Mangala Jyothi
Diocesan Biblical, Catechetical and Liturgical Center
Diocese of Mangalore
Mangala Jyothi
Diocesan Biblical, Catechetical and Liturgical Center
Diocese of Mangalore
Home
Departments
Prayers
News
Photo Gallery
Results
Magazines
Sunday Reading
Contact
Select a date
keyboard_arrow_down
Choose a year...
2024
keyboard_arrow_down
Choose a month...
December
November
5 December
ದಶೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ – ರಾತಿಚೆಂ ಮೀಸ್ - ಪಯ್ಲೆಂ ವಾಚಪ್
ಇಸಾ 9: 1-6 ಕಾಳೊಕಾಂತ್ ಚಲ್ತಲ್ಯಾ ಲೊಕಾಕ್ ಏಕ್ ವ್ಹಡ್ ಉಜ್ವಾಡ್ ದಿಷ್ಟಿ ಪಡ್ಲೊ; ಮರಣಾಚೆ ಸಾವ್ಳೆಚ್ಯಾ ದೆಶಾಂತ್ ರಾವ್ತಲ್ಯಾಂಚೆರ್ ಏಕ್ ಉಜ್ವಾಡ್ ಫಾಂಕ್ಲೊ. ತುವೆಂ ತಾಂಚೊ ಆನಂದ್ ವಾಡಯ್ಲೊಯ್, ತಾಂಚೊ ಸಂತೊಸ್ ಚಡಯ್ಲೊಯ್. ಲುಂವ್ಣೆಚ್ಯಾ ಸಮಯಾರ್ ಸಂತೊಸ್ತಾತ್ ಆನಿ ಝುಜಾಚಿ ಲೂಟ್ ವಾಂಟುನ್ ಘೆತಾನಾ ಉಲ್ಲಾಸ್ತಾತ್ ತಶೆಂ ತಿಂ ತುಜೆ ಮುಕಾರ್ ಅನಂದ್ಭರಿತ್ ಜಾತಾತ್. ಕಿತ್ಯಾಕ್ ಮಿದಿಯಾನಾಚ್ಯಾ ದಿಸಾ ತುವೆಂ ಕೆಲ್ಲೆಂಯ್ ತಶೆಂ, ತಾಂಚೆಂ ಭಾರಾಚೆಂ ಜುಂ, ತಾಂಚ್ಯಾ ಖಾಂದಾ ವಯ್ಲೆಂ ಲಾಂಕುಡ್, ತಾಂಚೆರ್ ಜುಲುಮ್ ಕರ್ತಲ್ಯಾಂಚೊ ದಾಂಡೊ ತುವೆಂ ಮೊಡುನ್ ಉಡಯ್ಲಿಂಯ್. ಧರ್ಣಿರ್ ಝಣ್‍ಝಣ್ತಲಿಂ ಸಗ್ಳಿಂ ಪಾಂಯ್‍ತಣಾಂ ಆನಿ ರಗ್ತಾಂತ್ ಲೊಳಯ್‍ಲ್ಲಿಂ ವಸ್ತ್ರಾಂ ಹುಲ್ಪೊನ್ ವೆತಲಿಂ ಆನಿ ಉಜ್ಯಾಚೊ ಗ್ರಾಸ್ ಜಾತಲಿಂ. ಕಿತ್ಯಾಕ್ ಏಕ್ ಬಾಳಕ್ ಆಮ್ಕಾಂ ಜಲ್ಮಲಾ, ಏಕ್ ಪೂತ್ ಆಮ್ಕಾಂ ದಿಲಾ, ತಾಚ್ಯಾ ಖಾಂದಾರ್ ಅಧಿಕಾರ್ ಘಾಲಾ; ಆನಿ ತಾಕಾ ಹೆಂ ನಾಂವ್ ದವರ್ಲಾಂ: “ವಿಸ್ಮಿತ್ ಬೂದ್‍ದಿಣಾರ್, ಪದ್ವೆದಾರ್ ದೇವ್, ಸಾಸ್ಣಿಕ್ ಬಾಪ್, ಶಾಂತಿಚೊ ಕುಂವರ್.” ತಾಚೊ ಅಧಿಕಾರ್ ವಾಡತ್ ವೆತಲೊ, ಆನಿ ತಾಚ್ಯಾ ರಾಜಾಂತ್ ಸದಾಂಕಾಲ್ ಶಾಂತಿ ಆಸ್ತಲಿ. ದಾವಿದಾಚ್ಯಾ ಶಿಂವಾಸನಾರ್ ಬಸುನ್ ತೊ ಆಪ್ಲೆ ರಾಜ್ ಚಲಯ್ತಲೊ; ಆತಾಂ ಥಾವ್ನ್ ನಿತೆಕಾಳಿಂ ನ್ಯಾಯ್‍ನಿತಿನ್ ಆನಿ ಪ್ರಾಮಾಣಿಕ್ಪಣಾನ್ ತೆಂ ರಾಜ್ ತೊ ಥಿರ್ ಕರ್ತಲೊ ಆನಿ ಸಾಂಬಾಳ್ತಲೊ. ದಳ್ಬಾರಾಂಚೊ ಸರ್ವೆಸ್ಪರ್ ಆಪ್ಲ್ಯಾ ಮೊಗಾಚ್ಯಾ ಬಳಾನ್ ಹೆಂ ಸಗ್ಳೆಂ ಕರ್ತಲೊ.
Show more
5 December
ದಶೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ – ರಾತಿಚೆಂ ಮೀಸ್ - ಕೀರ್ತನ್
ಕೀರ್ತನ್ 95 ಅಂತರ್ ಗೀತ್ ಶ್ಲೋಕ್ : ಆಜ್ ಆಮ್ಕಾಂ ಜಲ್ಮಲಾ ತಾರೊಕ್, ತೊಚ್ ಕ್ರೀಸ್ತ್ ಸೊಮಿ. 1. ಸರ್ವೆಸ್ಪರಾಕ್ ಎಕ್ ನವೆಂ ಗೀತ್ ಗಾಯಾ, ಭೂ-ನಿವಾಸ್ಯಾಂನೋ, ಸರ್ವೆಸ್ಪರಾಕ್ ಸದ್ಗಿತಾಂ ಗಾಯಾ. ಪರಮೇಶ್ವರಾಕ್ ಹರ್ಸಿಯಾ, ತಾಚೆಂ ನಾಂವ್ ವಾಖಾಣಾ. 2. ತಾಚೆಂ ತಾರಣ್ ದಿಸ್ಪಡ್ತೆಂ ಗಾಜಯಾ, ಜನಾಂಗಾಂ ಮಧೆಂ ತಾಚಿ ಮಹಿಮಾ ಪರ್ಗಟ್ ಕರಾ, ಸರ್ವ್ ಪರ್ಜಾಂಕ್ ತಾಚಿಂ ವಿಜ್ಮಿತಾಂ ಕಳಯಾ. 3. ಸರ್ಗ್ ಸಗ್ಳೊ ಅನಂದುಂ, ಉಲ್ಲಾಸುಂ ಆಖೊ ಸಂಸಾರ್, ಘರ್ಜೊಂ ದರ್ಯೊ-ಸಾಗೊರ್ ಆನಿ ತಾಂತ್ಲೆಂ ಸರ್ವ್! ಫೊಳ್-ಪಿಕಾ ಸವೆಂ ಉಲ್ಲಾಸುಂ ಭುಂಯ್-ಭಾಟಾಂ, ಸಂತೊಸಾನ್ ಹಾಲೊಂ-ಧಲೊಂ ರುಕಾಂ-ಝಡಾಂನಿ ಭರ್ಲಲಿಂ ರಾನಾಂ-ವನಾಂ! 4. ಸಗ್ಳಿ ಸೃಷ್ಟಿ ಉಲ್ಲಾಸುಂ ಯೆತಾ ತ್ಯಾ ಸರ್ವೆಸ್ಪರಾಕ್, ವ್ಹಯ್, ಯೆತಾ ತೊ ಪ್ರಿಥುಮೆಚಿ ಮುನ್ಸುಬಿ ಕರ್ಚ್ಯಾಕ್. ಸಗ್ಳ್ಯಾ ಸಂಸಾರಾಚಿ ಸತಾನ್, ಸಮೆಸ್ತ್ ಜನಾಂಗಾಂಚಿ ನಿತಿನ್ ತೊ ಝಡ್ತಿ ಕರ್ತಲೊ.
