Mangala Jyothi
Diocesan Biblical, Catechetical and Liturgical Center
Diocese of Mangalore
Mangala Jyothi
Diocesan Biblical, Catechetical and Liturgical Center
Diocese of Mangalore
Home
Departments
Prayers
News
Photo Gallery
Results
Magazines
Sunday Reading
Contact
Select a date
keyboard_arrow_down
Choose a year...
2025
keyboard_arrow_down
Choose a month...
June
May
April
11 June
ಜುಲಾಯಿ 27 – ಸಾಧ್ಯಾ ಕಾಳಾಚೊ ಸತ್ರಾವೊ ಆಯ್ತಾರ್ – ಪಯ್ಲೆಂ ವಾಚಪ್
ಉತ್ಪತ್ತಿ 18:20-32 ಉಪ್ರಾಂತ್ ಸರ್ವೆಸ್ಪರಾನ್ ಮ್ಹಳೆಂ: “ಸೊದೊಮ್ ಆನಿ ಗೊಮೊರ್ರಾ ವಿರೋಧ್ ಬೋಬ್ ಭೋವ್ ವ್ಹಡ್ ಜಾಲ್ಯಾ; ತಾಂಚೆಂ ಪಾತಕ್ ಖರೆಂಚ್ ಭೋವ್ ವ್ಹಡ್ ಆಸಾ. ಹಾಂವ್ ಸಕ್ಲಾ ವಚುನ್ ತಾಂಚ್ಯೊ ಕರ್ನ್ಯೊ ಹಾಂವೆಂ ತಾಂಚೆ ವಿರೋಧ್ ಆಯ್ಕಲ್ಲೆ ಬೊಬೆಕ್ ತಾಳ್ ಪಡ್ತಾತ್ ಕಿ ನಾ ಮ್ಹಣ್ ಪಳತಲೊಂ. ಹಾಚಿ ಹಾಂವೆಂ ಖಬರ್ ಘೆಂವ್ಕ್ ಜಾಯ್.” ತೆ ದೋಗ್ ಮನಿಸ್ ಥಂಯ್ ಥಾವ್ನ್ ಸೊದೊಮಾಚೆ ವಾಟೆನ್ ಗೆಲೆ. ಪೂಣ್ ಅಬ್ರಹಾಮ್ ಸರ್ವೆಸ್ಪರಾ ಮುಕಾರ್ ಥಂಯ್‍ಚ್ ಉಬೊ ರಾವ್ಲೊ. ಅಬ್ರಹಾಮ್ ಸರ್ವೆಸ್ಪರಾ ಸರ್ಶಿಂ ವಚುನ್ ವಿಚಾರಿಲಾಗ್ಲೊ: “ಖೊಟ್ಯಾಂ ಸಾಂಗಾತಾ ನಿತಿವಂತಾಂಚೊಯ್ ತುಂ ನಾಸ್ ಕರ್ತಾಯ್? ಚಿಂತ್ಯಾಂ, ಶಹರಾಂತ್ ಪನ್ನಾಸ್ ನಿತಿವಂತ್ ಮನಿಸ್ ಆಸಾತ್; ತರ್ ಸಗ್ಳ್ಯಾ ಶಹರಾಚೊ ತುಂ ನಾಸ್ ಕರ್ತಲೊಯ್ ಆನಿ ತಾಂತುಂ ಆಸ್ಲಲ್ಯಾ ಪನ್ನಾಸ್ ನಿತಿವಂತ್ ಮನ್ಶಾಂಕ್ ಲಾಗುನ್ ತೆಂ ವಾಟಾಂವ್ಚೊ ನಾಂಯ್? ಅಶೆಂ ಕೆದಿಂಚ್ ಕರಿನಾಕಾ, ಕಿತ್ಯಾಕ್ ಖೊಟ್ಯಾಂ ಸಾಂಗಾತಾ ನಿತಿವಂತಾಕ್ ಜಿವ್ಶಿಂ ಮಾರ್ಲ್ಯಾರ್, ನಿತಿವಂತಾಂಕ್ ಆನಿ ಖೊಟ್ಯಾಂಕ್ ಎಕಾಚ್ ಥರಾನ್ ಲೆಖ್‍ಲ್ಲೆ ಪರಿಂ ಜಾತಾ. ಅಶೆಂ ಕೆದಿಂಚ್ ಕರಿನಾಕಾ! ಸಗ್ಳ್ಯಾ ಸಂಸಾರಾಚ್ಯಾ ಮನ್ಸುಬಿದಾರಾನ್ ನಿತಿಕ್ ಪಸಂದ್ ಜಾಲ್ಲೆಂ ಕರುಂಕ್ ಜಾಯ್ ನ್ಹಯ್?” ಸರ್ವೆಸ್ಪರಾನ್ ಮ್ಹಳೆಂ: “ಸೊದೊಮ್ ಶಹರಾಂತ್ ಪನ್ನಾಸ್ ನಿತಿವಂತ್ ಮನಿಸ್ ಮ್ಹಾಕಾ ಮೆಳ್ತಿತ್ ಜಾಲ್ಯಾರ್, ತಾಂಚೆ ಖಾತಿರ್ ಸಗ್ಳೆಂ ಶಹರ್ ಹಾಂವ್ ವಾಟಾಯ್ತಲೊಂ.” ಆಬ್ರಾಹಾಮಾನ್ ಜಾಪ್ ದಿಲಿ: “ಹಾಂವ್ ಧುಳ್ ಆನಿ ಗೊಬರ್ ತರೀ ಸರ್ವೆಸ್ಪರಾ ಲಾಗಿಂ ಅಶೆಂ ಉಲೊಂವ್ಕ್ ಧಯ್ರ್ ಘೆತಾಂ! ಚಿಂತ್ಯಾಂ, ಪನ್ನಾಸ್ ನಿತಿವಂತ್ ಮನ್ಶಾಂಕ್ ಪಾಂಚ್ ಜಣ್ ಉಣೆ ಆಸಾತ್. ಹ್ಯಾ ಪಾಂಚ್ ಜಣಾಂಕ್ ಲಾಗುನ್ ತುಂ ಸಗ್ಳ್ಯಾ ಶಹರಾಚೊ ನಾಸ್ ಕರ್ತಾಯ್?” ತಾಣೆಂ ಮ್ಹಳೆಂ: “ನಾ, ಥಂಯ್ ಪಂಚೆಚಾಳಿಸ್ ನಿತಿವಂತ್ ಮನಿಸ್ ಮೆಳ್ತಿತ್ ಜಾಲ್ಯಾರ್ ಹಾಂವ್ ತಾಚೊ ನಾಸ್ ಕರ್ಚೊ ನಾಂ.” ಅಬ್ರಹಾಮಾನ್ ಪರ್ತುನ್ ಮ್ಹಳೆಂ: “ಚಿಂತ್ಯಾಂ, ಥಂಯ್ ಚಾಳಿಸ್ ಮಾತ್ರ್ ಆಸಾತ್.” ತಾಣೆಂ ಜಾಪ್ ದಿಲಿ: “ಚಾಳಿಸ್ ಜಾಣಾಂ ಖಾತಿರ್ ಹಾಂವ್ ತಾಚೊ ನಾಸ್ ಕರ್ಚೊ ನಾಂ.” ಅಬ್ರಹಾಮಾನ್ ಮ್ಹಳೆಂ: “ಹಾಂವ್ ಪರ್ತುನ್ ಉಲಯ್ತಾಂ ಮ್ಹಣ್ ಮ್ಹಜೊ ಸರ್ವೆಸ್ಪರ್ ರಾಗಾರ್ ಜಾಯ್ನಾ ಜಾಂವ್! ಥಂಯ್ ತೀಸ್ ಜಣ್ ಮಾತ್ರ್ ಮೆಳ್ತಿತ್ ಜಾಲ್ಯಾರ್?” ತಾಣೆಂ ಜಾಪ್ ದಿಲಿ: “ತೀಸ್ ಜಣ್ ಥಂಯ್ ಮೆಳ್ತಿತ್ ಜಾಲ್ಯಾರ್ ಹಾಂವ್ ತಶೆಂ ಕರ್ಚೊ ನಾಂ.” ಅಬ್ರಹಾಮಾನ್ ಮ್ಹಳೆಂ: “ಪರ್ತುನ್ ಮ್ಹಜ್ಯಾ ಸರ್ವೆಸ್ಪರಾ ಲಾಗಿಂ ಉಲೊಂವ್ಕ್ ಹಾಂವೆಂ ಧಯ್ರ್ ಘೆತ್ಲಾಂ; ಥಂಯ್ ವೀಸ್‍ಚ್ ಮೆಳ್ತಿತ್ ಜಾಲ್ಯಾರ್?” ತಾಣೆಂ ಜಾಪ್ ದಿಲಿ: “ಹ್ಯಾ ವೀಸ್ ಜಣಾಂ ಖಾತಿರ್ ಹಾಂವ್ ತಾಚೊ ನಾಸ್ ಕರ್ಚೊ ನಾಂ.” ಆಬ್ರಾಹಾಮಾನ್ ಮ್ಹಳೆಂ: “ಮ್ಹಜೊ ಸರ್ವೆಸ್ಪರ್ ರಾಗಾರ್ ಜಾಯ್ನಾ ಜಾಂವ್. ನಿಮಾಣೆಂ ಏಕ್ ಪಾವ್ಟಿಂ ಹಾಂವ್ ಉಲಯ್ತಾಂ: “ಥಂಯ್ ಧಾಚ್ ಜಣ್ ಮೆಳ್ತಿತ್ ಜಾಲ್ಯಾರ್?” ತಾಣೆಂ ಜಾಪ್ ದಿಲಿ: ಧಾ ಜಣ್ ಥಂಯ್ ಮೆಳ್ತಿತ್ ಜಾಲ್ಯಾರ್ ಹಾಂವ್ ತಾಚೊ ನಾಸ್ ಕರ್ಚೊ ನಾಂ.”
Show more
11 June
ಜುಲಾಯಿ 27 – ಸಾಧ್ಯಾ ಕಾಳಾಚೊ ಸತ್ರಾವೊ ಆಯ್ತಾರ್ – ಕೀರ್ತನ್
ಕೀರ್ತನ್ 137 ಶ್ಲೋಕ್: ತುಕಾ ಉಲೊ ಮಾರ್ಲಲ್ಯಾ ವೆಳಾ ತುವೆಂ ಮ್ಹಾಕಾ ಕಾನ್ ದಿಲೆಯ್, ಸರ್ವೆಸ್ಪರಾ. 1. ಮ್ಹಜ್ಯಾ ತೊಂಡಾಂತ್ಲೆಂ ಪ್ರಾರ್ಥನ್ ಆಯ್ಕುನ್ ಘೆತ್ಲೆಂಯ್ ಮ್ಹಣ್, ಸರ್ವೆಸ್ಪರಾ, ಸಗ್ಳ್ಯಾ ಮ್ಹಜ್ಯಾ ಕಾಳ್ಜಾನ್ ಹಾಂವ್ ತುಕಾ ಧಿನ್ವಾಸ್ತಾಂ: ತುಜ್ಯಾ ದುತಾಂ ಮುಖಾರ್ ತುಜೆಂ ಕೀರ್ತನ್ ಗಾಯ್ತಾಂ, ತುಜ್ಯಾ ಪವಿತ್ರ್ ಮಂದಿರಾ ಸಮೊರ್ ತುಕಾ ಸಾಷ್ಟಾಂಗ್ ನಮಸ್ಕಾರ್ ಕರ್ತಾಂ. 2. ತುಂ ಬರೊ ಆನಿ ವಿಶ್ವಾಸಿ, ಸಕ್ಟಾಂ ಪ್ರಾಸ್ ವರ್ತೆಂ ತುಜೆಂ ನಾಂವ್ ಆನಿ ತುವೆಂ ದಿಲ್ಲೆಂ ಉತರ್, ದೆಕುನ್ ತುಜ್ಯಾ ನಾಂವಾಚಿ ಹೊಗ್ಳಿಕ್ ಗಾಯಾಂ. ತುಕಾ ಉಲೊ ಮಾರ್ಲಲ್ಯಾ ವೆಳಾ ತುವೆಂ ಮ್ಹಾಕಾ ಕಾನ್ ದಿಲೆಯ್. ಮ್ಹಜೆಂ ಕಾಳಿಜ್ ಘಟ್ ಕರ್ನ್ ಮ್ಹಾಕಾ ಧಯ್ರಾನ್ ಭರ್ಲೊಯ್. 3. ಸರ್ವೆಸ್ಪರ್ ಖರೊಚ್ ಮಹೋನ್ನತ್, ತರ್‍ಯಿ ಖಾಲ್ತ್ಯಾಂಚೆರ್ ತೊ ದೀಷ್ಟ್ ಘಾಲ್ತಾ, ಪುಣ್ ಗರ್ವಿಷ್ಟ್ಯಾಂಚಿ ಒಳಕ್ ತೊ ಪಯ್ಸ್ ಥಾವ್ನ್‍ಚ್ ಧರ್ತಾ, ಕಷ್ಟಾಂ-ದುಖಿಂಚ್ಯಾ ಮಧ್ಲ್ಯಾನ್ ಹಾಂವ್ ವಾಟ್ ಚಮ್ಕಾತಾಂ, ತರ್‍ಯಿ ತುಂ ಮ್ಹಜೊ ಜೀವ್ ರಾಖ್ತಾಯ್ ಆನಿ ಮ್ಹಜ್ಯಾ ದುಸ್ಮಾನಾಂಕ್ ನಿರಾಶಿ ಕರ್ತಾಯ್. 4. ತುಜೊ ಹಾತ್ ವಿಸ್ತಾರುನ್ ಮ್ಹಾಕಾ ತುಂ ರಾಖ್ತಾಯ್, ಮ್ಹಜ್ಯೆ ಖಾತಿರ್ ತುಜೊ ಉಜ್ವೊ ಹಾತ್ ಕಿತೆಂಯ್ ಕರುಂಕ್ ತಯಾರ್! ತುಜೊ ಮೋಗ್, ಸರ್ವೆಸ್ಪರಾ, ಸಾಸ್ಣಾಕ್ ಬಾಳ್ತಾ, ತುಜ್ಯಾ ಹಾತಾಂಚಿಂ ಕೃತ್ಯಾಂ ತುಂ ವಿಸರ್ನಾಕಾ.
Show more
11 June
ಜುಲಾಯಿ 27 – ಸಾಧ್ಯಾ ಕಾಳಾಚೊ ಸತ್ರಾವೊ ಆಯ್ತಾರ್ – ದುಸ್ರೆಂ ವಾಚಪ್
ಕೊಲೊಸ್ಸೆ 2:12-14 ಭಾವಾ-ಭಯ್ಣಿಂನೊ, ಪವಿತ್ರ್‍ಸ್ನಾನಾ ವರ್ವಿಂ ಕ್ರಿಸ್ತಾ ಸಾಂಗಾತಾ ತುಮ್ಕಾಂ ನಿಕೆಪಿಲ್ಯಾಂತ್ ಮಾತ್ರ್ ನ್ಹಯ್, ತಾಚೇ ಸವೆಂ ತುಮ್ಕಾಂ ಜಿವಂತ್‍ಯೀ ಉಠಯ್ಲ್ಯಾಂತ್. ಕಿತ್ಯಾಕ್ ಕ್ರಿಸ್ತಾಕ್ ಮೊರ್ನಾಂತ್ಲೊ ಜಿವಂತ್ ಉಠಯ್‍ಲ್ಲ್ಯಾ ದೆವಾಚೆರ್ ತುಮಿ ದವರ್ಲಲ್ಯಾ ವಿಶ್ವಾಸಾ ವರ್ವಿಂ ತುಮ್ಚೇ ಥಂಯ್ ಹೆಂ ಸಗ್ಳೆಂ ಘಡ್ಲಾಂ. ಏಕ್ ಕಾಳಾರ್ ತುಮ್ಚ್ಯಾ ಆಪ್ರಾಧಾಂಕ್ ಲಾಗುನ್ ತುಮಿ ಮೆಲ್ಲ್ಯಾತ್ ಆನಿ ಸುನತ್ ಕರುಂಕ್ ನಾತ್ಲಲೇ ಕುಡಿನ್ ಜಿಯೆವ್ನ್ ಆಸ್‍ಲ್ಲ್ಯಾತ್; ತರ್‍ಯೀ ದೆವಾನ್ ತುಮ್ಕಾಂ ನವ್ಯಾ ಜಿವಿತಾನ್ ಭರ್ಲಿಂ. ಸರ್ವ್ ಆಮ್ಚೆ ಅಪ್ರಾಧ್ ತಾಣೆಂ ಆಮ್ಕಾಂ ಭೊಗ್ಸಿಲ್ಯಾತ್. ಕಾಯ್ದ್ಯಾ ಸರಿ ಆಮ್ಚೇ ವಿರೋಧ್ ಆಸ್ಲಲ್ಯಾ ಅಪ್ರಾಧಾಂಚೆಂ ಲೆಖ್‍ಪತ್ರ್ ತಾಣೆಂ ಪುಸುನ್ ಕಾಡ್ಲೆಂ ಆನಿ ತೆಂ ಖುರ್ಸಾರ್ ಖಿಳಾವ್ನ್ ನಾಸ್ ಕೆಲೆಂ.
Show more
11 June
ಜುಲಾಯಿ 27 – ಸಾಧ್ಯಾ ಕಾಳಾಚೊ ಸತ್ರಾವೊ ಆಯ್ತಾರ್ – ಸುವಾರ್ತಾ
ಲೂಕ್ 11:1-13 ಏಕ್ ಪಾವ್ಟಿ ಜೆಜು ಏಕ್ ಸುವಾತೆರ್ ಮಾಗ್ಣೆಂ ಕರ್ನ್ ಆಸ್‍ಲ್ಲೊ. ಮಾಗ್ಣೆಂ ಜಾತಚ್ ಶಿಸಾಂ ಮಧ್ಲ್ಯಾ ಎಕ್ಲ್ಯಾನ್ ತಾಚೇಲಾಗಿಂ ಮ್ಹಳೆಂ: “ಸೊಮಿಯಾ, ಜುವಾಂವ್ನ್ ಆಪ್ಲ್ಯಾ ಶಿಸಾಂಕ್ ಶಿಕಯ್‍ಲ್ಲೇ ಬರಿ ತುಂ ಆಮ್ಕಾಂಯೀ ಮಾಗ್ಣೆಂ ಕರುಂಕ್ ಶಿಕಯ್.” ತವಳ್ ತೊ ತಾಂಕಾಂ ಸಾಂಗಿಲಾಗ್ಲೊ: “ತುಮಿ ಮಾಗ್ಣೆಂ ಕರ್ತಾನಾ ಅಶೆಂ ಮ್ಹಣಾ: ಬಾಪಾ, ತುಜೆಂ ನಾಂವ್ ಪವಿತ್ರ್ ಜಾಂವ್, ತುಜೆಂ ರಾಜ್ಯ್ ಯೇಂವ್. ಆಮ್ಚೊ ದಿಸ್ಪಡ್ತೊ ಗ್ತಾಸ್ ಹರ್ಯೇಕ್ ದೀಸ್ ಆಮ್ಕಾಂ ದೀ. ಜಶೆಂ ಅಮ್ಚೇರ್ ಚುಕ್ಲಲ್ಯಾ ಹರ್ಯೆಕ್ಲ್ಯಾಕ್ ಆಮಿ ಬೊಗ್ಶಿತಾಂವ್, ತಶೆಂ ಆಮ್ಚಿಂ ಪಾತ್ಕಾಂ ಬೊಗ್ಶಿ; ಆಮ್ಕಾಂ ತಾಳ್ನೆಂತ್ ವ್ಹರಿನಾಕಾ.” ಉಪ್ರಾಂತ್ ಜೆಜು ತಾಂಕಾಂ ಸಾಂಗಿಲಾಗ್ಲೊ: “ತುಮ್ಚೇ ಮಧೆಂ ಎಕ್ಲ್ಯಾಕ್ ಏಕ್ ಈಷ್ಟ್ ಆಸಾ ಮ್ಹಣ್ ಚಿಂತ್ಯಾಂ, ಆನಿ ತೊ ಮಧ್ಯಾನೆರ್ ಹ್ಯಾ ಇಷ್ಟಾ ಸರ್ಶಿಂ ವೆತಾ ಆನಿ ಮ್ಹಣ್ತಾ: ‘ಇಷ್ಟಾ, ಮ್ಹಾಕಾ ತೀನ್ ಉಂಡೆ ಉಸ್ಣೆ ದೀ. ಪಯ್ಣಾರ್ ಆಸ್ಲಲೊ ಮ್ಹಜೊ ಏಕ್ ಈಷ್ಟ್ ಅವ್ಚಿತ್ ಆಮ್ಗೆರ್ ಯೇವ್ನ್ ಪಾವ್ಲಾ. ತಾಕಾ ವಾಡ್ತೊಂ ಮ್ಹಳ್ಯಾರ್ ಮ್ಹಜೆಲಾಗಿಂ ಕಾಂಯ್ಚ್ ನಾ.’ ಆನಿ ಚಿಂತ್ಯಾಂ, ತೊ ತಾಚೊ ಈಷ್ಟ್ ಭಿತರ್ ಥಾವ್ನ್ ಜಾಪ್ ದೀವ್ನ್ ಮ್ಹಣ್ತಾ: ‘ಮ್ಹಾಕಾ ಧೊಶಿನಾಕಾ, ದಾರಾಕ್ ಖಿಳ್ ಘಾಲ್ನ್ ಜಾಲ್ಯಾ; ಮ್ಹಜಿಂ ಭುರ್ಗಿಂ ಮ್ಹಜೇ ಪಾಸ್ಳೆಂತ್ ನಿದ್ಲ್ಯಾಂತ್; ಆತಾಂ ಉಠುನ್ ತುಕಾ ಕಾಂಯ್ ದಿಂವ್ಕ್ ಮ್ಹಜೇ ವರ್ವಿಂ ಜಾಯ್ನಾ.’ ಹಾಂವ್ ತುಮ್ಕಾಂ ಸಾಂಗ್ತಾಂ: ಇಷ್ಟಾಗತೇ ಪಾಸತ್ ಉಠುನ್ ತೊ ಕಾಂಯ್ ದಿವ್ಚೊನಾ ಜಾಲ್ಯಾರ್‍ಯೀ, ಲಜ್ ನಾಸ್ತಾಂ ತಾಣೆಂ ವಿಚಾರ್ಲಲೇ ಖಾತಿರ್ ಪುಣ್‍ಯೀ ಉಠ್ತಲೊ ಆನಿ ತಾಕಾ ಜಾಯ್ ತಿತ್ಲೆಂ ದಿತಲೊ.” “ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಮಾಗಾ ಆನಿ ತುಮಿ ಘೆತಲ್ಯಾತ್; ಸೊಧಾ ಆನಿ ತುಮ್ಕಾಂ ಮೆಳ್ತಲೆಂ, ಬಡಯಾ ಅನಿ ತುಮ್ಕಾಂ ಉಗ್ತೆಂ ಜಾತಲೆಂ. ಕಿತ್ಯಾಕ್ ಮಾಗ್ತಾ ತೊ ಹರ್ಯೆಕ್ಲೊ ಘೆತಾ, ಸೊಧ್ತಾ ತಾಕಾ ಮೆಳ್ತಾ ಆನಿ ಬಡಯ್ತಲ್ಯಾಕ್ ಉಗ್ತೆಂ ಜಾತಾ. ತುಮ್ಚೇ ಮಧೆಂ ಕೊಣ್ ಬಾಪುಯ್ ಆಪ್ಲೊ ಪೂತ್ ಮಾಸ್ಳಿ ಮಾಗಿತ್ ಜಾಲ್ಯಾರ್ ತಾಕಾ ಮಾಸ್ಳೇ ಬದ್ಲಾಕ್ ಜಿವ್ದಾಳ್ ದೀತ್? ವಾ ತಾಂತಿಂ ಮಾಗಿತ್ ಜಾಲ್ಯಾರ್ ತಾಕಾ ವಿಚು ದೀತ್? ಖೊಟೆ ಜಾವ್ನಾಸುನ್‍ಯೀ ತುಮಿ ಜರ್ ತುಮ್ಚ್ಯಾ ಭುಗ್ರ್ಯಾಂಕ್ ಬರೆ ವಸ್ತು ದೀಂವ್ಕ್ ಜಾಣಾತ್, ತರ್ ಸರ್ಗಿಂಚೊ ಬಾಪ್ ಆಪ್ಣಾಲಾಗಿಂ ಮಾಗ್ತಲ್ಯಾಂಕ್ ಕಿತ್ಲ್ಯಾ ಮಾಪಾನ್ ಪವಿತ್ರ್ ಆತ್ಮೊ ದೀನಾ ಜಾಯ್ತ್?”
