನ್ ಆಹಾಜಾ ಕಡೆ ಉಲೊವ್ನ್ ಮ್ಹಳೆಂ: “ತುಜ್ಯಾ ಸರ್ವೆಸ್ಪರಾ ಲಾಗಿಂ ಏಕ್ ಖುಣಾ ಮಾಗ್; ತಿ ಪಾತಾಳಾಂತ್ಲ್ಯಾ ಗುಂಡಾಯೆಂತ್ಲಿ ವಾ ಊಂಚ್ ಸರ್ಗಾ ವಯ್ಲಿ ಜಾಂವ್!” ಪೂಣ್ ಆಹಾಜಾನ್ ಜಾಪ್ ದಿಲಿ: “ಹಾಂವ್ ಮಾಗ್ಚೊ ನಾಂ; ಹಾಂವ್ ಸರ್ವೆಸ್ಪರಾಚಿ ಪರಿಕ್ಷಾ ಕರ್ಚೊ ನಾಂ.” ತೆದ್ನಾ ಇಸಾಯಿಯಾನ್ ಮ್ಹಳೆಂ: “ದಾವಿದಾಚ್ಯಾ ಘರಾಣ್ಯಾಚ್ಯಾಂನೊ, ಚೀತ್ ದಿವ್ನ್ ಆಯ್ಕಾ! ತುಮಿ ಮನ್ಶಾಂಕ್ ಸತಾಯ್ಲಿಂ ತೆಂ ತುಮ್ಕಾಂ ಪಾವ್ಲೆಂ ನಾ ಮ್ಹಣ್ ಆತಾಂ ಮ್ಹಜ್ಯಾ ದೆವಾಕ್ಯೀ ಸತಾಂವ್ಕ್ ಸೊದ್ತಾತ್? ದೆಕುನ್ ಸರ್ವೆಸ್ಪರ್ಚ್ ತುಮ್ಕಾಂ ಏಕ್ ಖುಣಾ ದಿತಲೊ. ಪಳೆ, ಏಕ್ ತರ್ನಾಟಿ ಸ್ತ್ರೀ ಗರ್ಭೆಸ್ತ್ ಆಸಾ, ತಿ ಎಕಾ ಪುತಾಕ್ ಜಲ್ಮ್ ದಿತಲಿ ಆನಿ ತಾಕಾ ಇಮ್ಮಾನುಯೆಲ್ ಮ್ಹಣ್ ನಾಂವ್ ದವರ್ತಲಿ.
Show more
24 November
ದಸೆಂಬರ್ 21 - ಕಿಸ್ತಾ ಯೆಣ್ಯಾಕಾಳಾಚೊ ಚವ್ತೊ ಆಯ್ತಾರ್ – ಕೀರ್ತನ್
ಕೀ. 23 ಶ್ಲೋಕ್: ಭಿತರ್ ಸರ್ತಾ ಸರ್ವೆಸ್ಪರ್, ರಾಜಾ ದೇವ್ - ಮಹಿಮೆಚೊ. 1. ಸರ್ವೆಸ್ಪರಾಚಿ ಜಾವ್ನಾಸಾ ಪ್ರಿಥುಮ್ ಆನಿ ತಾಂತ್ಲಿ ಸಗ್ಳಿ ಗ್ರೇಸ್ತ್ಕಾಯ್, ಸಂಸಾರ್ ಆನಿ ತಾಂತ್ಲೆ ನಿವಾಸಿಯಿ ಸಗ್ಳೆ ತಾಚೆಚ್! ತಾಣೆಂಚ್ ಪ್ರಿಥುಮ್ ದರ್ಯಾ ವಯ್ರ್ ಸ್ಥಾಪಿತ್ ಕೆಲ್ಯಾ ಆನಿ ಉದ್ಕಾ-ರಾಶಿಚೆರ್ ತಿಕಾ ಥಿರ್ ಕರ್ನ್ ದವರ್ಲ್ಯಾ. 2. ಸರ್ವೆಸ್ಪರಾಚ್ಯಾ ದೊಂಗ್ರಾರ್ ಕೊಣಾಕ್ ಚಡುಂಕ್ ಮೆಳತ್? ತಾಚ್ಯಾ ಪವಿತ್ರ್ ಥಳಾರ್ ಪಾಂಯ್ ದವರುಂಕ್ ಕೊಣ್ ತೊ ಯೋಗ್ಯ್? ಜೊ ನಿತಳ್ ಹಾತಾಂಚೊ ಆನಿ ನಿರ್ಮಳ್ ಅಂತಸ್ಕರ್ನಾಚೊ, ಖಂಯ್ಚ್ಯಾಯ್ ಬೊಂಬ್ಯಾಕ್ ಆಪ್ಲೆಂ ಕಾಳಿಜ್ ಉಬಾರಿನಾ ತಸಲ್ಯಾಕ್ ಫಾವೊ! 3. ತಸಲ್ಯಾಕ್ ಸರ್ವೆಸ್ಪರಾಚೊ ಆಶೀರ್ವಾದ್ ಲಾಭ್ತಲೊ, ತಾಚ್ಯಾ ಸೊಡ್ವಣ್ದಾರಾ ದೆವಾಚಿ ಕುರ್ಪಾ ತೊ ಜೊಡ್ತಲೊ. ಅಸಲಿಂ ಮನ್ಶಾಂ ತುಜೆಂ ದರ್ಶನ್ ಮೆಳುಂಕ್ ಆಶೆತಾತ್ ತುಜೆಂ ಮುಖಮಳ್ ಪಳೆಂವ್ಕ್ ಅತ್ರೆಗ್ತಾತ್, ಜಾಕೊಬಾಚ್ಯಾ ದೆವಾ!
Show more
24 November
ದಸೆಂಬರ್ 21 - ಕಿಸ್ತಾ ಯೆಣ್ಯಾಕಾಳಾಚೊ ಚವ್ತೊ ಆಯ್ತಾರ್ – ದುಸ್ರೆಂ ವಾಚಪ್
ರೊಮಾ 1:1-7 ಪಾವ್ಲಾನ್, ಮ್ಹಣ್ಜೆ ಜೆಜು ಕ್ರಿಸ್ತಾಚ್ಯಾ ಸೆವಕಾನ್, ಧರ್ಮ್ದೂತ್ ಜಾಂವ್ಕ್ ಆಪಯ್ಲಲ್ಯಾನ್ ಆನಿ ದೆವಾಚಿ ಸುವಾರ್ತಾ ಪರ್ಗಟ್ ಕರ್ಚ್ಯಾ ಕಾಮಾಕ್ ವೆಗ್ಳೊ ಕೆಲ್ಲ್ಯಾನ್, ದೆವಾನ್ ಮೋಗ್ ಕರ್ತಲ್ಯಾ ಆನಿ ಆಪ್ಣಾಚಿ ಸ್ವಂತ್ ಪರ್ಜಾ ಜಾಂವ್ಕ್ ತಾಣೆಂ ಆಪಯ್ಲಲ್ಯಾ, ರೊಮಾ ಶಹರಾಂತ್ ಆಸ್ಲಲ್ಯಾ ತುಮ್ಕಾಂ ಸಕ್ಟಾಂಕ್ ಬರೊವ್ಚೆಂ, ದೆವಾ ಆಮ್ಚ್ಯಾ ಬಾಪಾಚಿ ಆನಿ ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚಿ ಕುರ್ಪಾ ಆನಿ ಶಾಂತಿ ತುಮ್ಕಾಂ. ಹಿ ಸುವಾರ್ತಾ ಆದಿಂಮಾಗಾಂ ಆಪ್ಲ್ಯಾ ಪ್ರವಾದ್ಯಾ ಮಾರಿಪತ್ ಪವಿತ್ರ್ ಪುಸ್ತಕಿಂ ದೆವಾನ್ ಭಾಸಾಯ್ಲ್ಲಿ. ತಿ ತಾಚ್ಯಾಚ್ ಪುತಾ ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾ ವಿಶ್ಯಾಂತ್ಲಿ: ರಗ್ತಾ ಮಾಸಾ ಪರ್ಮಾಣೆಂ ತೊ ದಾವಿದಾಚೇ ಸಂತತೆಚೊ, ಪುಣ್ ಪವಿತ್ರ್ ಕರ್ತಾ ತ್ಯಾ ಅತ್ಮ್ಯಾ ಪರ್ಮಾಣೆಂ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲಲ್ಯಾ ವೆಳಾ ಥಾವ್ನ್ ದೆವಾಚೊ ಸಕ್ತಿವಂತ್ ಪೂತ್ ಮ್ಹಣ್ ಸ್ಥಾಪಿತ್ ಜಾಲ್ಲೊ. ತಾಚ್ಯಾ ನಾಂವಾಚೇ ಮಹಿಮೇ ಖಾತಿರ್ ಸರ್ವ್ ಜನಾಂಗಾಂಕ್ ವಿಧೇಯ್ಪಣಾಚೇ, ಮ್ಹಣ್ಜೆ ಭಾವಾರ್ಥಾಚೇ ವಾಟೇಕ್ ಹಾಡುಂಕ್ ತಾಚೇಚ್ ವರ್ವಿಂ ಧರ್ಮ್ದೂತ್ ಜಾವ್ಚೆಂ ದೆಣೆಂ ಮ್ಹಾಕಾ ಲಾಭ್ಲೆಂ. ಜೆಜು ಕ್ರಿಸ್ತಾಚೊ ಲೋಕ್ ಜಾಂವ್ಕ್ ಆಪಯ್ಲಲೆ ರೊಮಾ ಶಹರಾಂತ್ ಆಸ್ಲಲೆ ತುಮಿಯೀ ಹಾಂಚೇಚ್ ಮಧ್ಲ್ಲೆ
Show more
24 November
ದಸೆಂಬರ್ 21 - ಕಿಸ್ತಾ ಯೆಣ್ಯಾಕಾಳಾಚೊ ಚವ್ತೊ ಆಯ್ತಾರ್ - ಸುವಾರ್ತಾ
ಕ್ರೀಸ್ತಾಚೆಂ ಜನನ್ ಹೇ ಪರಿಂ ಜಾಲೆಂ: ತಾಚೇ ಮಾತೇ ಮರಿಯೆಕ್ ಜುಜೆಲಾಗಿಂ ಕರಾರ್ ಜಾಲ್ಲೆಂ. ಪುಣ್ ತಾಂಚ್ಯಾ ಲಗ್ನಾ ಪಯ್ಲೆಂ ತಿ ಪವಿತ್ರ್ ಅತ್ಮ್ಯಾ ವರ್ವಿಂ ಗರ್ಭೆಸ್ತ್ ಜಾಲಿ. ತಿಚೊ ಪತಿ ಜುಜೆ ನಿತಿವಂತ್ ಮನಿಸ್. ತರ್ಯೀ ಮರಿಯೆಕ್ ಅಪಕೀರ್ತ್ ಹಾಡುಂಕ್ ತಾಕಾ ಖುಶಿ ನಾತ್ಲಿ. ದೆಕುನ್ ತಾಣೆಂ ತಿಕಾ ಗುಪ್ತಿಂ ಸೊಡ್ಚಿ ಮ್ಹಣುನ್ ಚಿಂತ್ಲೆಂ. ಪುಣ್ ತಾಣೆಂ ಅಶಿ ಆಲೋಚನ್ ಕೆಲಿ ತಿತ್ಲಿಚ್, ತಾಕಾ ಸೊಪ್ಣಾಂತ್ ಸರ್ವೆಸ್ಪರಾಚೊ ಎಕ್ ದೂತ್ ದಿಷ್ಟಿ ಪಡ್ಲೊ ಆನಿ ಮ್ಹಣಾಲೊ: “ಜುಜೆ, ದಾವಿದಾಚ್ಯಾ ಪುತಾ, ಮರಿಯೆಕ್ ತುಜಿ ಪತಿಣ್ ಮ್ಹಣ್ ತುಜ್ಯಾ ಘರಾ ಹಾಡುಂಕ್ ಭಿಯೆನಾಕಾ, ಕಿತ್ಯಾಕ್ ತಿಚೆ ಥಂಯ್ ಗರ್ಭ್ಸಂಭವ್ ಪವಿತ್ರ್ ಅತ್ಮ್ಯಾ ವರ್ವಿಂ ಜಾಲಾ. ತಿ ಏಕ್ ಪುತಾಕ್ ಪ್ರಸುತ್ ಜಾತಲಿ; ತುವೆಂ ತಾಕಾ ಜೆಜು ಮ್ಹಣ್ ನಾಂವ್ ದವರುಂಕ್ ಜಾಯ್; ಕಿತ್ಯಾಕ್ ತೊ ಆಪ್ಲೇ ಪರ್ಜೆಕ್ ತಿಚ್ಯಾ ಪಾತ್ಕಾಂತ್ಲಿ ಸೊಡಯ್ತಲೊ.” ಹೆಂ ಸಗ್ಳೆಂ ಘಡ್ಲೆಂ ಪೂರ್ಣ್ ಜಾವ್ಚ್ಯಾಕ್ ಪ್ರವಾದ್ಯಾ ಮಾರಿಫತ್ ಸರ್ವೆಸ್ಪರಾನ್ ಮ್ಹಳ್ಳೆಂ ತೆಂ : “ಏಕ್ ಆಂಕ್ವಾರ್ ಚಲಿ ಗರ್ಭೆಸ್ತ್ ಜಾತಲಿ ಆನಿ ಏಕ್ ಪುತಾಕ್ ಪ್ರಸುತ್ ಜಾತಲಿ ಆನಿ ತಾಕಾ ‘ಇಮ್ಮಾನುಎಲ್’ ಮ್ಹಣುನ್ ಆಪಯ್ತಲೆ.” ‘ಇಮ್ಮಾನುಎಲ್’ ಮ್ಹಳ್ಯಾರ್, ‘ದೇವ್ ಆಮ್ಚೇ ಸಾಂಗಾತಾ’ ಮ್ಹಣ್ ಅರ್ಥ್. ಜುಜೆನ್ ನಿದೆಂತ್ಲೊ ಉಠ್ತಚ್, ಸರ್ವೆಸ್ಪರಾಚ್ಯಾ ದುತಾನ್ ಪರ್ಮಾಯ್ಲ್ಲೇ ಪರ್ಮಾಣೆಂ ಕೆಲೆಂ. ಮರಿಯೆಕ್ ಆಪ್ಲಿ ಪತಿಣ್ ಮ್ಹಣ್ ತಾಣೆಂ ಆಪ್ಲ್ಯಾ ಘರಾ ಹಾಡ್ಲಿ.