Show more
5 December
ದಶೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ – ರಾತಿಚೆಂ ಮೀಸ್ - ದುಸ್ರೆಂ ವಾಚಪ್
ತೀತ್ 2:11-14 ಸಗ್ಳ್ಯಾ ಮನ್ಶಾಕುಳಾಕ್ ತಾರಣ್ ಹಾಡ್ಚ್ಯಾಕ್ ದೆವಾಚಿ ಕುರ್ಪಾ ಆತಾಂ ಪ್ರತ್ಯಕ್ಷ್ ಜಾಲ್ಯಾ. ಸರ್ವ್ ಅಧರ್ಮ್ ಆನಿ ಸಂಸಾರಿ ಆಶಾ ಸಾಂಡುನ್ ಹ್ಯಾ ಸಂಸಾರಾಂತ್ ಮಿತಿನ್, ನಿತಿನ್ ಆನಿ ಭಕ್ತಿನ್ ಜಿಯೆಂವ್ಕ್ ಆನಿ ಆಮ್ಚ್ಯಾ ವರ್ತ್ಯಾ ದೆವಾಚ್ಯಾ ಆನಿ ಸೊಡ್ವಣ್ದಾರಾ ಜೆಜು ಕ್ರಿಸ್ತಾಚ್ಯಾ ಮಹಿಮೇಭರಿತ್ ಯೆಣ್ಯಾಕ್ ಭಾಗಿ ಭರ್ವಸ್ಯಾನ್ ವಾಟ್ ಪಳೆವ್ನ್ ರಾವುಂಕ್ ತಿ ಕುರ್ಪಾ ಆಮ್ಕಾಂ ಶಿಕಯ್ತಾ. ಆಪ್ಣಾಕ್‍ಚ್ ತಾಣೆಂ ಆಮ್ಚೇ ಪಾಸತ್ ಬಲಿದಾನ್‍ಕಸೊ ಭೆಟೊವ್ನ್ ದಿಲೊ. ಸರ್ವ್ ಖೊಟೆಪಣಾಂತ್ಲಿಂ ಆಮ್ಕಾಂ ಸೊಡೊಂವ್ಚೇ ಖಾತಿರ್, ಆನಿ ಆಪ್ಣಾಕ್ ಮಾನ್ವತಾ ಆನಿ ಬರಿ ಕನ್ರ್ಯೊ ಆಧಾರುಂಕ್ ಉರ್ಬೆತಾ ತಸಲಿ ಏಕ್ ಪರ್ಜಾ ವಿಂಗಡ್ ಕರ್ನ್ ದವರ್ಚೇ ಖಾತಿರ್ ತಾಣೆಂ ಹೆಂ ಕೆಲೆಂ.
Show more
5 December
ದಶೆಂಬರ್ 25 - ಜೆಜುಚ್ಯಾ ಜಲ್ಮಾಚಿ ಪರಬ್ – ರಾತಿಚೆಂ ಮೀಸ್ - ಸುವಾರ್ತಾ
ಲೂಕ್ 2:1-14 ತ್ಯಾ ದಿಸಾಂನಿ ಆಗುಸ್ತ್ ಚಕ್ರವರ್ತಿನ್ ಸಗ್ಳ್ಯಾ ರೋಮೀ ಸಂಸಾರಾಚೆಂ ಜನಗಣನ್ ಕರುಂಕ್ ಜಾಯ್ ಮ್ಹಣುನ್ ಫರ್ಮಾಣ್ ಧಾಡ್ಲೆಂ. ಹೆಂ ಪಯ್ಲೆಂ ಜನಗಣನ್ ಕ್ವಿರೀನ್ ಸೀರಿಯಾಚೊ ಅಧಿಪತಿ ಜಾವ್ನ್ ಆಸ್‍ಲ್ಲ್ಯಾ ಕಾಳಾರ್ ಕಾಡ್‍ಲ್ಲೆಂ. ದೆಕುನ್, ಸಮೆಸ್ತಾಂ ಆಪ್ಲೆಂ ನಾಂವ್ ದಾಖಲ್ ಕರುಂಕ್ ಆಪಾಪ್ಲ್ಯಾ ಸ್ವಂತ್ ಗಾಂವಾಕ್ ಗೆಲಿಂ. ಜುಜೆ ದಾವಿದಾಚ್ಯಾ ಘರಾಣ್ಯಾಚೊ ದೆಕುನ್ ಗಾಲಿಲೆಯಾಚ್ಯಾ ನಜರೆತ್ ಶಹರಾ ಥಾವ್ನ್ ಜುದೇಯಾಂತ್ ಆಸ್ಲಲ್ಯಾ ದಾವಿದಾಚ್ಯಾ ಶಹರಾಕ್, ಬೆತ್ಲೆಹೆಮಾಕ್, ಆಪ್ಲೆಂ ನಾಂವ್ ದಾಖಲ್ ಕರ್ಚ್ಯಾಕ್ ಗೆಲೊ. ತಾಚೇಲಾಗಿಂ ಕರಾರ್ ಜಾಲ್ಲಿ ತಾಚಿ ಪತಿಣ್ ಮರಿಯೀ ತಾಚೇ ಸಾಂಗಾತಾ ಗೆಲಿ; ತವಳ್ ತಿ ಭರ್ಲಲಿ ಗರ್ಭಿಣ್. ತಿಂ ಥಂಯ್ ಆಸ್ತಾನಾ, ತಿಚೆ ಪ್ರಸೂತ್‍ಪಣಾಚೆ ದೀಸ್ ಭರ್ತಿ ಜಾಲೆ ಆನಿ ತಿ ಆಪ್ಲ್ಯಾ ಪ್ರಥಮ್ ಭುರ್ಗ್ಯಾಕ್, ಏಕ್ ಪುತಾಕ್, ಪ್ರಸೂತ್ ಜಾಲಿ. ತಾಕಾ ತಿಣೆಂ ಫಾಳಿಯಾಂನಿ ಗುಟ್ಲಾವ್ನ್ ಏಕ್ ಖಾವ್ಣೆಂತ್ ನಿದಾಯ್ಲೊ; ಕಿತ್ಯಾಕ್ ಛಾತ್ರಾಂತ್ ತಾಂಕಾಂ ಜಾಗೊ ಮೆಳೊಂಕ್‍ನಾತ್ಲೊ. ದೇವ್‍ದುತಾಂನಿ ಗೊವ್ಳ್ಯಾಂಕ್ ದಿಲ್ಲೊ ಸಂದೇಶ್ ತ್ಯಾಚ್ ಗಾಂವ್ಚ್ಯಾ ಮೈದಾನಾಂನಿ ಥೊಡೆ ಗೊವ್ಳಿ ಜಾಗೆ ರಾವುನ್, ಆಪ್ಲ್ಯಾ ಹಿಂಡಾಂಚೆರ್ ರಾತಿಚಿ ರಾಖಣ್ ಕರ್ನ್ ಆಸ್ಲೆ. ತವಳ್ ಎಕಾಚ್ಛಾಣೆಂ, ಸರ್ವೆಸ್ಪರಾಚೊ ಏಕ್ ದೂತ್ ತಾಂಚೇ ಮುಖಾರ್ ಉಬೊ ಜಾಲೊ ಆನಿ ದೆವಾಚೊ ಪ್ರಕಾಸ್ ತಾಂಚೇ ಭೊಂವ್ತಿಂ ಫಾಂಕ್ಲೊ; ಆನಿ ತೆ ಭಿಯಾನ್ ಥರ್ಥರ್ಲೆ. ತೊ ದೂತ್ ತಾಂಕಾಂ ಮ್ಹಣಾಲೊ: “ಭಿಯೆನಾಕಾತ್, ಪಳೆಯಾ ಸಗ್ಳೇ ಪರ್ಜೆಕ್ ವ್ಹಡ್ ಸಂತೊಸಾಚಿ ಬರಿ ಖಬರ್ ಹಾಂವ್ ತುಮ್ಕಾಂ ಹಾಡ್ನ್ ಆಯ್ಲಾಂ. ಆಯ್ಚೇ ರಾತೀ ದಾವಿದಾಚೇ ನಗರಿಂ ತುಮ್ಕಾಂ ಏಕ್ ತಾರಕ್ ಜಲ್ಮಲಾ - ತೊಚ್ ಕ್ರೀಸ್ತ್ ಸೊಮಿ. ಆನಿ ಹೊ ತುಮ್ಕಾಂ ಏಕ್ ಗುರ್ತ್: ಫಾಳಿಯಾಂನಿ ಗುಟ್ಲಾವ್ನ್, ಖಾವ್ಣೆಂತ್ ನಿದಾಯ್ಲಲೊ ಎಕ್ ಬಾಳೊಕ್ ತುಮ್ಕಾಂ ಮೆಳ್ತಲೊ.” ತಿತ್ಲ್ಯಾರ್ ಎಕಾಚ್ಚಾಣೆಂ ದೇವ್‍ದುತಾ ಸಾಂಗಾತಾ ಸರ್ಗಿಂಚ್ಯಾ ದಳ್ಬರಾಚೊ ವ್ಹಡ್ ಏಕ್ ಜಮೊ ದಿಷ್ಟಿ ಪಡ್ಲೊ. ಆನಿ ದೆವಾಚಿ ಸ್ತುತಿ ಕರಿತ್ ಮ್ಹಣಾಲೊ: “ಮಹಿಮಾ ದೆವಾಕ್ ಅತಿ ಉನ್ನತಿಂ ಆನಿ ಶಾಂತಿ ದೆವಾಕ್ ಮಾನ್ವಲ್ಯಾತ್ ತ್ಯಾ ಮನ್ಶಾಂಕ್ ಸಂಸಾರಿಂ.”