Show more
11 June
ಜುಲಾಯಿ 20 – ಸಾಧ್ಯಾ ಕಾಳಾಚೊ ಸೊಳಾವೊ ಆಯ್ತಾರ್ – ಪಯ್ಲೆಂ ವಾಚಪ್
ಉತ್ಪತ್ತಿ 18:1-10 ಮಾಮ್ರೆಚ್ಯಾ ಪವಿತ್ರ್ ರುಕಾ ಲಾಗಿಂ ಸರ್ವೆಸ್ಪರ್ ಅಬ್ರಹಾಮಾಕ್ ದಿಷ್ಟಿ ಪಡ್ಲೊ. ತೆದ್ನಾ ಅಬ್ರಹಾಮ್ ದೊನ್ಪಾರಾಂಚೆ ಧಗಿಕ್ ತಂಬಾಚ್ಯಾ ದಾರಾ ಲಾಗಿಂ ಬಸುನ್ ಆಸ್ಲೊ. ತಾಣೆಂ ವಯ್ರ್ ಪಳೆಲೆಂ ಆನಿ ತೇಗ್ ಮನಿಸ್ ಥಂಯ್ ಲಾಗ್ಸಾರ್ ಉಬೆ ಆಸ್ಲಲೆ ತಾಕಾ ದಿಸ್ಲೆ. ತಾಂಕಾಂ ಪಳೆತಚ್ ತಂಬಾಚ್ಯಾ ದಾರಾ ಕಡ್ಚೊ ಉಟುನ್ ತಾಂಕಾಂ ಮೆಳುಂಕ್ ತೊ ಧಾಂವ್ಲೊ. ಆನಿ ಧರ್ಣಿರ್ ಸರ್ಪಟುನ್ ತೊ ಮ್ಹಣಲಾಗ್ಲೊ: “ಸಾಯ್ಬಾಂನೊ, ಹಾಂವ್ ತುಮ್ಕಾಂ ಮಾನ್ವಲಾಂ ಜಾಲ್ಯಾರ್ ತುಮ್ಚ್ಯಾ ಸೆವಕಾ ಸವೆಂ ರಾವನಾಸ್ತಾಂ ಮುಕಾರ್ ವಚನಾಕಾತ್. ಇಲ್ಲೆಂ ಉದಕ್ ಹಾಡೊವ್ನ್ ದಿತಾಂ; ತುಮ್ಚೆ ಪಾಂಯ್ ಧುವ್ನ್ ರುಕಾ ಪಂದಾಕ್ ವಿಶೆವ್ ಘೆಯಾ. ಹಾಂವ್ ಇಲ್ಲೊ ಉಂಡೊ ಹಾಡ್ತಾಂ. ಫುಡೆಂ ವೆಚೆ ಪಯ್ಲೆಂ ತೊ ಖಾವ್ನ್ ಇಲ್ಲಿ ಘಟಾಯ್ ಘೆಯಾ. ಹ್ಯಾ ಪಾಸತ್ ತುಮ್ಚ್ಯಾ ಸೆವಕಾಚ್ಯಾ ಘರಾ ತುಮಿ ಆಯ್ಲ್ಯಾತ್.” ತಾಂಣಿಂ ಜಾಪ್ ದಿಲಿ: “ತುವೆಂ ಸಾಂಗ್ಲಲೆ ಪರ್ಮಾಣೆಂ ಕರ್”. ಅಬ್ರಹಾಮ್ ತುರ್ತಾನ್ ತಂಬಾಕ್ ಧಾಂವುನ್ ಸಾರಾ ಸರ್ಶಿಂ ಗೆಲೊ ಆನಿ ತಿಕಾ ಸಾಂಗಿಲಾಗ್ಲೊ: “ವೆಗಿಂ ತೀನ್ ಶೆರ್ ಪೀಟ್ ಮಳ್ ಆನಿ ಬಾಕ್ರ್ಯೊ ಕರ್” ಉಪ್ರಾಂತ್ ಗೊರ್ವಾಂ ಆಸ್ಲೆಲೆ ಕಡೆನ್ ತೊ ಧಾಂವ್ಲೊ ಆನಿ ತರ್ನೆಂ ಆನಿ ಪುಡ್ಪುಡಿತ್ ವಾಸ್ರುಂ ತಾಣೆಂ ವಿಂಚ್ಲೆಂ ಆನಿ ತೆಂ ಚಾಕ್ರಾಕ್ ದಿಲೆಂ. ಚಾಕ್ರಾನ್ ತುರ್ತಾನ್ ರಾಂದಪ್ ಕೆಲೆಂ. ಉಪ್ರಾಂತ್ ಅಬ್ರಹಾಮಾನ್ ಧಂಯ್, ದೂದ್ ಆನಿ ರಾಂದ್ಲಲೆಂ ಮಾಸ್ ಘೆವ್ನ್ ತಾಂಚೆ ಮುಕಾರ್ ದವರ್ಲೆಂ. ತೆ ಜೆವ್ತಾನಾ ಅಬ್ರಹಾಮ್ ತಾಂಚೆ ಬಗ್ಲೆಕ್ ರುಕಾ ಮುಳಾಂತ್ ಉಬೊ ರಾವ್ಲೊ. ತಾಂಣಿಂ ತಾಕಾ ವಿಚಾರ್ಲೆಂ: “ತುಜಿ ಬಾಯ್ಲ್ ಸಾರಾ ಖಂಯ್ ಆಸಾ?” ತಾಣೆಂ ಜಾಪ್ ದಿಲಿ: “ತಿ ಥಂಯ್ ತಂಬಾಂತ್ ಆಸಾ.” ತಾಂಚೆ ಪಯ್ಕಿಂ ಎಕ್ಲ್ಯಾನ್ ಮ್ಹಳೆಂ: “ಫುಡ್ಲ್ಯಾ ವರ್ಸಾ ಹ್ಯಾಚ್ ವೆಳಾರ್ ಹಾಂವ್ ಪರ್ತುನ್ ತುಮ್ಗೆರ್ ಯೆತಲೊಂ. ತೆದ್ನಾ ತುಜೆ ಬಾಯ್ಲೆಕ್ ಸಾರಾಕ್ ಏಕ್ ಚೆರ್ಕೊ ಭುರ್ಗೊ ಜಾತಲೊ.”
Show more
11 June
ಜುಲಾಯಿ 20 – ಸಾಧ್ಯಾ ಕಾಳಾಚೊ ಸೊಳಾವೊ ಆಯ್ತಾರ್ – ಕೀರ್ತನ್
ಕೀರ್ತನ್ 14 ಶ್ಲೋಕ್: ಸರ್ವೆಸ್ಪರಾ, ತುಜ್ಯಾ ಪವಿತ್ರ್ ತಂಬಾಂತ್ ವಸ್ತಿ ಕರುಂಕ್ ಕೊಣಾಕ್ ಫಾವೊ ಜಾಯ್ತ್? 1. ಜೊ ಕೊಣ್ ನಿತಳ್ ಜಿಣಿ ಜಿಯೆತಾ, ನ್ಯಾಯ್-ನಿತಿನ್ ಚಲ್ತಾ, ಕಾಳ್ಜಾಂತ್ ಥಾವ್ನ್ ಸತ್ ಉಲಯ್ತಾ, ಆಪ್ಲ್ಯೆ ಜಿಬೆನ್ ಪೆಲ್ಯಾಚಿ ನಿಸ್ಕುಚಾರ್ ಉಲಯ್ನಾ, -ಅಸಲ್ಯಾಕ್ ಫಾವೊ ಜಾತಾ. 2. ಜೊ ಕೊಣ್ ಪೆಲ್ಯಾಕ್ ಕಸಲೊಚ್ ಅನ್ನ್ಯಾಯ್ ಕರಿನಾ, ಸೆಜಾರ್ಯಾಚೆಂ ನಾಂವ್ ಪಾಡ್ ಕರಿನಾ; ಜೊ ಕೋಣ್ ಅಣ್ವ್ಯಾ ಮನ್ಶಾಕ್ ಕಾಂಠಾಳ್ತಾ, ದೇವ್ - ಭಿರಾಂತೆಚ್ಯಾಕ್ ಮಾನಾನ್ ಲೆಖ್ತಾ, -ಅಸಲ್ಯಾಕ್ ಫಾವೊ ಜಾತಾ. 3. ಜಾಕಾ ಕಷ್ಟ್ - ನಷ್ಟ್ ಕಿತೆಂಯ್ ಯೇಂವ್, ತೊ ಉತ್ರಾಕ್ ಚುಕನಾ; ರೀಣ್ ದಿತಾ ಪುಣ್ ವಾಡ್ ಘೆನಾ, ಆನಿ ನಿರಪ್ರಾಧ್ಯಾಂ ವಯ್ರ್ ಲೊಂಚ್ ಖಾಯ್ನಾ; -ಅಸಲ್ಯಾಕ್ ಫಾವೊ ಜಾತಾ.
Show more
11 June
ಜುಲಾಯಿ 20 – ಸಾಧ್ಯಾ ಕಾಳಾಚೊ ಸೊಳಾವೊ ಆಯ್ತಾರ್ – ದುಸ್ರೆಂ ವಾಚಪ್
ಕೊಲೊಸ್ಸೆ.1:24-28 ಭಾವಾ-ಭಯ್ಣಿಂನೊ, ತುಮ್ಚೇ ಪಾಸತ್ ಕಷ್ಟ್ ಸೊಸುಂಕ್ ಮ್ಹಾಕಾ ಆತಾಂಯೀ ಸಂತೊಸ್ ಭೊಗ್ತಾ. ಕ್ರಿಸ್ತಾಚ್ಯಾ ಕಷ್ಟಾಂನಿ ಕಿತೆಂ ಉಣೆಂ ಆಸಾ ತೆಂ ತಾಚೇ ಕುಡಿ, ಮ್ಹಣ್ಜೆ ಪವಿತ್ರ್ ಸಭೇ ಖಾತಿರ್ ಮ್ಹಜೇ ಕುಡಿಂತ್ ಹಾಂವ್ ಭರ್ತಿ ಕರ್ತಾಂ. ದೆವಾಚೆಂ ಉತರ್ ತುಮ್ಚೇ ಪರಿಪೂರ್ಣ್ ಸಮ್ಜಣೆಕ್ ಹಾಡ್ಚೇ ಪಾಸತ್ ಆಪ್ಲೊ ಸೆವಕ್ ತಾಣೆಂ ಮ್ಹಾಕಾ ನೆಮ್ಲೊ ತೆದ್ನಾ ಪವಿತ್ರ್ ಸಭೆಚೊ ಹಾಂವ್ ಮ್ಹಣಿಯಾರಿ ಜಾಲೊಂ. ವೆಳಾಕಾಳಾಚೇ ಸುರ್ವೆರ್ ಥಾವ್ನ್ ಆನಿ ಸರ್ವ್ ವಂಶಾವಳಿಂ ಥಾವ್ನ್ ಲಿಪೊವ್ನ್ ಆಸ್ಲಲೊ ತೊಚ್ ಗುಟ್ ಆತಾಂ ಆಪ್ಣೆಂ ವಿಂಚುನ್ ಕಾಡ್ಲಲ್ಯಾಂಕ್ ಉಗ್ಡಾಪೆ ಕರ್ಚೆಂ ಕಾಮ್ ತಾಣೆಂ ಮ್ಹಾಕಾ ದಿಲಾಂ. ಹೆರ್ ಜಾತಿಂಚ್ಯಾ ಲೊಕಾಂ ಮಧೆಂ ಹ್ಯಾ ಮಹಿಮೇಭರಿತ್ ಗುಟಾಚಿ ಸಂಪತ್ತಿ ಕೆದಿ ವರ್ತಿ ಮ್ಹಣ್ ದೆವಾನ್ ಆಪ್ಲೇಚ್ ಖುಶೇನ್ ತಾಂಕಾಂ ಕಳಿತ್ ಕೆಲ್ಯಾ. ಹೊಚ್ ತೊ ಗುಟ್: ತುಮ್ಚೇ ಥಂಯ್ ಆಸಾ ತೊ ಕ್ರೀಸ್ತ್‍ಚ್ ತುಮ್ಚೇ ಮಹಿಮೆಚೊ ಭರ್ವಸೊ. ಹ್ಯಾಚ್ ಕ್ರಿಸ್ತಾಕ್ ಆಮಿ ಪರ್ಗಟ್ ಕರ್ತಾಂವ್. ಕ್ರಿಸ್ತಾ ಸವೆಂ ಸರ್ವ್ ಮನ್ಶಾಂಕ್ ಸಂಪೂರ್ಣ್‍ಕಾಯೆಚ್ಯಾ ಪಾಂವ್ಡ್ಯಾಕ್ ವ್ಹರಿಶೆಂ ಹರ್ಯೆಕ್ಲ್ಯಾಕ್ ಪುರ್ತಿ ಜಾಣ್ವಾಯ್ ದಿವ್ನ್ ಆನಿ ಚತ್ರಾಯ್ ಸಾಂಗುನ್ ಆಮಿ ಶಿಕಯ್ತಾಂವ್.
Show more
11 June
ಜುಲಾಯಿ 20 – ಸಾಧ್ಯಾ ಕಾಳಾಚೊ ಸೊಳಾವೊ ಆಯ್ತಾರ್ – ಸುವಾರ್ತಾ
ಲೂಕ್ 10:38-42 ಜೆಜು ಆನಿ ತಾಚೆ ಶಿಸ್ ಪಯ್ಣ್ ಕರ್ನ್ ವೆತಾನಾ, ಏಕ್ ಹಳ್ಳೆಕ್ ಯೇವ್ನ್ ಪಾವ್ಲೆ. ಥಂಯ್ ಮಾರ್ಥಾ ನಾಂವಾಚೇ ಏಕ್ ಸ್ತ್ರೀಯೆನ್ ಜೆಜುಕ್ ಆಪ್ಲ್ಯಾ ಘರಾಂತ್ ಘೆತ್ಲೊ. ತಿಕಾ ಮರಿ ನಾಂವಾಚಿ ಏಕ್ ಭಯ್ಣ್ ಆಸ್ಲಿ. ಆನಿ ಹಿ ಸೊಮಿಯಾಚ್ಯಾ ಪಾಂಯಾಂ ಸರ್ಶಿಂ ಬಸುನ್ ತಾಚಿ ಶಿಕೊವ್ಣ್ ಆಯ್ಕತಾಲಿ. ಪುಣ್, ಮಾರ್ಥಾ, ಜಾಯ್ತಿ ಸರ್ಬಾರಯ್ ಕರ್ಚ್ಯಾರ್ ಪಡ್ಲಿ ಆನಿ ಜೆಜು ಸರ್ಶಿಂ ಯೇವ್ನ್ ಮ್ಹಣಾಲಿ: “ಸೊಮಿಯಾ, ಮ್ಹಜೇ ಭಯ್ಣಿನ್ ಮ್ಹಾಕಾ ಎಕ್ಲೇಕ್‍ಚ್ ವಾವ್ರುಂಕ್ ಸೊಡ್ಲಾಂ. ಹಾಚೇ ವಿಶ್ಯಾಂತ್ ತುಂ ಕಾಂಯ್ ಖಬ್ರೆರ್ ನಾಯ್‍ಮೂ? ತಿಕಾ ಚಿಕ್ಕೆ ಮ್ಹಜೇ ಕುಮ್ಕೆಕ್ ಯೆಂವ್ಕ್ ಸಾಂಗ್!” ಪುಣ್ ಸೊಮಿಯಾನ್ ತಿಕಾ ಜಾಪ್ ದೀವ್ನ್ ಮ್ಹಳೆಂ: “ಮಾರ್ಥಾ, ಮಾರ್ಥಾ, ತುಂ ಸಬಾರ್ ಸಂಗ್ತಿಂ ವಿಶ್ಯಾಂತ್ ಖಂತ್ ಹುಸ್ಕೊ ಕರ್ನ್ ಆಸಾಯ್. ಪುಣ್ ಗರ್ಜೆಚೆಂ ಏಕ್ ಮಾತ್ರ್ ಮರಿಯೆನ್ ಬರೊ ವಾಂಟೊ ವಿಂಚುನ್ ಕಾಡ್ಲಾ ಆನಿ ತಿಚೇ ಲಾಗ್ಚೊ ತೊ ಕಾಡ್ನ್ ವ್ಹರ್ಚೆನಾತ್.”
Show more
11 June
ಜುಲಾಯಿ 13 – ಸಾಧ್ಯಾ ಕಾಳಾಚೊ ಪಂದ್ರಾವೊ ಆಯ್ತಾರ್ – ಪಯ್ಲೆಂ ವಾಚಪ್
ದ್ವಿತಿ.30:10-14 ಪೂಣ್ ಹ್ಯಾ ಪಾಸತ್ ತುವೆಂ ಸರ್ವೆಸ್ಪರಾ ತುಜ್ಯಾ ದೆವಾಚೆಂ ಉತರ್ ಆಯ್ಕುಂಕ್ ಜಾಯ್ ಆನಿ ಹ್ಯಾ ಧರ್ಮ್‍ಶಾಸ್ತ್ರಾಚ್ಯಾ ಪುಸ್ತಕಾಂತ್ ಬರೊವ್ನ್ ಘಾಲ್ಯಾತ್ ತೆ ಸರ್ವ್ ತಾಚೆ ಉಪದೆಸ್ ಆನಿ ಕಾಯ್ದೆ ಪಾಳುಂಕ್ ಜಾಯ್ ಆನಿ ಸಗ್ಳ್ಯಾ ತುಜ್ಯಾ ಕಾಳ್ಜಾನ್ ಆನಿ ಸಗ್ಳ್ಯಾ ತುಜ್ಯಾ ಅತ್ಮ್ಯಾನ್ ಸರ್ವೆಸ್ಪರಾ ತುಜ್ಯಾ ದೆವಾಶಿಂ ಪರ್ತುಂಕ್ ಜಾಯ್. ಆಜ್ ಹಾಂವ್ ತುಕಾ ದಿತಾಂ ತೊ ಕಾಯ್ದೊ ತುಜೆ ಸಕ್ತೆ ಭಾಯ್ಲೊ ನ್ಹಯ್ ವಾ ತುಕಾ ಚಡ್ ಪಯ್ಸ್ ನ್ಹಯ್. ತೊ ವಯ್ರ್ ಮಳ್ಬಾರ್ ನಾ, ದೆಕುನ್ ತುವೆಂ ಅಶೆಂ ಮ್ಹಣುಂಕ್ ಜಾಯ್ನಾ: ‘ಆಮಿ ತೊ ಆಯ್ಕುನ್ ಪಾಳ್ಚೆ ಖಾತಿರ್ ಆಮ್ಚೆ ಪಾಸತ್ ಮಳ್ಬಾರ್ ವಚುನ್ ತೊ ಸಕ್ಲಾ ಆಮ್ಚೆಶಿಂ ಕೋಣ್ ಹಾಡುನ್ ದಿತ್ ಆನಿ ಪರ್ಗಟ್ ಕರಿತ್?’ ಆನಿ ತೊ ದರ್ಯಾ ಪಲ್ತಡಿಯ್ ನಾ, ದೆಕುನ್ ತುವೆಂ ಅಶೆಂ ಮ್ಹಣುಂಕ್ ಜಾಯ್ನಾ: ‘ಆಮಿ ತೊ ಆಯ್ಕುನ್ ಪಾಳ್ಚೆ ಖಾತಿರ್ ಆಮ್ಚೆ ಪಾಸತ್ ದರ್ಯೊ ಉತ್ರುನ್ ಆಮ್ಕಾಂ ತೊ ಕೋಣ್ ಹಾಡುನ್ ದಿತ್ ಆನಿ ಪರ್ಗಟ್ ಕರಿತ್?’ ನಾ, ತಾಚೆಂ ಉತರ್ ತುಜೆ ಲಾಗಿಂಚ್ ಆಸಾ; ತೆಂ ತುಜ್ಯಾ ತೊಂಡಾಂತ್ ಆನಿ ತುಜ್ಯಾ ಕಾಳ್ಜಾಂತ್ ಆಸಾ; ಆನಿ ತುಜ್ಯಾನ್ ತೆಂ ಪಾಳುಂಕ್ ಜಾತಾ.
Show more
11 June
ಜುಲಾಯಿ 13 – ಸಾಧ್ಯಾ ಕಾಳಾಚೊ ಪಂದ್ರಾವೊ ಆಯ್ತಾರ್ – ಕೀರ್ತನ್ 18
ಶ್ಲೋಕ್: ಸರ್ವೆಸ್ಪರಾಚ್ಯೊ ಆಜ್ಞಾ ನಿತಿಚ್ಯೊ, ಕಾಳ್ಜಾಚೊ ಸಂತೊಸ್! 1. ಸರ್ವೆಸ್ಪರಾಚಿ ಶಿಕೊವ್ಣ್ ಭೋವ್ ಬರಿ, ಜಿವಾಚಿ ತಿ ಘಟಾಯ್! ಸರ್ವೆಸ್ಪರಾಚಿಂ ನಿಯಮಾಂ ಮತಿಕ್ ಉಜ್ವಾಡ್, ನೆಣ್ತ್ಯಾಂಚಿ ತಿ ಜಾಣ್ವಾಯ್! 2. ಸರ್ವೆಸ್ಪರಾಚ್ಯೊ ಆಜ್ಞಾ ನಿತಿಚ್ಯೊ, ಕಾಳ್ಜಾಚೊ ಸಂತೊಸ್! ಸರ್ವೆಸ್ಪರಾಚ್ಯೊ ಹುಕ್ಮೊ ಸ್ವಷ್ಟ್, ದೊಳ್ಯಾಂಚೊ ಉಜ್ವಾಡ್! 3. ಸರ್ವೆಸ್ಪರಾಚಿ ಭೆಂ-ಭಿರಾಂತ್ ಭೋವ್ ಪವಿತ್ರ್, ತಿ ಸದಾಂಚ್ ಬಾಳ್ತಾ! ಸರ್ವೆಸ್ಪರಾಚೆ ನಿರ್ಣಯ್ ವಿಶ್ವಾಸ್‍ಪಾತ್ರ್, ತೆ ಸಗ್ಳೆ ನಿತಿಚೆ! 4. ಭಾಂಗಾರಾ ಪ್ರಾಸ್, ಅಪುಟ್ ಭಾಂಗಾರಾ ಪ್ರಾಸ್, ಮನಾಕ್ ಧಾದೊಸ್ಕಾಯೆಚೆ; ಮ್ಹೊಂವಾ ಪ್ರಾಸ್, ಪೊಳಿಯೆಂತ್ಲ್ಯಾ ಮ್ಹೊಂವಾ ಪ್ರಾಸ್, ಚಡ್ ಗೊಡ್ಶೆ ತುಜೆ ಕಾಯ್ದೆ.