Show more
24 November
ದಸೆಂಬರ್ 14 - ಕಿಸ್ತಾ ಯೆಣ್ಯಾಕಾಳಾಚೊ ತಿಸ್ರೊ ಆಯ್ತಾರ್ - ಪಯ್ಲೆಂ ವಾಚಪ್
ಇಸಾ. 35:1-6,8,10 ಅರಣೆಂ ಆನಿ ಸುಕ್ಲಲಿ ಭುಂಯ್ ಸಂತೊಸ್ಭರಿತ್ ಜಾಂವ್, ಪಾಡ್ ಪಡ್ಲಲಿ ಭುಂಯ್ ಉಲ್ಲಾಸುಂ ಆನಿ ಫುಲುಂ; ಸಾಳ್ಕಾ ಭಾಶೆನ್ ತಿ ಭರ್ಪೂರ್ ಫುಲಾಂನಿ ಫುಲುಂ, ತಿ ಉಲ್ಲಾಸುಂ ಆನಿ ಅನಂದಾನ್ ಗಿತಾಂ ಗಾಂವ್. ತಿಕಾ ದಿಲ್ಯಾ ಲೆಬನೊನಾಚಿ ಮಹಿಮಾ, ಕಾರ್ಮೆಲಾಚೊ ಆನಿ ಶಾರೊನಾಚೊ ಪ್ರತಾಪ್. ಲೋಕ್ ಸರ್ವೆಸ್ಪರಾಚಿ ಮಹಿಮಾ ದೆಕ್ತಲೊ, ಆಮ್ಚ್ಯಾ ದೆವಾಚೊ ಪ್ರತಾಪ್. ಥಕ್ಲಲೆ ಹಾತ್ ಘಟ್ ಕರಾ, ಅಸ್ಕತ್ ಧೊಂಪ್ರಾಂ ಥಿರ್ ಕರಾ. ಭಿವ್ಕುರ್ಯಾ ಕಾಳ್ಜಾಚ್ಯಾಂಕ್ ಸಾಂಗಾ: “ಧಯ್ರ್ ಘೆಯಾ! ಭಿಯೆನಾಕಾತ್! ಪಳೆಯಾ, ಹಾಂಗಾ ಆಸಾ ತುಮ್ಚೊ ದೇವ್. ಸೂಡ್ ಘೆಂವ್ಕ್ ತೊ ಯೆತಾ, ಫಾರಿಕ್ಪಣ್ ಘೆಂವ್ಕ್ ತೊ ಯೆತಾ, ತುಮ್ಕಾಂ ಸೊಡೊಂವ್ಕ್ ತೊ ಯೆತಾ.” ತೆದ್ನಾ ಕುಡ್ರ್ಯಾಂಚೆ ದೊಳೆ ಉಗಡ್ತಲೆ, ಭೆರ್ಯಾಂಚೆ ಕಾನ್ ಉಗ್ತೆ ಜಾತಲೆ; ತೆದ್ನಾ ಮೆರ್ವಾ ಭಾಶೆನ್ ಥೊಂಟೆ ಉಡ್ತಲೆ ಆನಿ ಮೊನ್ಯಾಂಚ್ಯೊ ಜಿಬೊ ಸಂತೊಸಾನ್ ಗಾಯ್ತಲ್ಯೊ. ತಾಂತ್ಲ್ಯಾನ್ ಏಕ್ ರಾಜ್ರಸ್ತೊ ವೆತಲೊ ಆನಿ ತಾಕಾ “ಪವಿತ್ರ್ ವಾಟ್” ಮ್ಹಣ್ತಲಿಂ; ಕಿತ್ಯಾಕ್ ಸರ್ವೆಸ್ಪರಾನ್ ಸೊಡಯ್ಲ್ಯಾಂತ್ ತಿಂ ಪರತ್ ಯೆತಲಿಂ, ಗಿತಾಂ ಗಾವುನ್ ತಿಂ ಸಿಯೊನಾಕ್ ಯೆತಲಿಂ; ಸಾಸ್ಣಿಕ್ ಸಂತೊಸ್ ತಾಂಚ್ಯಾ ಮಾತ್ಯಾರ್ ಆಸ್ತಲೊ; ಸಂತೊಸ್ ಆನಿ ಆನಂದ್ ತಿಂ ಭೊಗ್ತಲಿಂ, ದೂಖ್ ಆನಿ ರುದನ್ ಪಳುನ್ ವೆತಲಿಂ.
Show more
24 November
ದಸೆಂಬರ್ 14 - ಕಿಸ್ತಾ ಯೆಣ್ಯಾಕಾಳಾಚೊ ತಿಸ್ರೊ ಆಯ್ತಾರ್ – ಕೀರ್ತನ್
ಕೀ.145 ಶ್ಲೋಕ್: ಯೆ, ಯೆ, ಸೊಮಿಯಾ, ಸೊಡಯ್ ಆಮ್ಕಾಂ! ವ ಸರ್ವೆಸ್ಪರಾಕ್ ಜೈ, ಜೈ! 1. ಸರ್ವೆಸ್ಪರ್ ಸದಾಂಚ್ ವಿಶ್ವಾಸ್ ಪುರ್ತೊ, ಅನ್ನ್ಯಾಯ್ ಜಾಲ್ಲ್ಯಾಂಕ್ ನ್ಯಾಯ್-ನೀತ್ ಜೊಡ್ನ್ ದಿತಾ ತೊ; ಭುಕೆಲ್ಲ್ಯಾಂಕ್ ತೊ ಗ್ರಾಸ್ ದಿತಾ, ಕೈದ್ಯಾಂಚ್ಯೊ ಸಾಂಕ್ಳ್ಯೊ ತೊ ತುಟೊವ್ನ್ ಉಡಯ್ತಾ. 2. ಸರ್ವೆಸ್ಪರ್ ಕುಡ್ರ್ಯಾಂಚೆ ದೊಳೆ ಉಘಡ್ತಾ, ಬಾಗ್ವಲ್ಲ್ಯಾಂಕ್ ನೀಟ್ ಉಬಿಂ ಕರ್ತಾ; ಸರ್ವೆಸ್ಪರ್ ಪರ್ಗಾಂವ್ಯಾಂಕ್ ರಾಕ್ತಾ, ಅನಾಥಾಂಕ್ ಆನಿ ವಿಧ್ವಿಂಕ್ ತೊಚ್ ಸಾಂಬಾಳ್ತಾ. 3. ಸರ್ವೆಸ್ಪರ್ ನಿತಿವಂತಾಂಚಿ ಆಪುರ್ಬಾಯ್ ಕರ್ತಾ, ಪುಣ್ ಖೊಟ್ಯಾಂಚ್ಯೊ ಆಲೋಚನೊ, ನಿರ್ಫಳ್ ಕರ್ತಾ; ಸರ್ವೆಸ್ಪರ್ ಸದಾಂಕಾಲ್ ರಾಜ್ವಟ್ ಚಲಯ್ತಲೊ. ಏ ಸಿಯೋನಾ, ತುಜೊ ದೇವ್ ಸಂತತೆಚ್ಯಾ ಸಂತತೇಕ್ ತುಜೊ ರಾಯ್ ಜಾತಲೊ.
Show more
24 November
ದಸೆಂಬರ್ 14 - ಕಿಸ್ತಾ ಯೆಣ್ಯಾಕಾಳಾಚೊ ತಿಸ್ರೊ ಆಯ್ತಾರ್ – ದುಸ್ರೆಂ ವಾಚಪ್
ಜಾಕೊಬ್ 5:7-10 ಆತಾಂ ಭಾವಾಂಭಯ್ಣಿಂನೋ, ಸೊಮಿ ಯೆತಾ ಪರ್ಯಾನ್ ಸೊಸ್ಣಿಕ್ ಜಾಯಾ. ಪಳೆಯಾ ಏಕ್ ಶೆತ್ಕಾರ್, ಕಶೆಂ ತೊ ಭುಮಿಚ್ಯಾ ಮೊಲಾಧಿಕ್ ಪಿಕಾಕ್ ರಾಕುನ್ ರಾವ್ತಾ; ಪಯ್ಲೆಂಚೊ ಆನಿ ಆಖ್ರೇಚೊ ಪಾವ್ಸ್ ಯೇಸರ್ ತೊ ಸೊಸ್ಣಿಕಾಯೆನ್ ರಾಕುನ್ ರಾವ್ತಾ. ತುಮಿಯೀ ತಶಿಂಚ್ ಸೊಸ್ಣಿಕ್ ಜಾಯ್ಜಯ್ ಆನಿ ತುಮ್ಚ್ಯಾ ಕಾಳ್ಜಾಂತ್ ಧೈರ್ ಘೆಜಯ್, ಕಿತ್ಯಾಕ್ ಸೊಮಿಯಾಚೆಂ ಯೆಣೆಂ ಲಾಗಿಂ ಪಾವ್ಲಾಂ. ಭಾವಾಂಭಯ್ಣಿಂನೋ, ಎಕಾಮೆಕಾಚೆರ್ ಅಪ್ರಾಧ್ ಮಾಂಡಿನಾಕಾತ್; ಮಾಂಡ್ಶಾತ್ ಜಾಲ್ಯಾರ್ ತುಮ್ಚಿಚ್ ಝಡ್ತಿ ಜಾತಲಿ. ಪಳೆಯಾ, ನಿತಿದಾರ್ ತುಮ್ಚ್ಯಾ ದಾರ್ವಟ್ಯಾ ಸರ್ಶಿಂ ಉಬೊ ಆಸಾ. ಭಾವಾಂಭಯ್ಣಿಂನೋ, ಸೊಮಿಯಾಚೇ ನಾಂವಿಂ ಉಲಯ್ಲ್ಲ್ಯಾ ಪ್ರವಾದ್ಯಾಂನಿ ಕಷ್ಟಾಂ ಮಧೆಂ ದಾಖಯ್ಲಲೇ ಸೊಸ್ಣಿಕಾಯೆಚಿ ದೇಖ್ ಘೆಯಾ.