Show more
20 November
ದಶೆಂಬರ್ 22 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ – ಪಯ್ಲೆಂ ವಾಚಪ್
ಮೀಖಾ 5:1-4 ಪೂಣ್ ತುಂ ಬೆತ್ಲೆಹೆಮ್-ಎಫ್ರಾತಾ, ಜುದಾಚ್ಯಾ ಕುಳಿಯಾಂ ಮಧೆಂ ತುಂ ಭೋವ್ ಲ್ಹಾನ್, ತರೀ ಇಸ್ರಾಯೆಲಾಚೆರ್ ರಾಜ್ವಟ್ ಚಲೊಂವ್ಚೊ ಆಸಾ ತೊ ಮ್ಹಾಕಾ ತುಜೆ ಥಾವ್ನ್ ಜಲ್ಮತಲೊ. ತಾಚೊ ಆರಂಭ್ ನ್ಹಯ್ ಆತಾಂಚೊ, ಬಗರ್ ಭೋವ್ ಪುರ್ವಿಲ್ಯಾ ಕಾಳಾಂಚೊ. ದೆಕುನ್ ಪ್ರಸೂತ್ ಜಾಂವ್ಚಿ ಆಸಾ ತಿ ಪ್ರಸೂತ್ ಜಾಯ್ಸರ್ ಸರ್ವೆಸ್ಪರ್ ತಾಂಕಾಂ ಸಾಂಡ್ತಲೊ; ಉಪ್ರಾಂತ್ ತಾಚೆ ಉರ್ಲಲೆ ಭಾವ್ ಇಸ್ರಾಯೆಲಿತಾಂಶಿಂ ಪರ್ತುನ್ ಯೆತಲೆ. ಸರ್ವೆಸ್ಪರಾಚೆ ಪದ್ವೆನ್ ಆನಿ ಆಪ್ಲ್ಯಾ ದೆವಾಚ್ಯಾ ನಾಂವಾಚ್ಯಾ ಪ್ರತಾಪಾನ್ ತೊ ಥಿರ್ ರಾವ್ತಲೊ ಆನಿ ಆಪ್ಲ್ಯಾ ಹಿಂಡಾಕ್ ಚರಯ್ತಲೊ. ತಿಂ ಸುರಕ್ಷಿತ್ ವಸ್ತಿ ಕರ್ತಲಿಂ, ಕಿತ್ಯಾಕ್ ತೆದ್ನಾ ಥಾವ್ನ್ ತಾಚಿ ಪದ್ವಿ ಪೃಥ್ವೆಚ್ಯಾ ಶಿಮಾಂ ಪರ್ಯಾಂತ್ ಪಾವ್ತಲಿ, ಆನಿ ತೊಚ್ ಶಾಂತಿ ಜಾತಲೊ. ಅಸ್ಸೀರಿಯಾಗಾರ್ ಆಮ್ಚ್ಯಾ ದೆಶಾಚೆರ್ ಧಾಡ್ ಘಾಲ್ತಿತ್ ಜಾಲ್ಯಾರ್ ಆನಿ ಆಮ್ಚೆ ಭುಂಯ್ಚೆರ್ ಪಾಂಯ್ ದವರ್ತಿತ್ ಜಾಲ್ಯಾರ್, ಆಮಿ ತಾಂಚೆ ವಿರೋಧ್ ಸಾತ್ ಗೊವ್ಳ್ಯಾಂಕ್ ಆನಿ ರಾಯಾಳ್ ವರ್ಗಾಚ್ಯಾ ಆಟ್ ಫುಡಾರ್ಯಾಂಕ್ ಉಟಯ್ತಲ್ಯಾಂವ್.
Show more
20 November
ದಶೆಂಬರ್ 22 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ – ಕೀರ್ತನ್
ಕೀರ್ತನ್ 79 ಅಂತರ್ ಗೀತ್ ಶ್ಲೋಕ್ : ದೆವಾ, ಆಮ್ಕಾಂ ಎಕ್ಟಾಂಯ್ ಕರ್, ತುಜ್ಯಾ ಮುಖಮಳಾಚೊ ಪರ್ಜಳ್ ಆಮ್ಚ್ಯೆರ್ ಫಾಂಕಯ್! 1. ಆಯ್ಕ್ ಆಮ್ಕಾಂ, ಏ ಇಸ್ರಾಯೆಲಾಚ್ಯಾ ಗೊವ್ಳ್ಯಾ, ಖೆರೊಬಾಂ ವಯ್ರ್ ಸಿಂಹಾಸನಾರ್ ಬಸುನ್ ಆಸ್ಲಲ್ಯಾ; ತುಜ್ಯಾ ಮುಖಮಳಾಚೊ ಪರ್ಜಳ್ ಆಮ್ಚ್ಯೆರ್ ಪಡುಂದಿ, ತೆದ್ವಾಂ ಸೊಡ್ವಣ್ ಆಮ್ಕಾಂ ಲಾಭ್ತಲಿ. 2. ದಳ್ಭಾರಾಂಚ್ಯಾ ದೆವಾ, ಆಮ್ಕಾಂ ಫುಡ್ ಕರ್ನ್ ಪಳೆ, ಸರ್ಗಾರ್ ಥಾವ್ನ್ ನದರ್ ಘಾಲ್, ಹ್ಯೆ ದಾಕ್ವಾಲಿಚ್ಯೆ ಲಾಗಿಂ ಯೆವ್ನ್ ಭೆಟ್ ಕರ್! ತುಜ್ಯಾ ಉಜ್ವ್ಯಾ ಹಾತಾನ್ ಲಾವ್ನ್ ವ್ಹಡ್ ಕೆಲ್ಲ್ಯೆ ದಾಕ್ವಾಲಿಕ್ ಬಾಳ್ಗೂನ್ ಸಾಂಬಾಳ್. 3. ತುಜ್ಯಾ ಉಜ್ವ್ಯಾಕ್ ಬಸಯ್ಲಲ್ಯಾ ಪುರುಷಾಚೆರ್, ತುಜ್ಯೆ ಖಾತಿರ್‍ಚ್ ತುವೆಂ ಬಳಿಷ್ಟ್ ಕೆಲ್ಲ್ಯಾ ಮನ್ಶಾಚೆರ್ ಸದಾಂಚ್ ತುಜೊ ಹಾತ್ ದವರ್. ತೆದ್ವಾಂ ಆಮಿ ಕೆದಿಂಚ್ ತುಜ್ಯೆ ಸರ್ಶಿಲಿಂ ಪಯ್ಸ್ ಸರ್ಚಿಂನಾಂವ್, ಆಮ್ಕಾಂ ನವ್ಯಾನ್ ಜೀವ್ ದಿ ಆನಿ ತುಜೆಂ ನಾಂವ್ ಆಮಿ ವಾಖಾಣ್ತಲ್ಯಾಂವ್.