Show more
11 June
ಜುಲಾಯಿ 13 – ಸಾಧ್ಯಾ ಕಾಳಾಚೊ ಪಂದ್ರಾವೊ ಆಯ್ತಾರ್ – ದುಸ್ರೆಂ ವಾಚಪ್
ಕೊಲೊಸ್ಸೆ 1:15-20 ಭಾವಾ ಭಯ್ಣಿಂನೊ, ತೊಚ್ ಪ್ರತಿರೂಪ್ ಅದೃಶ್ಯ್ ದೆವಾಚೆಂ, ಪ್ರಥಮ್ ಜನಿತ್ ಸರ್ವ್ ರಚ್ನಾಂ ಮಧೆಂ; ತಾಚೇ ಥಂಯ್ ಸರ್ಗಿಂಚಿಂ ಆನಿ ಪೃಥ್ವೆಚಿಂ, ದಿಸ್ತಾತ್ ತಿಂ ಆನಿ ದಿಸನಾತ್‍ಲ್ಲಿಂ ಸರ್ವ್ ರಚ್ನಾಂ - ಸಿಯಾಸಣಾಂ, ಸ್ವಾಮಿತ್ವಾಂ, ಅಧಿಕಾರಿ ಆನಿ ಪ್ರಭುತ್ವಾಂ - ದೆವಾನ್ ರಚ್ಲಿಂ. ಸರ್ವ್ ರಚ್ನಾಂ ಜಾವ್ಚೇ ಪಯ್ಲೆಂ ತೊ ಆಸ್‍ಲ್ಲೊ. ಸರ್ವ್ ವಸ್ತು ತಾಚೇ ಮಾರಿಪತ್ ಅಸ್ತಿತ್ವಾಂತ್ ಆಸಾತ್. ತೊಚ್ ಮಸ್ತಕ್ ಕುಡಿಚೆಂ, ಮ್ಹಣ್ಜೆ ಪವಿತ್ರ್ ಸಭೆಚೆಂ, ಆರಂಭ್ ವಾ ಪಯ್ಲೆಂ ಫೊಳ್ ಜಿವಂತ್ ಜಾಲ್ಲ್ಯಾಂಚೆಂ. ದೆವಾಚಿಚ್ ಖುಶಿ ಅಶಿ ಜಾಲಿ: ತಾಚೇ ಥಂಯ್ ಆಪ್ಣಾಚಿ ಸಗ್ಳಿ ಸಂಪೂರ್ಣತಾ ಬಿಡಾರ್ ಕರುನ್ ಆಸ್ಚಿ ಆನಿ ತಾಚ್ಯಾ ಖುರ್ಸಾಚ್ಯಾ ರಗ್ತಾ ಮಾರಿಫತ್ ಸಮಾಧಾನ್ ಸ್ಥಾಪಿತ್ ಕರ್ನ್, ಭುಮಿಚ್ಯಾ ಆನಿ ಅಂತ್ರಾಳಾಚ್ಯಾ ಸರ್ವ್ ರಚ್ನಾಂಕ್ ಆಪ್ಣಾ ಥಂಯ್ ರಾಜಿ ಕರುನ್ ಘೆವ್ಚಿ ಮ್ಹಣ್.
Show more
11 June
ಜುಲಾಯಿ 6 – ಸಾಧ್ಯಾ ಕಾಳಾಚೊ ಚೊವ್ದಾವೊ ಆಯ್ತಾರ್ – ಪಯ್ಲೆಂ ವಾಚಪ್
ಇಸಾ.66:10-14 ಜೆರುಸಾಲೆಮಾ ಸವೆಂ ಸಂತೊಸ್ಭರಿತ್ ಜಾಯಾ, ತಿಚೊ ಮೋಗ್ ಕರ್ತಲ್ಯಾ ಸಗ್ಳ್ಯಾಂನೊ, ತಿಚೆ ಪಾಸತ್ ಉಲ್ಲಾಸ್ ಕರಾ. ತಿಚೆ ಪಾಸತ್ ರುದನ್ ಕರ್ತಲ್ಯಾ ಸಮೆಸ್ತಾಂನೊ, ಸಂತೊಸ್ಭರಿತ್ ಜಾಯಾ, ತಿಚೆ ಸವೆಂ ಸಂತೊಸ್ಭರಿತ್ ಜಾಯಾ. ಬುಜ್ವಣ್ ದಿತಲಿಂ ತಿಚಿಂ ಸ್ತನಾಂ ಚಿಂವುನ್ ಧಾದೊಶಿ ಜಾಯಾ, ತಿಚ್ಯಾ ಭರ್ಲಲ್ಯಾ ಹದ್ರ್ಯಾಂತ್ಲೆಂ ಅನಂದಾನ್ ಪಿಯೆಯಾ. ಕಿತ್ಯಾಕ್ ಸರ್ವೆಸ್ಪರ್ ಅಶೆಂ ಮ್ಹಣ್ತಾ: ಏಕೆ ನ್ಹಂಯೆ ಪರಿಂ ಹಾಂವ್ ತಿಕಾ ಶಾಂತಿ ಧಾಡ್ತಲೊಂ ಆನಿ ಭರೊನ್ ಒಮ್ತತಾ ತ್ಯಾ ವ್ಹಾಳಾ ಪರಿಂ ರಾಷ್ಟ್ರಾಂಚಿ ಸಂಪತ್ತಿ. ತಿಚ್ಯಾ ಬಾಳಾಂಕ್ ಹಾಂಡಿರ್ ಬಸೊವ್ನ್ ವ್ಹರ್ತಲಿಂ, ಆನಿ ಉಸ್ಕ್ಯಾರ್ ಖೆಳಯ್ತಲಿಂ. ಜಶೆಂ ಏಕ್ ಆವಯ್ ಆಪ್ಲ್ಯಾ ಭುಗ್ರ್ಯಾಕ್ ಬುಜಯ್ತಾ, ತಶೆಂ ಹಾಂವ್ ತುಮ್ಕಾಂ ಬುಜಯ್ತಲೊಂ; ಜೆರುಸಾಲೆಮಾಂತ್ ತುಮ್ಕಾಂ ಬುಜ್ವಣ್ ಮೆಳ್ತಲಿ. ತುಮಿ ಹೆಂ ದೆಕ್ತಲ್ಯಾತ್, ಆನಿ ತುಮ್ಚೆಂ ಕಾಳಿಜ್ ಸಂತೊಸ್ತಲೆಂ, ತುಮ್ಚ್ಯೊ ಕುಡಿ ತಣಾ ಪರಿಂ ಫುಲ್ತಲ್ಯೊ. ಸರ್ವೆಸ್ಪರಾಚೊ ಹಾತ್ ತಾಚ್ಯಾ ಸೆವಕಾಂಕ್ ಉಗ್ಡಾಪೆ ಜಾತಲೊ.
Show more
11 June
ಜುಲಾಯಿ 6 – ಸಾಧ್ಯಾ ಕಾಳಾಚೊ ಚೊವ್ದಾವೊ ಆಯ್ತಾರ್ – ಕೀರ್ತನ್
ಕೀರ್ತನ್ 65 ಶ್ಲೋಕ್: ಭುಮಿಚ್ಯಾ ನಿವಾಸ್ಯಾಂನೋ, ದೆವಾಕ್ ಅನಂದಾಚಿ ಬೊಬ್ ಉಠಯಾ. 1. ಭುಮಿಚ್ಯಾ ನಿವಾಸ್ಯಾಂನೋ, ದೆವಾಕ್ ಅನಂದಾಚಿ ಬೊಬ್ ಉಠಯಾ ತಾಚಿ ಮಹಿಮಾ ಗಿತಾಂ-ಗಾಯನಾಂನಿ ವರ್ನಿಯಾ; ತಾಚಿ ಕೀರ್ತ್ ಗಾಜಯಾ. ದೆವಾಕ್ ಸಾಂಗಾ: “ಕಿತ್ಲಿಂ ವಿಚಿತ್ರ್ ತುಜಿಂ ಕರ್ತುವಾಂ!” 2. ಸಗ್ಳಿ ಪ್ರಥ್ವಿ ತುಜ್ಯೆ ಮುಖಾರ್ ಸರ್ಪಡ್ತಾ, ತುಜಿ ವಾಖಣ್ಣಿ ಕರ್ತಾ, ತುಜ್ಯಾ ನಾಂವಾಚಿ ಕೀರ್ತ್ ಗಾಯ್ತಾ, ಯೆಯಾ ಆನಿ ದೆವಾಚಿಂ ಕರ್ತುವಾಂ ಪಳೆಯಾ, ಮನ್ಶಾಂ ಮಧೆಂ ಆಮ್ಕಾಂ ಥಟಾಕ್ಕ್ ಕರ್ತಾತ್ ತಸಲಿಂ ತಾಚಿಂ ಕಾಮಾಂ! 3. ದರ್ಯೊ ತಾಣೆಂ ಸುಕಿ ಧರ್ಣ್ ದಿಸ್ತಾ ಪರ್ಯಾನ್ ಸುಕಯ್ಲೊ, ಸುಕ್ಲಲ್ಯಾ ಆಳ್ವ್ಯಾಂತ್ಲ್ಯಾನ್ ಲೋಕ್ ಪಾಂಯ್ ಭಿಜನಾಸ್ತಾಂ ಉತರ್ಲೊ. ಹ್ಯಾ ಪಾಸತ್ ಆಮಿ ತಾಚ್ಯೆ ಉದೆಶಿಂ ಸಂತೊಸ್ ಪಾವ್ಯಾಂ, ತೊ ಆಪ್ಲ್ಯೆ ಪದ್ವೆನ್ ಸದಾಂಚ್ ರಾಜ್ವಟ್ ಚಲಯ್ತಾ. 4. ದೆವಾಚ್ಯಾ ಭಕ್ತಾಂನೋ, ತುಮಿ ಸಮೆಸ್ತ್ ಯೆಯಾ, ದೆವಾನ್ ಮ್ಹಜ್ಯೆ ಪಾಸತ್ ಕಿತೆಂ ಕೆಲಾಂ ತೆಂ ವರ್ನಿತಾಂ, ಆಯ್ಕಾ: ಮ್ಹಜ್ಯಾ ಮಾಗ್ಣ್ಯಾಚಿ ದೆವಾನ್ ಬೆಪರ್ವಾ ಕರುಂಕ್ ನಾ, ಮ್ಹಜ್ಯೆ ವಯ್ಲಿ ದಯಾ ತಾಣೆಂ ಪಾಟಿಂ ಕಾಡುಂಕ್ ನಾ: ತಾಕಾ ಜಾಂವ್ ಮಹಿಮಾ!
Show more
11 June
ಜುಲಾಯಿ 6 – ಸಾಧ್ಯಾ ಕಾಳಾಚೊ ಚೊವ್ದಾವೊ ಆಯ್ತಾರ್ – ದುಸ್ರೆಂ ವಾಚಪ್ ಆನಿ ಸುವಾರ್ತಾ
ಗಾಲಾತ್ 6:14-18 ಭಾವಾಂ ಭಯ್ಣಿಂನೊ, ಮ್ಹಾಕಾ ಜಾಲ್ಯಾರ್, ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚ್ಯಾ ಖುರ್ಸಾಚಿ ಬಡಾಯ್ ಶಿವಾಯ್, ಹೆರ್ ಖಂಯ್ಚೆಂಯೀ ವ್ಹಡ್ಪಣ್ ಲೆಖ್ಚೆಂ ಮ್ಹಾಕಾ ನಾಕಾ. ತಾಚೇ ಮಾರಿಫತ್ ಸಂಸಾರ್ ಮ್ಹಾಕಾ ಆನಿ ಹಾಂವ್ ಸಂಸಾರಾಕ್ ಖುರ್ಸಾಯ್‍ಲ್ಲೇಬರಿ. ಕಿತ್ಯಾಕ್ ಜೆಜು ಕ್ರಿಸ್ತಾ ಥಂಯ್ ಸುನತ್‍ಯೀ ಉಪ್ಕಾರನಾ, ಅಸುನತ್‍ಯೀ ಉಪ್ಕಾರನಾ; ಉಪ್ಕಾರ್ತಾ ನವೆಂ ರಚನ್ ಮಾತ್ರ್. ಹೆಂ ನಿಯಮ್ ಪಾಳ್ತಲ್ಯಾ ಸಮೆಸ್ತಾಂಚೆರ್ ಆನಿ ದೆವಾಚ್ಯಾ ಇಸ್ರಾಯೆಲ್‍ಗಾರಾಂಚೆರ್ ಸಮಾಧಾನ್ ಆನಿ ದಯಾ ದೆಂವುಂ. ಹ್ಯಾ ಪುಡಾಂ ಕೊಣೆಂಯೀ ಮ್ಹಾಕಾ ಉಪದ್ರ್ ದಿವ್ಚೆ ನ್ಹಯ್; ಕಿತ್ಯಾಕ್ ಮ್ಹಜೇ ಕುಡಿರ್ ಸೊಮಿಯಾ ಜೆಜುಚೆ ದಾಗ್ ಹಾಂವ್ ವ್ಹಾವಯ್ತಾಂ. ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚಿ ಕುರ್ಪಾ, ಭಾವಾಂಭಯ್ಣಿಂನೋ, ತುಮ್ಚೇ ಸವೆಂ ಆಸುಂ. ಆಮೆನ್. ಸುವಾರ್ತಾ: ಲೂಕ್ 10:1-12,17-20. ಹಾಚೇ ಉಪ್ರಾಂತ್ ಸೊಮಿಯಾನ್ ಆನಿ ಬಾವೆಸತ್ತರ್ ಜಣಾಂಕ್ ನೆಮ್ಲೆ ಆನಿ ಅಪುಣ್ ವೆಚೊ ಆಸ್ಲೊ ತ್ಯಾ ಹರ್ಯೇಕ್ ಶಹರಾಕ್ ಆನಿ ಹಳ್ಳೆಕ್ ತಾಂಕಾಂ ದೊಗಾಂ ದೊಗಾಂ ಲೆಖಾನ್ ಆಪ್ಣಾ ಮುಖಾರ್ ಧಾಡ್ಲೆ. ತಾಂಕಾಂ ತೊ ಸಾಂಗಿಲಾಗ್ಲೊ: “ಪಿಕಾವಳ್ ಯಥೇಷ್ಟ್ ಆಸಾ. ಪುಣ್ ವಾವ್ರಾಡಿ ಥೊಡೆಚ್. ದೆಕುನ್ ಪಿಕಾಚ್ಯಾ ಧನಿಯಾಲಾಗಿಂ, ತಾಣೆಂ ಆಪ್ಲ್ಯಾ ಪಿಕಾಚ್ಯಾ ಶೆತಾಂತ್ ವಾವ್ರಾಡಿ ಧಾಡ್ಚ್ಯಾಕ್ ಮಾಗಾ. ವಚಾ ತುಮಿ, ಪುಣ್ ಚತ್ರಾಯ್ ಕರಾ! ಸುಣ್ಯಾವಾಗ್ಟಾಂ ಮಧೆಂ ಶೆಳಿಯಾಂಕ್ ಧಾಡ್ಲಲೇಬರಿ ಹಾಂವ್ ತುಮ್ಕಾಂ ಧಾಡ್ತಾಂ. ವಾಟೇರ್ ಚಿರಿ ಜಾಂವ್, ಭುತಿ ಜಾಂವ್, ವ್ಹಾಣೋ ಜಾಂವ್ ವ್ಹರಿನಾಕಾತ್; ವಾಟೇರ್ ಕೊಣಾಕ್‍ಯೀ ಸಲಾಮ್ ಕರುಂಕ್ ರಾವಾನಾಕಾತ್. ಖಂಯ್ಚ್ಯಾಯೀ ಘರಾಂತ್ ತುಮಿ ರಿಗ್ತಾನಾ ಪಯ್ಲೆಂ ಅಶೆಂ ಮ್ಹಣಾ: ‘ಸಮಾಧಾನ್ ಹ್ಯಾ ಘರಾಕ್.’ ಸಮಾಧಾನ್ ಆಶೆತಲೊ ಮನಿಸ್ ಥಂಯ್ ಜಿಯೆತಾ ಜಾಲ್ಯಾರ್, ತುಮ್ಚೆಂ ಸಮಾಧಾನ್ ತುಮ್ಕಾಂಚ್ ಪಾಟಿಂ ಯೆತಲೆಂ. ತ್ಯಾಚ್ ಘರಾ ತುಮಿ ರಾವಾ; ತಾಂಣಿಂ ದಿಲ್ಲೆಂ ಖಾಯಾ ಆನಿ ಪಿಯೆಯಾ; ಕಿತ್ಯಾಕ್ ವಾವ್ರಾಡ್ಯಾಕ್ ತಾಚಿ ಮಜುರಿ ಫಾವೊ. ದೆಕುನ್ ಘರಾಂ ಮೆಜಿನಾಕಾತ್. ಖಂಯ್ಚ್ಯಾಯೀ ಶಹರಾಂತ್ ತುಮಿ ರಿಗ್ಶಾತ್ ಆನಿ ಲೋಕ್ ತುಮ್ಕಾಂ ಯೆವ್ಕಾರ್ ದೀತ್ ಜಾಲ್ಯಾರ್, ತಾಂಣಿಂ ಕಿತೆಂ ವಾಡ್ಲಾಂ ತೆಂ ಜೆವಾ, ಥಂಯ್ ಆಸ್ಲಲ್ಯಾ ಪಿಡೆಸ್ತಾಂಕ್ ಗೂಣ್ ಕರಾ ಆನಿ ‘ದೆವಾಚೆಂ ರಾಜ್ಯ್ ತುಮ್ಕಾಂ ಲಾಗಿಂ ಪಾವ್ಲಾಂ’ ಮ್ಹಣುನ್ ತಾಂಕಾಂ ಸಾಂಗಾ. ಪುಣ್ ಖಂಯ್ಚಾಯೀ ಶಹರಾಂತ್ ತುಮಿ ಗೆಲ್ಲ್ಯಾ ವೆಳಾರ್ ಲೋಕ್ ತುಮ್ಕಾಂ ಯೆವ್ಕಾರ್ ದೀನಾ ಜಾಯ್ತ್ ಜಾಲ್ಯಾರ್, ತಾಂಚ್ಯಾ ರಸ್ತ್ಯಾಂನಿ ವಚುನ್ ಅಶೆಂ ಮ್ಹಣಾ: ‘ಆಮ್ಚ್ಯಾ ಪಾಂಯಾಂಕ್ ಲಾಗ್ಲಲಿ ತುಮ್ಚ್ಯಾ ಶಹರಾಚಿ ಧುಳ್ ಸಯ್ತ್ ತುಮ್ಚೇ ವಿರೋಧ್ ಸಾಕ್ಷೇಕ್ ಆಮಿ ಫಾಪುಡ್ತಾಂವ್. ತರಿಪುಣ್ ದೆವಾಚೆಂ ರಾಜ್ಯ್ ತುಮ್ಕಾಂ ಲಾಗಿಂ ಪಾವ್ಲಾಂ ಮ್ಹಣ್ ಮಾತ್ರ್ ಜಾಣ ಜಾಯಾ!’ ಹಾಂವ್ ತುಮ್ಕಾಂ ಸಾಂಗ್ತಾಂ: ಝಡ್ತೆಚ್ಯಾ ದಿಸಾ, ಸೊದೊಮಾಕ್ ಮೆಳ್ಚಿ ಆಸಾ ತಿ ಕಾಕುಳ್ತ್‍ಯೀ ತ್ಯಾ ಶಹರಾಕ್ ಮೆಳ್ಚಿನಾ. ಉಪ್ರಾಂತ್ ಧಾಡ್‍ಲ್ಲೆ ತೆ ಬಾವೆಸತ್ತರ್ ಸಂತೊಸಾನ್ ಪಾಟಿಂ ಆಯ್ಲೆ ಆನಿ ಮ್ಹಣಾಲೆ: “ಸೊಮಿಯಾ, ತುಜೆಂ ನಾಂವ್ ಕಾಡ್ಲ್ಯಾರ್, ದೆಂವ್ಚಾರ್ ಸಯ್ತ್ ಆಮ್ಕಾಂ ಖಾಲ್ ಜಾತಾತ್.” ಜೆಜು ಜಾಪ್ ದೀವ್ನ್ ತಾಂಕಾಂ ಸಾಂಗಿಲಾಗ್ಲೊ: “ಅಂತ್ರಳಾ ಥಾವ್ನ್ ಝಗ್ಲಾವ್ಣೆಂ ಪಡ್‍ಲ್ಲೇಬರಿ ಸೈತಾನ್ ಪಡೊನ್ ಆಪ್ಟಾಲ್ಲೊ ಹಾಂವೆಂ ಪಳೆಲೆಂ. ಪಳೆಯಾ, ಸರಪ್, ಇಚು ಆನಿ ದುಸ್ಮಾನಾಂಚೆಂ ಸಗ್ಳೆಂ ಬಳ್‍ಚ್ ಪಾಯಾಂಥಳಾ ಮಸ್ತುಂಕ್ ಹಾಂವೆಂ ತುಮ್ಕಾಂ ಪದ್ವಿ ದಿಲ್ಯಾ ಆನಿ ಕಿತೆಂಚ್ ತುಮ್ಕಾಂ ಬಾಧಕ್ ಕರ್ಚೆಂನಾ. ತರಿಪುಣ್ ದೆಂವ್ಚಾರ್ ತುಮ್ಕಾಂ ಖಾಲ್ ಜಾತಾತ್ ದೆಕುನ್ ತುಮಿ ಸಂತೊಸ್ ಪಾವನಾಕಾತ್, ಬಗರ್ ತುಮ್ಚಿಂ ನಾಂವಾಂ ಸರ್ಗಿಂ ಬರೊವ್ನ್ ಆಸಾತ್ ದೆಕುನ್ ಸಂತೊಸ್ ಪಾವಾ.