Show more
24 November
ದಸೆಂಬರ್ 14 - ಕಿಸ್ತಾ ಯೆಣ್ಯಾಕಾಳಾಚೊ ತಿಸ್ರೊ ಆಯ್ತಾರ್ – ಸುವಾರ್ತಾ
ಮಾತೆವ್ 11:2-11 ತವಳ್ ಕ್ರಿಸ್ತಾಚ್ಯಾ ಕೃತ್ಯಾಂ ವಿಶ್ಯಾಂತ್ಲಿ ಖಬರ್ ಬಂಧೆಂತ್ ಆಸ್ಲ್ಲ್ಯಾ ಜುವಾಂವ್ಚ್ಯಾ ಕಾನಾಂತ್ ಪಡ್ಲಿ ಆಸ್ತಾಂ, ತಾಣೆಂ ಆಪ್ಲ್ಯಾ ಶಿಸಾಂಕ್ ಧಾಡ್ನ್ ಜೆಜುಲಾಗಿಂ ಅಶೆಂ ವಿಚಾರುಂಕ್ ಲಾಯ್ಲೆಂ : “ಯೆಂವ್ಚೊ ಆಸಾ ತೊ ತುಂಚ್, ವಾ ಆಮಿ ಆನ್ಯೆಕ್ಲ್ಯಾಚಿ ವಾಟ್ ಪಳೆಜಯ್?” ಜೆಜುನ್ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ: “ಪಾಟಿಂ ವಚಾ, ಆನಿ ತುಮಿಚ್ ಆಯ್ಕಲಾಂ ಆನಿ ಪಳೆಲಾಂ ತೆಂ ಜುವಾಂವ್ಕ್ ಸಾಂಗಾ: ಕುರ್ಡೆ ಪಳೆತಾತ್, ಥೊಂಟೆ ಚಲ್ತಾತ್, ಕೊಡ್ಕಾರ್ ನಿತಳ್ ಜಾತಾತ್, ಕೆಪ್ಪೆ ಆಯ್ಕತಾತ್, ಮೆಲ್ಲೆ ಜೀವ್ ಜಾತಾತ್ ಆನಿ ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ ಜಾತಾ. ಮ್ಹಜೇ ವಿಶ್ಯಾಂತ್ ಜಾಚೊ ಭಾವಾರ್ಥ್ ಧಂಡಳ್ನಾ ತೊ ಭಾಗಿ!” ಜುವಾಂವ್ಚೆ ಶಿಸ್ ಪಾಟ್ ಕರ್ನ್ ಗೆಲ್ಲೆಚ್, ಜೆಜು ಲೊಕಾಚ್ಯಾ ಜಮ್ಯಾಲಾಗಿಂ ಜುವಾಂವ್ ವಿಶ್ಯಾಂತ್ ಉಲೊಂವ್ಕ್ಲಾಗ್ಲೊ: “ತುಮಿ ಕಿತೆಂ ಪಳೆಂವ್ಕ್ ಮ್ಹಣ್ ಅರಣ್ಯಾಕ್ ಗೆಲ್ಲ್ಯಾತ್? ವಾರೆಕ್ ಧಲ್ಚೊ ಚಿವೊಗಾಯ್? ನ್ಹಯ್ ತರ್, ಕಿತೆಂ ಪಳೆಂವ್ಕ್ ಗೆಲ್ಲ್ಯಾತ್? ನಾಜೂಕ್ ವಸ್ತುರಾಂ ನ್ಹೆಸ್ಲಲೊ ಮನಿಸ್ಗಾಯ್? ನಾಜೂಕ್ ವಸ್ತುರಾಂ ನ್ಹೆಸ್ತಾತ್ ತೆ ರಾವ್ಳೆರಾಂನಿ ಪಳೆಂವ್ಕ್ ಮೆಳ್ತಾತ್. ಕಿತೆಂ ತರ್ ತುಮಿ ಪಳೆಂವ್ಕ್ ಗೆಲ್ಲ್ಯಾತ್? ಏಕ್ ಪ್ರವಾದಿ? ವ್ಹಯ್, ಹಾಂವ್ ತುಮ್ಕಾಂ ಸಾಂಗ್ತಾಂ, ಪ್ರವಾದ್ಯಾ ಪ್ರಾಸ್ ವತ್ರ್ಯಾಕ್. ತಾಚೇಚ್ ವಿಶ್ಯಾಂತ್ ಪವಿತ್ರ್ ಪುಸ್ತಕಿಂ ಅಶೆಂ ಬರೊವ್ನ್ ಆಸಾ: ‘ಪಳೆ, ಮ್ಹಜ್ಯಾ ದುತಾಕ್, ತುಜ್ಯಾ ಫುಡ್ಲ್ಯಾನ್ ಧಾಡ್ತಾಂ, ತೊ ತುಜ್ಯಾ ಯೆಣ್ಯಾಕ್ ತುಜಿ ವಾಟ್ ತಯಾರ್ ಕರ್ತಲೊ’ ಸತ್ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಮನಿಸ್ ಜಾವ್ನ್ ಜಲ್ಮಲ್ಲ್ಯಾಂ ಮಧೆಂ ಸ್ನಾನ್ದಾತಾರ್ ಜುವಾಂವ್ ಪ್ರಾಸ್ ವರ್ತೊ ದುಸ್ರೊ ನಾ; ತರಿಪುಣ್ ಸರ್ಗಿಂಚ್ಯಾ ರಾಜ್ಯಾಂತ್ ಕನಿಷ್ಠ್ ಆಸ್ಲಲೊ ಸಯ್ತ್ ತಾಚೇ ಪ್ರಾಸ್ ವ್ಹರ್ತೊ.
Show more
24 November
ದಸೆಂಬರ್ 7 - ಕಿಸ್ತಾ ಯೆಣ್ಯಾಕಾಳಾಚೊ ದುಸ್ರೊ ಆಯ್ತಾರ್ - ಪಯ್ಲೆಂ ವಾಚಪ್
ಇಸಾ.11:1-10 ಜೆಸ್ಸೆಚಾ ಮುಳಾಕ್ ಏಕ್ ಕೋಂಬ್ ಫುಟ್ತಲೊ, ಆನಿ ತಾಚ್ಯಾ ಪಾಳಾಂತ್ಲಿ ಏಕ್ ಕೊಮ್ರಿ ಉಪ್ಜತಲಿ. ಸರ್ವೆಸ್ಪರಾಚೊ ಅತ್ಮೊ ತಾಚೆರ್ ಯೆವ್ನ್ ರಾವ್ತಲೊ: ಜಾಣ್ವಾಯೆಚೊ ಆನಿ ಸಮ್ಜೊಣೆಚೊ ಅತ್ಮೊ, ಬುದಿಚೊ ಆನಿ ಪದ್ವೆಚೊ ಅತ್ಮೊ, ಸರ್ವೆಸ್ಪರಾಚ್ಯಾ ಶಾಣೆಪಣಾಚೊ ಆನಿ ಭಿರಾಂತಿಚೊ ಅತ್ಮೊ; ಸರ್ವೆಸ್ಪರಾಚಿ ಭಿರಾಂತ್ ತಾಚೆಂ ಪ್ರೇರಣ್ ಜಾತಲಿ. ತೊ ವಯ್ಲ್ಯಾ ವಯ್ರ್ ಪಳೆವ್ನ್ ನ್ಯಾಯ್ನೀತ್ ಕರ್ಚೊ ನಾ, ಲೊಕಾಚೆಂ ಆಯ್ಕುನ್ ತೊ ಫರ್ಮಾಣ್ ಮಾರ್ಚೊ ನಾ. ತೊ ಪ್ರಾಮಾಣಿಕ್ಪಣಾನ್ ದುಬ್ಳ್ಯಾಂಕ್ ನ್ಯಾಯ್ ಕರುನ್ ದಿತಲೊ, ದೆಶಾಚ್ಯಾ ಲ್ಹಾನ್ವಿಕಾಂ ಖಾತಿರ್ ನಿತಿನ್ ನಿರ್ಣಯ್ ಘೆತಲೊ; ಆಪ್ಲ್ಯಾ ಉತ್ರಾಚೆ ಬೊಡಿಯೆನ್ ದೆಶಾಕ್ ತೊ ಮಾರ್ ದಿತಲೊ ಆನಿ ಆಪ್ಲ್ಯಾ ವೊಂಟಾಂಚ್ಯಾ ಶ್ವಾಸಾನ್ ನಷ್ಟ್ಯಾಂಚೊ ನಾಸ್ ಕರ್ತಲೊ. ಪ್ರಾಮಾಣಿಕ್ಪಣ್ ತಾಚ್ಯಾ ಪೆಂಕ್ಟಾಚೊ ಪಟ್ಟೊ ಜಾತಲೊ ಆನಿ ವಿಶ್ವಾಸಿಪಣ್ ತಾಚೊ ಕಮರ್ಬಂದ್. ಸುಣೆಂವಾಗೂಟ್ ಶೆಳಿಯೆ ಸಾಂಗಾತಾ ಜಿಯೆತಲೆಂ ಆನಿ ಬೊಕ್ಡೆಪೀಲ್ ಚಿಟ್ಯಾವಾಗಾಚೆ ಕುಶಿಕ್ ಆಡ್ ಪಡ್ತಲೊ. ವಾಸ್ರುಂ ಆನಿ ಶಿಂವ್ ಸಾಂಗಾತಾ ಚರ್ತಲಿಂ ಆನಿ ಏಕ್ ಲ್ಹಾನ್ ಭುರ್ಗೊ ತಾಂಕಾಂ ರಾಕ್ತಲೊ. ಗಾಯ್ ಆನಿ ಆಂಸ್ವೆಲ್ ಇಷ್ಟಾಗತಿಂತ್ ಆಸ್ತಲಿಂ ಆನಿ ತಾಂಚಿಂ ಪಿಲಾಂ ಸಾಂಗಾತಾ ನಿದ್ತಲಿಂ. ಶಿಂವ್ ಬಯ್ಲಾ ಭಾಶೆನ್ ತಣ್ ಖಾತಲೊ. ದುದಾಚೆಂ ಬಾಳ್ಶೆಂ ಸೊರ್ಪಾಚ್ಯಾ ಬಿಳಾಚೆರ್ ಖೆಳ್ತಲೆಂ, ಲ್ಹಾನ್ ಭುರ್ಗೆಂ ಆಗಿಯ್ಯಾಚ್ಯಾ ಬಿಳಾಂತ್ ಹಾತ್ ಘಾಲ್ತಲೆಂ. ಮ್ಹಜ್ಯಾ ಆಖ್ಯಾ ಪವಿತ್ರ್ ಪರ್ವತಾರ್ ಕೋಣ್ಚ್ ವಾಯ್ಟ್ ಕರಿನಾ, ಕೋಣ್ಚ್ ದೆಸ್ವಾಟ್ ಕರಿನಾ; ಕಿತ್ಯಾಕ್ ಜಶೆಂ ದರ್ಯಾಕ್ ಭರ್ತಿ ಯೆತಾ, ತಶೆಂ ಪೃಥ್ವಿ ಸರ್ವೆಸ್ಪರಾಚ್ಯಾ ಗಿನ್ಯಾನಾನ್ ಭರೊನ್ ಯೆತಲಿ. ತ್ಯಾ ದಿಸಾ ಜೆಸ್ಸೆಚೆಂ ಪಾಳ್ ಸಗ್ಳ್ಯಾ ರಾಷ್ಟ್ರಾಂಕ್ ಏಕ್ ಖುಣಾ ಕಶಿ ಉಬೆಂ ರಾವ್ತಲೆಂ, ಸಗ್ಳಿಂ ರಾಷ್ಟ್ರಾಂ ತಾಕಾ ಸೊಧುನ್ ಯೆತಲಿಂ ಆನಿ ತಾಚೆಂ ಘರ್ ಮಹಿಮೆವಂತ್ ಜಾತಲೆಂ.
Show more
24 November
ದಸೆಂಬರ್ 7 - ಕಿಸ್ತಾ ಯೆಣ್ಯಾಕಾಳಾಚೊ ದುಸ್ರೊ ಆಯ್ತಾರ್ – ಕೀರ್ತನ್
ಕೀ.71 ಶ್ಲೋಕ್: ತಾಚ್ಯಾ ದಿಸಾಂನಿ ನೀತ್ ವಿಸ್ತಾರ್ತಲಿ ಆನಿ ಸಂಪೂರ್ಣ್ ಶಾಂತಿ ವಸ್ತಲಿ. 1. ಸರ್ವೆಸ್ಪರಾ, ರಾಯಾಕ್ ತುಜ್ಯಾ ನ್ಯಾಯ್-ನೀತ್ ಶಿಕೊವ್ನ್ ದೀ, ರಾಯ್-ಕುಂವರ್ ಜಾವ್ನಾಸ್ಲಲ್ಯಾ ತಾಕಾ ತುಜೆಂ ನಿತಿವಂತ್ಪಣ್ ವಾಂಟುನ್ ದೀ; ತೊ ನ್ಯಾಯ್-ನಿತಿನ್ ತುಜ್ಯೆ ಪರ್ಜೆಚಿ ಮುನ್ಸುಬಿ ಕರ್ತಲೊ, ಆನಿ ತುಜ್ಯಾ ದುರ್ಬಳ್ಯಾಂಕ್ ನೀತ್ ಕರ್ನ್ ದಿತಲೊ. 2. ತಾಚ್ಯಾ ದಿಸಾಂನಿ ನೀತ್ ವಿಸ್ತಾರ್ತಲಿ, ಚಂದ್ರ್ ಸರಾಸರ್ ತಾಚಿ ಶಾಂತಿ ಬಾಳ್ತಲಿ. ದರ್ಯಾ ಥಾವ್ನ್ ದರ್ಯಾ ಪರ್ಯಾಂತ್, ನ್ಹಂಯ್ಚ್ಯೆ ತಡಿ ಥಾವ್ನ್ ಭುಮಿಚೊ ಕೊನ್ಸೊ ಪರ್ಯಾಂತ್, ಚಲ್ತಲಿ ತಾಚಿ ರಾಜ್ವಟ್ಕಿ. 3. ಕಿತ್ಯಾಕ್ ಉಲೊ ಮಾರ್ತಲ್ಯಾ ಗರೀಬಾಂಕ್, ಆಧಾರ್ ನಾತ್ಲಲ್ಯಾ ದುಬ್ಳ್ಯಾಂಕ್ ತೊ ಪಾವ್ತಲೊ; ದುರ್ಗತಿಚ್ಯಾಂಕ್ ಆನಿ ದುರ್ಬಳ್ಯಾಂಕ್ ತೊ ದಯಾ ದಾಖಯ್ತಲೊ, ಆನಿ ನಿರಾಧಾರ್ಯಾಂಚೊ ತೊ ಜೀವ್ ವಾಂಚಯ್ತಲೊ. 4. ಹರ್ಸಿಲ್ಲೆಂ ಜಾಂವ್ ತಾಚೆಂ ನಾಂವ್, ಸುರ್ಯೊ ಆಸಾಸರ್ ತೆಂ ಬಾಳ್ವೊಂ ಪೃಥ್ವೆಚಿಂ ಸರ್ವ್ ಜನಾಂಗಾಂ ತಾಚ್ಯೆ ಉದೆಶಿಂ ಆಪುಣ್ ಸದೆಂವ್ ಮ್ಹಣುನ್, ತಾಕಾ ಲಾಭ್ಲಲೊ ಆಶೀರ್ವಾದ್ ಆಪ್ಣಾಂಕ್ಯಿ ಲಾಭೊಂ ಮ್ಹಣುನ್ ಪ್ರಾರ್ಥುಂ.