Show more
20 November
ದಶೆಂಬರ್ 22 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ - ದುಸ್ರೆಂ ವಾಚಪ್
ಹೆಬ್ರೆವ್ 10:5-10 ಹ್ಯಾ ಪಾಸತ್‍ಚ್, ಆಪುಣ್ ಸಂಸಾರಾಂತ್ ಯೆತಾನಾ ಕ್ರಿಸ್ತಾನ್ ಮ್ಹಳೆಂ: “ಬಲಿದಾನಾಂ ಆನಿ ಅರ್ಪಣಾಂ ತುಕಾ ನಾಕಾ ಜಾಲಿಂ; ಪುಣ್ ಮ್ಹಾಕಾ ಏಕ್ ಕೂಡ್ ತುವೆಂ ತಯಾರ್ ಕೆಲಿಯ್. ಹೋಮ್ ಬಲಿಯೋ ಆನಿ ದೋಷ್ ಪರಿಹಾರಾಚಿಂ ಬಲಿದಾನಾಂ ತುಕಾ ಮಾನ್ವಲಿಂ ನಾತ್.” ತವಳ್ ಹಾಂವೆಂ ಮ್ಹಳೆಂ : “ಪಳೆ, ಹಾಂವ್ ಆಯ್ಲಾಂ, ಪವಿತ್ರ್ ಗ್ರಂಥಾಚ್ಯಾ ಕೊವ್ಳ್ಯಾರ್ ಮ್ಹಜೇ ವಿಶ್ಯಾಂತ್ ಬರೊವ್ನ್ ಆಸ್ಲಲೇಬರಿ, ದೆವಾ, ತುಜಿ ಖುಶಿ ಕರುಂಕ್ ಹಾಂವ್ ಆಯ್ಲಾಂ.” ಪಯ್ಲೆಂ ತೊ ಅಶೆಂ ಮ್ಹಣ್ತಾ : “ಬಲಿದಾನಾಂ ಆನಿ ಅರ್ಪಣಾಂ, ಹೋಮ್ ಬಲಿಯೋ ವಾ ದೋಷ್ ಪರಿಹಾರಾಚಿಂ ಬಲಿದಾನಾಂ ತುಕಾ ನಾಕಾ ಜಾಲಿಂ ವಾ ತುಕಾ ತಿಂ ಮಾನ್ವಲಿಂನಾತ್.” (ತರ್‍ಯೀ ಹಿಂ ಸಕ್ಕಡ್ ನಿಯಮ್‍ಶಾಸ್ತ್ರಾಚ್ಯಾ ವಿಧಿ ಪರ್ಮಾಣೆಂ ಭೆಟೊವ್ಚಿಂ ತಸಲಿಂ.) ಉಪ್ರಾಂತ್ ತೊ ಮ್ಹಣ್ತಾ : “ತುಜಿ ಖುಶಿ ಕರುಂಕ್ ಹಾಂವ್ ಆಯ್ಲಾಂ.” ತಶೆಂ ಮ್ಹಳ್ಯಾರ್ ತೊ ಪಯ್ಲೆಂಚಿ ಆರಾಧನ್ ಸ್ತುತಿ ರದ್ದ್ ಕರ್ತಾ ಆನಿ ದುಸ್ರಿಚ್ ಏಕ್ ಸ್ಥಾಪಿತ್ ಕರ್ತಾ. ಹೇಚ್ ‘ಖುಶೇಕ್’ಲಾಗುನ್ ಜೆಜು ಕ್ರಿಸ್ತಾಚೇ ಕುಡಿಚ್ಯಾ ಎಕ್‍ಚ್ ಪಾವ್ಟಿ ಕೆಲ್ಲ್ಯಾ ಬಲಿದಾನಾ ಮಾರಿಫತ್ ಆಮಿ ಪವಿತ್ರ್ ಜಾಲ್ಯಾಂವ್.
Show more
20 November
ದಶೆಂಬರ್ 22 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ಚೊವ್ತೊ ಆಯ್ತಾರ್ – ಸುವಾರ್ತಾ
ಲೂಕ್ 1:39-45 “ಹೆಂ ಘಡೊನ್ ಥೊಡ್ಯಾಚ್ ದಿಸಾಂನಿ ಮರಿ ಉಠುನ್ ಜುದಾಚ್ಯಾ ದೊಂಗ್ರಾಳ್ ಪ್ರದೇಶಾಂತ್ಲ್ಯಾ ಏಕ್ ಶಹರಾಕ್ ಧಾಂವ್‍ಧಾಂವಿಂ ಗೆಲಿ. ಥಂಯ್ ಜಾಕರಿಚ್ಯಾ ಘರಾ ಭಿತರ್ ಸರ್ನ್, ಎಲಿಜಾಬೆತಿಕ್ ತಿಣೆಂ ನಮಾನ್ ಕೆಲೊ. ಎಲಿಜಾಬೆತಿನ್ ಮರಿಯೆಚೊ ನಮಾನ್ ಆಯ್ಕತಚ್, ತಿಚೇ ಕುಶಿಂತ್ ಆಸ್ಲಲ್ಯಾ ಬಾಳ್ಕಾನ್ ಉಡಿ ಮಾರ್ಲಿ; ಆನಿ ಎಲಿಜಾಬೆತ್ ಪವಿತ್ರ್ ಆತ್ಮ್ಯಾನ್ ಭರೊನ್, ವ್ಹಡ್ಲ್ಯಾ ತಾಳ್ಯಾನ್ ಮ್ಹಣಾಲಿ: “ಸ್ತ್ರೀಯಾಂ ಭಿತರ್ ತುಂ ಸದೆಂವ್ ಆನಿ ಸದೆಂವ್ ತುಜೇ ಕುಶಿಚೆಂ ಫಳ್. ಮ್ಹಜ್ಯಾ ಸೊಮಿಯಾಚೇ ಮಾತೆನ್ ಮ್ಹಜೇ ಭೆಟೆಕ್ ಯೆವ್ಚೆಂ ಹೆಂ ಭಾಗ್ ಖಂಯ್ ಥಾವ್ನ್ ಮ್ಹಾಕಾ ಫಾವೊ ಜಾಲೆಂ? ತುಜ್ಯಾ ನಮಾನಾಚೊ ಸಬ್ದ್ ಮ್ಹಜ್ಯಾ ಕಾನಾಂತ್ ಪಡ್ತಚ್, ಮ್ಹಜೇ ಕುಶಿಂತ್ಲ್ಯಾ ಬಾಳ್ಕಾನ್ ಉಲ್ಲಾಸಾನ್ ಉಡಿ ಮಾರ್ಲಿ. ಸರ್ವೆಸ್ಪರಾನ್ ಆಪ್ಣಾಕ್ ಕಳಿತ್ ಕೆಲ್ಲ್ಯೊ ಸಂಗ್ತಿ ಘಡೊನ್ ಯೆತಲ್ಯೊ ಮ್ಹಣ್ ಸತ್ಮಾನ್ಲಲಿ ತುಂ ಕಿತ್ಲಿ ಭಾಗಿ!” ತವಳ್ ಮರಿ ಮ್ಹಣಾಲಾಗ್ಲಿ: “ಮ್ಹಜೊ ಜೀವ್ ಸರ್ವೆಸ್ಪರಾಚಿ ವ್ಹಡ್ವಿಕ್ ಗಾತಾ, ಮ್ಹಜೊ ಆತ್ಮೊ ದೆವಾ ಮ್ಹಜ್ಯಾ ತಾರಕಾ ಥಂಯ್ ಸಂತೊಸಾನ್ ಉಡ್ತಾ. ಕಿತ್ಯಾಕ್, ಅಪ್ಲೇ ಕಿರ್ಕೊಳ್ ಚರಣ್‍ದಾಸಿಚೆರ್ ತಾಣೆಂ ದಯಾದೀಷ್ಟ್ ಘಾಲಿ. ದೆಕುನ್ ಹ್ಯಾ ಫುಡಾಂ ಸರ್ವ್ ಸಂತತಿ ಮ್ಹಾಕಾ ಸದೆಂವ್ ಮ್ಹಣುನ್ ಪಾಚಾರ್ತಲ್ಯೊ.