Show more
11 June
ಜುಲಾಯಿ 6 – ಸಾಧ್ಯಾ ಕಾಳಾಚೊ ಚೊವ್ದಾವೊ ಆಯ್ತಾರ್ – ಸುವಾರ್ತಾ
ಲೂಕ್ 10:1-12,17-20. ಹಾಚೇ ಉಪ್ರಾಂತ್ ಸೊಮಿಯಾನ್ ಆನಿ ಬಾವೆಸತ್ತರ್ ಜಣಾಂಕ್ ನೆಮ್ಲೆ ಆನಿ ಅಪುಣ್ ವೆಚೊ ಆಸ್ಲೊ ತ್ಯಾ ಹರ್ಯೇಕ್ ಶಹರಾಕ್ ಆನಿ ಹಳ್ಳೆಕ್ ತಾಂಕಾಂ ದೊಗಾಂ ದೊಗಾಂ ಲೆಖಾನ್ ಆಪ್ಣಾ ಮುಖಾರ್ ಧಾಡ್ಲೆ. ತಾಂಕಾಂ ತೊ ಸಾಂಗಿಲಾಗ್ಲೊ: “ಪಿಕಾವಳ್ ಯಥೇಷ್ಟ್ ಆಸಾ. ಪುಣ್ ವಾವ್ರಾಡಿ ಥೊಡೆಚ್. ದೆಕುನ್ ಪಿಕಾಚ್ಯಾ ಧನಿಯಾಲಾಗಿಂ, ತಾಣೆಂ ಆಪ್ಲ್ಯಾ ಪಿಕಾಚ್ಯಾ ಶೆತಾಂತ್ ವಾವ್ರಾಡಿ ಧಾಡ್ಚ್ಯಾಕ್ ಮಾಗಾ. ವಚಾ ತುಮಿ, ಪುಣ್ ಚತ್ರಾಯ್ ಕರಾ! ಸುಣ್ಯಾವಾಗ್ಟಾಂ ಮಧೆಂ ಶೆಳಿಯಾಂಕ್ ಧಾಡ್ಲಲೇಬರಿ ಹಾಂವ್ ತುಮ್ಕಾಂ ಧಾಡ್ತಾಂ. ವಾಟೇರ್ ಚಿರಿ ಜಾಂವ್, ಭುತಿ ಜಾಂವ್, ವ್ಹಾಣೋ ಜಾಂವ್ ವ್ಹರಿನಾಕಾತ್; ವಾಟೇರ್ ಕೊಣಾಕ್‍ಯೀ ಸಲಾಮ್ ಕರುಂಕ್ ರಾವಾನಾಕಾತ್. ಖಂಯ್ಚ್ಯಾಯೀ ಘರಾಂತ್ ತುಮಿ ರಿಗ್ತಾನಾ ಪಯ್ಲೆಂ ಅಶೆಂ ಮ್ಹಣಾ: ‘ಸಮಾಧಾನ್ ಹ್ಯಾ ಘರಾಕ್.’ ಸಮಾಧಾನ್ ಆಶೆತಲೊ ಮನಿಸ್ ಥಂಯ್ ಜಿಯೆತಾ ಜಾಲ್ಯಾರ್, ತುಮ್ಚೆಂ ಸಮಾಧಾನ್ ತುಮ್ಕಾಂಚ್ ಪಾಟಿಂ ಯೆತಲೆಂ. ತ್ಯಾಚ್ ಘರಾ ತುಮಿ ರಾವಾ; ತಾಂಣಿಂ ದಿಲ್ಲೆಂ ಖಾಯಾ ಆನಿ ಪಿಯೆಯಾ; ಕಿತ್ಯಾಕ್ ವಾವ್ರಾಡ್ಯಾಕ್ ತಾಚಿ ಮಜುರಿ ಫಾವೊ. ದೆಕುನ್ ಘರಾಂ ಮೆಜಿನಾಕಾತ್. ಖಂಯ್ಚ್ಯಾಯೀ ಶಹರಾಂತ್ ತುಮಿ ರಿಗ್ಶಾತ್ ಆನಿ ಲೋಕ್ ತುಮ್ಕಾಂ ಯೆವ್ಕಾರ್ ದೀತ್ ಜಾಲ್ಯಾರ್, ತಾಂಣಿಂ ಕಿತೆಂ ವಾಡ್ಲಾಂ ತೆಂ ಜೆವಾ, ಥಂಯ್ ಆಸ್ಲಲ್ಯಾ ಪಿಡೆಸ್ತಾಂಕ್ ಗೂಣ್ ಕರಾ ಆನಿ ‘ದೆವಾಚೆಂ ರಾಜ್ಯ್ ತುಮ್ಕಾಂ ಲಾಗಿಂ ಪಾವ್ಲಾಂ’ ಮ್ಹಣುನ್ ತಾಂಕಾಂ ಸಾಂಗಾ. ಪುಣ್ ಖಂಯ್ಚಾಯೀ ಶಹರಾಂತ್ ತುಮಿ ಗೆಲ್ಲ್ಯಾ ವೆಳಾರ್ ಲೋಕ್ ತುಮ್ಕಾಂ ಯೆವ್ಕಾರ್ ದೀನಾ ಜಾಯ್ತ್ ಜಾಲ್ಯಾರ್, ತಾಂಚ್ಯಾ ರಸ್ತ್ಯಾಂನಿ ವಚುನ್ ಅಶೆಂ ಮ್ಹಣಾ: ‘ಆಮ್ಚ್ಯಾ ಪಾಂಯಾಂಕ್ ಲಾಗ್ಲಲಿ ತುಮ್ಚ್ಯಾ ಶಹರಾಚಿ ಧುಳ್ ಸಯ್ತ್ ತುಮ್ಚೇ ವಿರೋಧ್ ಸಾಕ್ಷೇಕ್ ಆಮಿ ಫಾಪುಡ್ತಾಂವ್. ತರಿಪುಣ್ ದೆವಾಚೆಂ ರಾಜ್ಯ್ ತುಮ್ಕಾಂ ಲಾಗಿಂ ಪಾವ್ಲಾಂ ಮ್ಹಣ್ ಮಾತ್ರ್ ಜಾಣ ಜಾಯಾ!’ ಹಾಂವ್ ತುಮ್ಕಾಂ ಸಾಂಗ್ತಾಂ: ಝಡ್ತೆಚ್ಯಾ ದಿಸಾ, ಸೊದೊಮಾಕ್ ಮೆಳ್ಚಿ ಆಸಾ ತಿ ಕಾಕುಳ್ತ್‍ಯೀ ತ್ಯಾ ಶಹರಾಕ್ ಮೆಳ್ಚಿನಾ. ಉಪ್ರಾಂತ್ ಧಾಡ್‍ಲ್ಲೆ ತೆ ಬಾವೆಸತ್ತರ್ ಸಂತೊಸಾನ್ ಪಾಟಿಂ ಆಯ್ಲೆ ಆನಿ ಮ್ಹಣಾಲೆ: “ಸೊಮಿಯಾ, ತುಜೆಂ ನಾಂವ್ ಕಾಡ್ಲ್ಯಾರ್, ದೆಂವ್ಚಾರ್ ಸಯ್ತ್ ಆಮ್ಕಾಂ ಖಾಲ್ ಜಾತಾತ್.” ಜೆಜು ಜಾಪ್ ದೀವ್ನ್ ತಾಂಕಾಂ ಸಾಂಗಿಲಾಗ್ಲೊ: “ಅಂತ್ರಳಾ ಥಾವ್ನ್ ಝಗ್ಲಾವ್ಣೆಂ ಪಡ್‍ಲ್ಲೇಬರಿ ಸೈತಾನ್ ಪಡೊನ್ ಆಪ್ಟಾಲ್ಲೊ ಹಾಂವೆಂ ಪಳೆಲೆಂ. ಪಳೆಯಾ, ಸರಪ್, ಇಚು ಆನಿ ದುಸ್ಮಾನಾಂಚೆಂ ಸಗ್ಳೆಂ ಬಳ್‍ಚ್ ಪಾಯಾಂಥಳಾ ಮಸ್ತುಂಕ್ ಹಾಂವೆಂ ತುಮ್ಕಾಂ ಪದ್ವಿ ದಿಲ್ಯಾ ಆನಿ ಕಿತೆಂಚ್ ತುಮ್ಕಾಂ ಬಾಧಕ್ ಕರ್ಚೆಂನಾ. ತರಿಪುಣ್ ದೆಂವ್ಚಾರ್ ತುಮ್ಕಾಂ ಖಾಲ್ ಜಾತಾತ್ ದೆಕುನ್ ತುಮಿ ಸಂತೊಸ್ ಪಾವನಾಕಾತ್, ಬಗರ್ ತುಮ್ಚಿಂ ನಾಂವಾಂ ಸರ್ಗಿಂ ಬರೊವ್ನ್ ಆಸಾತ್ ದೆಕುನ್ ಸಂತೊಸ್ ಪಾವಾ.
Show more
4 June
ಜೂನ್ 29 – ಸಾಧ್ಯಾ ಕಾಳಾಚೊ ತೆರಾವೊ ಆಯ್ತಾರ್ – ಪಯ್ಲೆಂ ವಾಚಪ್
ಧ.ಕೃ. 12:1-11 ತ್ಯಾ ವೆಳಾರ್ ತೆಂ ಹೆರೊದ್ ರಾಯಾನ್ ಪವಿತ್ರ್ ಸಭೆಚ್ಯಾ ಥೊಡ್ಯಾ ಸಾಂದ್ಯಾಂಕ್ ದಗ್ದುಂಕ್ ಸುರು ಕೆಲೆಂ. ಜುವಾಂವ್ಚ್ಯಾ ಭಾವಾಚೆಂ, ಜಾಕೊಬಾಚೆಂ, ತಾಣಿಂ ಶಿಸ್ ಕಾಪಯ್ಲೆಂ ಹಿ ಕರ್ನಿ ಜುದೆವಾಂಕ್ ಮಾನ್ವಲಿ ತೆಂ ಪಳೆವ್ನ್, ಪೆದ್ರುಕ್‍ಯಿ ಧರೊಂವ್ಕ್ ತೊ ಫುಡೆಂ ಸರ್ಲೊ. ಹೆಂ ಬೆಖಮಿರ್ ಉಂಡ್ಯಾಚೆ ಪರ್ಬೆ ದಿಸಾಂನಿ ಘಡ್ಲೆಂ. ಪೆದ್ರುಕ್ ತಾಣೆಂ ಧರ್ನ್ ಬಂದೆಂತ್ ಘಾಲೊ ಆನಿ ತಾಚೊ ಪಾರೊ ಕರುಂಕ್ ಚೊವ್ಗ್ ಚೊವ್ಗ್ ಶಿಪಾಯಾಂಚೆ ಚಾರ್ ಪಂಗಡ್ ತಾಣೆಂ ದವರ್ಲೆ, ಪಾಸ್ಖ್ ಪರ್ಬೆ ಉಪ್ರಾಂತ್ ತಾಕಾ ಲೊಕಾ ಹುಜಿರ್ ಹಾಡ್ಚೊ ಮ್ಹಣ್ ಹೆರೊದಿನ್ ಆಲೋಚನ್ ಕೆಲ್ಲಿ. ಪೆದ್ರು ಅಶೆಂ ಬಂದೆಂತ್ ಬಂದೋಬಸ್ತೆರ್ ಆಸ್ತಾನಾ, ತಾಚೆ ಪಾಸತ್ ಪವಿತ್ರ್ ಸಭೆಚೆಂ ಮಾಗ್ಣೆಂ ಖಳನಾಸ್ತಾನಾ ದೆವಾ ಹುಜಿರ್ ಚಡತ್ ಆಸ್ಲೆಂ. ಹೆರೊದಿಕ್ ಪೆದ್ರುಕ್ ಲೊಕಾ ಹುಜಿರ್ ಹಾಡ್ಚೊ ಆಸ್ಲೊ ತ್ಯಾ ದಿಸಾಚೆ ಆದ್ಲೆ ರಾತಿ, ಪೆದ್ರು ದೋಗ್ ಪಾರ್ಯಾಗಾರಾಂ ಮದೆಂ ನಿದುನ್ ಆಸ್ಲೊ. ದೋನ್ ಸಾಂಕ್ಳಿಂನಿ ತಾಕಾ ಬಾಂಧುನ್ ಘಾಲ್ಲೊ. ಆನಿ ಬಂದೆಚ್ಯಾ ದಾರ್ವಟ್ಯಾ ಸರ್ಶಿ ಪಾರೆ ರಾಖಣ್ ಕರ್ನ್ ಆಸ್ಲೆ. ಆಶೆಂ ಆಸ್ತಾಂ, ಎಕಾಚ್ಚಾಣೆಂ ತಾಚೆ ಬಗ್ಲೆಕ್ ಸರ್ವೆಸ್ಪರಾಚೊ ಏಕ್ ದೂತ್ ಉಬೊ ರಾವ್ಲೊ. ಆನಿ ತೊ ಆಸ್ಲಲೊ ತ್ಯಾ ಕುಡಾಂತ್ ಉಜ್ವಾಡ್ ಫಾಂಕ್ಲೊ. ತ್ಯಾ ದುತಾನ್ ಪೆದ್ರುಚ್ಯಾ ಕುಸಳಾಕ್ ಥಾಪುಡ್ಲೆಂ ಆನಿ ತಾಕಾ ಜಾಗೊವ್ನ್ ಮ್ಹಳೆಂ: “ಊಠ್, ವೆಗಿಂ ಊಠ್!” ತಿತ್ಲ್ಯಾರ್ ತಾಚ್ಯಾ ಹಾತಾಚ್ಯೊ ಸಾಂಕ್ಳಿ ನಿಕ್ಳೊನ್ ಪಡ್ಲ್ಯೊ. ತವಳ್ ತ್ಯಾ ದುತಾನ್ ಮ್ಹಳೆಂ: “ತುಜೊ ಕಮರ್ ಬಾಂಧ್ ಆನಿ ತುಜ್ಯೊ ವ್ಹಾಣೊ ಘಾಲ್.” ಪೆದ್ರುನ್ ತಶೆಂಚ್ ಕೆಲೆಂ. ಉಪ್ರಾಂತ್ ತ್ಯಾ ದುತಾನ್ ಪತ್ರ್ಯಾನ್ ಮ್ಹಳೆಂ: “ತುಜೊ ಶೆಲೊ ಪಾಂಗರ್ ಆನಿ ಮ್ಹಜ್ಯಾ ಪಾಟ್ಲ್ಯಾನ್ ಯೇ.” ಆನಿ ಪೆದ್ರು ತಾಚ್ಯಾ ಪಾಟ್ಲ್ಯಾನ್ ಗೆಲೊ. ತರ್‍ಯಿ ದೇವ್‍ದುತಾನ್ ಆಪ್ಣಾಕ್ ಕೆಲೆಂ ತೆಂ ಏಕ್ ಖರಿ ಗಜಾಲ್ ಮ್ಹಣ್ ತೊ ನೆಣಾಸ್ಲೊ; ಆಪುಣ್ ಏಕ್ ದರ್ಶನ್ ದೆಖ್ತಾಂ ಮ್ಹಣ್ ತಾಣೆಂ ಲೆಖ್ಲೆಂ. ಅಶೆಂ, ತೆ ಪಯ್ಲೊ ಆನಿ ದುಸ್ರೊ ಪಾರೊ ಉತರ್ಲೆ ಆನಿ ಶಹರಾಕ್ ಪಾವಯ್ತಲೇ ವಾಟೇಕ್ ತೆಂಕುನ್ ಆಸ್ಲಲ್ಯಾ ಲೊಂಕ್ಡಾಚ್ಯಾ ದಾರ್ವಟ್ಯಾ ಸರ್ಶಿಂ ಪಾವ್ಲೆ. ತೊ ದಾರ್ವಟೊ ಆಪಾಪಿಂಚ್ ತಾಂಕಾಂ ಉಗ್ತೊ ಜಾಲೊ. ತೆ ಭಾಯ್ರ್ ಗೆಲೆ ಆನಿ ಏಕ್ ಗಲ್ಲೆಂತ್ಲ್ಯಾನ್ ತೆ ಉತರ್ಲೆಲೆಚ್ ತೊ ದೂತ್ ಪೆದ್ರುಕ್ ಸೊಡ್ನ್ ಗೆಲೊ. ತಿತ್ಲ್ಯಾ ಭಿತರ್ ಪೆದ್ರು ಸೈರಣಾರ್ ಆಯ್ಲೊ. ತಾಣೆಂ ಮ್ಹಳೆಂ: “ಆತಾಂ ಹಾಂವ್ ಖಂಡಿತ್ ಜಾಣಾಂ, ದೆವಾನ್ ಆಪ್ಲ್ಯಾ ದುತಾಕ್ ಧಾಡ್ಲೊ ಆನಿ ಮ್ಹಾಕಾ ಹೆರೊದಿಚ್ಯಾ ಹಾತಾಂತ್ಲೊ ಆನಿ ಜುದೆವ್ ಲೊಕಾನ್ ಮ್ಹಾಕಾ ಕರಿಜಯ್ ಮ್ಹಣ್ ಯೆವ್ಜಿಲ್ಲ್ಯಾ ತ್ಯಾ ಸರ್ವಾಂತ್ಲೊ ತಾಣೆಂ ಮ್ಹಾಕಾ ಸೊಡಯ್ಲೊ.”
Show more
4 June
ಜೂನ್ 29 – ಸಾಧ್ಯಾ ಕಾಳಾಚೊ ತೆರಾವೊ ಆಯ್ತಾರ್ – ಕೀರ್ತನ್
ಕೀರ್ತನ್ 34 ಶ್ಲೋಕ್: ಸಗ್ಳ್ಯಾ ಅನ್ವಾರಾಂ-ಆಕಾಂತಾಂತ್ಲೊ ಸರ್ವೆಸ್ಪರಾನ್ ಮ್ಹಾಕಾ ನಿವಾರ್ಲೊ. 1. ಸರ್ವೆಸ್ಪರಾಕ್ ಹಾಂವ್ ಸದಾಂಚ್ ಧಿನ್ವಾಸ್ತಲೊಂ, ತಾಚಿ ಅರ್ಗಾಂಸ್ತುತಿ ಖಳನಾಸ್ತಾಂ ಮ್ಹಜ್ಯಾ ಒಂಠಾಂಚೆರ್ ಆಸ್ತಲಿ. ಸರ್ವೆಸ್ಪರಾ ವರ್ವಿಂ ಮ್ಹಜ್ಯಾ ಅತ್ಮ್ಯಾಕ್ ವ್ಹಡ್ವಿಕ್ ಮೆಳ್ತಾ, ಹೆಂ ಆಯ್ಕುನ್ ದುಬ್ಳ್ಯಾಂಧಾಕ್ಟ್ಯಾಂಕ್ ಸಂತೊಸ್ ಜಾಂವ್. 2. ಮ್ಹಜೆ ಸವೆಂ ಮೆಳುನ್ ಸರ್ವೆಸ್ಪರಾಚಿ ಕೀರ್ತ್ ಗಾಜಯಾ, ಎಕಾ ತಾಳ್ಯಾನ್ ಆಮಿ ಸಕ್ಕಡ್ ತಾಚೆಂ ನಾಂವ್ ವಂದಿಯಾಂ. ಸರ್ವೆಸ್ಪರಾಕ್ ಹಾಂವ್ ಮೆಳುಂಕ್ ಗೆಲೊಂ, ತೊ ಮ್ಹಾಕಾ ಆಯ್ಕಲೊ, ಆನಿ ಆಯ್ಕುನ್ ಸರ್ವ್ ಮ್ಹಜ್ಯಾ ಕಷ್ಟಾಂ ಅನ್ವಾರಾಂತ್ಲೊ ತಾಣೆಂ ಮ್ಹಾಕಾ ನಿವಾರ್ಲೊ. 3. ತಾಚೆರ್ ದೊಳೆ ಲಾವ್ನ್ ರಾವ್ತಾತ್ ತೆ ಸಂತೊಸ್ಭರಿತ್ ಜಾತಾತ್, ತಾಂಚಿಂ ಮುಖಮಳಾಂ ಲಜೆನ್ ಕೆದಿಂಚ್ ಬಾವನಾಂತ್. ಕಷ್ಟತಲ್ಯಾನ್ ವ್ಹಡ್ಲ್ಯಾನ್ ಉಲೊ ಮಾರ್ಲೊ ಆನಿ ಸರ್ವೆಸ್ಪರಾನ್ ತಾಕಾ ಜಾಪ್ ದಿಲಿ, ಆನಿ ಸಗ್ಳ್ಯಾ ಅನ್ವಾರಾಂ ಆಕಾಂತಾಂತ್ಲೊ ತಾಕಾ ನಿವಾರ್ಲೊ. 4. ತಾಚ್ಯಾ ಭಕ್ತಾಂ ಭೊಂವಾರಿಂ ವೆಡೊ ಘಾಲ್ನ್ ಸರ್ವೆಸ್ಪರಾಚೊ ದೂತ್ ತಾಂಕಾಂ ರಾಖ್ತಾ, ಸಾಂಬಾಳ್ತಾ. ಚಾಕುನ್ ಪಳೆಯಾ, ಸರ್ವೆಸ್ಪರ್ ಕಿತ್ಲೊ ಸ್ವಾದಿಕ್ ಗೋಡ್! ತಾಚ್ಯಾ ಗೊಪಾಂತ್ ಆಸ್ರೊ ಸೊಧ್ತಾ ತೊ ಮನಿಸ್ ಖರೊಚ್ ಭಾಗಿ!
Show more
4 June
ಜೂನ್ 29 – ಸಾಧ್ಯಾ ಕಾಳಾಚೊ ತೆರಾವೊ ಆಯ್ತಾರ್ - ದುಸ್ರೆಂ ವಾಚಪ್
2 ತಿಮೊ 4:6-8, 17-18 ಹಾಂವ್ ಆತಾಂ, ಮ್ಹಾಕಾ ಬಲಿ ಕಸೊ ಭೆಟೊಂವ್ಚೆ ಸ್ಥಿತೆರ್ ಪಾವ್ಲಾಂ. ಹಾಂವೆಂ ವೆಚೊ ವೇಳ್ ಲಾಗಿಂ ಪಾವ್ಲಾ. ಮ್ಹಜೆಂ ಝುಜ್ ಹಾಂವ್ ಬರೆಂ ಝುಜ್ಲಾಂ. ಶೆವಟ್ ಪರ್ಯಾನ್ ಮ್ಹಜಿ ಧಾಂವ್ ಹಾಂವ್ ಧಾಂವ್ಲಾಂ, ಮ್ಹಜೊ ಭಾವಾರ್ಥ್ ಹಾಂವೆಂ ಸಾಂಬಾಳ್ಳಾ. ಆತಾಂ ನಿತಿವಂತ್ಪಣಾಚೊ ಮುಕುಟ್ ಮ್ಹಾಕಾ ತಯಾರ್ ದವರ್ಲಲೊ ಆಸಾ. ಹೊ ಮುಕುಟ್ ನಿತಿಚೊ ಮುನ್ಸುಬಿದಾರ್ ಮ್ಹಣ್ತಾತ್ ತೊ ಸೊಮಿ ತ್ಯಾ ನಿಮಾಣ್ಯಾ ದಿಸಾ ಮ್ಹಾಕಾ ದಿತಲೊ. ಮ್ಹಾಕಾ ಮಾತ್ರ್ ನ್ಹಯ್, ತಾಚ್ಯಾ ಯೆಣ್ಯಾಕ್ ಅತ್ರೆಗುನ್ ಆಸ್ಲಲ್ಯಾ ಸಮೆಸ್ತಾಂಕ್‍ಯಿ ತೊ ದಿತಲೊ. ಸೊಮಿ ಮ್ಹಜೆ ಬಗ್ಲೆನ್‍ಚ್ ರಾವ್ಲೊ ಆನಿ ತಾಣೆಂಚ್ ಮ್ಹಾಕಾ ಘಟಾಯ್ ದಿಲಿ. ದೆಕುನ್ ಹೆರ್ ಜಾತಿಂಚ್ಯಾಂನಿ ಕಾನ್ ದಿಶೆಂ ಮ್ಹಜೆ ಮಾರಿಫತ್ ಸುವಾರ್ತಾ ಸಂಪೂರ್ಣ್ ಥರಾನ್ ಪರ್ಗಟ್ ಜಾಲಿ. ಅಶೆಂ ಸಿಂಹಾಚ್ಯಾ ಘಾಸಾಂತ್ಲೊ ಹಾಂವ್ ಬಚಾವ್ ಜಾಲೊಂ. ಸರ್ವ್ ವಾಯ್ಟಾಂತ್ಲೊ ಆನಿಕ್‍ಯಿ ಸೊಮಿ ಮ್ಹಾಕಾ ನಿವಾರ್ತಲೊ. ಆನಿ ಆಪ್ಲ್ಯಾ ಸರ್ಗಿಂಚ್ಯಾ ರಾಜ್ಯಾಂತ್ ಶಾಬಿತ್ ವ್ಹರ್ನ್ ಪಾಯ್ತಲೊ. ತಾಕಾ ಸಾಸ್ಣಾಚ್ಯಾ ಸಾಸ್ಣಾಕ್ ಮಹಿಮಾ ಜಾಂವ್. ಆಮೆನ್.