Show more
24 November
ದಸೆಂಬರ್ 7 - ಕಿಸ್ತಾ ಯೆಣ್ಯಾಕಾಳಾಚೊ ದುಸ್ರೊ ಆಯ್ತಾರ್ – ದುಸ್ರೆಂ ವಾಚಪ್
ರೊಮಾ.15:4-9 ಭಾವಾಂ-ಭಯ್ಣಿಂನೋ, ಪವಿತ್ರ್ ಪುಸ್ತಕಾಂತ್ ಬರೊವ್ನ್ ಘಾಲ್ಲ್ಯೊ ಸಂಗ್ತಿ ಆಮ್ಕಾಂ ಶಿಕೊವ್ಣ್ ದಿಂವ್ಚೆ ಖಾತಿರ್ ಬರೊವ್ನ್ ಘಾಲ್ಯಾತ್. ತಾಂಣಿಂ ದಿಲ್ಲೇ ಸೊಸ್ಣಿಕಾಯೆ ಆನಿ ಉತ್ತೇಜನಾ ವರ್ವಿಂ ಆಮಿ ಭರ್ವಸೊ ಧರ್ಚೇ ಖಾತಿರ್ ತಾಂತ್ಲ್ಯೊ ಸಂಗ್ತಿ ಬರಯ್ಲ್ಲ್ಯೊ. ಹೇ ಸೊಸ್ಣಿಕಾಯೆಚೆಂ ಆನಿ ಉತ್ತೇಜನಾಚೆಂ ಮೂಳ್ ಜಾವ್ನಾಸ್ಲ್ಲೊ ದೇವ್ ತುಮಿ ಜೆಜು ಕ್ರಿಸ್ತಾಚೇ ದೆಖಿ ಪರ್ಮಾಣೆಂ ಜಿಯೆಶೆಂ ತುಮ್ಕಾಂ ಏಕ್ ಮನಾಚಿಂ ಕರುಂ. ಹಾಚೇ ವರ್ವಿಂ ಏಕ್ಚ್ ಕಾಳ್ಜಾನ್ ಆನಿ ಏಕ್ಚ್ ತಾಳ್ಯಾನ್ ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚ್ಯಾ ಬಾಪಾಕ್ ತುಮಿ ಸಮೆಸ್ತ್ ವಾಖಾಣುಂಕ್ ಪಾವ್ತಲ್ಯಾತ್. ತರ್ ಕ್ರಿಸ್ತಾನ್ ತುಮ್ಕಾಂ ದೆವಾಚೇ ಮಹಿಮೇ ಖಾತಿರ್ ಮಯ್ಪಾಸಾನ್ ಲಾಗಿಂ ಘೆತ್ಲಲೇಬರಿ, ತುಮಿಯೀ ಎಕಾಮೆಕಾ ಥಂಯ್ ಮಾಯಾಮೊಗಾನ್ ಚಲಾ. ಆಪುಣ್ ವಿಶ್ವಾಸಿ ಮ್ಹಣ್ ದಾಖೊವ್ಚೇ ಖಾತಿರ್ ದೆವಾನ್ ಆಮ್ಚ್ಯಾ ಪುರ್ವಜಾಂಕ್ ಕೆಲ್ಲ್ಯೊ ಭಾಸಾವ್ಣ್ಯೊ ಜ್ಯಾರಿ ಕರ್ನ್ ಕ್ರಿಸ್ತಾಕ್ ಜುದೆವಾಂಚೊ ಸೆವಕ್ ಕರ್ನ್ ನಮಿಯರ್ಲೊ ಮ್ಹಣ್ ಹಾಂವ್ ಧೈರಾನ್ ಸಾಂಗ್ತಾಂ. ಹೆರ್ ಜಾತಿಂಚೊ ಲೋಕ್ ಆಪ್ಣಾಕ್ ದೆವಾನ್ ದಾಖಯ್ಲಲೇ ಕಾಕುಳ್ತಿ ಖಾತಿರ್ ತಾಕಾ ಮಹಿಮಾ ದಿತಾ; ಕಿತ್ಯಾಕ್ ಪವಿತ್ರ್ ಪುಸ್ತಕಿಂ ಅಶೆಂ ಮ್ಹಳಾಂ: “ಹ್ಯಾ ಪಾಸತ್ ಹೆರ್ ಜಾತಿಂಚ್ಯಾ ಲೊಕಾ ಮಧೆಂ ಹಾಂವ್ ತುಕಾ ನಾಂವಾಡ್ತಲೊಂ. ಆನಿ ತುಜ್ಯಾ ನಾಂವಾಚಿ ಕೀರ್ತ್ ಗಾಯ್ತಲೊಂ.”
Show more
24 November
ದಸೆಂಬರ್ 7 - ಕಿಸ್ತಾ ಯೆಣ್ಯಾಕಾಳಾಚೊ ದುಸ್ರೊ ಆಯ್ತಾರ್ - ಸುವಾರ್ತಾ
ಮಾತೆವ್ 3:1-12 ತ್ಯಾ ದಿಸಾಂನಿ ಸ್ನಾನ್ದಾತಾರ್ ಜುವಾಂವ್ ಜುದೇಯಾಚ್ಯಾ ಅರಣ್ಯಾಂತ್ ದಿಷ್ಟಿ ಪಡ್ಲೊ ಆನಿ ಅಶೆಂ ಪ್ರಸಂಗ್ ಕರಿಲಾಗ್ಲೊ : “ತುಮ್ಚಿ ಪಾತ್ಕಿ ಜಿಣಿ ಬದಲಾ, ಕಿತ್ಯಾಕ್ ಸರ್ಗಿಂಚೆಂ ರಾಜ್ಯ್ ಲಾಗಿಂ ಪಾವ್ಲಾಂ.” ತಾಚೆಚ್ ವಿಶ್ಯಾಂತ್ ತೆಂ ಇಸಾಯಿಯಾ ಪ್ರವಾದ್ಯಾನ್ ಸಾಂಗ್ಲ್ಲೆಂ: “ಅರಣ್ಯಾಂತ್ ಏಕ್ ತಾಳೊ ಬೋಬ್ ಮಾರ್ತಾ: ಸೊಮಿಯಾಕ್ ಏಕ್ ವಾಟ್ ತಯಾರ್ ಕರಾ; ತಾಚ್ಯಾ ಪಯ್ಣಾಕ್ ರಸ್ತೊ ನೀಟ್ ಕರಾ.” ಜುವಾಂವ್ ಕರ್ಯಾಲೊಂವೆಚೆಂ ವಸ್ತುರ್ ನ್ಹೆಸ್ಲ್ಲೊ ಆನಿ ತಾಣೆಂ ಪೆಂಕ್ಟಾಕ್ ಚಾಮ್ಡ್ಯಾಚೊ ಪಾಟೊ ಬಾಂಧ್ಲ್ಲೊ; ದೆಂಪೆ ಆನಿ ರಾನ್ ಮ್ಹೊಂವ್ ತಾಚೆಂ ಖಾಣ್. ತವಳ್ ಜೆರುಜಲೆಮ್ ಶಹರಾಂತ್ಲೊ, ಜುದೇಯಾಚ್ಯಾ ಆಖ್ಯಾ ಪ್ರಾಂತಾಂತ್ಲೊ ಆನಿ ಯೊರ್ದಾನ್ ನ್ಹಂಯ್ ಬಗ್ಲೆಚ್ಯಾ ಸಗ್ಳ್ಯಾ ಬಯ್ಲಾಂತ್ಲೊ ಲೋಕ್ ತಾಚೆ ಸರ್ಶಿಂ ವೆತಾಲೊ ಆನಿ ಆಪ್ಲಿಂ ಪಾತ್ಕಾಂ ಉಚಾರ್ನ್ ಯೊರ್ದಾನ್ ನ್ಹಂಯ್ತ್ ತಾಚ್ಯಾ ಹಾತಾಂತ್ಲೆಂ ಸ್ನಾನ್ ಘೆತಾಲೊ. ಫಾರಿಜೆವಾಂ ಆನಿ ಸಾದುಸೆವಾಂ ಮಧ್ಲೆ ಸಬಾರ್ ಜಣ್ ಸ್ನಾನ್ ಘೆಂವ್ಕ್ ಆಪ್ಣಾ ಸರ್ಶಿಂ ಯೆತಾಲೆ ತೆಂ ಪಳೆವ್ನ್ ಜುವಾಂವ್ನ್ ತಾಂಕಾಂ ಮ್ಹಳೆಂ: “ಹತ್ತ್, ಆಗ್ಗ್ಯಾಚ್ಯಾ ಪಿಲಾಂನೋ, ಯೆಂವ್ಕ್ ಆಸಾ ತ್ಯಾ ಕ್ರೋಧಾ ಥಾವ್ನ್ ತುಮಿ ಚುಕೊವ್ನ್ ಘೆವ್ಯೆತ್ ಮ್ಹಣ್ ಕೊಣೆಂ ತುಮ್ಕಾಂ ಚತ್ರಾಯ್ ದಿಲಿ? ತರ್ ತುಮ್ಚಿ ಪಾತ್ಕಿ ಜಿಣಿ ಬದಲ್ಲ್ಯಾ ಮ್ಹಣ್ ದಾಖೊವ್ನ್ ದಿತಾತ್ ತ್ಯೊ ಕನ್ರ್ಯೊ ಆಧಾರಾ. ‘ಆಮ್ಕಾಂ ಆಬ್ರಾಹಾಮ್ ಆಮ್ಚೊ ಬಾಪ್ ಆಸಾ’ ಮ್ಹಣುನ್ ತುಮ್ಚೇ ಇತ್ಲ್ಯಾಕ್ ಮ್ಹಣುಂಕ್ ಧೈರ್ ಘೆನಾಕಾತ್. ಹಾಂವ್ ತುಮ್ಕಾಂ ಸಾಂಗ್ತಾಂ: ಹ್ಯಾಚ್ ಫಾತ್ರಾಂ ಥಾವ್ನ್ ಆಬ್ರಾಹಾಮಾಕ್ ಸಂತತ್ ಉತ್ಪನ್ನ್ ಕರ್ಚಿ ದೆವಾಕ್ ಸಾಮರ್ಥಿ ಆಸಾ. ಇತ್ಲ್ಯಾ ಭಿತರ್ಚ್ ರುಕಾಂಚ್ಯಾ ಮುಳಾಕ್ ಕುರಾಡ್ ದವರ್ನ್ ಜಾಲ್ಯಾ. ದೆಕುನ್ ಬರೊ ಫೋಳ್ ದೀನಾ ತೊ ಹರ್ಯೇಕ್ ರೂಕ್ ಕಾತರ್ತಲೆ ಆನಿ ಉಜ್ಯಾಂತ್ ಉಡಯ್ತಲೆ. ದೆವಾ ಥಂಯ್ ತುಮ್ಚ್ಯಾಚ್ ಪಾಟಿಂ ಪರ್ತೊಣ್ಯಾಚೊ ಗುರ್ತ್ ಮ್ಹಣ್ ಹಾಂವ್ ತುಮ್ಕಾಂ ಉದ್ಕಾನ್ ಸ್ನಾನ್ ದಿತಾಂ. ಪುಣ್ ಮ್ಹಜ್ಯಾ ಪಾಟ್ಲ್ಯಾನ್ ಯೆತಾ ತೊ ಮ್ಹಜೆ ಪ್ರಾಸ್ ಬಳಿಷ್ಠ್; ತಾಚ್ಯಾ ಪಾಂಯಾಂಚ್ಯೊ ವ್ಹಾಣೊ ವ್ಹಾವೊಂವ್ಕ್ ಸಯ್ತ್ ಹಾಂವ್ ಯೋಗ್ಯ್ ನ್ಹಯ್. ತೊ ತುಮ್ಕಾಂ ಪವಿತ್ರ್ ಅತ್ಮ್ಯಾನ್ ಆನಿ ಉಜ್ಯಾನ್ ಸ್ನಾನ್ ದಿತಲೊ. ಆಪ್ಲೆಂ ಸುಪ್ ತಾಣೆಂ ಆತಾಂ ಹಾತಾಂತ್ ಧರ್ಲಾಂ ಆನಿ ಆಪ್ಲಿ ಧಾನಿ ತೊ ಆಸುಡ್ನ್ ನಿತಳ್ ಕರ್ತಲೊ. ಆಪ್ಲೊ ಗೋಂವ್ ತೊ ತುಪ್ಯಾಂನಿ ಭರ್ತಲೊ. ಪುಣ್ ಪೋಲ್ ಕೆದಿಂಚ್ ಪಾಲ್ವನಾ ತಸಲ್ಯಾ ಉಜ್ಯಾಂತ್ ಘಾಲ್ನ್ ಲಾಸ್ತಲೊ.”