Show more
20 November
ದಶೆಂಬರ್ 15 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ – ಪಯ್ಲೆಂ ವಾಚಪ್
ಝೆಫಾ. 3:14-18 ಸಿಯೊನಾಚೆ ಧುವೆ, ಸಂತೊಸಾನ್ ಬೋಬ್ ಮಾರ್, ಇಸ್ರಾಯೆಲಾ, ಉಲ್ಲಾಸಾನ್ ಗಿತಾಂ ಗಾ! ಜೆರುಸಾಲೆಮಾಚೆ ಧುವೆ, ಸಂತೊಸ್ಭರಿತ್ ಜಾ, ಸಗ್ಳ್ಯಾ ತುಜ್ಯಾ ಕಾಳ್ಜಾನ್ ಉಲ್ಲಾಸಿತ್ ಜಾ! ತುಜೆರ್ ಪಡ್ಲಲೆಂ ಪರ್ಮಾಣ್ ಸರ್ವೆಸ್ಪರಾನ್ ಪಯ್ಸ್ ಕೆಲಾಂ, ತುಜ್ಯಾ ದುಸ್ಮಾನಾಂಕ್ ತಾಣೆಂ ಪಾಟಿಂ ಧಾಂವ್ಡಾಯ್ಲ್ಯಾತ್. ಇಸ್ರಾಯೆಲಾಚೊ ರಾಯ್, ಸರ್ವೆಸ್ಪರ್, ತುಜೆ ಮಧೆಂ ಆಸಾ, ತುಜೆರ್ ಆನಿಕ್ ವಿಘ್ನ್ ಯೆತಲೆಂ ಮ್ಹಣ್ ಭಿರಾಂತ್ ಧರ್ಚಿ ಗರ್ಜ್ ನಾ. ತ್ಯಾ ದಿಸಾ ಜೆರುಸಾಲೆಮಾ ವಿಶಿಂ ಅಶೆಂ ಮ್ಹಣ್ತಲಿಂ: ಸಿಯೊನಾ, ಭಿಯೆನಾಕಾ, ತುಜೆ ಹಾತ್ ಗಳುಂಕ್ ದಿನಾಕಾ. ಸರ್ವೆಸ್ಪರ್ ತುಜೊ ದೇವ್ ತುಜೆ ಮಧೆಂ ಆಸಾ, ಜಯ್ತ್ ದಿತಲೊ ಝುಜಾರಿ ತೊ. ತುಜೆ ವಿಶಿಂ ತೊ ಅನಂದ್ಭರಿತ್ ಜಾತಲೊ, ಆಪ್ಲ್ಯಾ ಮೊಗಾನ್ ತೊ ತುಕಾ ನವಿ ಕರ್ತಲೊ, ಉತ್ಸವಾಚ್ಯಾ ದಿಸಾ ಸಂತೊಸ್ತಾತ್ ಆನಿ ಉಲ್ಲಾಸ್ತಾತ್ ತಶೆಂ ತೊ ಸಂತೊಸ್ತಲೊ ಆನಿ ಉಲ್ಲಾಸ್ತಲೊ. ಹಾಂವ್ ತುಜೆಂ ನಿರ್ಭಾಗ್ ಪಯ್ಸ್ ಕರ್ತಲೊಂ, ತಾಚಿ ಲಜ್ ತುಕಾ ಆನಿಕ್ ಭೊಗುಂಕ್ ಪಡ್ಚಿನಾ.
Show more
20 November
ದಶೆಂಬರ್ 15 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ – ಕೀರ್ತನ್
ಕೀರ್ತನ್ 12 ಅಂತರ್ ಗೀತ್ ಶ್ಲೋಕ್ : ಸಂತೊಸ್ ಪಾವಾ, ಉಲ್ಲಾಸ್ ಕರಾ, ಇಸ್ರಾಯೆಲಾಚೊ ಪವಿತ್ರ್ ದೇವ್ ತುಮ್ಚ್ಯೆ ಮಧೆಂ ಖರೊಚ್ ವರ್ತೊ! 1. ಅಬ್ಳೆ, ದೇವ್‍ಚ್ ಮ್ಹಜೊ ತಾರೊಕ್, ತಾಕಾ ಜರ್ ಪಾತ್ಯೆನ್ ಮ್ಹಾಕಾ ಭಿರಾಂತ್‍ಚ್ ನಾ; ಕಿತ್ಯಾಕ್ ಸರ್ವೆಸ್ಪರ್ ಮ್ಹಜೆಂ ಬಳ್, ತೊಚ್ ಮ್ಹಜ್ಯಾ ಕೀರ್ತನಾಚೆಂ ಮೂಳ್; ವ್ಹಯ್, ತೊಚ್ ಮ್ಹಜೊ ಸೊಡ್ವಣ್ದಾರ್. 2. ಸೊಡ್ವಣೆಚ್ಯೆ ಝರಿಂತ್ಲೆಂ ಸಂತೊಸಾನ್ ಉದಕ್ ಕಾಡುಂಕ್ ಮುಖಾರ್ ಸರಾ, ಸರ್ವೆಸ್ಪರಾಕ್ ಗಿತಾಂ ಗಾಯಾ, ತಾಚೆಂ ನಾಂವ್ ಹರ್ಸಿಯಾ. ಸಕ್ಕಡ್ ಪರ್ಜಾಂಕ್ ತಾಚಿಂ ವಿಜ್ಮಿತಾಂ ಕಳಿತ್ ಕರಾ, ತಾಚೆಂ ನಾಂವ್ ಶ್ರೇಷ್ಠ್ ಮ್ಹಣುನ್ ಪರ್ಗಟ್ ಕರಾ. 3. ಸರ್ವೆಸ್ಪರಾಕ್ ಗಿತಾಂ ಗಾಯಾ, ಕಿತ್ಯಾಕ್ ತಾಣೆಂ ಕೆಲ್ಯಾಂತ್ ಮಹತ್ಕಾರ್ಯಾಂ, ಶೆಕಾನ್ ಶೆಕ್ ಪ್ರಿಥುಮೆಚೆರ್ ತಿಂ ಕಳಿತ್ ಕರಾ, ಗಾಜಯಾ, ಸಿಯೊನಾಚ್ಯಾ ನಿವಾಸ್ಯಾಂನೋ ಅನಂದಾಚೆ ಉಲ್ಲಾಸ್ ಸೊಡಾ, ಕಿತ್ಯಾಕ್ ಇಸ್ರಾಯೆಲಾಚೊ ಪವಿತ್ರ್ ದೇವ್ ತುಮ್ಚ್ಯೆ ಮಧೆಂ ಖರೊಚ್ ವರ್ತೊ.
Show more
20 November
ದಶೆಂಬರ್ 15 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ - ದುಸ್ರೆಂ ವಾಚಪ್
ಫಿಲಿ. 4:4-7 ಸೊಮಿಯಾ ಥಂಯ್ ಸದಾಂಚ್ ತುಮಿ ಸಂತೊಸ್ ಪಾವಾ; ಪತ್ರ್ಯಾನ್ ಹಾಂವ್ ಸಾಂಗ್ತಾಂ: ಸಂತೊಸ್ ಪಾವಾ! ತುಮ್ಚೆಂ ಭೊಳೆಪಣ್ ಸಮೆಸ್ತ್ ಮನ್ಶಾಂಕ್ ಕಳಿತ್ ಜಾಂವ್. ಸೊಮಿಯಾಚ್ಯಾ ಯೆಣ್ಯಾಚೊ ಕಾಳ್ ಲಾಗಿಂಚ್ ಆಸಾ. ಕಸಲೊಚ್ ಖಂತ್‍ಹುಸ್ಕೊ ಧರಿನಾಕಾತ್; ಹರ್ಯೇಕ್ ತುಮ್ಚಿ ಗರ್ಜ್ ಮಾಗ್ಣ್ಯಾನ್ ಆನಿ ಉಪ್ಕಾರಿ ಮನಾನ್ ದೆವಾಕ್ ಕಳಿತ್ ಕರಾ. ತವಳ್ ಆಮ್ಚೇ ಜಾಣ್ವಾಯೆನ್ ಆಟಾಪುಂಕ್ ನಜೊ ಜಾಲ್ಲೆಂ ತೆಂ ದೆಣೆಂ, ದೆವಾಚೆಂ ಸಮಾಧಾನ್ ತುಮ್ಚಿಂ ಕಾಳ್ಜಾಂ ಆನಿ ತುಮ್ಚಿಂ ಮನಾಂ ಕ್ರಿಸ್ತಾ ಜೆಜುಚ್ಯಾ ಎಕ್ವಟಾಂತ್ ಶಾಬಿತ್ ರಾಕ್ತಲೆಂ.