Show more
4 June
ಜೂನ್ 29 – ಸಾಧ್ಯಾ ಕಾಳಾಚೊ ತೆರಾವೊ ಆಯ್ತಾರ್ – ಸುವಾರ್ತಾ
ಮಾತೆ 16:13-19 ಜೆಜು ಸೆಜಾರೇಯಾ ಫಿಲಿಪ್ಪಿ ನಾಂವಾಚ್ಯಾ ಪ್ರಾಂತಾಂತ್ ಯೇವ್ನ್ ಪಾವ್‍ಲ್ಲ್ಯಾ ವೆಳಾರ್, ಜೆಜುನ್ ಆಪ್ಲ್ಯಾ ಶಿಸಾಂ ಲಾಗಿಂ ವಿಚಾರ್ಲೆಂ: “ಮನ್ಶಾಪುತಾಕ್ ಲೋಕ್ ಕೊಣ್ ಮ್ಹಣ್ ಮ್ಹಣ್ತಾತ್?” ತಾಂಣಿಂ ಜಾಪ್ ದಿಲಿ: “ಥೊಡೆ ತೊ ಸ್ನಾನ್‍ದಾತಾರ್ ಜುವಾಂವ್ ಮ್ಹಣ್ತಾತ್, ಹೆರ್ ಥೊಡೆ ತೊ ಎಲಿಯಾ ಮ್ಹಣ್ತಾತ್, ಆನಿ ಹೆರ್ ತೊ ಯೆರೆಮಿಯಾ ವಾ ಪ್ರವಾದ್ಯಾಂ ಪೈಕಿ ಎಕ್ಲೊ ಮ್ಹಣ್ತಾತ್.” ತವಳ್ ಜೆಜು ತಾಂಕಾಂ ವಿಚಾರಿ: “ಪುಣ್ ತುಮಿ, ಹಾಂವ್ ಕೊಣ್ ಮ್ಹಣ್ ಮ್ಹಣ್ತಾತ್?” ಸಿಮಾಂವ್ ಪೆದ್ರುನ್ ಜಾಪ್ ದೀವ್ನ್ ಮ್ಹಳೆಂ: “ತುಂ ಕ್ರೀಸ್ತ್, ಜಿವ್ಯಾ ದೆವಾಚೊ ಪೂತ್.” ತವಳ್ ಜೆಜು ಪೆದ್ರುಕ್ ಮ್ಹಣಾಲೊ: “ಭಾಗಿ ತುಂ ಸಿಮಾಂವ್, ಯೊನಾಚ್ಯಾ ಪುತಾ! ಕಿತ್ಯಾಕ್ ಹೆಂ ತುಕಾ ಉಗ್ಡಾಪೆಂ ಕೆಲೆಂ ಕೊಣ್‍ಯಿ ಮನ್ಶಾನ್ ನ್ಹಯ್, ಬಗರ್ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾನ್. ಹಾಂವ್ ತುಕಾ ಸಾಂಗ್ತಾಂ: ‘ತುಂ ಪೆದ್ರು ಮ್ಹಣ್ಜೆ ಖಡಪ್; ಆನಿ ಹ್ಯಾ ಖಡ್ಪಾಚೆರ್ ಮ್ಹಜಿ ಧರ್ಮ್‍ಸಭಾ ಹಾಂವ್ ಬಾಂಧ್ತಲೊಂ ಆನಿ ಪಾತಾಳಾಚೆ ದಾರ್ವಟೆ ತಿಚೆರ್ ಜಯ್ತ್ ವ್ಹರುಂಕ್ ಸಕ್ಚೆನಾಂತ್. ಹಾಂವ್ ತುಕಾ ಸರ್ಗಿಂಚ್ಯಾ ರಾಜ್ಯಾಚ್ಯೊ ಚಾವಿಯೊ ದಿತಲೊಂ. ಜೆಂ ಕಿತೆಂ ಸಂಸಾರಿಂ ತುಂ ಆಡ್ವಾರ್ತಲೊಯ್, ತೆಂ ಸರ್ಗಿಂಯಿ ಆಡ್ವಾರ್ಲಲೆಂ ಜಾತಲೆಂ; ಆನಿ ಜೆಂ ಕಿತೆಂ ಸಂಸಾರಿಂ ತುಂ ಸೊಡಯ್ತಲೊಯ್, ತೆಂ ಸರ್ಗಿಂಯಿ ಸೊಡಯ್ಲಲೆಂ ಜಾತಲೆಂ’.”
Show more
6 May
ಜೂನ್ 22 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ – ಪಯ್ಲೆಂ ವಾಚಪ್
ಉತ್ಪತ್ತಿ 14:18-23 ಸಾಲೆಮಾಚೊ ರಾಯ್ ಆನಿ ಪರಮೋನ್ನತ್ ದೆವಾಚೊ ಯಾಜಕ್ ಮೆಲ್ಕಿಸೆದೆಕ್ ಅಬ್ರಾಮಾಕ್ ಉಂಡೊ ಆನಿ ದಾಕಾಂಸೊರೊ ಹಾಡುನ್ ಆಯ್ಲೊ. ಆನಿ ತಾಕಾ ಆಶಿರ್ವಾದ್ ದಿವ್ನ್ ಮ್ಹಣಾಲೊ: “ಪರಮೋನ್ನತ್ ದೇವ್, ಸರ್ಗಾ ಸಂಸಾರಾಚೊ ರಚ್ನಾರ್ ಅಬ್ರಾಮಾಚೆರ್ ಆಪ್ಲೊ ಆಶಿರ್ವಾದ್ ಘಾಲುಂ; ಸದೆಂವ್ ಜಾಂವ್ ಪರಮೋನ್ನತ್ ದೇವ್, ತಾಣೆಂ ತುಜ್ಯಾ ದುಸ್ಮಾನಾಂಕ್ ತುಜೆ ಅಧೀನ್ ದಿಲ್ಯಾತ್.” ಆನಿ ಅಬ್ರಾಮಾನ್ ಆಪ್ಣ್ಣೆಂ ಸ್ವಾಧೀನ್ ಕೆಲ್ಲ್ಯಾ ಸರ್ವ್ ವಸ್ತುಂಚೊ ಧಾಂತ್ಲೊ ಏಕ್ ವಾಂಟೊ ಮೆಲ್ಕಿಸೆದೆಕಾಕ್ ದಿಲೊ.
Show more
6 May
ಜೂನ್ 22 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ – ಕೀರ್ತನ್
ಕೀರ್ತನ್ 109 ಶ್ಲೋಕ್: ತುಂ ಮೆಲ್ಖಿಸೆದೆಕಾಚ್ಯಾ ವರ್ಗಾ ಪರ್ಮಾಣೆಂ ಸಾಸ್ಣಾಕ್ ಯಾಜಕ್ 1. ಮ್ಹಜ್ಯಾ ಸೊಮಿಯಾಕ್ ಸರ್ವೆಸ್ಪರಾನ್ ಸಾಂಗ್ಲೆಂ: “ಬಸ್ ತುಂ ಮ್ಹಜ್ಯಾ ಉಜ್ವ್ಯಾಕ್ ಪಾಡಾವ್ ಕರ್ನ್ ತುಜ್ಯಾ ವೈರಿಂಕ್ ತುಜ್ಯಾ ಪಾಂಯಾಂಥಳಾ ಹಾಂವೆಂ ಘಾಲಿಸರ್.” 2. ತುಜ್ಯೆ ರಾಜ್ವಟ್ಕೆಚಿ ಪದ್ವಿ ಸಿಯೊನಾ ಥಾವ್ನ್ ಸರ್ವೆಸ್ಪರ್ ತುಕಾ ದಿತಲೊ ಮ್ಹಣುನ್: ತುಜ್ಯಾ ದುಸ್ಮಾನಾಂ ವಯ್ರ್ ರಾಜ್ವಟ್ ಚಲಯ್. 3. ಪವಿತ್ರ್ ಥಳಾರ್ ತುಕಾ ಪದ್ವಿ ಲಾಬ್ಲಲ್ಯಾ ದಿಸಾ ತುಜಿ ಪರ್ಜಾ ಸಂತೊಸಾನ್ ತುಜ್ಯೆ ಸೆವೆಕ್ ಲಾಗ್ತಲಿ; ಫಾಂತ್ಯಾಚ್ಯಾ ದೊವಾ ಬರಿ ಹಾಂವ್ ತುಕಾ ಜಲ್ಮ್ ದಿತಲೊಂ. 4. ಸರ್ವೆಸ್ಪರಾನ್ ಸಪುತ್ ದಿಲಾ, ದಿಲ್ಲೆಂ ಉತರ್ ತೊ ಬದಲ್ಚೊ ನಾ; “ತುಂ ಮೆಲ್ಖಿಸೆದೆಕಾಚ್ಯಾ ವರ್ಗಾ ಪರ್ಮಾಣೆಂ ಸಾಸ್ಣಾಕ್ ಯಾಜಕ್”.
Show more
6 May
ಜೂನ್ 22 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ - ದುಸ್ರೆಂ ವಾಚಪ್
1 ಕೊರಿಂಥ್ 11:23-26 ಜೆಂ ಕಿತೆಂ ಸೊಮಿಯಾಲಾಗ್ಚೆಂ ಹಾಂವೆಂ ಘೆತ್ಲಾಂ ತೆಂಚ್ ತುಮ್ಕಾಂ ಹಾಂವೆಂ ಸಾಂಗುನ್ ದಿಲಾಂ, ಮ್ಹಣ್ಜೆ ಸೊಮಿಯಾ ಜೆಜುನ್, ತೊ ಪರಾಧೀನ್ ಜಾಲೊ ತೇ ರಾತಿಂ, ಉಂಡೊ ಘೆತ್ಲೊ, ದೆವಾಕ್ ಅರ್ಗಾಂ ದೀವ್ನ್ ತೊ ಮೊಡ್ಲೊ ಆನಿ ಮ್ಹಳೆಂ: “ಹಿ ಮ್ಹಜಿ ಕೂಡ್ ತುಮ್ಚೇ ಪಾಸತ್ ದಿಂವ್ಚಿ. ಹೆಂ ಮ್ಹಜ್ಯಾ ಉಗ್ಡಾಸಾಕ್ ಕರಾ.” ತೇಚ್ ಪರಿಂ ಜೆವಣ್ ಜಾತಚ್ ತಾಣೆಂ ಕಾಲ್ಸ್ ಘೆತ್ಲಿ ಆನಿ ಮ್ಹಳೆಂ: “ಹಿ ಕಾಲ್ಸ್ ಮ್ಹಜ್ಯಾ ರಗ್ತಾನ್ ಥಿರ್ ಕೆಲ್ಲೊ ನವೊ ಸೊಲ್ಲೊ. ಜಿತ್ಲೇ ಪಾವ್ಟಿ ತಿ ತುಮಿ ಪಿಯೆತಾತ್ ತಿತ್ಲೇ ಪಾವ್ಟಿ ತೆಂ ಮ್ಹಜ್ಯಾ ಉಗ್ಡಾಸಾಕ್ ಕರಾ.” ಕಿತ್ಯಾಕ್ ಜಿತ್ಲೆ ಪಾವ್ಟಿ ತುಮಿ ಹೊ ಉಂಡೊ ಖಾತಾತ್ ಆನಿ ಹಿ ಕಾಲ್ಸ್ ಪಿಯೆತಾತ್, ತಿತ್ಲೇ ಪಾವ್ಟಿ ಸೊಮಿಯಾಚೆಂ ಮರಣ್ ತೊ ಯೇಸರ್ ತುಮಿ ಪರ್ಗಟ್ ಕರ್ತಲ್ಯಾತ್.
Show more
6 May
ಜೂನ್ 22 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ – ಸುವಾರ್ತಾ
ಲೂಕ್ 9:11-17 ಜೆಜು ದೆವಾಚ್ಯಾ ರಾಜ್ಯಾ ವಿಶಾಂತ್ ತೊ ತಾಂಚೇಲಾಗಿಂ ಉಲಯ್ಲೊ ಆನಿ ಗೂಣ್ ಜಾಂವ್ಚಿ ಗರ್ಜ್ ಆಸ್ಲಲ್ಯಾ ಪಿಡೆಸ್ತಾಂಕ್ ತಾಣೆಂ ಗೂಣ್ ಕೆಲಿಂ. ತಿತ್ಲ್ಯಾರ್ ಸಾಂಜ್ ಜಾಯ್ತ್ ಆಯ್ಲಿ. ಬಾರಾ ಜಣ್ ಧರ್ಮ್‍ದೂತ್ ತಾಚೇ ಸರ್ಶಿಂ ಯೇವ್ನ್ ಮ್ಹಣಾಲೆ: “ಆಮಿ ಹಾಂಗಾ ಎಕ್ಸುರೇ ಸುವಾತೆರ್ ಆಸಾಂವ್, ದೆಕುನ್ ಲೊಕಾಜಮ್ಯಾಕ್ ತುಂ ಧಾಡ್ನ್ ಸೊಡ್. ಭೊಂವ್ತಣಿಂಚ್ಯಾ ಹಳ್ಳ್ಯಾಂನಿ ಆನಿ ಭಾಟಾಂನಿ ವಚುನ್ ಜೆವಣ್ ಆನಿ ಬಿಡಾರ್‍ಬಿ ಮೆಳ್ತಾ ಜಾಲ್ಯಾರ್ ತಿಂ ಸೊಧುಂ.” ಜೆಜುನ್ ತಾಂಕಾಂ ಸಾಂಗ್ಲೆಂ: “ತುಮಿಚ್ ತಾಂಕಾಂ ಕಾಂಯ್ ಪುಣ್‍ಯೀ ಖಾಂವ್ಕ್ ದಿಯಾ.” ಶಿಸಾಂನಿ ತಾಕಾ ಜಾಪ್ ದಿಲಿ: “ಪಾಂಚ್ ಉಂಡೆ ಆನಿ ದೋನ್ ಮಾಸ್ಳ್ಯೊ ಸಿವಾಯ್ ಹೆರ್ ಕಾಂಯ್ ಆಮ್ಚೇಲಾಗಿಂ ನಾ. ನಾ ಜಾಲ್ಯಾರ್ ಆಮಿ ವಚುನ್ ಹ್ಯಾ ಜಮ್ಯಾಕ್ ಮ್ಹಣ್ ಖಾಣ್ ಮೊಲಾಕ್ ಘೆಜಯ್ ಜಾಲೆಂ!” (ದಾದ್ಲೆಚ್ ಚಡುಣೆಂ ಪಾಂಚ್ ಹಜಾರ್ ಜಾತಿತ್ ಮ್ಹಣ್ಯೆತ್.) ತವಳ್ ಜೆಜುನ್ ಆಪ್ಲ್ಯಾ ಶಿಸಾಂಕ್ ಸಾಂಗ್ಲೆಂ: “ಲೊಕಾಕ್ ಸುಮಾರ್ ಪನ್ನಾಸ್ ಪನ್ನಾಸಾಂಚ್ಯೊ ಪಂಗ್ತಿ ಘಾಲ್ನ್ ಬಸಯಾ.” ತಾಂಣಿಂ ತಶೆಂಚ್ ಕೆಲೆಂ ಆನಿ ಸಕ್ಟಾಂಕ್ ಬಸಯ್ಲಿಂ. ಉಪ್ರಾಂತ್ ಪಾಂಚ್ ಉಂಡೆ ಆನಿ ದೋನ್ ಮಾಸ್ಳ್ಯೊ ತಾಣೆಂ ಹಾತಿಂ ಘೆತ್ಲ್ಯೊ. ಸರ್ಗಾಕ್ ದೀಷ್ಟ್ ಲಾವ್ನ್ ಅರ್ಗಾಂ ದಿಲಿಂ ಆನಿ ಉಂಡೆ ಮೊಡ್ನ್ ಲೊಕಾಕ್ ವಾಂಟುಂಕ್ ಶಿಸಾಂಲಾಗಿಂ ದಿಲೆ. ಲೋಕ್ ಸಕ್ಕಡ್ ಖಾವ್ನ್ ಧಾದೊಶಿ ಜಾಲೊ. ಚಡಿತ್ ಉರ್ಲಲೆ ಕುಡ್ಕೆ ಎಕ್ಟಾಂಯ್ ಕರ್ತಾನಾ ಬಾರಾ ದಾಲಿಂ ಜಾತಿತ್. ತೆ ತಾಂಣಿಂ ಭರ್ನ್ ಕಾಡ್ಲೆ.
Show more
6 May
ಜೂನ್ 15 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ – ಪಯ್ಲೆಂ ವಾಚಪ್
ಮ್ಹಣ್ಣ್ಯೊ 8:22-31 ದೆವಾಚಿ ಜಾಣ್ವಾಯ್ ಅಶೆಂ ಮ್ಹಣ್ತಾ: “ಆಪ್ಲ್ಯಾ ಕಾಮಾಚ್ಯಾ ಆರಂಭಾಕ್ ಸರ್ವೆಸ್ಪರಾನ್ ಮ್ಹಾಕಾ ರಚ್ಲಿ, ತಾಚ್ಯಾ ಪುರಾತನ್ ಕೃತ್ಯಾಂ ಮಧೆಂ ಹಾಂವ್‍ಚ್ ಪಯ್ಲಿ. ಪುರ್ವಿಲ್ಯಾ ಕಾಳಾ ಥಾವ್ನ್, ಆರಂಬಾ ಥಾವ್ನ್, ಪೃಥ್ವೆಚಿ ಉತ್ಪತ್ತಿ ಜಾಂವ್ಚೆ ಆದಿಂ ತಾಣೆಂ ಮ್ಹಾಕಾ ಥಿರ್ ಕೆಲಿ. ಮ್ಹಜೊ ಜಲ್ಮ್ ಜಾಲೊ ತೆದ್ನಾ ಸಾಗೊರ್ ನಾತ್ಲೆ, ಉದ್ಕಾಚ್ಯೊ ಝರಿ ಉಮಾಳುಂಕ್ ನಾತ್ಲ್ಯೊ. ಪರ್ವತಾಂಕ್ ತಾಂಚ್ಯಾ ಸ್ಥಾನಾರ್ ಥಿರ್ ಕರ್ಚೆ ಆದಿಂ, ದೊಂಗರ್ ಉಬೆ ರಾಂವ್ಚೆ ಆದಿಂ ಹಾಂವ್ ಜಲ್ಮಲಿಂ. ತಾಣೆಂ ಆಜುನ್ ಪೃಥ್ವಿ ಆನಿ ಶೆತಾಂ ವಾ ಭುಂಯ್ಚಿ ಪಯ್ಲಿ ಮೂಟ್‍ಭರ್ ಮಾತಿ ಲೆಗುನ್ ಕರುಂಕ್ ನಾತ್ಲಿಂ. ಜೆದ್ನಾ ತಾಣೆಂ ಆಕಾಸಾಚೆಂ ನಿರ್ಮಾಣ್ ಕೆಲೆಂ ತೆದ್ನಾ ಹಾಂವ್ ಥಂಯ್ ಆಸ್ಲಿಂ. ಜೆದ್ನಾ ತಾಣೆಂ ಸಾಗೊರಾ ಭೊಂವ್ತಣಿಂ ವರ್ತುಳ್ ಘಾಲೆಂ, ಜೆದ್ನಾ ತಾಣೆಂ ವಯ್ಲ್ಯಾ ಕುಪಾಂಚೆಂ ಸ್ಥಾನ್ ನಿರ್ಧಾರಿತ್ ಕೆಲೆಂ ಆನಿ ಸಾಗೊರಾಚ್ಯೊ ಝರಿ ಫುಟಶ್ಯೊ ಕೆಲ್ಯೊ, ಜೆದ್ನಾ ತಾಣೆಂ ದರ್ಯಾಚ್ಯೊ ಮೆರೊ ನಿಶ್ಚಿತ್ ಕೆಲ್ಯೊ ಆನಿ ಉದಕ್ ಮೆರಾಂ ಭಾಯ್ರ್ ವಚನಾಶೆಂ ಆಜ್ಞಾ ದಿಲಿ, ಜೆದ್ನಾ ತಾಣೆಂ ಪೃಥ್ವೆಚಿ ಬುನ್ಯಾದ್ ಘಾಲಿ, ತೆದ್ನಾ ಹಾಂವ್ ಎಕಾ ನಿಪುಣ್ ಶಿಲ್ಪ್ಯಾ ಪರಿಂ ತಾಚೆ ಸವೆಂ ಆಸ್ಲಿಂ. ದಿಸಾನ್ ದೀಸ್ ಹಾಂವ್ ತಾಕಾ ಸಂತೊಸ್ಭರಿತ್ ಕರ್ತಾಲಿಂ, ಸಗ್ಳೊ ವೇಳ್ ಹಾಂವ್ ತಾಚೆ ಮುಕಾರ್ ಖೆಳ್ತಾಲಿಂ. ತಾಚ್ಯಾ ಸಂಸಾರಾಂತ್ ಹಾಂವ್ ಖೆಳ್ತಾಲಿಂ ಆನಿ ಮನ್ಶಾಂ ಮಧೆಂ ಹಾಂವ್ ಆನಂದ್ ಭೊಗ್ತಾಲಿಂ.”
Show more
6 May
ಜೂನ್ 15 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ – ಕೀರ್ತನ್
ಕೀರ್ತನ್ 8 ಶ್ಲೋಕ್: ಸರ್ವೆಸ್ಪರಾ, ಆಮ್ಚ್ಯಾ ದೆವಾ, ಕಿತ್ಲೆಂ ವರ್ತೆಂ ನಾಂವ್ ತೆಂ ತುಜೆಂ ಆಖ್ಯೆ ಪ್ರಿಥುಮೆಚೆರ್! 1. ತುಜ್ಯಾ ಹಾತಾಂಚೊ ವಾವ್ರ್ ಮ್ಹಣ್ ಆಸ್ಲಲ್ಯಾ ಅಂತ್ರಾಳಾಕ್ ಹಾಂವ್ ದೀಷ್ಟ್ ಲಾಯ್ತಾನಾ, ಆನಿ ಎಕಾ ಮಾಂಡಾವಳೆನ್ ಥಂಯ್ ಖಂಚಯ್ಲಲಿಂ ಚಂದ್ರ್ - ನೆಕೆತ್ರಾಂ ದೆಖ್ತಾನಾ, ಮನಿಸ್ ಕೊಣ್, ತುವೆಂ ತಾಚೊ ಉಗ್ಡಾಸ್ ಕರ್ಚ್ಯಾಕ್, ವಿನಾಶಿ ಮನಿಸ್ ಕಿತೆಂ, ತುವೆಂ ತಾಚಿ ಪರ್ವಾ ಕರ್ಚ್ಯಾಕ್? 2. ತರ್‍ಯಿ ದೇವ್‍ದುತಾಂ ಉಪ್ರಾಂತ್ ದುಸ್ರೆಂ ಸ್ಥಾನ್ ತುವೆಂ ತಾಕಾ ದಿಲಾಂಯ್, ವ್ಹಡ್ ಮಹಿಮೆನ್ ಆನಿ ವೈಭವಾನ್ ತುವೆಂ ತಾಕಾ ನೆಟಯ್ಲ್ಯಯ್. ತುಜ್ಯಾ ಹಾತಾಂಚ್ಯಾ ರಚ್ನಾಂಚೆರ್ ತಾಕಾ ಅಧಿಕಾರಿ ನೆಮ್ಲಾಯ್, ಆನಿ ರಚ್ಲಲೊ ಸಂಸಾರ್ ತಾಚ್ಯಾ ಪಾಂಯಾಂಥಳಾ ದವರ್ಲಾಯ್. 3. ಗೊರುಂ-ವಾಸ್ರಾಂ ಆನಿ ರಾನ್ವಟ್ ಸಾವ್ಜಾಂ, ಅಂತ್ರಾಳಾಚಿಂ ಸುಕ್ಣಿಂ ಆನಿ ಉದ್ಕಾಂತ್ಲಿ ಮಾಸ್ಳಿ, ಸಾಗೊರಾಚ್ಯೆ ಗುಂಡಾಯೆಂತ್ ಹೆಣೆಂ-ತೆಣೆಂ ಧಾಂವ್ತಾತ್ ತ್ಯೊ ಜೀವಿ ಲೆಗುನ್ ಸಗ್ಳೆಂಚ್ ತಾಚೆ ಆಧೀನ್ ಕೆಲಾಂಯ್.
Show more
6 May
ಜೂನ್ 15 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ - ದುಸ್ರೆಂ ವಾಚಪ್
ರೋಮ್ 5:1-5 ಭಾವಾರ್ಥಾ ವರ್ವಿಂ ಆಮಿ ನಿತಿವಂತ್ಪಣ್ ಜೊಡ್ಲಾಂ ಆಸ್ತಾಂ, ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾ ಉದೆಶಿಂ ಆಮಿ ಆತಾಂ ದೆವಾ ಥಂಯ್ ಶಾಂತಿನ್ ಜಿಯೆತಾಂವ್. ಆಮಿ ಆತಾಂ ಆಸ್ಲಲ್ಯಾ ಕುರ್ಪೆಚ್ಯಾ ಪಾಂವ್ಡ್ಯಾರ್ ಆಮಿ ಪಾವಾಶೆಂ ಆಮ್ಕಾಂ ವಾಟ್ ವ್ಹೆಲ್ಲಿ ಜೆಜು ಕ್ರಿಸ್ತಾನ್‍ಚ್; ಆನಿ ತಾಚೇಚ್ ಉದೆಶಿಂ ದೆವಾಸವೆಂ ಆಮ್ಕಾಂ ವೈಭವ್ ಲಾಭ್ತಲೊ ಮ್ಹಣ್ ಭರ್ವಸೊ ಧರ್ನ್ ಉಲ್ಲಾಸ್ ಪಾವ್ತಾಂವ್. ತಿತ್ಲೆಂಚ್ ನ್ಹಯ್, ಆಮ್ಚ್ಯಾ ಕಷ್ಟಾಂ ಅನ್ವಾರಾಂತ್‍ಯೀ ಆಮಿ ಸಂತೊಸ್ ಪಾವ್ತಾಂವ್. ಕಿತ್ಯಾಕ್ ಕಷ್ಟ್ ಅನ್ವಾರಾಂ ಸೊಸ್ಣಿಕಾಯೆಕ್ ವಾಟ್ ಕರ್ತಾತ್. ಸೊಸ್ಣಿಕಾಯ್ ಆಮ್ಚಿ ಥಿರಸಣ್ ಪಾರ್ಕುಂಕ್ ಪಾವ್ತಾ, ಆನಿ ಥಿರಸಣ್ ಆಮ್ಚ್ಯಾ ಭರ್ವಶಾಚೆಂ ಮೂಳ್ ಜಾಂವ್ಕ್ ಪಾವ್ತಾ ಮ್ಹಣ್ ಆಮಿ ಜಾಣಾಂವ್. ಅಸಲೊ ಭರ್ವಸೊ ಆಮ್ಕಾಂ ನಿರಾಶಿ ಕರಿನಾ; ಕಿತ್ಯಾಕ್ ಆಪ್ಲೆಂ ದೆಣೆಂ ಮ್ಹಣ್ ಆಮ್ಕಾಂ ದಿಲ್ಲ್ಯಾ ಪವಿತ್ರ್ ಆತ್ಮ್ಯಾ ಮುಖಾಂತ್ರ್ ದೆವಾನ್ ಆಪ್ಲೊ ಮೋಗ್ ಆಮ್ಚ್ಯಾ ಕಾಳ್ಜಾಂನಿ ಧಾರಾಳ್ ವೊತ್ಲಾ.