Show more
24 November
ನವೆಂಬರ್ 30 - ಕಿಸ್ತಾ ಯೆಣ್ಯಾಕಾಳಾಚೊ ಪಯ್ಲೊ ಆಯ್ತಾರ್ - ಪಯ್ಲೆಂ ವಾಚಪ್
ಇಸಾ.2:1-5 ಜುದಾ ಆನಿ ಜೆರುಸಾಲೆಮಾ ವಿಶಿಂ ಆಮೋಜಾಚ್ಯಾ ಪುತಾ ಇಸಾಯಿಯಾನ್ ದೆಕ್ಲ್ಲೆಂ ದೃಶ್ಯ್. ಅಂತಿಮ್ ದಿಸಾಂನಿ ಅಶೆಂ ಘಡ್ತಲೆಂ: ಸರ್ವೆಸ್ಪರಾಚ್ಯಾ ಮಂದಿರಾಚೊ ಪರ್ವತ್ ಅತ್ಯುನ್ನತ್ ಪರ್ವತ್ ಕಸೊ ಸ್ಥಾಪಿತ್ ಜಾತಲೊ ಆನಿ ಸಗ್ಳ್ಯಾ ದೊಂಗ್ರಾಂ ವಯ್ರ್ ಊಂಚ್ ಉಬಾರ್ಲಲೊ ಆಸ್ತಲೊ, ಸಗ್ಳಿಂ ರಾಷ್ಟ್ರಾಂ ತಾಚೆಶಿಂ ವ್ಹಾಳೊನ್ ಯೆತಲಿಂ. ಜಾಯ್ತ್ಯೊ ಪರ್ಜಾ ತಾಚೆಶಿಂ ಯೆವ್ನ್ ಮ್ಹಣ್ತಲ್ಯೊ: “ಯೆಯಾ, ಸರ್ವೆಸ್ಪರಾಚ್ಯಾ ಪರ್ವತಾರ್ ಚಡುಂಯಾ, ಜಾಕೊಬಾಚ್ಯಾ ದೆವಾಚ್ಯಾ ಮಂದಿರಾಂತ್ ವಚುಂಯಾ; ತೊ ಆಪ್ಲೊ ವಾಟೊ ಆಮ್ಕಾಂ ಶಿಕಯ್ತಲೊ, ಆನಿ ಆಮಿ ತಾಚ್ಯಾ ವಾಟಾಂನಿ ಚಲುಂಕ್ ಪಾವ್ತಲ್ಯಾಂವ್.” ಕಿತ್ಯಾಕ್ ಸಿಯೊನಾ ಥಾವ್ನ್ ಧರ್ಮ್ಶಾಸ್ತ್ರ್ ಭಾಯ್ರ್ ಸರ್ತಲೆಂ, ಆನಿ ಜೆರುಸಾಲೆಮಾ ಥಾವ್ನ್ ಸರ್ವೆಸ್ಪರಾಚೆಂ ಉತರ್. ರಾಷ್ಟ್ರಾಂ ಮಧೆಂ ತೊ ನ್ಯಾಯ್ ಕರ್ತಲೊ ಆನಿ ಜಾಯ್ತ್ಯಾ ಪರ್ಜಾಂಕ್ ನೀತ್ ಕರುನ್ ದಿತಲೊ. ತಿಂ ಆಪ್ಲೊ ತಲ್ವಾರಿ ಮೊಡುನ್ ನಾಂಗರ್ ಕರ್ತಲಿಂ ಆನಿ ಆಪ್ಲೆ ಭಾಲೆ ಮೊಡುನ್ ಕೊಯ್ತ್ಯೊ ಕರ್ತಲಿಂ. ಏಕ್ ರಾಷ್ಟ್ರ್ ದುಸ್ರ್ಯಾ ರಾಷ್ಟ್ರಾಚೆರ್ ಆಪ್ಲಿ ತಲ್ವಾರ್ ಉಬಾರ್ಚೆಂ ನಾ, ಹ್ಯಾ ಫುಡೆಂ ಝುಜಾಚಿ ತಯಾರಿ ಕೋಣ್ಚ್ ಕರ್ಚೊ ನಾ. ಜಾಕೊಬಾಚ್ಯಾ ಘರಾಣ್ಯಾ, ಯೆ, ಸರ್ವೆಸ್ಪರಾಚ್ಯಾ ಉಜ್ವಾಡಾಂತ್ ಆಮಿ ಚಲುಂಯಾ.
Show more
24 November
ನವೆಂಬರ್ 30 - ಕಿಸ್ತಾ ಯೆಣ್ಯಾಕಾಳಾಚೊ ಪಯ್ಲೊ ಆಯ್ತಾರ್ - ಕೀ.121
ಶ್ಲೋಕ್: “ಸರ್ವೆಸ್ಪರಾಚ್ಯೆ ಘರಿಂ ವಚುಂಯಾ” ಮ್ಹಣ್ತಾನಾ ಹಾಂವ್ ಸಂತೊಸ್ಲೊಂ. 1. “ಯಾ ಆಮಿ ಸರ್ವೆಸ್ಪರಾಚ್ಯೆ ಘರಿಂ!” ಅಶೆಂ ಮ್ಹಣುನ್ ಲೋಕ್ ಮ್ಹಣ್ತಾನಾ ಕೆದೊ ವರ್ತೊ ಸಂತೊಸ್ ಮ್ಹಾಕಾ ಭೊಗ್ಲೊ! 2. ಆಮಿ ತುಜ್ಯೆಶಿಂ ಪಾವ್ಲ್ಯಾಂವ್ ಜೆರುಜಲೆಮಾ! ತುಜ್ಯಾ ದಾರ್ವಾಟ್ಯಾಂಚೆರ್ ಆಸಾತ್ ಆಮ್ಚಿಂ ಪಾಂವ್ಲಾಂ, ತುಜ್ಯಾ ದಾರಾಂ ಭಿತರ್ ಉಬೆ ಆಸಾತ್ ಆಮ್ಚೆ ಪಾಂಯ್! 3. ಮಜ್ಭೂತ್ ಆನಿ ಅಖಂಡ್ ಬಾಂಧಾವಳೆನ್ ಉಬಾರ್ನ್ ಬಾಂಧ್ಲಾಂ ಆಮ್ಚೆಂ ಜೆರುಜಲೆಮ್! ಥಂಯ್ಸರ್ ಚಡುನ್ ಯೆತಾತ್ ಕುಳಿಯೊ, ವ್ಹಯ್, ಸರ್ವೆಸ್ಪರಾಚ್ಯೊ ಕುಳಿಯೊ ತ್ಯೊ! 4. ಸಗ್ಳ್ಯಾಂ ಮ್ಹಜ್ಯಾ ಭಾವಾಂ-ಭಯ್ಣಿಂ ಆನಿ ಮಿತ್ರಾಂ ಪಾಸತ್ “ಶಾಂತಿ ತುಕಾ!” ಮ್ಹಣುನ್ ಹಾಂವ್ ಮಾಗ್ತಾಂ, ಸರ್ವೆಸ್ಪರ್ ಆಮ್ಚೊ ದೇವ್ ಹಾಂಗಾ ಬಿಡಾರ್ ಕರ್ನ್ ಆಸಾ ದೆಕುನ್ “ತುಕಾ ನಂದನ್ ಜಾಂವ್” ಮ್ಹಣುನ್ ಹಾಂವ್ ಪ್ರಾರ್ಥಿತಾಂ.
Show more
24 November
ನವೆಂಬರ್ 30- ಕಿಸ್ತಾ ಯೆಣ್ಯಾಕಾಳಾಚೊ ಪಯ್ಲೊ ಆಯ್ತಾರ್ – ದುಸ್ರೆಂ ವಾಚಪ್
ರೊಮಾ.13:11-14 ಭಾವಾ-ಭಯ್ಣಿಂನೊ, ಕಸಲೆ ವೇಳ್ ಘಡಿಯೆಕ್ ಆಮಿ ಪಾವ್ಲ್ಯಾಂವ್ ಮ್ಹಣ್ ತುಮಿ ಜಾಣಾ ಜಾಯಾ; ಆಮಿ ನಿದೆಂತ್ಲಿಂ ಉಠ್ಚೊ ವೇಳ್ ಜಾಲೊ. ಆಮ್ಚೆಂ ತಾರಣ್ ಆಮಿ ಸತ್ಮಾನುಂಕ್ ಸುರು ಕರ್ತಾನಾ ಆಸ್ಲಲೆಂ ತಾಚೇ ಪ್ರಾಸ್ ಚಡ್ ಆತಾಂ ಲಾಗಿಂ ಆಸಾ. ರಾತ್ ಕಾಬಾರ್ ಜಾಯ್ತ್ ಆಯ್ಲಿ ಆನಿ ದೀಸ್ ಉದೆಂವ್ಚೊ ಜಾಲೊ. ದೆಕುನ್ ಆಮಿ ಕಾಳೊಕಾಂತ್ಲ್ಯಾ ಕಾಮಾಂಕ್ ಪಾಟ್ ಕರ್ಯಾಂ ಆನಿ ಉಜ್ವಾಡಾಚಿಂ ಝುಜಾ ಕವಚಾಂ ನ್ಹೆಸ್ಯಾಂ. ಆಮ್ಚೆಂ ಚಾಲ್ಚಮ್ಕಣ್ ದಿಸಾ ಉಜ್ವಾಡಾ ಜಿಯೆತಲ್ಯಾ ಜಣಾಂಕ್ ಸಹಜ್ಲ್ಲೆಂ ಜಾವ್ನ್ ಆಸುಂ: ಪೊಟಾರ್ಧ್ಪಣ್ ವಾ ಬೆಬ್ದೆಪಣ್, ಕಾಮಾಚಾರ್ ವಾ ಬಾಸ್ಕಳ್ಪಣ್, ಝಗ್ಡಿಂ ವಾ ಮಸರ್ ಆಮ್ಕಾಂ ನಾಕಾ. ಸೊಮಿಯಾ ಜೆಜು ಕ್ರಿಸ್ತಾಕ್ಚ್ ತುಮ್ಚೆಂ ಝುಜಾ ಕವಚ್ ಕಶೆಂ ನ್ಹೆಸಾ ಆನಿ ಕುಡಿಚ್ಯಾ ವೊಡ್ಣ್ಯಾಂಕ್ ಧಾದೊಶಿ ಕರ್ಚಿ ಚಿಂತಾ ಹ್ಯಾ ಫುಡಾಂ ಸೊಡ್ನ್ ಸೊಡಾ.
Show more
24 November
ನವೆಂಬರ್ 30- ಕಿಸ್ತಾ ಯೆಣ್ಯಾಕಾಳಾಚೊ ಪಯ್ಲೊ ಆಯ್ತಾರ್ – ಸುವಾರ್ತಾ
ಮಾತೆವ್ 24:37-44 ಜೆಜು ಆಪ್ಲ್ಯಾ ಶಿಸಾಂಕ್ ಅಶೆಂ ಸಾಂಗಾಲಾಗ್ಲೊ: ಜಶೆಂ ನೊಯೆಚ್ಯಾ ಕಾಳಾರ್ ಘಡ್ಲೆಂ, ತಶೆಂಚ್ ಮನ್ಶಾಪೂತ್ ಯೆತಲೊ ತ್ಯಾ ಕಾಳಾರ್ಯೀ ಘಡ್ತಲೆಂ. ಜಶೆಂ ಬುಡ್ತುಗಲಾಚ್ಯಾ ಆದ್ಲ್ಯಾ ದಿಸಾಂನಿ, ನೊಯೆ ತಾರ್ವಾಂತ್ ರಿಗ್ಲೊ ತೊ ದೀಸ್ ಪರ್ಯಾನ್ ಲೋಕ್ ಖಾತಾಲೊ ಆನಿ ಪಿಯೆತಾಲೊ, ಲಗ್ನ್ ಜಾತಾಲೊ ಆನಿ ಲಗ್ನ್ ಕರ್ನ್ ದಿತಾಲೊ. ಆನಿ ಬುಡ್ತುಗಲ್ ಯೇವ್ನ್ ತೆ ಸಕ್ಕಡ್ ವ್ಹಾಳೊನ್ ವಚಸರ್ ತಾಂಕಾಂ ಕಳಿತ್ ಜಾಂವ್ಕ್ ನಾ; ತಶೆಂಚ್ ಮನ್ಶಾಪೂತ್ ಯೆತಲೊ ತ್ಯಾ ವೆಳಾರ್ಯೀ ಘಡ್ತಲೆಂ. ತೆದ್ವಾಂ ಶೆತಾಂತ್ ಆಸ್ಲಲ್ಯಾ ದೋಗ್ ದಾದ್ಲ್ಯಾಂ ಮಧ್ಲ್ಯಾ ಎಕ್ಲ್ಯಾಕ್ ವ್ಹರ್ತಲೆ, ಆನ್ಯೆಕ್ಲ್ಯಾಕ್ ಸೊಡ್ತಲೆ; ದಾಂತ್ಯಾರ್ ದೊಳುಂಕ್ ಬಸ್ಲಲ್ಯಾ ದೊಗಿ ಸ್ತ್ರಿಯಾಂ ಮಧ್ಲೇ ಎಕ್ಲೇಕ್ ವ್ಹರ್ತಲೆ, ಆನ್ಯೆಕ್ಲೇಕ್ ಸೊಡ್ತಲೆ. “ದೆಕುನ್ ತುಮಿ ಜಾಗ್ರುತ್ ರಾವಾ; ಖಂಯ್ಚ್ಯಾ ದಿಸಾ ತುಮ್ಚೊ ಧನಿ ಯೆತಲೊ ತೆಂ ತುಮಿ ನೆಣಾತ್. ಉಗ್ಡಾಸ್ ದವರಾ, ಚೋರ್ ಆಮ್ಕ್ಯಾಚ್ ವೆಳಾರ್ ಯೆತಲೊ ಮ್ಹಣ್ ಘರ್ಚೊ ಧನಿ ಜಾಣಾ ಆಸ್ಲೊ ಜಾಲ್ಯಾರ್, ತೊ ಖಂಡಿತ್ ಜಾಗೊ ರಾವ್ತೊ ಆನಿ ಆಪ್ಲೆಂ ಘರ್ ಫೋಡ್ನ್ ನಾಗೊಂವ್ಕ್ ತೊ ಸೊಡ್ತೊನಾ. ದೆಕುನ್ ತುಮಿಯೀ ಆಯ್ತೆ ರಾವಾ; ಕಿತ್ಯಾಕ್ ತುಮಿ ಚಿಂತಿನಾತ್ಲ್ಲೇ ಘಡಿಯೇ ಮನ್ಶಾಪೂತ್ ಯೆತಲೊ.