Show more
20 November
ದಶೆಂಬರ್ 15 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ತಿಸ್ರೊ ಆಯ್ತಾರ್ – ಸುವಾರ್ತಾ
ಲೂಕ್ 3:10-18 ತವಳ್ ಲೊಕಾಚ್ಯಾ ಜಮ್ಯಾಂನಿ ತಾಚೇಲಾಗಿಂ ವಿಚಾರ್ಲೆಂ: “ತರ್ ಆಮಿ ಕಿತೆಂ ಕರಿಜಯ್ ಮ್ಹಣ್ ತುಂ ಮ್ಹಣ್ತಾಯ್?” ತಾಣೆಂ ತಾಂಕಾಂ ಜಾಪ್ ದಿಲಿ: “ತುಮ್ಚೇ ಮಧೆಂ ಕೊಣಾಲಾಗಿಂ ದೋನ್ ದಗ್ಲೆ ಆಸಾತ್, ತೊ ಕಾಂಯ್ ನಾತ್ಲಲ್ಯಾಕ್ ಏಕ್ ದೀಂವ್, ಆನಿ ಜೆಂವ್ಕ್ ಖಾಂವ್ಕ್ ಜಾಯ್ ಪುರ್ತೆಂ ಆಸ್ಲಲೊಯೀ ತಶೆಂಚ್ ಕರುಂ.” ಥೊಡೆ ಸುಂಕಾಗಾರ್ ಸ್ನಾನ್ ಘೆಂವ್ಕ್ ಆಯ್ಲೆ ಆನಿ ತಾಂಣಿಂ ತಾಚೇಲಾಗಿಂ ವಿಚಾರ್ಲೆಂ: “ಮೆಸ್ತ್ರಿ, ಆಮಿ ಕಿತೆಂ ಕರಿಜಯ್ ಮ್ಹಣ್ ತುಂ ಮ್ಹಣ್ತಾಯ್?” ತಾಣೆಂ ತಾಂಕಾಂ ಸಾಂಗ್ಲೆಂ: “ತುಮ್ಕಾಂ ನಿಶ್ಚಯ್ ಕೆಲ್ಲೇ ಪ್ರಾಸ್ ಚಡಿತ್ ವಸೂಲ್ ಕರಿನಾಕಾತ್.” ಥೊಡ್ಯಾ ಶಿಪಾಯಾಂನಿಯೀ ಯೇವ್ನ್ ತಾಚೇಲಾಗಿಂ ವಿಚಾರ್ಲೆಂ: “ಆನಿ ಆಮಿ ಕಿತೆಂ ಕರಿಜಯ್ ಮ್ಹಣ್ ತುಂ ಮ್ಹಣ್ತಾಯ್?” ತಾಣೆಂ ತಾಂಕಾಂ ಜಾಪ್ ದಿಲಿ: “ಕೊಣ್ ಮನ್ಶಾಕ್‍ಯೀ ಜುಲುಮ್ ಕರಿನಾಕಾತ್, ಕೊಣಾಯ್ಚೆರ್‍ಯೀ ಫಟ್ ಫಿರ್ಯಾದ್ ಮಾಂಡಿನಾಕಾತ್; ತುಮ್ಕಾಂ ಕಿತ್ಲಿ ದಿಸ್ಪಡ್ತಿ ಪೋಡ್ ಮೆಳ್ತಾ, ತಿ ಘೆವ್ನ್ ಧಾದೊಶಿ ಜಾಯಾ.” ಲೊಕಾಚೊ ಅತ್ರೆಗ್ ಆತಾಂ ವಾಡೊನ್ ಯೆತಾಲೊ ಆನಿ ಜುವಾಂವ್‍ಚ್ ಕಾಂಯ್ ಕ್ರೀಸ್ತ್ ಗಾಯ್ ಮ್ಹಣ್ ಹರ್ಯೆಕ್ಲೊ ಆಪ್ಲ್ಯಾ ಮನಾ ಭಿತರ್ ಚಿಂತುಂಕ್ ಪಡ್ಲೊ. ತ್ಯಾ ಪಾಸತ್ ಜುವಾಂವ್ ಸಕ್ಟಾಂಕ್ ಸಾಂಗಿಲಾಗ್ಲೊ: “ಹಾಂವ್ ತುಮ್ಕಾಂ ಸ್ನಾನ್ ದಿತಾಂ ಉದ್ಕಾನ್; ಪುಣ್ ಮ್ಹಜೇ ಪ್ರಾಸ್ ಸಕ್ತಿವಂತ್ ಎಕ್ಲೊ ಯೆವ್ಚೊ ಆಸಾ; ತಾಚ್ಯಾ ವ್ಹಾಣಾಂಚೊ ಬಾಂಧ್ ಸೊಡೊಂವ್ಕ್ ಸಯ್ತ್ ಹಾಂವ್ ಯೋಗ್ಯ್ ನ್ಹಯ್. ತೊ ತುಮ್ಕಾಂ ಪವಿತ್ರ್ ಆತ್ಮ್ಯಾನ್ ಆನಿ ಉಜ್ಯಾನ್ ಪವಿತ್ರ್ ಸ್ನಾನ್ ದಿತಲೊ; ಆಪ್ಲೆಂ ಸುಪ್ ತಾಣೆಂ ಹಾತಾಂತ್ ಧರ್ಲಾಂ ಆನಿ ತೊ ಆಪ್ಲಿ ಧಾನಿ ಆಸುಡ್ನ್ ನಿತಳ್ ಕರ್ತಲೊ; ಆಪ್ಲೊ ಗೋಂವ್ ತುಪ್ಯಾಂನಿ ಭರ್ತಲೊ, ಪುಣ್ ಪೋಲ್ ಪಾಲ್ವನಾ ತಸಲ್ಯಾ ಉಜ್ಯಾಂತ್ ಘಾಲ್ನ್ ಲಾಸ್ತಲೊ.” ಅಸಲಿ ಹೆರ್ ಜಾಯ್ತಿ ಶಿಕೊವ್ಣ್ ದೀವ್ನ್ ಜುವಾಂವ್ ಲೊಕಾಕ್ ಸುವಾರ್ತಾ ಪರ್ಗಟ್ ಕರ್ತಾಲೊ.