Show more
6 May
ಜೂನ್ 15 – ಭೋವ್ ಪವಿತ್ರ್ ತ್ರಿತ್ವೆಚಿ ಪರಬ್ – ಸುವಾರ್ತಾ
ಜುವಾಂವ್ 16:12-15 ತ್ಯಾ ವೆಳಿಂ, ಜೆಜುನ್ ಆಪ್ಲ್ಯಾ ಶಿಸಾಂಕ್ ಮ್ಹಳೆಂ: “ಅನಿಕ್‍ಯೀ ಜಾಯ್ತ್ಯೊ ಸಂಗ್ತಿ ಹಾಂವೆಂ ತುಮ್ಕಾಂ ಸಾಂಗ್ಚ್ಯೊ ಆಸಾತ್; ಪುಣ್ ಆತಾಂ ತುಮ್ಕಾಂ ತ್ಯೊ ವ್ಹಾವೊಂವ್ಕ್ ತಾಂಕಾನಾ. ಸತಾಚೊ ಪವಿತ್ರ್ ಆತ್ಮೊ ಆಯ್ಲಲ್ಯಾ ವೆಳಾರ್, ತುಮ್ಕಾಂ ತುಮ್ಕಾಂ ತೊ ಸಂಪೂರ್ಣ್ ಸತಾಕ್ ವ್ಹರ್ನ್ ಪಾಯ್ತಲೊ. ತೊ ಅಪ್ಲೆಸ್ತಕಿಂ ಉಲೊವ್ಚೊನಾ; ಆಪ್ಣೆಂ ಆಯ್ಕಲೆಂಚ್ ತೊ ಉಲಯ್ತಲೊ. ಹ್ಯಾ ಶಿವಾಯ್ ಫುಡೆಂ ಘಡ್ಚ್ಯೊ ಆಸಾತ್ ತ್ಯೊ ಸಂಗ್ತಿ ತುಮ್ಕಾಂ ತೊ ಕಳಯ್ತಲೊ. ಆನಿ ತುಮ್ಕಾಂ ಕಳಯ್ತಲೊ ತ್ಯೊ ಸಂಗ್ತಿ ತೊ ಮ್ಹಜೇ ಥಾವ್ನ್ ಘೆತಲೊ ಆನಿ ಅಶೆಂ ಮ್ಹಾಕಾ ಮಹಿಮಾ ದಿತಲೊ. ಜೆಂ ಬಾಪಾಚೆಂ ತೆಂ ಸಗ್ಳೆಂ ಮ್ಹಜೆಂಚ್. ದೆಕುನ್ ಹಾಂವೆಂ ಮ್ಹಳೆಂ: ತುಮ್ಕಾಂ ಕಳಯ್ತಲೊ ತ್ಯೊ ಸಂಗ್ತಿ ತೊ ಮ್ಹಜೇ ಥಾವ್ನ್ ಘೆತಲೊ.
Show more
6 May
ಜೂನ್ 8 – ಪವಿತ್ರ್ ಅತ್ಮ್ಯಾಚ್ಯಾ ಯೆಣ್ಯಾಚಿ ಪರಬ್ – ಪಯ್ಲೆಂ ವಾಚಪ್
ಧ. ಕೃತ್ಯಾಂ 2:1-11 ಪೆಂತೆಕೊಸ್ತಾಚೇ ಪರ್ಬೆಚೊ ದೀಸ್ ಆಯ್ಲೊ ಆಸ್ತಾಂ, ತೆ ಸಮೇಸ್ತ್ ಏಕ್ ಸುವಾತೆರ್ ಸಾಂಗಾತಾ ಮೆಳೊನ್ ಆಸ್ಲೆ. ತೆದ್ವಾಂ ಎಕಾಚ್ಛಾಣೆಂ ಕಠಿಣ್ ಝಾಡ್‍ವಾರೆಂ ಆಯ್‍ಲ್ಲೇಬರಿ ಮಳ್ಬಾರ್ ಥಾವ್ನ್ ಏಕ್ ಆವಾಜ್ ಆಯ್ಲೊ ಆನಿ ತೆ ಬಸೊನ್ ಆಸ್ಲಲೆ ತ್ಯಾ ಘರಾಂತ್ ಭರ್ಲೊ. ತವಳ್ ತಾಂಕಾಂ ದಿಸ್ಲ್ಯೊ ಉಜ್ಯಾಸಾಕ್ರ್ಯೊ ಜಿಬೋ. ತ್ಯೊ ವಿಂಗಡ್ ವಿಂಗಡ್ ಜಾವ್ನ್ ತಾಂಚೇ ಮಧ್ಲ್ಯಾ ಹರ್ಯೆಕ್ಲ್ಯಾಚೆರ್ ವಚುನ್ ರಾವ್ಲ್ಯೊ. ತೆ ಸಮೆಸ್ತ್ ಪವಿತ್ರ್ ಆತ್ಮ್ಯಾನ್ ಭರ್ಲೆ ಆನಿ ತ್ಯಾ ಆತ್ಮ್ಯಾನ್ ತಾಂಕಾ ದಿಲ್ಲೇ ವಾಚಾ ಸಕ್ತೇ ಪರ್ಮಾಣೆಂ ಪರ್ಕಿ ಭಾಸಾಂನಿ ತೆ ಉಲೊಂವ್ಕ್ ಲಾಗ್ಲೆ. ಸಂಸಾರಾಂತ್ಲ್ಯಾ ಹರ್ಯೇಕ್ ಗಾಂವ್ಚೆ ಭಕ್ತಿವಂತ್ ಜುದೆವ್ ತ್ಯಾ ವೆಳಾರ್ ಜೆರುಜಲೆಮಾಕ್ ಆಯ್ಲಲೆ ಥಂಯ್ ಆಸ್ಲೆ. ಹೊ ಆವಾಜ್ ಆಯ್ಕುನ್ ಲೊಕಾಚೊ ವ್ಹಡ್ ಏಕ್ ಹಮೊ ಎಕ್ಟಾಂಯ್ ಜಾಲೊ ಆನಿ ತಾಂಣಿಂ ಉಲಯ್ಲಲೆಂ ಹರ್ಯೆಕ್ಲ್ಯಾಕ್ ಆಪಾಪ್ಲೇ ಭಾಶೆನ್ ಆಯ್ಕತಾಲೆಂ ದೆಕುನ್ ಲೋಕ್ ಸಕ್ಕಡ್ ಥಟಕ್ ಜಾಲೊ. ಸಮೇಸ್ತ್ ಗಾಲಿಲೆಯಾಗಾರ್ ನ್ಹಯ್‍ವೇ? ತರ್ ಆಮ್ಚೇ ಮಧ್ಲ್ಯಾ ಹರ್ಯೆಕ್ಲ್ಯಾಕ್ ತೆ ಉಲಯ್ತಾತ್ ತೆಂ ಅಮ್ಚೇ ಆಮ್ಚೇ ಮಾಯ್‍ಭಾಶೆನ್ ಆಯ್ಕತಾ ತೆಂ ಕಶೆಂ? ಆಮಿ ಹಾಂಗಾ ಆಸಾಂವ್ ಪಾರ್ಥಿಯಾಂತ್ಲೆ, ಮೇದಿಯಾಂತ್ಲೆ, ಎಲಾಮಾಂತ್ಲೆ, ಮೆಸಾಪೊತಾಮಿಯಾಂತ್ಲೆ, ಜುದೇಯಾಂತ್ಲೆ, ಆನಿ ಕಾಪ್ಪಾದೋಸಿಯಾಂತ್ಲೆ, ಪೊಂತುಸಾಂತ್ಲೆ ಆನಿ ಪಂಫೀಲಿಯಾಂತ್ಲೆ, ಎಜಿಪ್ತಾಂತ್ಲೆ ಆನಿ ಸಿರೆನ್ ಭೊಂವ್ತಿಂಚ್ಯಾ ಲೀಬಿಯಾಂಥ್ಲೆ ಆನಿ ಥೊಡೆ ರೊಮಾ ಥಾವ್ನ್ ಸಯ್ತ್ ಆಯ್ಲಲೆ. ಜುದೆವ್ ಆನಿ ಜುದೆವ್ ಧರ್ಮಾಕ್ ಆಯ್ಲೆವಾರ್‍ಚ್ ಮೆಳ್‍ಲ್ಲೆ, ಕ್ರೇತಾಂತ್ಲೆ ಆನಿ ಅರ್ಬಿಸ್ಥಾನಾಂತ್ಲೆ ಸಯ್ತ್. ತರ್‍ಯೀ ದೆವಾಚ್ಯಾ ವಿಚಿತ್ರ್ ಕೃತ್ಯಾಂ ವಿಶ್ಯಾಂತ್ ತೆ ಸಾಂಗ್ತಾತ್ ತೆಂ ಆಮಿ ಆಮ್ಚೇ ಮಾಯ್‍ಭಾಶೆನ್ ಆಯ್ಕಾತಾಂವ್!”
Show more
6 May
ಜೂನ್ 8 – ಪವಿತ್ರ್ ಅತ್ಮ್ಯಾಚ್ಯಾ ಯೆಣ್ಯಾಚಿ ಪರಬ್ – ಕೀರ್ತನ್
ಕೀರ್ತನ್ 103 ಶ್ಲೋಕ್: ಧಾಡ್ ತುಜ್ಯಾ ಅತ್ಮ್ಯಾಕ್, ಸರ್ವೆಸ್ಪರಾ, ಆನಿ ಸಂಸಾರಾಚೆಂ ರೂಪ್ ತುಂ ನವೆಂ ಕರ್. ವಾ ಸರ್ವೆಸ್ಪರಾಕ್ ಜೈ, ಜೈ! 1. ಅತ್ಮ್ಯಾ ಮ್ಹಜ್ಯಾ, ಸರ್ವೆಸ್ಪರಾಕ್ ನಾಂವಾಡ್: ಸರ್ವೆಸ್ಪರಾ, ಮ್ಹಜ್ಯಾ ದೆವಾ, ಕಿತ್ಲೊ ತುಂ ವರ್ತೊ! ಕಿತ್ಲಿಂ ವಿವಿಧ್ ತುಜಿಂ ಕೃತ್ಯಾಂ, ಸರ್ವೆಸ್ಪರಾ, ಪ್ರಥ್ವಿ ಸಗ್ಳಿ ತುಜ್ಯಾ ರಚ್ನಾಂನಿ ಭರ್ಲ್ಯಾ. 2. ತುಂ ತುಜೆಂ ತೊಂಡ್ ಲಿಪಯ್ತಾನಾ ರಚ್ನಾಂ ಘಾಬರ್ತಾತ್, ತುಂ ಪ್ರಾಣ್ ಮಾತ್ರ್ ಕಾಡ್, ತಿಂ ಮೊರುನ್ ಪತ್ರ್ಯಾನ್ ಧುಳಿಕ್ ವೆತಾತ್. ಪುಣ್ ತುಂ ಸ್ವಾಸ್ ದಿಶಿ ಜಾಲ್ಯಾರ್, ತಿಂ ಪರತ್ ರಚೊನ್ ಯೆತಾತ್, ಅಶೆಂ ಪ್ರಿಥುಮೆಚೆಂ ರೂಪ್ ತುಂ ನವೆಂ ಕರ್ತಾಯ್. 3. ಸರ್ವೆಸ್ಪರಾಕ್ ಜಾಂವ್ ಮಹಿಮಾ ಸಾಸ್ಣಾಚ್ಯಾ ಸಾಸ್ಣಾಕ್! ಆಪ್ಲ್ಯಾ ಕೃತ್ಯಾಂನಿ ಜಾಂವ್ ತುಕಾ ಅನಂದ್! ಮ್ಹಜಿಂ ಚಿಂತ್ನಾಂ ತಾಕಾ ಮಾನ್ವೊಂ! ವ್ಹಯ್, ಸರ್ವೆಸ್ಪರಾ ಥಂಯ್ ಆಸಾ ಮ್ಹಜೊ ಸಂತೊಸ್.
Show more
6 May
ಜೂನ್ 8 – ಪವಿತ್ರ್ ಅತ್ಮ್ಯಾಚ್ಯಾ ಯೆಣ್ಯಾಚಿ ಪರಬ್ - ದುಸ್ರೆಂ ವಾಚಪ್
ರೋಮ್ 8:8-17 ಹ್ಯಾ ಪಾಸತ್ ರಗ್ತಾಮಾಸಾಕ್ ಖಾಲ್‍ಜಾತಾತ್ ತಿಂ ದೆವಾಕ್ ಮಾನ್ವನಾ0ತ್. ದೆವಾಚೊ ಪವಿತ್ರ್ ಅತ್ಮೊ ತುಮ್ಚೇ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ತುಮಿ ರಗ್ತಾಮಾಸಾಚೇ ಅಪೇಕ್ಷೇ ಪರ್ಮಾಣೆಂ ನ್ಹಯ್, ಬಗರ್ ಪವಿತ್ರ್ ಅತ್ಮ್ಯಾಚೇ ಖುಶೇ ಪರ್ಮಾಣೆಂ ಜಿಯೆತಾತ್; ಆನಿ ಜಾಚೇ ಥಂಯ್ ಕ್ರಿಸ್ತಾಚೊ ಅತ್ಮೊ ನಾ, ತೊ ಕ್ರಿಸ್ತಾಚೊ ನ್ಹಯ್. ಆನಿ ಕ್ರೀಸ್ತ್ ತುಮ್ಚೇ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ತುಮ್ಚಿ ಕೂಡ್ ಪಾತ್ಕಾ ನಿಮ್ತಿಂ ಮೆಲ್ಯಾ ತರ್‍ಯೀ ದೆವಾ ಥಂಯ್ ತುಮಿ ನಿತಿವಂತ್ಪಣ್ ಜೊಡ್ಲಾಂ ದೆಕುನ್, ಅತ್ಮೊಚ್ ತುಮ್ಕಾಂ ಜೀವ್‍ದಿವ್ಪಿ ಸಕತ್ ಜಾತಾ. ತಿತ್ಲೆಂಚ್ ನ್ಹಯ್, ಜೆಜುಕ್ ಮೆಲ್ಲ್ಯಾಂತ್ಲೊ ಉಠಯ್ಲಲ್ಯಾ ದೆವಾಚೊ ಅತ್ಮೊ ತುಮ್ಚೇ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ಜೆಜು ಕ್ರಿಸ್ತಾಕ್ ಮೆಲ್ಲ್ಯಾಂತ್ಲೊ ಉಠಯ್ಲಲೊ ದೇವ್ ತ್ಯಾಚ್ ಅತ್ಮ್ಯಾ ಉದೆಶಿಂ ತುಮ್ಚ್ಯೊ ವಿನಾಶಿ ಕುಡಿ ನವ್ಯಾ ಜಿವಾನ್ ಭರ್ತಲೊ. ತರ್ ಭಾವಾಂನೋ, ಆಮಿ ಋಣಿ. ಪುಣ್ ರಗ್ತಾಮಾಸಾಚೇ ಅಪೇಕ್ಷೆಕ್ ಸರಿ ಜಾಲ್ಲ್ಯಾ ಜೀವನಾಚೆ ಋಣಿ ನ್ಹಯ್; ಕಿತ್ಯಾಕ್ ರಗ್ತಾಮಾಸಾ ಪರ್ಮಾಣೆಂ ಜಿಯೆಶಾತ್ ಜಾಲ್ಯಾರ್ ತುಮಿ ಮರ್ತಲ್ಯಾತ್. ಪುಣ್ ಅತ್ಮ್ಯಾ ವರ್ವಿಂ ತುಮ್ಚ್ಯಾ ರಗ್ತಾಮಾಸಾಚ್ಯಾ ಖೊಟ್ಯಾ ಕನ್ರ್ಯಾಂಚೊ ನಾಸ್ ಕರ್ಶಾತ್ ಜಾಲ್ಯಾರ್ ತುಮಿ ಜಿಯೆತಲ್ಯಾತ್. ಜಾಂಕಾಂ ದೆವಾಚೊ ಅತ್ಮೊ ಚಲೊವ್ನ್ ವ್ಹರ್ತಾ, ತಿಂ ದೆವಾಚಿಂ ಭುರ್ಗಿಂ. ಕಿತ್ಯಾಕ್ ತುಮ್ಕಾಂ ಮೆಳ್ಳಲೊ ಅತ್ಮೊ ತುಮ್ಚ್ಯಾ ಆದ್ಲ್ಯಾ ಗುಲಾಮ್‍ಪಣಾಚ್ಯಾ ಭಿಯಾಭರಿತ್ ಜೀವನಾಕ್ ತುಮ್ಕಾಂ ವ್ಹರ್ನ್ ಪಾವಯ್ನಾ; ಬಗರ್ ತೊ ತುಮ್ಕಾಂ ದೆವಾಚಿಂ ಭುರ್ಗಿಂ ಕರ್ತಾ ಆನಿ ಆಪ್ಲ್ಯಾ ಬಳಾನ್ ದೆವಾಕ್ ‘ಅಬ್ಬಾ’ಮ್ಹಣ್ಜೆ ‘ಬಾಪಾ’ಮ್ಹಣುನ್ ಆಮಿ ಉಲೊ ಮಾರಿಶೆಂ ಕರ್ತಾ. ದೆವಾಚೊ ಹೊ ಅತ್ಮೊ ಆಮಿ ದೆವಾಚಿಂ ಭುರ್ಗಿಂ ಮ್ಹಣ್ ಆಮ್ಚ್ಯಾ ಅತ್ಮ್ಯಾಕ್ ರುಜ್ವಾತ್ ದಿತಾ: ಆಮಿ ದೆವಾಚಿಂ ಭುರ್ಗಿಂ ಜಾಲ್ಯಾರ್, ತಾಚ್ಯಾ ದಾಯ್ಜಾಚೆ ವಾರಿಸ್ದಾರ್‍ಯೀ ವ್ಹಯ್. ತಿತ್ಲೆಂಚ್ ನ್ಹಯ್, ಕ್ರಿಸ್ತಾ ಸವೆಂ ದೆವಾಚ್ಯಾ ದಾಯ್ಜಾಚೆ ಸಹವಾರಿಸ್ದಾರ್ ಆಮಿ; ಕಿತ್ಯಾಕ್ ಜರ್ ಕ್ರಿಸ್ತಾಚ್ಯಾ ಕಷ್ಟಾಂತ್ ಆಮಿ ವಾಂಟೆಲಿ ಜಾತಾಂವ್, ತರ್ ತಾಚೇ ಮಹಿಮೆಚೆಯೀ ಆಮಿ ವಾಂಟೆಲಿ ಜಾಂವ್ಕ್ ಪಾವ್ತಲ್ಯಾಂವ್.
Show more
6 May
ಜೂನ್ 8 – ಪವಿತ್ರ್ ಅತ್ಮ್ಯಾಚ್ಯಾ ಯೆಣ್ಯಾಚಿ ಪರಬ್ – ಸುವಾರ್ತಾ
ಜುವಾಂವ್ 14:15-16, 23-26 “ತುಮಿ ಮ್ಹಜೊ ಮೋಗ್ ಕರ್ತಾತ್ ಜಾಲ್ಯಾರ್, ಮ್ಹಜೆ ಉಪದೆಸ್ ಪಾಳ್ತಲ್ಯಾತ್. ತವಳ್ ಹಾಂವ್ ಬಾಪಾಲಾಗಿಂ ಮಾಗ್ತಲೊಂ, ತೊ ತುಮ್ಕಾಂ ಏಕ್ ಮಜತ್‍ದಾರ್ ದಿತಲೊ ಆನಿ ಹೊ ತುಮ್ಚೇ ಸವೆಂ ಸದಾಂಕಾಳ್ ರಾವ್ತಲೊ. ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ: “ಜೊ ಕೊಣ್ ಮ್ಹಜೊ ಮೋಗ್ ಕರ್ತಾ, ತೊ ಮ್ಹಜೆಂ ಉತರ್ ಪಾಳ್ತಾ. ತವಳ್ ಮ್ಹಜೊ ಬಾಪ್ ತಾಚೊ ಮೋಗ್ ಕರ್ತಾ; ಆನಿ ಆಮಿ ದೊಗ್‍ಯೀ ತಾಚೇಶಿಂ ಯೇವ್ನ್, ತಾಚೇ ಥಂಯ್ ವಸ್ತಿ ಕರ್ತಲ್ಯಾಂವ್. ಮ್ಹಜೊ ಮೋಗ್ ಕರಿನಾ ತೊ, ಮ್ಹಜೆಂ ಉತರ್ ಪಾಳಿನಾ. ತುಮಿ ಆಯ್ಕತಾತ್ ತೆಂ ಉತರ್ ಮ್ಹಜೆಂ ನ್ಹಯ್, ಬಗರ್ ಮ್ಹಾಕಾ ಪಾಠಯ್ಲಾ ತ್ಯಾ ಬಾಪಾಚೆಂ.” “ತುಮ್ಚೇ ಸಾಂಗಾತಾ ಆಸ್ತಾನಾಂಚ್ ಹೆಂ ಸಗ್ಳೆಂ ಹಾಂವೆಂ ತುಮ್ಕಾಂ ಸಾಂಗ್ಲಾಂ. ಪುಣ್ ಮ್ಹಜೇ ನಾಂವಿಂ ಬಾಪ್‍ಚ್ ತುಮ್ಕಾಂ ಎಕ್ ಮಜತ್‍ದಾರ್ ಪಾಠಯ್ತಲೊ; ತೊ ಪವಿತ್ರ್ ಆತ್ಮೊ ತುಮ್ಕಾಂ ಸಗ್ಳೆಂ ಶಿಕಯ್ತಲೊ ಆನಿ ಹಾಂವೆಂ ತುಮ್ಕಾಂ ಸಾಂಗ್ಲಾಂ ತೆಂ ಸಗ್ಳೆಂ ತುಮ್ಚ್ಯಾ ಉಗ್ಡಾಸಾಕ್ ಹಾಡ್ತಲೊ.”