Show more
21 October
ನವೆಂಬರ್ 23 – ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ - ಪಯ್ಲೆಂ ವಾಚಪ್
2 ಸಾಮು.5:1-3 ಇಸ್ರಾಯೆಲಾಚ್ಯೊ ಸಗ್ಳ್ಯೊ ಕುಳಿಯೊ ಹೆಬ್ರೊನಾಂತ್ ದಾವಿದಾಶಿಂ ಆಯ್ಲ್ಯೊ ಆನಿ ತಾಂಣಿಂ ಮ್ಹಳೆಂ: “ಆಮಿ ತುಜ್ಯಾಚ್ ಹಾಡಾಮಾಸಾಚೆ. ಸೊಂಪ್ಲಲ್ಯಾ ದಿಸಾಂನಿ ಸಾವ್ಲ್ ಆಮ್ಚೆರ್ ರಾಜ್ವಟ್ಕಿ ಚಲಯ್ತಾಲೊ ತೆದ್ನಾ, ತುವೆಂಚ್ ಇಸ್ರಾಯೆಲಿತಾಂಕ್ ಝುಜಾಕ್ ಆಪೊವ್ನ್ ವ್ಹೆಲೆಯ್ ಆನಿ ತಾಂಕಾಂ ಪಾಟಿಂ ಹಾಡ್ಲೆಯ್, ಆನಿ ಸರ್ವೆಸ್ಪರಾನ್ ತುಕಾ ಮ್ಹಳೆಂ: ‘ತುಂಚ್ ಮ್ಹಜೆ ಪರ್ಜೆ ಇಸ್ರಾಯೆಲಾಚೊ ಗೊವ್ಳಿ ಜಾತಲೊಯ್, ತುಂಚ್ ಇಸ್ರಾಯೆಲಾಚೊ ಫುಡಾರಿ ಜಾತಲೊಯ್.” ದೆಕುನ್ ಇಸ್ರಾಯೆಲಾಚೆ ಸರ್ವ್ ಮಾಲ್ಗಡೆ ಹೆಬ್ರೊನಾಂತ್ ದಾವಿದಾಶಿಂ ಆಯ್ಲೆ; ದಾವಿದ್ ರಾಯಾನ್ ಹೆಬ್ರೊನಾಂತ್ ಸರ್ವೆಸ್ಪರಾ ಹುಜಿರ್ ತಾಂಚೆ ಕಡೆ ಏಕ್ ಕರಾರ್ ಕೆಲೊ.
Show more
21 October
ನವೆಂಬರ್ 23 - ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ – ಕೀರ್ತನ್
ಕೀ.121 ಶ್ಲೋಕ್: "ಸರ್ವೆಸ್ಪರಾಚ್ಯೆ ಘರಿಂ ವಚುಂಯಾ" ಮ್ಹಣ್ತನಾ ಹಾಂವ್ ಸಂತೊಸ್ಲೊಂ 1. "ಯಾ ಆಮಿ, ಸರ್ವೆಸ್ಪರಾಚ್ಯೆ ಘರಿಂ!" ಅಶೆಂ ಮ್ಹಣುನ್ ಲೋಕ್ ಮ್ಹಣ್ತನಾ ಕೆದೊ ವರ್ತೊ ಸಂತೊಸ್ ಮ್ಹಾಕಾ ಭೊಗ್ಲೊ! ಆಮಿ ತುಜ್ಯೆಶಿಂ ಪಾವ್ಲ್ಯಾಂವ್ ಜೆರುಸಾಲೆಮಾ! ತುಜ್ಯಾ ದಾರ್ವಾಟ್ಯಾಂಚೆರ್ ಆಸಾತ್ ಆಮ್ಚಿಂ ಪಾಂವ್ಲಾಂ. ತುಜ್ಯಾ ದಾರಾಂ ಭಿತರ್ ಉಬೆ ಆಸಾತ್ ಆಮ್ಚೆ ಪಾಂಯ್! 2. ಮಜ್ಭೂತ್ ಆನಿ ಅಖಂಡ್ ಬಾಂಧಾವಳೆನ್ ಉಬಾರ್ನ್ ಬಾಂಧ್ಲಾಂ ಆಮ್ಚೆಂ ಜೆರುಸಾಲೆಮ್! ಥಂಯ್ಸರ್ ಚಡುನ್ ಯೆತಾತ್ ಕುಳಿಯೊ, ವ್ಹಯ್, ಸರ್ವೆಸ್ಪರಾಚ್ಯೊ ಕುಳಿಯೊ ತ್ಯೊ! 3. ಥಂಯ್ ಸರ್ವೆಸ್ಪರಾಚೆಂ ನಾಂವ್ ವಾಖಾಣುಂಕ್ ಇಸ್ರಾಯೆಲಾಚೊ ಕಾಯ್ದೊ ತೊ ಥಂಯ್ಸರ್ ಉಬಾರ್ಲಾಂ ದಾವಿದ್ ರಾಯಾಚೆಂ ಮುನ್ಸುಬೆಚೆಂ ಸಿಂಹಾಸನ್.
Show more
21 October
ನವೆಂಬರ್ 23 - ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ – ದುಸ್ರೆಂ ವಾಚಪ್
ಕೊಲೊಸ್ಸೆ; 1:12-20 ಉಜ್ವಾಡಾಚ್ಯಾ ರಾಜ್ಯಾಂತ್ ಆಪ್ಲ್ಯಾ ಭಕ್ತಾಂಕ್ ತಯಾರ್ ಕೆಲ್ಲ್ಯಾ ದಾಯ್ಜಾಂತ್ ಭಾಗಿದಾರ್ ಜಾಂವ್ಚೆಂ ದೆಣೆಂ ತುಮ್ಕಾಂ ಫಾವೊ ಕೆಲ್ಲ್ಯಾ ಬಾಪಾಕ್ ತುಮಿ ಅರ್ಗಾಂ ದಿತಲ್ಯಾತ್. ತಾಣೆಂ ಆಮ್ಕಾಂ ಕಾಳೊಕಾಚೆ ಪದ್ವೆಂತ್ಲಿಂ ಕಾಡ್ನ್ ಆಪ್ಲ್ಯಾ ಮೊಗಾಚ್ಯಾ ಪುತಾಚ್ಯಾ ರಾಜ್ಯಾಂತ್ ಹಾಡ್ನ್ ಪಾಯ್ಲ್ಯಾಂತ್. ತ್ಯಾಚ್ ತಾಚ್ಯಾ ಪುತಾ ಮಾರಿಫತ್ ಲಾಭ್ತಾ ಆಮ್ಕಾಂ ಸೊಡ್ವಣ್, ಮ್ಹಣ್ಜೆ ಪಾತ್ಕಾಂಚೆಂ ಭೊಗ್ಸಣೆಂ. ತೊಚ್ ಪ್ರತಿರೂಪ್ ಅದೃಶ್ಯ್ ದೆವಾಚೆಂ, ಪ್ರಥಮ್ ಜನಿತ್ ಸರ್ವ್ ರಚ್ನಾಂ ಮಧೆಂ; ತಾಚೇ ಥಂಯ್ ಸರ್ಗಿಂಚಿಂ ಆನಿ ಪೃಥ್ವೆಚಿಂ, ದಿಸ್ತಾತ್ ತಿಂ ಆನಿ ದಿಸನಾತ್‍ಲ್ಲಿಂ ಸರ್ವ್ ರಚ್ನಾಂ - ಸಿಯಾಸಣಾಂ, ಸ್ವಾಮಿತ್ವಾಂ, ಅಧಿಕಾರಿ ಆನಿ ಪ್ರಭುತ್ವಾಂ - ದೆವಾನ್ ರಚ್ಲಿಂ. ಸರ್ವ್ ರಚ್ನಾಂ ಜಾವ್ಚೇ ಪಯ್ಲೆಂ ತೊ ಆಸ್‍ಲ್ಲೊ. ಸರ್ವ್ ವಸ್ತು ತಾಚೇ ಮಾರಿಪತ್ ಅಸ್ತಿತ್ವಾಂತ್ ಆಸಾತ್. ತೊಚ್ ಮಸ್ತಕ್ ಕುಡಿಚೆಂ, ಮ್ಹಣ್ಜೆ ಪವಿತ್ರ್ ಸಭೆಚೆಂ, ಆರಂಭ್ ವಾ ಪಯ್ಲೆಂ ಫೊಳ್ ಜಿವಂತ್ ಜಾಲ್ಲ್ಯಾಂಚೆಂ. ದೆವಾಚಿಚ್ ಖುಶಿ ಅಶಿ ಜಾಲಿ: ತಾಚೆ ಥಂಯ್ ಆಪ್ಣಾಚಿ ಸಗ್ಳಿ ಸಂಪೂರ್ಣತಾ ಬಿಡಾರ್ ಕರುನ್ ಆಸ್ಚಿ ಆನಿ ತಾಚ್ಯಾ ಖುರ್ಸಾಚ್ಯಾ ರಗ್ತಾ ಮಾರಿಫತ್ ಸಮಾಧಾನ್ ಸ್ಥಾಪಿತ್ ಕರ್ನ್, ಭುಮಿಚ್ಯಾ ಆನಿ ಅಂತ್ರಾಳಾಚ್ಯಾ ಸರ್ವ್ ರಚ್ನಾಂಕ್ ಆಪ್ಣಾ ಥಂಯ್ ರಾಜಿ ಕರುನ್ ಘೆವ್ಚಿ ಮ್ಹಣ್.
Show more
21 October
ನವೆಂಬರ್ 23 - ಕ್ರಿಸ್ತ್ ರಾಯಾಚಿ ದಬಾಜಿಕ್ ಪರಬ್ - ಸುವಾರ್ತಾ
ಲೂಕ್ 23:35-43 ಶೆಕಿಂ, ಜೆಜುಕ್ ಖುರ್ಸಾರ್ ಮಾರ್ತಾಸ್ತಾನಾ ಲೋಕ್ ಲಾಗ್ಸಾರ್ ರಾವುನ್ ಪಳೆತ್ ಆಸ್ಲೊ. ತಾಂಚೆ ಮುಖಂಡ್ ತಾಕಾ ಕೆಂಡುನ್ ಮ್ಹಣ್ತಾಲೆ: “ಹೆರಾಂಕ್ ತಾಣೆಂ ಬಚಾವ್ ಕೆಲೆ; ಹೊ ದೆವಾಚೊ ಕ್ರೀಸ್ತ್, ವಿಂಚ್ಲಲೊ, ವ್ಹಯ್ ಜಾಲ್ಯಾರ್, ತೊ ಆಪ್ಣಾಕ್‍ಚ್ ಬಚಾವ್ ಕರುಂ!” ಶಿಪಾಯ್‍ಯೀ ತಾಚಿಂ ಖೆಳ್ಕುಳಾಂ ಕರ್ತಾಲೆ. ತೆ ತಾಚೇ ಸರ್ಶಿಂ ವಚುನ್, ತಾಕಾ ಆಂಬೊಟ್ ವಾಯ್ನ್ ದೀವ್ನ್ ಮ್ಹಣ್ತಾಲೆ: “ತುಂ ಜುದೆವಾಂಚೊ ರಾಯ್ ಜಾಲ್ಯಾರ್ ತುಕಾಚ್ ಬಚಾವ್ ಕರ್.” ತಾಚ್ಯಾ ಮಾತ್ಯಾ ವಯ್ರ್ “ಹೊ ಜುದೆವಾಂಚೊ ರಾಯ್” ಹಿಂ ಉತ್ರಾಂ ಬರೊವ್ನ್ ಘಾಲ್ಲಿಂ. ಉಮ್ಕಾಳಾಯ್‍ಲ್ಲ್ಯಾ ಅಪ್ರಾಧ್ಯಾಂ ಮಧ್ಲೊ ಎಕ್ಲೊ ತಾಚಿ ನಿಂದಾ ಕರ್ನ್ ಮ್ಹಣಾಲೊ: “ತುಂ ಕ್ರೀಸ್ತ್ ವ್ಹಯ್ ಜಾಲ್ಯಾರ್ ತುಕಾಚ್ ಆನಿ ಆಮ್ಕಾಂಯೀ ಬಚಾವ್ ಕರ್.” ತವಳ್ ದುಸ್ರೊ ಜಾಪ್ ದೀವ್ನ್ ತಾಕಾ ಭೆಷ್ಟಾಂವ್ಕ್ ಲಾಗ್ಲೊ: “ತುಕಾಯೀ ತಿಚ್ ಶಿಕ್ಷಾ ಫಾವೊ ಜಾಲ್ಯಾ ಆಸ್ತಾನಾ ತುಂ ದೆವಾಕ್ ಕಾಂಯ್ ಭಿಯೆನಾಯ್‍ವೆ? ಆಮ್ಕಾಂ ಜಾಲ್ಯಾರ್ ನಿತಿ ಪ್ರಕಾರ್, ಮ್ಹಣ್ಜೆ ಆಮ್ಚ್ಯಾ ಕನ್ರ್ಯಾಂಕ್ ಫಾವೊ ಜಾಲ್ಲೆಂ ತೆಂ ಮೆಳ್ಳಾಂ; ಪುಣ್ ಹಾಣೆಂ ಕಸಲಿಚ್ ಚೂಕ್ ಆಧಾರ್ಲಿನಾ.” ಉಪ್ರಾಂತ್ ತೊ ಜೆಜುಲಾಗಿಂ ಮ್ಹಣಾಲೊ: “ಜೆಜೂ, ತುಂ ರಾಜ್‍ಪದ್ವಿ ಘೆವ್ನ್ ಯೆತಾಸ್ತಾನಾ ಮ್ಹಜೊ ಉಗ್ಡಾಸ್ ದವರ್.” ಜೆಜುನ್ ತಾಕಾ ಸಾಂಗ್ಲೆಂ: “ಹಾಂವ್ ತುಕಾ ಸಾಂಗ್ತಾಂ, ಆಜ್‍ಚ್ ತುಂ ಮ್ಹಜೇ ಸಾಂಗಾತಾ ವೈಕುಂಠಾಂತ್ ಆಸ್ತಲೊಯ್.”