Show more
20 November
ದಶೆಂಬರ್ 8 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ದುಸ್ರೊ ಆಯ್ತಾರ್ – ಪಯ್ಲೆಂ ವಾಚಪ್
ಬಾರು. 5:1-9 ಜೆರುಸಾಲೆಮಾ, ತುಜಿಂ ವಿಳಾಪಾಚಿಂ ಆನಿ ಖಂತಿಚಿಂ ವಸ್ತ್ರಾಂ ಕಾಡ್, ಸದಾಂಕಾಲ್ ದೆವಾಚ್ಯಾ ವೈಭವಾಚಿ ಸೊಬಾಯ್ ನ್ಹೆಸ್; ದೆವಾಚ್ಯಾ ನಿತಿವಂತ್ಪಣಾಚೊ ಶೆಲೊ ಪಾಂಗುರ್, ಸಾಸ್ಣಾಚ್ಯಾ ದೆವಾಚ್ಯಾ ವೈಭವಾಚೊ ಮುಕುಟ್ ತುಜ್ಯಾ ಮಾತ್ಯಾರ್ ದವರ್. ಕಿತ್ಯಾಕ್ ಸಗ್ಳೆ ಪೃಥ್ವೆಕ್ ದೇವ್ ತುಜಿ ಸೊಭಾಯ್ ದಾಕಯ್ತಲೊ; “ನಿತಿವಂತ್ಪಣಾ ವರ್ವಿಂ ಶಾಂತಿ, ಆನಿ ಭಕ್ತಿಪಣಾ ವರ್ವಿಂ ಮಹಿಮಾ” ಹೆಂ ನಾಂವ್ ದೇವ್ ತುಕಾ ಸಾಸ್ಣಾಕ್ ದಿತಲೊ. ಊಟ್, ಜೆರುಸಾಲೆಮಾ, ಪರ್ವತಾಚೆರ್ ಉಬಿ ರಾವ್, ಉದೆಂತಿಕ್ ದಿಷ್ಟ್ ಲಾಯ್ ಆನಿ ತುಜ್ಯಾ ಭುರ್ಗ್ಯಾಂಕ್ ಪಳೆ: ಪವಿತ್ರ್ ದೆವಾಚ್ಯಾ ಉತ್ರಾನ್, ಉದೆಂತಿ ಥಾವ್ನ್ ಆನಿ ಅಸ್ತಮ್ತೆ ಥಾವ್ನ್ ತಾಂಕಾಂ ಎಕ್ಟಾಂಯ್ ಕೆಲ್ಯಾಂತ್; ದೆವಾನ್ ತಾಂಚೊ ಉಗ್ಡಾಸ್ ಕೆಲೊ ಮ್ಹಣ್ ತಿಂ ಸಗ್ಳಿಂ ಸಂತೊಸ್ತಾತ್. ತುಕಾ ಸೊಡುನ್ ತಿಂ ಪಾಂಯಾಂನಿ ಚಲುನ್ ಗೆಲಿಂ, ದುಸ್ಮಾನಾಂನಿ ತಾಂಕಾಂ ಆಮ್ಡುನ್ ವ್ಹೆಲಿಂ; ಪೂಣ್ ಆತಾಂ ದೇವ್ ತಾಂಕಾಂ ರಾಯಾಳ್ ಪಾಲ್ಖೆರ್ ಬಸೊವ್ನ್‍ಶೆಂ ವೈಭವಾನ್ ತುಜೆಶಿಂ ಪರ್ತುನ್ ಹಾಡ್ತಲೊ. ಕಿತ್ಯಾಕ್ ಇಸ್ರಾಯೆಲಾನ್ ದೆವಾಚ್ಯಾ ವೈಭವಾಂತ್ ಸುರಕ್ಷಿತ್ ಚಲ್ಚೆ ಖಾತಿರ್, ಹರೇಕ್ ಊಂಚ್ ಪರ್ವತ್ ಆನಿ ಸಾಸ್ಣಿಕ್ ದೊಂಗರ್ ಸಮತಳ್ ಕರುಂಕ್ ಜಾಯ್, ಆನಿ ಧರ್ಣ್ ಸಪಾಟ್ ಕರುಂಕ್ ಫಾಲ್ಕಿಂ ಭರುಂಕ್ ಜಾಯ್ ಮ್ಹಣ್ ದೆವಾನ್ ಆದೇಶ್ ದಿಲಾ. ದೆವಾಚ್ಯಾ ಆದೆಶಾಕ್ ಪಾಳೊ ದಿವ್ನ್ ರಾನಾಂ ಆನಿ ಪರ್ಮಳಿತ್ ರೂಕ್ ಇಸ್ರಾಯೆಲಾಕ್ ಸಾವ್ಳಿ ದಿತಲಿಂ; ಕಿತ್ಯಾಕ್ ದೇವ್ ಆಪ್ಲೆ ಮಹಿಮೆಚ್ಯಾ ಉಜ್ವಾಡಾಂತ್, ತಾಚೆ ಥಾವ್ನ್ ಯೆತಾ ತೆ ಕಾಕುಳ್ತಿನ್ ಆನಿ ನಿತಿನ್ ಇಸ್ರಾಯೆಲಾಕ್ ಸಂತೊಸಾನ್ ಚಲೊವ್ನ್ ವ್ಹರ್ತಲೊ.
Show more
20 November
ದಶೆಂಬರ್ 8 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ದುಸ್ರೊ ಆಯ್ತಾರ್ – ಕೀರ್ತನ್
ಕೀರ್ತನ್ 125 ಅಂತರ್ ಗೀತ್ ಶ್ಲೋಕ್ : ಸರ್ವೆಸ್ಪರಾನ್ ಆಮ್ಚ್ಯೆ ಖಾತಿರ್ ವಿಚಿತ್ರಾಂ ಕೆಲ್ಯಾಂತ್ ದೆಕುನ್ ಆಮಿ ಸಂತೊಸ್ಭರಿತ್ ಜಾಲ್ಯಾಂತ್. 1. ಗುಲಾಮ್‍ಪಣಾಂತ್ ಆಸ್ಲಲ್ಯಾ ಅಮ್ಕಾಂ ಸರ್ವೆಸ್ಪರಾನ್ ಪತ್ರ್ಯಾನ್ ಸಿಯೊನಾಕ್ ಹಾಡ್ಲಿಂ ತೆದ್ನಾ ಆಮ್ಕಾಂ ತೆಂ ಸ್ವಪಣ್‍ಶೆಂ ದಿಸ್ಲೆಂ, ತೆದ್ನಾ ಆಮ್ಚ್ಯಾ ತೊಂಡಾರ್ ಖೆಳ್ತಾಲೊ ಹಾಸೊ ಆನಿ ಆಮ್ಚ್ಯಾ ಒಂಠಾಂನಿ ವ್ಹಾಳ್ತಾಲಿಂ ಗಿತಾಂ. 2. ಅನ್ಭಾವಾರ್ಥಿ ಲೆಗುನ್ ಮ್ಹಣುಂಕ್ ಲಾಗ್ಲೆ: “ಕಸ್ಲಿಂ ಅಜಾಪಾಂ ಸರ್ವೆಸ್ಪರಾನ್ ತಾಂಚ್ಯೆ ಖಾತಿರ್ ಕೆಲಿಂನಾಂತ್!” ವ್ಹಯ್, ಸರ್ವೆಸ್ಪರಾನ್ ಆಮ್ಚ್ಯೆ ಖಾತಿರ್ ವಿಚಿತ್ರಾಂ ಕೆಲ್ಯಾಂತ್, ದೆಕುನ್ ಆಮಿ ಸಂತೊಸ್ಭರಿತ್ ಜಾಲ್ಯಾಂವ್. 3. ಜಶೆಂ ನೆಗೆಬಾಂತ್ ಉದ್ಕಾಚೆ ತೋಡ್ ನವ್ಯಾನ್ ವ್ಹಾಳ್ತಾತ್, ತಶೆಂ ಆಮ್ಚ್ಯಾ ಗುಲಾಮಾಂಕ್ ಪರ್ತುನ್ ಪಾಟಿಂ ಹಾಡ್, ಸರ್ವೆಸ್ಪರಾ,ತಿ ರಡ್ಣ್ಯಾ ರುದಾನಾಂನಿ ಒಂಪ್ತಾತ್ ತಿಂ ಗಾಯಾನ್ ಗಿತಾಂನಿ ಕರ್ತಾತ್ ಲುಂವ್ಣಿ! 4. ವೆತಾಂ ವೆತಾಂ ದುಖಾಂ ಗಳೊವ್ನ್ ತಿಂ ಚಲ್ಲಿಂ, ಹಾತಾಂತ್ ಘೆವ್ನ್ ಒಂಪ್ಚೆಂ ಭಿಂ; ಪಾಟಿಂ ಯೆತಾಂ ಗಿತಾಂ ಗಾವ್ನ್ ಆಯ್ಲಿಂ, ಮಾತ್ಯಾರ್ ದವರ್ನ್ ಲುಂವ್ಣೆಚ್ಯೊ ಪೆಂಡಿಯೋ.