Show more
6 May
ಜೂನ್ 1 – ಜೆಜುಚ್ಯಾ ಸ್ವರ್ಗಾರೋಹಣಾಚಿ ಪರಬ್ – ಪಯ್ಲೆಂ ವಾಚಪ್
ಧ. ಕೃತ್ಯಾಂ 1:1-11 ಮ್ಹಜ್ಯಾ ಗ್ರಂಥಾಚ್ಯಾ ಪಯ್ಲ್ಯಾ ಭಾಗಾಂತ್, ಏ ಥಿಯೋಫಿಲಾ, ಜೆಜುನ್ ಆಪ್ಲೆಂ ಕಾಮ್ ಸುರು ಕೆಲೆಂ ತವಳ್ ಥಾವ್ನ್ ತಾಕಾ ಸರ್ಗಾರ್ ಉಬಾರ್ನ್ ವ್ಹೆಲೊ ತೊ ದೀಸ್ ಪರ್ಯಾಂತ್, ತಾಣೆಂ ಕೆಲ್ಲ್ಯಾ ಆನಿ ಪವಿತ್ರ್‍ಆತ್ಮ್ಯಾ ಮಾರಿಫಾತ್ ಆಪ್ಣೆಂ ವಿಂಚುನ್ ಕಾಡ್ಲಲ್ಯಾ ಧರ್ಮ್‍ದುತಾಂಕ್ ತಾಣೆಂ ಶಿಕಯ್‍ಲ್ಲ್ಯಾ ಸರ್ವ್ ಸಂಗ್ತಿಂ ವಿಶ್ಯಾಂತ್ ಹಾಂವೆಂ ಬರಯ್ಲಾಂ. ಆಪ್ಲ್ಯಾ ಮೊರ್ನಾ ಉಪ್ರಾಂತ್ಲ್ಯಾ ಕಾಳಾರ್ ಆಪುಣ್ ಪತ್ರ್ಯಾನ್ ಜಿವಂತ್ ಜಾಲಾ ಮ್ಹಣ್ ಸಬಾರ್ ರುಜ್ವಾತ್ಯಾಂನಿ ತಾಣೆಂ ತಾಂಕಾಂ ದಾಖೊವ್ನ್ ದಿಲೆಂ; ಚಾಳೀಸ್ ದೀಸ್ ಪರ್ಯಾನ್ ತೊ ತಾಂಕಾಂ ದಿಷ್ಟಿ ಪಡ್ಲೊ ಆನಿ ದೆವಾಚ್ಯಾ ರಾಜ್ಯಾ ವಿಶ್ಯಾಂತ್ ತಾಂಚೇಲಾಗಿಂ ಉಲಯ್ಲೊ. ಏಕ್ ಪಾವ್ಟಿಂ ತೆ ಸಾಂಗಾತಾ ಮೆಳ್‍ಲ್ಲ್ಯಾ ವೆಳಾರ್, ತಾಂಣಿಂ ಜೆರುಜಲೆಮಾಂತ್ಲೆ ಭಾಯ್ರ್ ಸರ್ನ್ ವಚನಯೆ, ಬಗರ್ ಬಾಪಾನ್ ಭಾಸಾಯ್ಲಲ್ಯಾ ದೆಣ್ಯಾಚಿ ವಾಟ್ ಪಳೆವ್ನ್ ರಾವಾಜಯ್ ಮ್ಹಣುನ್ ತಾಣೆಂ ತಾಂಕಾಂ ತಾಕಿದ್ ದಿಲಿ; ಆನಿ ತಾಣೆಂ ಮ್ಹಳೆಂ: “ತ್ಯಾ ಭಾಸಾವ್ಣ್ಯಾ ವಿಶ್ಯಾಂತ್ ಮ್ಹಜ್ಯಾಚ್ ತೊಂಡಾಂತ್ಲೆಂ ಅಶೆಂ ತುಮಿ ಆಯ್ಕಲಾಂ: ಜುವಾಂವ್ನ್ ಉದ್ಕಾಚೆಂ ಸ್ನಾನ್ ದಿಲೆಂ; ಪುಣ್ ತುಮಿ ಆನಿಕ್ ಥೊಡ್ಯಾಚ್ ದಿಸಾಂನಿ ಪವಿತ್ರ್ ಆತ್ಮ್ಯಾಚೆಂ ಸ್ನಾನ್ ಘೆತಲ್ಯಾತ್.” ಅಶೆಂ ಧರ್ಮ್‍ದೂತ್ ಸಾಂಗಾತಾ ಮೆಳ್‍ಲ್ಲ್ಯಾ ವೆಳಾರ್ ಜೆಜುಲಾಗಿಂ ವಿಚಾರುಂಕ್ ಲಾಗ್ಲೆ: “ಸೊಮಿಯಾ, ಹ್ಯಾಚ್ ಕಾಳಾರ್‍ವೆ ತುಂ ಇಸ್ರಾಯೆಲಾಚೆಂ ರಾಜ್ಯ್ ಪುನರ್ ಸ್ಥಾಪಿತ್ ಕರ್ತಲೊಯ್?” ಪುಣ್ ತಾಣೆಂ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ: “ಬಾಪಾನ್ ಆಪ್ಲ್ಯಾ ಸ್ವಂತ್ ಅಧಿಕಾರಾನ್ ನಿಶ್ಚಿತ್ ಕೆಲ್ಲಿ ವೇಳ್‍ಘಡಿ ಸಮ್ಜುನ್ ಘೆವ್ಚೆಂ ಕಾಮ್ ತುಮ್ಚೆಂ ನ್ಹಯ್. ಪುಣ್ ತುಮ್ಚೇರ್ ಪವಿತ್ರ್ ಆತ್ಮೊ ಯೆತಲೊ ತೆದ್ನಾ ತುಮ್ಕಾಂ ಬಳ್ ಮೆಳ್ತಲೆಂ. ಉಪ್ರಾಂತ್ ಜೆರುಜಲೆಮಾಂತ್ ಸಗ್ಳ್ಯಾ ಜುದೇಯಾಂತ್ ಆನಿ ಸಾಮಾರಿಯಾಂತ್ ಆನಿ ಸಂಸಾರಾಚ್ಯಾ ಪೊಂತಾ ಥಾವ್ನ್ ಪೊಂತಾ ಪರ್ಯಾಂತ್ ತುಮಿ ಮ್ಹಾಕಾ ಸಾಕ್ಸ್ ದಿತಲ್ಯಾತ್.” ತಾಣೆಂ ಇತ್ಲೆಂ ಸಾಂಗುನ್ ಜಾತಚ್ ತೆ ಪಳೆವ್ನ್ ಆಸ್ತಾನಾಚ್ ತಾಕಾ ವಯ್ರ್ ವಯ್ರ್ ಉಬಾರ್ನ್ ವ್ಹೆಲೊ ಆನಿ ತಾಂಚ್ಯಾ ದೊಳ್ಯಾಂ ಮುಖಾವಯ್ಲೊ ತಾಕಾ ಏಕ್ ಕುಪಾನ್ ಲಿಪಯ್ಲೊ. ಅಶೆಂ ಚಡತ್ ವೆತಾನಾ ಆನಿ ತೆ ಆನಿಕ್‍ಯೀ ಮಳ್ಬಾಕ್‍ಚ್ ದೀಷ್ಟ್ ಲಾವ್ನ್ ಆಸ್ತಾನಾ, ಧವೆಂ ವಸ್ತುರ್ ನ್ಹೆಸ್ಲಲೆ ದೋಗ್ ಜಣ್ ಎಕಾಚ್ಛಾಣೆಂ ತಾಂಚೇ ಸರ್ಶಿನ್ ಉಬೆ ಜಾಲೆ. ತೆ ಮ್ಹಣಾಲೆ: “ಗಾಲಿಲೆಯಾಚ್ಯಾ ಮನ್ಶಾಂನೋ, ತುಮಿ ಅಶೆಂ ಮಳ್ಬಾಕ್ ದೀಷ್ಟ್ ಲಾವ್ನ್ ಕಿತ್ಯಾಕ್ ಉಬೆ ರಾವ್ಲ್ಯಾತ್? ಹೊ, ತುಮ್ಚೇ ಮಧ್ಲೊ ವಯ್ರ್ ಉಕೊಲ್ನ್ ವ್ಹೆಲಾ ತೊ ಜೆಜು, ಜಸೊ ತುಮಿ ತಾಕಾ ಸರ್ಗಾಕ್ ಚಡುನ್ ವೆತಾನಾ ಪಳೆಲಾ ತಸೊಚ್ ಪತ್ರ್ಯಾನ್ ಯೆತಲೊ.”
Show more
6 May
ಜೂನ್ 1 – ಜೆಜುಚ್ಯಾ ಸ್ವರ್ಗಾರೋಹಣಾಚಿ ಪರಬ್ – ಕೀರ್ತನ್
ಕೀರ್ತನ್ 46 ಶ್ಲೋಕ್: ಸಂತೊಸಾಚ್ಯಾ ಉದ್ಗಾರಾಂ ಮಧೆಂ ದೇವ್ ಸರ್ಗಾರ್ ಚಡ್ತಾ, ತುತೂರೆಚ್ಯಾ ನಾದಾನ್ ಸರ್ವೆಸ್ಪರ್ ಚಡಿತ್ತ್ ವೆತಾ. ವಾ ಸರ್ವೆಸ್ಪರಾಕ್ ಜೈ, ಜೈ! 1. ಸಮೆಸ್ತ್ ಪರ್ಜಾಂನೋ ತಾಳಿಯೋ ಪೆಟಾ, ಬೊಬಾಟ್ ಮಾರುನ್ ದೆವಾಕ್ ಜಯ್ತಾ - ಗೀತ್ ಗಾಯಾ, ಅತ್ಯುನ್ನತ್ ದೆವಾಚಿ ಭಿರಾಂತ್ ಆಮ್ಕಾಂ ರಾಜಾ ತೊ, ಕಿತ್ಯಾಕ್, ಆಬ್ಳೆ, ಪ್ರಿಥುಮೆಚೊ ಅಧಿಕ್ ವರ್ತೊ ರಾಜಾ ತೊ. 2. ಸಂತೊಸಾಚ್ಯಾ ಉದ್ಗಾರಾಂ ಮಧೆಂ ದೇವ್ ಸರ್ಗಾರ್ ಚಡ್ತಾ, ತುತೂರೆಚ್ಯಾ ನಾದಾನ್ ಸರ್ವೆಸ್ಪರ್ ಚಡತ್ತ್ ವೆತಾ. ಆಮ್ಚ್ಯಾ ದೆವಾಕ್ ವಂದಿಯಾ, ತಾಕಾ ವಾಖಾಣಾ! ಆಮ್ಚ್ಯಾ ರಾಯಾಕ್ ಹರ್ಸಿಯಾ, ತಾಕಾ ವಾಖಾಣಾ! 3. ಆಖ್ಯೆ ಪ್ರಿಥುಮೆಚೊ ರಾಜಾ ತೊ, ಸಗ್ಳ್ಯೆ ತುಮ್ಚ್ಯೆ ನಿಪುಣಾಯೆನ್ ತಾಚಿ ಕೀರ್ತ್ ಗಾಯಾ. ಜನಾಂಗಾಂಚೆರ್ ಸರ್ವ್ ಅಧಿಕಾರ್ ತಾಣೆಂ ಘೆತ್ಲಾ, ಆಪ್ಲ್ಯಾ ಪವಿತ್ರ್ ಸಿಂಹಾಸನಾರ್ ತಾಣೆಂ ಬಸ್ಕಾ ಘೆತ್ಲ್ಯಾ.
Show more
6 May
ಜೂನ್ 1 – ಜೆಜುಚ್ಯಾ ಸ್ವರ್ಗಾರೋಹಣಾಚಿ ಪರಬ್ - ದುಸ್ರೆಂ ವಾಚಪ್
ಹೆಬ್ರೆವ್ 9:24-28, 10:19-23 ಕ್ರೀಸ್ತ್ ಮನ್ಶಾಂಚ್ಯಾ ಹಾತಾಂನಿ ಕೆಲ್ಲ್ಯಾ ಪವಿತ್ರ್ ಸ್ಥಾನಾಂತ್ ಪ್ರವೇಸ್ ಜಾಲೊನಾ; ಹೆಂ ಖರ್ಯಾ ಪವಿತ್ರ್ ಸ್ಥಾನಾಚೆಂ ಪ್ರತಿರೂಪ್ ಮಾತ್ರ್; ತೊ ಸರ್ಗಾರ್ ಪ್ರವೇಸ್ ಜಾಲೊ. ಆತಾಂ ದೆವಾ ಸಮೊರ್ ಆಮ್ಚೇ ಪಾಸತ್ ಹಾಜಿರ್ ಜಾವ್ಚೇ ಖಾತಿರ್ ತೊ ಭಿತರ್ ಸರ್ಲೊ. ಹೆರಾಂಚೆಂ ರಗತ್ ಘೆವ್ನ್ ಹರ್ಯೇಕ್ ವರ್ಸಾ ಪವಿತ್ರ್ ಸ್ಥಾನಾಂತ್ ರಿಗ್ತಲ್ಯಾ ಶ್ರೇಷ್ಠ್ ಯಾಜಕಾಬರಿ ತೊ ಆಪ್ಣಾಕ್‍ಚ್ ಪತ್ರ್ಯಾನ್ ಪತ್ರ್ಯಾನ್ ಭೆಟಯ್ನಾ. ತಶೆಂ ಕೆಲ್ಲೆಂ ಜಾಲ್ಯಾರ್ ಸಂಸಾರಾಚೇ ರಚನೇ ಥಾವ್ನ್‍ಚ್ ತಾಣೆಂ ಪತ್ರ್ಯಾನ್ ಪತ್ರ್ಯಾನ್ ಕಷ್ಟ್ ಸೊಸ್ಚೆ ಪಡ್ತೆ. ಪುಣ್ ಆತಾಂ ಹ್ಯಾ ಶೆವಟಿಂಚ್ಯಾ ಕಾಳಾರ್ ಆಪ್ಲ್ಯಾ ಬಲಿದಾನಾ ಮುಖಾಂತ್ರ್ ಪಾತಕ್ ಕಾಡ್ನ್ ಉಡೊವ್ಚೇ ಖಾತಿರ್ ಎಕ್‍ಚ್ ಪಾವ್ಟಿ ತೊ ಹಾಜಿರ್ ಜಾಲಾ. ಜಶೆಂ ಮನ್ಶಾಂಕ್ ಎಕ್‍ಚ್ ಪಾವ್ಟಿ ಮೊರುಂಕ್ ನಿರ್ಮಿಲಾಂ ಆನಿ ತ್ಯಾ ನಂತರ್ ತಾಂಚಿ ಝಡ್ತಿ ಜಾತಾ, ತಶೆಂ ಕ್ರಿಸ್ತಾಕ್‍ಯೀ ಸಮೆಸ್ತ್ ಮನ್ಶಾಂಚೆಂ ಪಾಪ್ ಕಾಡ್ಚೇ ಖಾತಿರ್ ಎಕ್‍ಚ್ ಪಾವ್ಟಿ ಭೆಟೊವ್ನ್ ದಿಲೊ. ಪುಣ್ ತೊ ಪತ್ರ್ಯಾನ್ ಯೆತಲೊ, ಪಾತ್ಕ್ಯಾಂಚೊ ನಾಸ್ ಕರುಂಕ್ ನ್ಹಯ್, ಬಗರ್ ತಾಚ್ಯಾ ಯೆಣ್ಯಾಚಿ ಅತ್ರೆಗಾನ್ ವಾಟ್ ಪಳೆವ್ನ್ ರಾವ್ಲಲ್ಯಾಂಕ್ ತಾರಣ್ ದಿವ್ಚ್ಯಾಕ್. ತರ್ ಭಾವಾಂಭಯ್ಣಿಂನೋ, ಜೆಜುಚ್ಯಾ ರಗ್ತಾ ವರ್ವಿಂ ಭೋವ್ ಪವಿತ್ರ್ ಸ್ಥಾನಾಂತ್ ಭಿತರ್ ಸರುಂಕ್ ಆಮ್ಕಾಂ ಪುರ್ತೆಂ ಧೈರ್ ಮೆಳ್ತಾ. ಪಡ್ದ್ಯಾಂತ್ಲ್ಯಾನ್ ಉತ್ರುನ್ ವೆಚಿ ಏಕ್ ನವಿ ಆನಿ ಜಿವಿ ವಾಟ್ ತಾಣೆಂ ಆಮ್ಕಾಂ ಉಘಡ್ಲ್ಯಾ; ತೊ ಪಡ್ದೊ ಮ್ಹಳ್ಯಾರ್ ತಾಚಿಚ್ ಕೂಡ್. ಹ್ಯಾ ಶಿವಾಯ್ ದೆವಾಚ್ಯಾ ಘರ್ಚೆಂ ಕಾರ್ಬಾರ್ಪಣ್ ಚಲೊಂವ್ಕ್ ಏಕ್ ವರ್ತೊ ಯಾಜಕ್ ಆಮ್ಕಾಂ ಮೆಳ್ಳಾ. ದೆಕುನ್ ಖರ್ಯಾ ಕಾಳ್ಜಾನ್ ಆನಿ ಥಿರ್ ಭಾವಾರ್ಥಾಚೇ ಖಾತ್ರೆನ್, ಆಮ್ಚಿಂ ಗುನ್ಯಾಂವ್ಕಾರಿ ಅಂತಸ್ಕರ್ನಾಂ ನಿತಳ್ ಕರ್ನ್ ಆನಿ ಆಮ್ಚ್ಯೊ ಕುಡಿ ನಿತಳ್ ಉದ್ಕಾನ್ ಧುವ್ನ್ ದೆವಾಕ್ ಆಮಿ ಲಾಗಿಂ ಸರ್ಯಾಂ. ಆಮಿ ಪಾಚಾರ್ತಾಂವ್ ತೊ ಭರ್ವಸೊ ಥಿರಸಣೆನ್ ಸಾಂಬಾಳ್ಯಾಂ; ಕಿತ್ಯಾಕ್ ಆಮ್ಕಾಂ ಭಾಸಾವ್ಣಿ ದಿಲ್ಲೊ ದೇವ್ ಸದಾಂಚ್ ವಿಶ್ವಾಸಿ.
Show more
6 May
ಜೂನ್ 1 – ಜೆಜುಚ್ಯಾ ಸ್ವರ್ಗಾರೋಹಣಾಚಿ ಪರಬ್ – ಸುವಾರ್ತಾ
ಲೂಕ್ 24:46-53 ಉಪ್ರಾಂತ್ ಪವಿತ್ರ್ ಪುಸ್ತಕ್ ತಾಂಕಾಂ ಸಮ್ಜಸಾರ್ಕೆಂ ತಾಂಚೇ ಮತಿಕ್ ತಾಣೆಂ ಉಜ್ವಾಡ್ ದಿಲೊ. ಆನಿ ಮ್ಹಳೆಂ: “ಅಶೆಂ ಪಯ್ಲೆಂಚ್ ಬರೊವ್ನ್ ಆಸಾ: ಕ್ರಿಸ್ತಾನ್ ಕಷ್ಟ್ ಸೊಸುಂಕ್ ಆಸಾ, ಆನಿ ತಿಸ್ರ್ಯಾ ದಿಸಾ ಮೆಲ್ಲ್ಯಾಂತ್ಲೊ ತಾಣೆಂ ಉಠೊಂಕ್ ಆಸಾ. ತಾಚ್ಯಾ ನಾಂವಾನ್ ಜಿಣಿ ಬದ್ಲಪಾಚೊ ಆನಿ ಪಾತ್ಕ್ಯಾಂಚ್ಯಾ ಬೊಗ್ಸಣ್ಯಾಚೊ ಸಂದೇಶ್ ಜೆರುಜಲೆಮಾ ಥಾವ್ನ್ ಸುರು ಕರ್ನ್, ಸರ್ವ್ ಪರ್ಜಾಂಕ್ ಪರ್ಗಟ್ ಕರುಂಕ್‍ಜಾಯ್. ತುಮಿಚ್ ಹ್ಯಾ ಸಂಗ್ತಿಂಕ್ ಸಾಕ್ಸ್. ಮ್ಹಜ್ಯಾ ಬಾಪಾನ್ ಭಾಸಾಯ್‍ಲ್ಲೆಂ ತೆಂ ದೆಣೆಂ ಹಾಂವ್ ತುಮ್ಚೇರ್ ಪಾಠಯ್ತಲೊಂ. ಪುಣ್ ಸರ್ಗಿಂ ಥಾವ್ನ್ ಯೆವ್ಚೇ ಸಕ್ತೆನ್ ತುಮಿ ಬಳ್ವಂತ್ ಜಾಯ್ಸರ್ ತುಮಿ ಶಹರಾಂತ್‍ಚ್ ರಾವಜಯ್. ಉಪ್ರಾಂತ್ ಜೆಜು ತಾಂಕಾಂ ಶಹರಾ ಭಾಯ್ರ್ ಬೆಥಾನಿಯಾ ಪರ್ಯಾನ್ ಆಪೊವ್ನ್ ವ್ಹರ್ನ್ ಗೆಲೊ. ಥಂಯ್ ಆಪ್ಲೆ ಹಾತ್ ಉಬಾರ್ನ್ ತಾಣೆಂ ತಾಂಕಾಂ ಆಶೀರ್ವಾದ್ ದಿಲೊ. ಆಶೀರ್ವಾದ್ ದೀವ್ನ್ ಆಸ್ತಾನಾಚ್, ತೊ ತಾಂಚೇ ಥಾವ್ನ್ ಮೆಕ್ಳೊ ಜಾಲೊ ಆನಿ ತಾಕಾ ಸರ್ಗಾಕ್ ಉಬಾರ್ನ್ ವ್ಹೆಲೊ. ಆನಿ ತಾಕಾ ಆರಾಧನ್ ಕರ್ತಚ್, ತೆ ವತ್ರ್ಯಾ ಸಂತೊಸಾನ್ ಜೆರುಜೆಲೆಮಾಕ್ ಪಾಟಿಂ ಗೆಲೆ. ಥಂಯ್ ಹರ್ಯೇಕ್ ದೀಸ್ ದೆವಾಳಾಕ್ ವಚುನ್ ತೆ ದೆವಾಚಿ ಸ್ತುತಿ ಕರಿತ್ ಆಸ್ಲೆ.