Show more
21 October
ನವೆಂಬರ್ 16 - ಸಾದ್ಯಾ ಕಾಳಾಚ್ಯಾ 33ವ್ಯಾ ಹಫ್ತ್ಯಾಚೊ ಆಯ್ತಾರ್ - ಪಯ್ಲೆಂ ವಾಚಪ್
ಮಾಲಾ.3:19-20 ಪಳೆಯಾ, ಜಳ್ತ್ಯಾ ಆಗ್ಟ್ಯಾ ಪರಿಂ ತೊ ದೀಸ್ ಯೆತಾ. ಸಗ್ಳಿಂ ಗರ್ವಿಷ್ಟ್ ಆನಿ ನಷ್ಟಿ ಮನ್ಶಾಂ ಸೊವ್ರ್ಯಾ ಸಾರ್ಕಿಂ ಜಾತಲಿಂ, ಆನಿ ಯೆಂವ್ಚೊ ಆಸಾ ತೊ ದೀಸ್ ತಾಂಚೆಂ ಮೂಳ್ ಆನಿ ತಾಳ್ ದವ್ರಿನಾಸ್ತಾಂ ತಾಂಕಾಂ ಉಜ್ಯಾನ್ ಲಾಸ್ತಲೊ, ಮ್ಹಣ್ತಾ ದಳ್ಬಾರಾಂಚೊ ಸರ್ವೆಸ್ಪರ್. ಪೂಣ್ ತುಮ್ಕಾಂ, ಮ್ಹಜ್ಯಾ ನಾಂವಾಚಿ ಭಿರಾಂತ್ ಧರ್ತಲ್ಯಾಂಕ್ ನಿತಿಚೊ ಸುರ್ಯೊ ಉದೆತಲೊ ಆನಿ ತಾಚ್ಯಾ ಕಿರ್ಣಾಂನಿ ಭಲಾಯ್ಕಿ ಆಸ್ತಲಿ.
Show more
21 October
ನವೆಂಬರ್ 16 - ಸಾದ್ಯಾ ಕಾಳಾಚ್ಯಾ 33ವ್ಯಾ ಹಫ್ತ್ಯಾಚೊ ಆಯ್ತಾರ್ – ಕೀರ್ತನ್
ಕೀ.97 ಶ್ಲೋಕ್: ನ್ಯಾಯ್-ನಿತಿನ್ ಪ್ರಿಥುಮೆಚಿ ಝಡ್ತಿ ಕರುಂಕ್ ಸೊಮಿ ಯೆತಲೊ 1. ಕಿನ್ನರಿ ಹಾತಿಂ ಘೆವ್ನ್ ಗಿತಾಂ ಗಾಯಾ, ವಿಣೆಂ ವ್ಹಾಜೊವ್ನ್ ಮಧುರ್ ಸಂಗೀತ್ ಕರಾ; ತುತೂರಿ-ಕೊಂಬ್ ಫುಂಕುನ್ ಸರ್ವೆಸ್ಪರ್ ರಾಯಾಕ್ ಜಯ್ತ್ ಮಾಗಾ. 2. ದರ್ಯೊ ಆನಿ ತಾಂತುಂ ಆಸಾ ತೆಂ ಸರ್ವ್, ಭುಮಿ ಆನಿ ತಿಚೆರ್ ಆಸಾ ತೊ ಲೋಕ್ ಆನಂದ್ ಪಾವುಂ. ನ್ಹಂಯೊ ಉಲ್ಲಾಸಾನ್ ತಾಳಿಯೊ ಪೆಟುಂ, ಪರ್ವತ್ ಸಂತೊಸಾನ್ ಉಡೊನ್ ನಾಚುಂ. 3. ಸಗ್ಳಿ, ಸೃಷ್ಟಿ ಯೆಂವ್ಚೊ ಆಸಾ ತ್ಯಾ ಸರ್ವೆಸ್ಪರಾ ಮುಖಾರ್ ಉಲ್ಲಾಸುಂ; ತೊ ಸಂಸಾರಾಚಿ ಮುನ್ಸುಬಿ ಕರುಂಕ್ ಯೆತಲೊ, ನ್ಯಾಯ್-ನಿತಿನ್ ಪ್ರಿಥುಮೆಚಿ ತೊ ಝಡ್ತಿ ಕರ್ತಲೊ, ಸತ್-ನಿತಿನ್ ಲೊಕಾಕ್ ತೊ ನಿರ್ಣಯ್ ಕರುನ್ ದಿತಲೊ.
Show more
21 October
ನವೆಂಬರ್ 16 - ಸಾದ್ಯಾ ಕಾಳಾಚ್ಯಾ 33ವ್ಯಾ ಹಫ್ತ್ಯಾಚೊ ಆಯ್ತಾರ್ - ಸುವಾರ್ತಾ
ಲೂಕ್ 21:5-19 ತ್ಯಾ ದಿಸಾಂನಿ ಥೊಡೆ ಜಣ್ ದೆವಾಳಾ ವಿಶ್ಯಾಂತ್ ಉಲೊವ್ನ್, ತೆಂ ಸೊಭಿತ್ ಫಾತ್ರಾಂನಿ ಆನಿ ದಾನ್ ಆಯ್‍ಲ್ಲ್ಯಾ ವಸ್ತುಂನಿ ಸುಂರ್ಗಾರಾಯ್ಲಾಂ ಮ್ಹಣ್ತಾಲೆ. ತವಳ್ ಜೆಜುನ್ ತಾಂಕಾಂ ಸಾಂಗ್ಲೆಂ: “ತುಮಿ ದೆಖ್ತಾತ್ ತ್ಯಾ ಬಾಂಧ್ಪಾಚೊ ಫಾತರ್ ಸಯ್ತ್ ಉರಸೊ ನಾ ತಸಲೆ ದೀಸ್ ಯೆತಲೆ; ಸಕ್ಕಡ್‍ಯಿ ಕೊಸ್ಳಾವ್ನ್ ಘಾಲ್ತಲೆ.” ತವಳ್ ತಾಂಣಿಂ ತಾಚೆ ಲಾಗಿಂ ವಿಚಾರ್ಲೆಂ: “ಮೆಸ್ತ್ರಿ, ಹ್ಯೊ ಸಂಗ್ತಿ ಕೆದಳಾ ಘಡ್ತಲ್ಯೊ? ತ್ಯೊ ಘಡ್ಚೊ ವೇಳ್ ಲಾಗಿಂ ಪಾವ್ಲಾ ಮ್ಹಣ್ ಗುರ್ತ್ ಕಸಲೊ?” ತವಳ್ ಜೆಜು ತಾಂಕಾಂ ಸಾಂಗಿಲಾಗ್ಲೊ: “ಕೊಣೆಂಯಿ ತುಮ್ಕಾಂ ಫಸಯ್ನಾಶೆಂ ಚತ್ರಾಯ್ ಕರಾ. ಸಬಾರ್ ಜಣ್ ಮ್ಹಜೇ ನಾಂವಿಂ ಯೆತಲೆ ಆನಿ ‘ಹಾಂವ್‍ಚ್ ತೊ’ ಆನಿ ‘ನಮಿಯಾರ್‍ಲ್ಲೊ ವೇಳ್ ಲಾಗಿಂ ಪಾವ್ಲಾ’ ಅಶೆಂ ಮ್ಹಣ್ತಲೆ. ಪುಣ್ ತುಮಿ ತಾಂಚ್ಯಾ ಪಾಟ್ಲ್ಯಾನ್ ವಚನಾಕಾತ್. ಝುಜಾಂ ಆನಿ ಕಾಟ್ಕಾಯಾಂ ವಿಶ್ಯಾಂತ್ ಖಬರ್ ಆಯ್ಕುನ್ ಆಕಾಂತುನ್ ಪಡನಾಕಾತ್. ಹ್ಯೊ ಸಂಗ್ತಿ ಘಡಜಯ್‍ಚ್. ಪುಣ್ ಅಂತ್ ತಕ್ಷಣ್ ಯೆವ್ಚೊನಾ.” ಉಪ್ರಾಂತ್ ತೊ ಮ್ಹಣಾಲೊ: “ರಾಷ್ಟ್ರ್ ರಾಷ್ಟ್ರಾಚೆರ್ ಆನಿ ರಾಜ್ಯ್ ರಾಜ್ಯಾಚೆರ್ ಝುಜಾಕ್ ದೆಂವ್ತಲೆಂ. ಥಂಯ್ ಹಾಂಗಾ ಭಿರಾಂಕುಳ್ ಭುಂಯ್ಕಾಂಪ್ಣಿ ಜಾತಲ್ಯೊ. ದುಕಳ್ ಆನಿ ಮಾರಿಚಿ ಪಿಡಾ ಪಡ್ತಲಿ ಆನಿ ಆಕಾಸರ್ ಭಿರಾಂಕುಳ್ ದೃಶ್ಯಾಂ ಆನಿ ವಿಚಿತ್ರ್ ಖುಣಾ ದಿಷ್ಟಿ ಪಡ್ತಲ್ಯೊ. ಪುಣ್ ಹ್ಯೊ ಸರ್ವ್ ಸಂಗ್ತಿ ಘಡ್ಚೇ ಪಯ್ಲೆಂ ತುಮ್ಕಾಂ ಧರ್ತಲೆ ಆನಿ ದಗ್ಧಿತಲೆ; ತುಮ್ಚಿ ಝಡ್ತಿ ಕರ್ಚೇ ಖಾತಿರ್ ತುಮ್ಕಾಂ ಸಿನಾಗೊಗಾಚ್ಯಾ ಅಧಿಕಾರ್ಯಾಂ ಹುಜಿರ್ ಹಾಡ್ತಲೆ ಆನಿ ಬಂಧಿಖಾನಾಂನಿ ಘಾಲ್ತಲೆ; ತುಮಿ ಮ್ಹಜೆ ಪಾಟ್ಲಾವ್ದಾರ್ ದೆಕುನ್, ತುಮ್ಕಾಂ ರಾಯಾಂ ಆನಿ ಅಧಿಪತಿಂ ಹುಜಿರ್ ವೊಡ್ನ್ ವ್ಹರ್ತಲೆ. ಸುವಾರ್ತೆಕ್ ಸಾಕ್ಸ್ ದಿಂವ್ಕ್ ತುಮ್ಕಾಂ ಹೊ ಏಕ್ ಸಂದರ್ಭ್ ಜಾತಲೊ. ತವಳ್ ಕಿತೆಂ ಜಾಪ್ ದಿವ್ಚಿ ಹ್ಯಾ ವಿಶ್ಯಾಂತ್ ಆತಾಂಚ್ ಆಲೋಚನ್ ಕರ್ಚೆನಾಂವ್ ಮ್ಹಣ್ ತುಮ್ಚೇ ಮತಿಂತ್ ನಿರ್ಧಾರ್ ಕರಾ. ಹಾಂವ್‍ಚ್ ತುಮ್ಕಾಂ ಅಸಲಿ ವಾಚಾಸಕ್ತ್ ಆನಿ ಜಾಣ್ವಾಯ್ ದಿತಲೊಂ ಕೀ, ಸರ್ವ್ ತುಮ್ಚೆ ವಿರೋಧಿ, ತುಮ್ಕಾಂ ಆಡಾಂವ್ಕ್ ವಾ ತುಮ್ಚೇರ್ ಉಪ್ರಾಟೆಂ ಸಾಂಗುಂಕ್ ಸಕ್ಚೆನಾತ್. ತುಮ್ಚಿಂಚ್ ಆವಯ್‍ಬಾಪುಯ್, ಭಾವ್‍ಭಯ್ಣಿ ಆನಿ ಸಯ್ರಿಂಧಾಯ್ರಿಂ ತುಮ್ಕಾಂ ಪರಾಧೀನ್ ಕರ್ತಲಿಂ ಆನಿ ತುಮ್ಚೆ ಮಧ್ಲ್ಯಾ ಥೊಡ್ಯಾಂಕ್ ಜಿವೆಶಿಂ ಮಾರಯ್ತಲಿಂ. ತುಮಿ ಮ್ಹಜೆ ಪಾಟ್ಲಾವ್ದಾರ್ ದೆಕುನ್ ಹರ್ಯೆಕ್ಲೊ ತುಮ್ಕಾಂ ದ್ವೇಶಿತಲೊ; ತರಿಪುಣ್ ತುಮ್ಚ್ಯಾ ಮಾತ್ಯಾಚೊ ಏಕ್ಚ್ ಏಕ್ ಕೇಸ್ ಲೆಗುನ್ ನಾಸ್ ಜಾವ್ಚೊನಾ. ತುಮ್ಚೇ ದೀಗ್ ಸೊಸ್ಣಿಕಾಯೆ ವರ್ವಿಂ ತುಮ್ಚೆ ಜೀವ್ ತುಮಿ ರಾಕ್ತಲ್ಯಾತ್.”