Show more
20 November
ದಶೆಂಬರ್ 8 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ದುಸ್ರೊ ಆಯ್ತಾರ್ - ದುಸ್ರೆಂ ವಾಚಪ್
ಫಿಲಿ. 1:3-6, 8-11 ಹರ್ಯೇಕ್ ಪಾವ್ಟೀ ತುಮ್ಚೊ ಉಗ್ಡಾಸ್ ಕಾಡ್ತಾನಾ ತುಮ್ಚೇ ಪಾಸತ್ ಮ್ಹಜ್ಯಾ ದೆವಾಕ್ ಹಾಂವ್ ಅರ್ಗಾಂ ದಿತಾಂ. ಸರ್ವ್ ಮ್ಹಜ್ಯಾ ಮಾಗ್ಣ್ಯಾಂನಿ ತುಮ್ಕಾಂ ಸಮೆಸ್ತಾಂ ಪಾಸತ್ ಸಂತೊಸಾನ್ ಹಾಂವ್ ಸದಾಂಚ್ ಮಾಗ್ತಾಂ. ಕಿತ್ಯಾಕ್ ಮ್ಹಳ್ಯಾರ್, ಕ್ರಿಸ್ತಾಚಿ ಸುವಾರ್ತಾ ತುಮ್ಕಾಂ ಪಾವ್ಲಿ ತ್ಯಾ ಪಯ್ಲ್ಯಾ ದಿಸಾ ಥಾವ್ನ್ ಎದೊಳ್ ಪರ್ಯಾನ್ ತಿ ಪರ್ಗಟ್ ಕರ್ಚ್ಯಾಂತ್ ಮ್ಹಜೇ ಸಾಂಗಾತಾ ತುಮಿ ವಾವುರ್ಲ್ಯಾತ್. ತುಮ್ಚೇ ಥಂಯ್ ಹೆಂ ಬರೆಂ ಕಾಮ್ ಸುರು ಕೆಲ್ಲೊ ದೇವ್, ಕ್ರೀಸ್ತ್ ಜೆಜು ಯೆತಾ ತೊ ದೀಸ್ ಪರ್ಯಾನ್, ತೆಂ ಸಂಪೂರ್ಣ್ ಕರಿತ್ ವೆತಲೊ ಮ್ಹಣ್ ಮ್ಹಜಿ ದೃಢ್ ಪಾತ್ಯೆಣಿ. ಜೆಜು ಕ್ರಿಸ್ತಾಚ್ಯಾ ಮೊವಾಳ್ ಮೊಗಾನ್ ಹಾಂವ್ ತುಮ್ಕಾಂ ಕಿತ್ಲೊ ಲಾಲೆತಾಂ ಮ್ಹಳ್ಳೆಂ ದೇವ್‍ಚ್ ಜಾಣಾ. ತುಮ್ಚೊ ಮೋಗ್ ಚಡ್ ಆನಿ ಚಡ್ ವಾಡೊಂ! ಜಾಣ್ವಾಯೆನ್ ಆನಿ ಸಾರ್ಕೇ ಸಮ್ಜಣೆನ್ ತೊ ತುಮ್ಚೇ ಥಂಯ್ ಭರೊನ್ ವೊವ್ತೊಂ! ಜೆಂ ಕಿತೆಂ ಉತ್ತಮ್ ತೆಂ ತುಮ್ಚೆಂ ಮನ್ ವೊಡುಂ - ಹೆಂಚ್ ಮ್ಹಜೆಂ ಪ್ರಾರ್ಥನ್. ಅಶೆಂ ಕ್ರೀಸ್ತ್ ಯೆತಾ ತೊ ದೀಸ್ ಪರ್ಯಾನ್ ತುಮಿ ನಿತಳ್ ಆನಿ ನಿರಪ್ರಾಧಿ ಜಾವ್ನ್ ಆಸಜಯ್; ಆನಿ ಜೆಜು ಕ್ರಿಸ್ತಾಚೇಚ್ ಕುಮ್ಕೆನ್ ದೆವಾಚಿ ಮಹಿಮಾ ಆನಿ ಸ್ತುತಿ ವಾಡೊವ್ಚ್ಯಾಕ್ ನಿತಿವಂತ್ಪಣಾಚ್ಯಾ ಫೆಳಾಂನಿ ತುಮಿ ಭರೊನ್ ಯೇಜಯ್ - ಹಿಚ್ ಮ್ಹಜಿ ಆಶಾ.
Show more
20 November
ದಶೆಂಬರ್ 8 - ಕ್ರೀಸ್ತ್ ಯೆಣ್ಯಾಚ್ಯಾ ಕಾಳಾಚೊ ದುಸ್ರೊ ಆಯ್ತಾರ್ – ಸುವಾರ್ತಾ
ಲೂಕ್ 3:1-6 ತಿಬೆರ್ ಚಕ್ರವರ್ತಿಚೇ ರಾಜ್ವಟ್ಕೆಚ್ಯಾ ಪಂದ್ರಾವ್ಯಾ ವರ್ಸಾ, ಪೋನ್ಸ್ ಪಿಲಾತ್ ಜುದೇಯಾಚೊ ಅಧಿಪತಿ ಜಾವ್ನಾಸ್ತಾ, ಹೆರೊದ್ ಗಾಲಿಲೆಯಾ ಪ್ರಾಂತಾಚೊ ಉಪರಾಯ್ ಆನಿ ಲಿಸಾನಿಯಾ ಅಬಿಲಿನಾ ಪ್ರಾಂತಾಚೊ ಉಪರಾಯ್ ಜಾವ್ನಾಸ್ತಾಂ, ಅನ್ನಾಸ್ ಆನಿ ಕಾಯಿಫಾಸ್ ಶ್ರೇಷ್ಠ್ ಯಾಜಕ್ ಜಾವ್ನಾಸ್‍ಲ್ಲ್ಯಾ ಕಾಳಾರ್, ಜಾಕರಿಚ್ಯಾ ಪುತಾಕ್ ಜುವಾಂವ್ಕ್ ಅರಣ್ಯಾಂತ್ ದೆವಾಚೆಂ ಉತರ್ ಪ್ರಾಪ್ತ್ ಜಾಲೆಂ. ತೊ ಯೊರ್ದಾನ್ ನ್ಹಂಯ್ ಭೊಂವ್ತಿಂಛ್ಯಾ ಸರ್ವ್ ಪ್ರದೇಶಾಂನಿ ಭೊಂವುನ್, ಲೊಕಾನ್ ಮನ್ ಬದ್ಲಿಜಾಯ್, ಸ್ನಾನ್ ಘೆಜಯ್ ಆನಿ ಪಾತ್ಕಾಂಚೆಂ ಬೊಗ್ಸಾಣೆಂ ಜೊಡಿಜಯ್ ಮ್ಹಣುನ್ ಪರ್ಗಟ್ ಕರುಂಕ್ ಲಾಗ್ಲೊ. ಹೆಂ ಇಸಾಯಿಯಾನ್ ಆಪ್ಲ್ಯಾ ಪ್ರವಾದ್ ಪುಸ್ತಕಾಂತ್ ಬರಯ್‍ಲ್ಲ್ಯಾ ಪರ್ಮಾಣೆಂ ಘಡ್ಲೆಂ: “ಅರಣ್ಯಾಂತ್ ಏಕ್ ತಾಳೊ ಬೊಬ್ ಮಾರ್ತಾ; ‘ಸೊಮಿಯಾಕ್ ಏಕ್ ವಾಟ್ ತಯಾರ್ ಕರಾ, ತಾಚ್ಯಾ ಪಯ್ಣಾಕ್ ರಸ್ತೊ ನೀಟ್ ಕರಾ,’ ಹರೇಕ್ ಫಾಲ್ಕೆಂ ಭರ್ತಲೆಂ ದೊಂಗರ್ ವಾ ಪರ್ವತ್ ತಗ್ಸುನ್ ಹಾಡ್ತಲೆ, ವಾಂಕ್ಡೆ ತಿಂಕ್ಡೆ ರಸ್ತೆ ನೀಟ್ ಜಾತಲೆ, ಆನಿ ಖರ್ಕಟ್ಯೊ ವಾಟೋ ಸಫಾಯ್ ಜಾತಲ್ಯೊ. ಅಶೆಂ ಸಗ್ಳೆಂ ಮನ್ಶಾಕುಳ್ ದೆವಾಚೆಂ ತಾರಣ್ ದೆಖ್ತಲೆಂ.”
Show more