Show more
11 April
ಮೇ 25 - ಪಾಸ್ಕಾ ಕಾಳಾಚೊ ಸವೊ ಆಯ್ತಾರ್ – ಪಯ್ಲೆಂ ವಾಚಪ್
ಧ. ಕೃತ್ಯಾಂ 15:1-2, 22-30 ಜುದೇಯಾ ಥಾವ್ನ್ ಥೊಡೆ ಜಣ್ ಆಯ್ಲೆ ಆನಿ ಭಾವಾಂಕ್ ಹೆ ಪರಿಂ ಶಿಕೊಂವ್ಕ್‍ಲಾಗ್ಲೆ: “ಮೊಯ್ಜೆಚ್ಯಾ ಕಾಯ್ದ್ಯಾ ಪರ್ಮಾಣೆಂ ತುಮ್ಕಾಂ ಸುನತ್ ಜಾಲ್ಯಾ ಶಿವಾಯ್ ತುಮಿ ಮುಕ್ತ್ ಜೊಡುಂಕ್ ಸಕನಾತ್.” ಪಾವ್ಲಾ ಆನಿ ಬಾರ್ನಾಬಾಸಾ ಆನಿ ಹ್ಯಾ ಮನ್ಶಾಂ ಮಧೆಂ ವ್ಹಡ್ ಮನಾಭೇದ್ ಆನಿ ಕಠಿಣ್ ವಾದ್‍ವಿವಾದ್ ಉಠ್ಲೆ. ದೆಕುನ್, ಪಾವ್ಲಾನ್ ಆನಿ ಬಾರ್ನಾಬಾಸಾನ್ ಆನಿ ಅಂತಿಯೊಕಾಚ್ಯಾ ಹೆರ್ ಥೊಡ್ಯಾ ಪ್ರತಿನಿಧಿಂನಿ ವಚುನ್ ಜೆರುಜಲೆಮಾಂತ್ ಆಸ್ಲಲ್ಯಾ ಧರ್ಮ್‍ದುತಾಂ ಆನಿ ಮಾಲ್ಗಡ್ಯಾಂ ಮುಖಾರ್ ಹೆಂ ಸವಾಲ್ ಘಾಲಿಜಯ್ ಮ್ಹಣ್ ನಿರ್ಣಯ್ ಜಾಲೊ. ತರಿಪುಣ್ ಬೊಂಬ್ಯಾಂಕ್ ಭೆಟೊವ್ನ್ ದಿಲ್ಲೆಂ ಕಸಲೆಂಚ್ ತಾಂಣಿಂ ಖಾಯ್ನಯೆ, ವ್ಯಭಿಚಾರ್ ಚುಕಯ್ಜಯ್ ಆನಿ ಗೊಮ್ಟಿ ಚಿರ್ಡುನ್ ಮಾರ್ಲಲ್ಯಾಚೆಂ ವಾ ರಗತ್ ಆಸ್ಲಲೆಂ ಮಾಸ್ ಖಾಯ್ನಯೆ ಮ್ಹಣುನ್ ತಾಂಕಾಂ ಆಮಿ ಬರ್ಪಿನಿಶಿಂ ಸಮ್ಜಣಿ ದೀಜಯ್. ಕಿತ್ಯಾಕ್ ಮೊಯ್ಜೆಚೆಂ ನಿಯಮ್‍ಶಾಸ್ತ್ರ್ ಕಿತ್ಲೆಶ್ಯಾ ಸಂತತಿಂ ಥಾವ್ನ್ ಹರ್ಯೇಕ್ ಶಹರಾಂತ್ ಪರ್ಗಟ್ ಜಾತಚ್ ಆಸಾ; ಹರ್ಯೇಕ್ ಸಾಬ್ಬಾತಾ ದಿಸಾ ಸಿನಾಗೊಗಾಂತ್ ತೆಂ ವಾಚ್ತಾತ್.” ತವಳ್ ಧರ್ಮ್‍ದುತಾಂನಿ ಆನಿ ಮಾಲ್ಗಡ್ಯಾಂನಿ ಸಗ್ಳೇ ಸಭೆಚೇ ಅನುಮತೆನ್ ಥೊಡೆ ಪ್ರತಿನಿಧಿ ವಿಂಚುನ್ ಕಾಡ್ಲೆ ಆನಿ ಪಾವ್ಲ್ ಆನಿ ಬಾರ್ನಾಬಾಸಾ ಸಾಂಗಾತಾ ತಾಂಕಾಂ ಅಂತಿಯೊಕಾಕ್ ಧಾಡ್ಚೆ ಮ್ಹಣ್ ಠರಾಯ್ಲೆಂ. ಉಪ್ರಾಂತ್ ಭಾವಾಂ ಮಧೆಂ ಮುಖೇಲ್ ಮ್ಹಣ್ ನಾಂವಾಡ್ಲಲ್ಯಾ ದೊಗಾಂಕ್, ಬಾರ್‍ಸಾಬ್ಬಾಸ್ ನಾಂವಾಚ್ಯಾ ಜುದಾಸಾಕ್ ಆನಿ ಸಿಲಾಸಾಕ್, ತಾಂಣಿಂ ವಿಂಚುನ್ ಕಾಡ್ಲೆ. ತಾಂಚೇ ಮುಖಾಂತ್ರ್ ಹೆಂ ಪತ್ರ್ ತಾಂಣಿಂ ಪಾಠಯ್ಲೆಂ: “ಧರ್ಮ್‍ದೂತ್ ಆನಿ ಮಾಲ್ಗಡೆ ತುಮ್ಚೆ ಭಾವ್, ಅಂತಿಯೊಕಾಂತ್ಲ್ಯಾ, ಸೀರಿಯಾಂತ್ಲ್ಯಾ ಆನಿ ಸಿಲೀಸಿಯಾಂತ್ಲ್ಯಾ ಜುದೆವ್ ನ್ಹಯ್ ಆಸ್ಲಲ್ಯಾ ಭಾವಾಂಕ್ ನಮಾನ್ ಧಾಡ್ತಾಂವ್. ಆಮ್ಚೇ ಮಧ್ಲ್ಯಾ ಥೊಡ್ಯಾಂನಿ ಆಪ್ಲೆಚ್ ಶಿಕೊವ್ಣೆನ್ ತುಮ್ಕಾಂ ಅಸಮಾಧಾನ್ ಕೆಲಾಂ ಆನಿ ತುಮ್ಚಿಂ ಮನಾಂ ಘುಸ್ಪಡಾಯ್ಲ್ಯಾಂತ್ ಮ್ಹಣ್ ಆಮಿ ಆಯ್ಕಲಾಂ. ಅಶೆಂ ಕರುಂಕ್ ತ್ಯಾ ಜಣಾಂಕ್ ಆಮಿ ಕಸಲಿಚ್ ಅನುಮತಿ ದೀಂವ್ಕ್ ನಾತ್ಲಿ. ದೆಕುನ್ ಆಮಿ ಆತಾಂ ಸಾಂಗಾತಾ ಮೆಳುನ್ ಥೊಡ್ಯಾಂಕ್ ಆಮ್ಚೆ ಪ್ರತಿನಿಧಿ ಮ್ಹಣ್ ವಿಂಚುನ್ ಕಾಡ್ಲ್ಯಾತ್, ಆನಿ ಆಮ್ಚ್ಯಾ ಮೊಗಾಚ್ಯಾ ಬಾರ್ನಾಬಾಸಾ ಆನಿ ಪಾವ್ಲಾ ಸಾಂಗಾತಾ ತುಮ್ಚೇ ಸರ್ಶಿಂ ತಾಂಕಾಂ ಧಾಡ್ಚೆ ಮ್ಹಣುನ್ ಆಮಿ ನಿರ್ಧಾರ್ ಕೆಲಾ. ಪಾವ್ಲ್ ಆನಿ ಬಾರ್ನಾಬಾಸ್ ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೇ ಸೆವೆಂತ್ ಆಪ್ಲೊ ಜೀವ್ ದೀಂವ್ಕ್ ಸಯ್ತ್ ತಯಾರ್ ಆಸ್ಲಲೆ ಮನಿಸ್. ಆಮಿ ತುಮ್ಕಾಂ ಪಾಠಯ್ತಾಂವ್ ತೆ ಮನಿಸ್ ಜುದಾಸ್ ಆನಿ ಸಿಲಾಸ್; ಹೆ ಆಮಿ ಬರ್ಪಿನಿಶಿಂ ಘಾಲ್ಲಿಂ ತಿಂಚ್ ನಿಯಮಾಂ ತೊಂಡಾ ಉತ್ರಾನ್ ತುಮ್ಕಾಂ ಕಳಿತ್ ಕರ್ತಲೆ; ಬೊಂಬ್ಯಾಂಕ್ ಬಲಿ ಮ್ಹಣ್ ಅರ್ಪಿಲ್ಲೆಂ ಕಸಲೆಂಯೀ ತುಮಿ ಖಾಯ್ನಾಯೆ, ರಗತ್ ಆಸ್ಲಲೆಂ ವಾ ಗೊಮ್ಟಿ ಚಿರ್ಡುನ್ ಮಾರ್ಲಲ್ಯಾಚೆಂ ಮಾಸ್‍ಯೀ ಖಾಯ್ನಾಯೆ ಆನಿ ವ್ಯಭಿಚಾರ್ ಚುಕಯ್ಜಯ್. ಹ್ಯಾ ಗರ್ಜೆಚ್ಯಾ ನಿಯಮಾಂ ಭಾಯ್ರ್, ತುಮ್ಚೇರ್ ದುಸ್ರೆಂ ಕಸಲೆಂಚ್ ವೊಜೆಂ ಘಾಲ್ಚೆಂ ನ್ಹಯ್ ಮ್ಹಣ್ ಪವಿತ್ರ್ ಆತ್ಮ್ಯಾನ್ ಆನಿ ಆಮಿ ನಿರ್ಣಯ್ ಕೆಲಾ. ಹ್ಯಾ ಸಂಗ್ತಿಂ ಥಾವ್ನ್ ತುಮಿ ಅಲಗ್ ರಾವ್ಶಾತ್ ಜಾಲ್ಯಾರ್, ಸಗ್ಳೆಂ ತುಮ್ಚ್ಯಾ ಬರ್ಯಾಕ್‍ಚ್ ಪಡ್ತಲೆಂ. ಅದೇವ್ಸ್.”
Show more
11 April
ಮೇ 25 - ಪಾಸ್ಕಾ ಕಾಳಾಚೊ ಸವೊ ಆಯ್ತಾರ್ – ಕೀರ್ತನ್
ಕೀರ್ತನ್ 66 ಶ್ಲೋಕ್: ಸರ್ವ್ ಪರ್ಜಾ ತುಕಾ ಹರ್ಸುಂ ದೆವಾ, ಸರ್ವ್ ಪರ್ಜಾ ತುಕಾ ಹರ್ಸುಂ. ವಾ ಸರ್ವೆಸ್ಪರಾಕ್ ಜೈ, ಜೈ! 1. ಜಾ ತುಂ ಕೃಪಾಳ್, ದೆವಾ, ಆನಿ ತುಜೊ ಆಶೀರ್ವಾದ್ ಆಮ್ಚ್ಯೆರ್ ಪಡುಂ; ತುಜ್ಯಾ ಪರ್ಜಳಿಕ್ ಮುಖಮಳಾಚಿ ದೀಷ್ಟ್ ಆಮ್ಚ್ಯೆರ್ ಫಾಂಕುಂ. ಹ್ಯೆ ವರ್ವಿಂ ಆಖ್ಯಾ ಸಂಸಾರಾರ್ ತುಜಿ ಖುಶಿ ಕಳಿತ್ ಜಾಂವ್, ಸರ್ವ್ ರಾಷ್ಟ್ರಾಂ ತುಜಿ ಸೊಡ್ವಣ್ ಒಳ್ಕುನ್ ಘೆಂವ್. 2. ದೆವಾ, ಸರ್ವ್ ಜನಾಂಗಾಂ ತುಕಾ ವಾಖಾಣುಂ, ಸರ್ವ್ ರಾಷ್ಟ್ರಾಂ ತುಜಿ ಸ್ತುತಿ ಕರುಂ. ತುಂ ತಾಂಚಿ ರಾಜ್ವಟ್ಕಿ ನ್ಯಾಯ್-ನಿತಿ ಪರ್ಮಾಣೆಂ ಕರ್ತಾಯ್, ದೆಸಾಂ ಭಾಸಾಂಚ್ಯಾ ಲೊಕಾಕ್ ಶಾಬಿತಾಯೆನ್ ಚಲಯ್ತಾಯ್. 3. ಸರ್ವ್ ಪರ್ಜಾ ತುಕಾ ವಾಖಾಣುಂ, ಸರ್ವೆಸ್ಪರಾ, ಪರ್ಜಾ ತುಕಾ ವಾಖಾಣುಂ; ದೇವ್ ಆಮ್ಕಾಂ ಆಪ್ಲೊ ಆಶೀರ್ವಾದ್ ದೀಂವ್ ಆನಿ ಸಗ್ಳಿ ಪ್ರಿಥುಮ್ ತಾಚ್ಯಾ ಪಾಂಯಾಂ ಪಡುಂ!
Show more
11 April
ಮೇ 25 - ಪಾಸ್ಕಾ ಕಾಳಾಚೊ ಸವೊ ಆಯ್ತಾರ್ - ದುಸ್ರೆಂ ವಾಚಪ್
ಉಗ್ಡಾಪಣ್ 21:10-14, 22-23 ಅತ್ಮ್ಯಾಚ್ಯಾ ಬಳಾನ್ ತಾಣೆಂ ಮ್ಹಾಕಾ ಏಕ್ ಊಂಚ್ ದೊಂಗ್ರಾಚೇ ತಾಳ್ವೆರ್ ವ್ಹೆಲೊ ಆನಿ ಥಂಯ್ ಥಾವ್ನ್ ಪವಿತ್ರ್ ಶಹರ್, ಜೆರುಜಲೆಮ್, ಮ್ಹಾಕಾ ದಾಖಯ್ಲೆಂ. ಸರ್ಗಾ ವಯ್ಲೆಂ ದೆವಾ ಥಾವ್ನ್ ತೆಂ ದೆಂವುನ್ ಯೆತಾಲೆಂ. ದೆವಾಚ್ಯಾ ವೈಭವಾನ್ ತೆಂ ಸಗ್ಳೆಂಚ್ ಪರ್ಜಳ್ತಾಲೆಂ. ತಾಚೊ ಪರ್ಜಳ್ ಏಕ್ ಭೋವ್ ಮೊಲಾಧಿಕ್ ಮಾಣ್ಕಾ ಸಾರ್ಕೊ, ಥಳ್ಥಳಿತ್ ವಜ್ರಾಸಾರ್ಕೊ ದಿಸ್ತಾಲೊ. ತ್ಯಾ ಶಹರಾಕ್ ರೂಂದ್ ಆನಿ ಉಬಾರ್ ಪಾಗೊರ್ ಆಸ್ಲೊ; ತಾಕಾ ಬಾರಾ ದಾರ್ವಟೆ ಆಸ್ಲೆ ಆನಿ ಎಕೇಕ್ ದಾರ್ವಟ್ಯಾ ಸರ್ಶಿಂ ಎಕೇಕ್ ದೇವ್‍ದೂತ್ ಪಾರೊತ್ ಕರುಂಕ್ ದವರ್ಲಲೊ. ಇಸ್ರಾಯೆಲಾಚ್ಯಾ ಬಾರಾ ಕುಳಿಯಾಂಚಿಂ ನಾಂವಾಂ ತ್ಯಾ ಬಾರಾ ದಾರ್ವಟ್ಯಾಂಚೆರ್ ಕಾಂತಯ್ಲಲಿಂ. ಉದೆಂತಿಚೇ ಕುಶಿನ್ ತೀನ್ ದಾರ್ವಟೆ, ಉತ್ತರೆಕ್ ತೀನ್, ದಕ್ಷಿಣೆಕ್ ತೀನ್ ಆನಿ ಅಸ್ತಮ್ತೆಕ್ ತೀನ್. ಶಹರಾಚೊ ಪಾಗೊರ್ ಬಾರಾ ಬುನ್ಯಾದಿಂಚೆರ್ ಬಾಂಧ್‍ಲ್ಲೊ. ತಾಂಚೇ ವಯ್ರ್ ಶೆಳಿಯೆಚ್ಯಾ ಬಾರಾ ಧರ್ಮ್‍ದುತಾಂಚಿಂ ನಾಂವಾಂ ಬರೊವ್ನ್ ಘಾಲ್ಲಿಂ. ಶಹರಾ ಭಿತರ್ ಖಂಯ್‍ಯೀ ಮ್ಹಾಕಾ ದೆವಾಳ್ ದಿಸ್ಲೆಂನಾ; ಕಿತ್ಯಾಕ್ ಸರ್ವ್ ಪದ್ವೆದಾರ್ ಸರ್ವೆಸ್ಪರ್ ದೇವ್ ಆನಿ ಶೆಳಿಚ್ ತಾಚೆಂ ದೆವಾಳ್. ಶಹರಾಂತ್ ಸುರ್ಯಾಚಿ ಜಾಂವ್ ಚಂದ್ರಾಚಿ ಜಾಂವ್ ಗರ್ಜ್ ನಾ; ಕಿತ್ಯಾಕ್ ದೆವಾಚಿ ಮಹಿಮಾಚ್ ತಾಚೊ ಉಜ್ವಾಡ್ ಆನಿ ತಿ ಶೆಳಿಚ್ ತಾಚೊ ದಿವೊ.
Show more
11 April
ಮೇ 25 - ಪಾಸ್ಕಾ ಕಾಳಾಚೊ ಸವೊ ಆಯ್ತಾರ್ - ದುಸ್ರೆಂ ವಾಚಪ್
ಉಗ್ಡಾಪಣ್ 21:10-14, 22-23 ಅತ್ಮ್ಯಾಚ್ಯಾ ಬಳಾನ್ ತಾಣೆಂ ಮ್ಹಾಕಾ ಏಕ್ ಊಂಚ್ ದೊಂಗ್ರಾಚೇ ತಾಳ್ವೆರ್ ವ್ಹೆಲೊ ಆನಿ ಥಂಯ್ ಥಾವ್ನ್ ಪವಿತ್ರ್ ಶಹರ್, ಜೆರುಜಲೆಮ್, ಮ್ಹಾಕಾ ದಾಖಯ್ಲೆಂ. ಸರ್ಗಾ ವಯ್ಲೆಂ ದೆವಾ ಥಾವ್ನ್ ತೆಂ ದೆಂವುನ್ ಯೆತಾಲೆಂ. ದೆವಾಚ್ಯಾ ವೈಭವಾನ್ ತೆಂ ಸಗ್ಳೆಂಚ್ ಪರ್ಜಳ್ತಾಲೆಂ. ತಾಚೊ ಪರ್ಜಳ್ ಏಕ್ ಭೋವ್ ಮೊಲಾಧಿಕ್ ಮಾಣ್ಕಾ ಸಾರ್ಕೊ, ಥಳ್ಥಳಿತ್ ವಜ್ರಾಸಾರ್ಕೊ ದಿಸ್ತಾಲೊ. ತ್ಯಾ ಶಹರಾಕ್ ರೂಂದ್ ಆನಿ ಉಬಾರ್ ಪಾಗೊರ್ ಆಸ್ಲೊ; ತಾಕಾ ಬಾರಾ ದಾರ್ವಟೆ ಆಸ್ಲೆ ಆನಿ ಎಕೇಕ್ ದಾರ್ವಟ್ಯಾ ಸರ್ಶಿಂ ಎಕೇಕ್ ದೇವ್‍ದೂತ್ ಪಾರೊತ್ ಕರುಂಕ್ ದವರ್ಲಲೊ. ಇಸ್ರಾಯೆಲಾಚ್ಯಾ ಬಾರಾ ಕುಳಿಯಾಂಚಿಂ ನಾಂವಾಂ ತ್ಯಾ ಬಾರಾ ದಾರ್ವಟ್ಯಾಂಚೆರ್ ಕಾಂತಯ್ಲಲಿಂ. ಉದೆಂತಿಚೇ ಕುಶಿನ್ ತೀನ್ ದಾರ್ವಟೆ, ಉತ್ತರೆಕ್ ತೀನ್, ದಕ್ಷಿಣೆಕ್ ತೀನ್ ಆನಿ ಅಸ್ತಮ್ತೆಕ್ ತೀನ್. ಶಹರಾಚೊ ಪಾಗೊರ್ ಬಾರಾ ಬುನ್ಯಾದಿಂಚೆರ್ ಬಾಂಧ್‍ಲ್ಲೊ. ತಾಂಚೇ ವಯ್ರ್ ಶೆಳಿಯೆಚ್ಯಾ ಬಾರಾ ಧರ್ಮ್‍ದುತಾಂಚಿಂ ನಾಂವಾಂ ಬರೊವ್ನ್ ಘಾಲ್ಲಿಂ. ಶಹರಾ ಭಿತರ್ ಖಂಯ್‍ಯೀ ಮ್ಹಾಕಾ ದೆವಾಳ್ ದಿಸ್ಲೆಂನಾ; ಕಿತ್ಯಾಕ್ ಸರ್ವ್ ಪದ್ವೆದಾರ್ ಸರ್ವೆಸ್ಪರ್ ದೇವ್ ಆನಿ ಶೆಳಿಚ್ ತಾಚೆಂ ದೆವಾಳ್. ಶಹರಾಂತ್ ಸುರ್ಯಾಚಿ ಜಾಂವ್ ಚಂದ್ರಾಚಿ ಜಾಂವ್ ಗರ್ಜ್ ನಾ; ಕಿತ್ಯಾಕ್ ದೆವಾಚಿ ಮಹಿಮಾಚ್ ತಾಚೊ ಉಜ್ವಾಡ್ ಆನಿ ತಿ ಶೆಳಿಚ್ ತಾಚೊ ದಿವೊ.
Show more
11 April
ಮೇ 25 - ಪಾಸ್ಕಾ ಕಾಳಾಚೊ ಸವೊ ಆಯ್ತಾರ್ – ಸುವಾರ್ತಾ
ಜುವಾಂವ್ 14:23-29 ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ: “ಜೊ ಕೊಣ್ ಮ್ಹಜೊ ಮೋಗ್ ಕರ್ತಾ, ತೊ ಮ್ಹಜೆಂ ಉತರ್ ಪಾಳ್ತಾ. ತವಳ್ ಮ್ಹಜೊ ಬಾಪ್ ತಾಚೊ ಮೋಗ್ ಕರ್ತಾ; ಆನಿ ಆಮಿ ದೊಗ್‍ಯೀ ತಾಚೇಶಿಂ ಯೇವ್ನ್, ತಾಚೇ ಥಂಯ್ ವಸ್ತಿ ಕರ್ತಲ್ಯಾಂವ್. ಮ್ಹಜೊ ಮೋಗ್ ಕರಿನಾ ತೊ, ಮ್ಹಜೆಂ ಉತರ್ ಪಾಳಿನಾ. ತುಮಿ ಆಯ್ಕತಾತ್ ತೆಂ ಉತರ್ ಮ್ಹಜೆಂ ನ್ಹಯ್, ಬಗರ್ ಮ್ಹಾಕಾ ಪಾಠಯ್ಲಾ ತ್ಯಾ ಬಾಪಾಚೆಂ.” “ತುಮ್ಚೇ ಸಾಂಗಾತಾ ಆಸ್ತಾನಾಂಚ್ ಹೆಂ ಸಗ್ಳೆಂ ಹಾಂವೆಂ ತುಮ್ಕಾಂ ಸಾಂಗ್ಲಾಂ. ಪುಣ್ ಮ್ಹಜೇ ನಾಂವಿಂ ಬಾಪ್‍ಚ್ ತುಮ್ಕಾಂ ಎಕ್ ಮಜತ್‍ದಾರ್ ಪಾಠಯ್ತಲೊ; ತೊ ಪವಿತ್ರ್ ಆತ್ಮೊ ತುಮ್ಕಾಂ ಸಗ್ಳೆಂ ಶಿಕಯ್ತಲೊ ಆನಿ ಹಾಂವೆಂ ತುಮ್ಕಾಂ ಸಾಂಗ್ಲಾಂ ತೆಂ ಸಗ್ಳೆಂ ತುಮ್ಚ್ಯಾ ಉಗ್ಡಾಸಾಕ್ ಹಾಡ್ತಲೊ.” “ಸಮಾಧಾನ್ ತುಮ್ಚೇಥಂಯ್ ಹಾಂವ್ ದವರ್ನ್ ವೆತಾಂ; ಮ್ಹಜೆಂ ಸಮಧಾನ್ ತುಮ್ಕಾಂ ದಿತಾಂ. ಸಂಸಾರ್ ಅಸಲೇಂ ಸಮಾಧಾನ್ ದೀಂವ್ಕ್ ಸಕನಾ. ತುಮಿ ಖಂತ್ ಕಾಡ್ಚಿ ಸೊಡಾ; ತುಮಿ ಭಿಯೆವ್ಚೆಂಯೀ ನಾಕಾ. ‘ಹಾಂವ್ ವೆತಾಂ ಆನಿ ತುಮ್ಚೇ ಸರ್ಶಿಂ ಪಾಟಿಂ ಯೆತಾಂ’ಮ್ಹಣುನ್ ಹಾಂವೆಂ ಸಾಂಗ್‍ಲ್ಲೆಂ ತುಮಿ ಆಯ್ಕಲಾಂ. ತುಮ್ಕಾಂ ಮ್ಹಜೊ ಮೋಗ್ ಆಸಾ ಜಾಲ್ಯಾರ್, ಹಾಂವ್ ಬಾಪಾ ಸರ್ಶಿಂ ವೆತಾಂ ಮ್ಹಣ್ ಆಯ್ಕುನ್ ತುಮಿ ಸಂತೊಸ್ ಪಾವ್ತಲ್ಯಾತ್; ಕಿತ್ಯಾಕ್ ಬಾಪ್ ಮ್ಹಜೇ ಪ್ರಾಸ್ ವರ್ತೊ. ಹೆಂ ಸಗ್ಳೆಂ ಘಡೊನ್ ಯೆವ್ಚ್ಯಾ ವೆಳಾರ್ ತುಮಿ ಸತ್ಮಾನ್ಚ್ಯಾಕ್, ಆತಾಂ ತೆಂ ಘಡೊನ್ ಯೆವ್ಚೇ ಆದಿಂಚ್, ಹಾಂವೆಂ ತುಮ್ಕಾಂ ಸಾಂಗ್ಲಾಂ.
Show more