Show more
21 October
ನವೆಂಬರ್ 09 - ದೇವ್-ಮಂದಿರಾಚ್ಯಾ ಸಮರ್ಪಣಾಚೊ ವಾರ್ಷಿಕ್ ಸಂಭ್ರಮ್ - ಆಯ್ತಾರ್ – ಕೀರ್ತನ್
ಕೀ.46 ಶ್ಲೋಕ್: ಏಕ್ ನ್ಹಂಯ್ ಆಸಾ, ತಿಚ್ಯೆ ವ್ಹಾಳ್ ದೆವಾಚ್ಯಾ ಶಹರಾಕ್ ಸಂತೊಸ್ ಹಾಡ್ತಾತ್, ತೆಂಚ್ ತೆಂ ಶಹರ್ ಅತ್ಯುನ್ನತ್ ದೆವಾಚ್ಯಾ ನಿವಾಸಾಚೆಂ 1. ದೇವ್‍ಚ್ ಆಮ್ಚೊ ಆಸ್ರೊ ಆನಿ ಆಮ್ಚೆಂ ಬಳ್, ಕಷ್ಟಾಂ-ಆಕಾಂತಾಂಚ್ಯಾ ವೆಳಾ ತೊಚ್ ಆಮ್ಚೊ ಖರೊ ಆಧಾರ್ ಭುಮಿ ಜಾಲ್ಯಾರ್ ಹಾಲೊನ್ ಪಡುಂ, ಪರ್ವತ್ ದೊಂಗರ್ ದರ್ಯಾಂತ್ ಕೊಸ್ಳೊನ್ ಪಡುಂ, ಪುಣ್ ಆಮಿ ಭಿಯೆಂವ್ಚಿಂ ನಾಂವ್. 2. ಏಕ್ ನ್ಹಂಯ್ ಆಸಾ, ತಿಚ್ಯೆ ವ್ಹಾಳ್ ದೆವಾಚ್ಯಾ ಶಹರಾಕ್ ಸಂತೊಸ್ ಹಾಡ್ತಾತ್, ತೆಂಚ್ ತೆಂ ಶಹರ್ ಅತ್ಯುನ್ನತ್ ದೆವಾಚ್ಯಾ ನಿವಾಸಾಚೆಂ. ದೆವಾನ್ ಜರ್ ತ್ಯಾ ಶಹರಾಂತ್ ಬಿಡಾರ್ ಕೆಲಾಂ, ತರ್ ತೆಂ ಹಾಲತ್ ಕಶೆಂ? ದೀಸ್ ಉದೆತನಾಚ್ ದೇವ್ ಯೆತಾ ತಾಚ್ಯೆ ಕುಮ್ಕೆಕ್. 3. ದಳ್ಭಾರಾಂಚೊ ಸರ್ವೆಸ್ಪರ್ ಆಮ್ಚ್ಯೆ ಸವೆಂ ಆಸಾ, ಜಾಕೊಬಾಚೊ ದೇವ್ ಆಮ್ಚೊ ಆಸ್ರೊ ಜಾವ್ನಾಸಾ. ಯೆಯಾ, ಪಳೆಯಾ, ಸರ್ವೆಸ್ಪರಾಚಿಂ ಕಾಮಾಂ ಪ್ರಿಥುಮೆಚೆರ್ ದೆಖಾ ತಾಣೆಂ ಕೆಲ್ಲಿಂ ಅಜಾಪಾಂ!
Show more
21 October
ನವೆಂಬರ್ 09 - ದೇವ್-ಮಂದಿರಾಚ್ಯಾ ಸಮರ್ಪಣಾಚೊ ವಾರ್ಷಿಕ್ ಸಂಭ್ರಮ್ - ಆಯ್ತಾರ್ – ದುಸ್ರೆಂ
1 ಕೊರಿಂಥ್ 3:9-11, 16-17 ತುಮಿ ತಾಚೆಂ ಶೆತ್, ತಾಚೆಂಚ್ ಬಾಂಧಪ್. ದೆವಾನ್ ಮ್ಹಾಕಾ ದಿಲ್ಲೇ ಕುರ್ಪೆಕ್ ಸರಿ ಜಾವ್ನ್, ಏಕ್ ಮಾಹೆತ್‍ವಂತ್ ಆನಿ ಕಾರ್ಭಾರಿ ಬಾಂಧ್ಪ್ಯಾಬರಿ ಹಾಂವೆಂ ಬುನ್ಯಾದ್ ಘಾಲ್ಯಾ ಆನಿ ಆತಾಂ ತಾಚೇ ವಯ್ರ್ ದುಸ್ರೊ ಎಕ್ಲೊ ಬಾಂಧಪ್ ಚಡಯ್ತಾ. ಪುಣ್ ಆಪುಣ್ ಕಶೆಂ ಬಾಂಧ್ತಾ ತೇ ವಿಶ್ಯಾಂತ್ ಹರ್ಯೆಕ್ಲೊ ಚತ್ರಾಯ್ ಘೆಂವ್. ಕಿತ್ಯಾಕ್ ಎದೊಳ್‍ಚ್ ಘಾಲ್ಲೇ ತೇ ಬುನ್ಯಾದೇ ಶಿವಾಯ್, ದುಸ್ರಿ ಬುನ್ಯಾದ್ ಕೊಣಾಚ್ಯಾನ್‍ಯೀ ಘಾಲುಂಕ್ ನಜೊ. ತುಮಿ ದೆವಾಚೆಂ ಮಂದಿರ್ ಆನಿ ದೆವಾಚೊ ಅತ್ಮೊ ತುಮ್ಚೇ ಥಂಯ್ ಬಿಡಾರ್ ಕರ್ನ್ ಆಸಾ ಮ್ಹಣ್ ತುಮಿ ನೆಣಾತ್? ಜರ್ ಎಕ್ಲೊ ದೆವಾಚೆಂ ಮಂದಿರ್ ನಾಸ್ ಕರ್ತಾ, ತರ್ ದೇವ್ ತಾಕಾ ನಾಸ್ ಕರ್ತಲೊ; ಕಿತ್ಯಾಕ್ ದೆವಾಚೆಂ ಮಂದಿರ್ ಪವಿತ್ರ್; ಆನಿ ತೆಂಚ್ ಮಂದಿರ್ ತುಮಿ.
Show more
21 October
ನವೆಂಬರ್ 09 - ದೇವ್-ಮಂದಿರಾಚ್ಯಾ ಸಮರ್ಪಣಾಚೊ ವಾರ್ಷಿಕ್ ಸಂಭ್ರಮ್ - ಆಯ್ತಾರ್ - ಸುವಾರ್ತಾ
ಜು. 2: 13-22 ಜುದೆವಾಂಚಿ ಪಾಸ್ಖ್ ಪರಬ್ ಲಾಗಿಂ ಪಾವ್ಲ್ಲಿ ಜಾಲ್ಲ್ಯಾನ್, ಜೆಜು ಜೆರುಜಲೆಮಾಕ್ ಗೆಲೊ. ದೆವಾಳಾಂತ್ ಗೊರ್ವಾಂ, ಬಕ್ರೆ ಆನಿ ಪಾರ್ವೆ ವಿಕ್ತಲೆ ಆನಿ ದುಡು ವಾಟಾಯ್ತಲೆ ವ್ಯಾಪಾರ್ ಕರುಂಕ್ ಆಪಾಪ್ಲ್ಯಾ ಮಾಂಡಾರ್ ಬಸೊನ್ ಆಸ್ಲೆ. ಹೆಂ ಪಳೆವ್ನ್, ತಾಣೆಂ ಸುಂಬಾಚೆಂ ಏಕ್ ಚಾಬೂಕ್‍ಶೆಂ ವಿಣ್ಲೆಂ ಆನಿ ತಾಂಕಾಂ ಸಕ್ಟಾಂಕ್, ಬಕ್ರ್ಯಾಂ ಆನಿ ಗೊರ್ವಾಂ ಸಮೇತ್, ಭಾಯ್ರ್ ಧಾಂವ್ಡಾಯ್ಲೆ. ವಾಟಾವ್‍ಗಾರಾಂಚೆ ಮಾಂಡ್ ತಾಣೆಂ ವೊಮ್ತೆ ಘಾಲೆ ಆನಿ ತಾಂಚಿಂ ನಾಣಿಂ ಶಿಂಪ್ಡಾಯ್ಲಿಂ. ಪಾರ್ವೆ ವಿಕ್ತಲ್ಯಾಂಕ್ ತೊ ಮ್ಹಣಾಲೊ: “ಕಾಡಾ ತೆ ಹಾಂಗಾ ಥಾವ್ನ್; ಮ್ಹಜ್ಯಾ ಬಾಪಾಚೆಂ ಘರ್ ವ್ಯಾಪಾರಾಚಿ ಸಾಂತ್ ಕರಿನಾಕಾತ್.” ತವಳ್ ‘ತುಜ್ಯಾ ಘರಾಚೇ ಉರ್ಬೆನ್ ಹಾಂವ್ ಲಾಸ್ತಾಂ’ಹ್ಯಾ ಪವಿತ್ರ್ ಪುಸ್ತಕಾಚ್ಯಾ ಉತ್ರಾಂಚೊ ತಾಚ್ಯಾ ಶಿಸಾಂಕ್ ಉಗ್ಡಾಸ್ ಆಯ್ಲೊ. ಜುದೆವ್ ತವಳ್ ತಾಕಾ ಜಾಪ್ ದೀವ್ನ್ ಮ್ಹಣಾಲೆ: “ಆಶೆಂ ಕರುಂಕ್ ತುಕಾ ಅಧಿಕಾರ್ ಆಸಾ ಮ್ಹಣ್ ಕಿತೆಂ ಆಚರ್ಯೆಂ ತುಜ್ಯಾನ್ ಆಮ್ಕಾಂ ದಾಖೊಂವ್ಕ್ ಜಾತಾ?” ಜೆಜುನ್ ತಾಂಕಾಂ ಜಾಪ್ ದಿಲಿ: “ಹೆಂ ದೆವಾಳ್ ತುಮಿ ಮೋಡ್ನ್ ಘಾಲಾ ಆನಿ ತೀನ್ ದಿಸಾಂನಿ ಹಾಂವ್ ತೆಂ ಪತ್ರ್ಯಾನ್ ಉಬಾರ್ತಲೊ.” ಜುದೆವಾಂನಿ ಮ್ಹಳೆಂ: “ಕಿತೆಂ? ಹೆಂ ದೆವಾಳ್ ಬಾಂಧೊಂವ್ಕ್ ಸವೆಚಾಳೀಸ್ ವರ್ಸಾಂ ಲಾಗ್ಲಿಂ ಆನಿ ತುಂ ತೆಂ ತೀನ್ ದಿಸಾಂನಿ ಉಬಾರ್ತಲೊಯ್?” ಪುಣ್ ಜೆಜು ಉಲಯ್‍ಲ್ಲೊ ಆಪ್ಲೇ ಕುಡಿಚ್ಯಾ ದೆವಾಳಾ ವಿಶ್ಯಾಂತ್. ತಾಣೆಂ ಅಶೆಂ ಸಾಂಗ್ಲ್ಲೆಂ ಮ್ಹ್ಹಣ್, ತಾಂಕಾ ಮೆಲ್ಲ್ಯಂತ್ಲೊ ಜಿವಂತ್ ಉಠಯ್ಲ್ಯಾ ಉಪ್ರಾಂತ್ ತಾಚ್ಯಾ ಶಿಸಾಂಕ್ ಉಗ್ಡಾಸ್ ಆಯ್ಲೊ. ತವಳ್ ಪವಿತ್ರ್ ಪುಸ್ತಕಾಚಿಂ ಉತ್ರಾಂ ಆನಿ ಜೆಜುಚಿ ಸಾಂಗ್ಣಿ ತಾಂಣಿಂ ಸತ್ಮಾನ್ಲಿ.
Show more
