Home Departments Prayers News Photo Gallery Results Magazines Contact

Select a date

4


Sep

ಸಪ್ತೆಂಬರ್ 8 – ಮೊಂತಿ ಫೆಸ್ತ್ - ಪಯ್ಲೆಂ ವಾಚಪ್

ಮಿಕಾ 5:1-4 ಪೂಣ್ ತುಂ ಬೆತ್ಲೆಹೆಮ್-ಎಫ್ರಾತಾ, ಜುದಾಚ್ಯಾ ಕುಳಿಯಾಂ ಮಧೆ ತುಂ ಭೋವ್ ಲ್ಹಾನ್, ತರೀ ಇಸ್ರಾಯೆಲಾಚೆರ್ ರಾಜ್ವಟ್ ಚಲೊಂವ್ಚೊ ಆಸಾ ತೊ ಮ್ಹಾಕಾ ತುಜೆ ಥಾವ್ನ್ ಜಲ್ಮತಲೊ. ತಾಚೊ ಆರಂಭ್ ನ್ಹಯ್ ಆತಾಂಚೊ, ಬಗರ್ ಭೋವ್ ಪುರ್ವಿಲ್ಯಾ ಕಾಳಾಂಚೊ. ದೆಕುನ್ ಪ್ರಸೂತ್ ಜಾಂವ್ಚಿ ಆಸಾ ತಿ ಪ್ರಸೂತ್ ಜಾಯ್ಸರ್ ಸರ್ವೆಸ್ಪರ್ ತಾಂಕಾಂ ಸಾಂಡ್ತಲೊ; ಉಪ್ರಾಂತ್ ತಾಚೆ ಉರ್ಲಲೆ ಭಾವ್ ಇಸ್ರಾಯೆಲಿತಾಂಶಿಂ ಪರ್ತುನ್ ಯೆತಲೆ. ಸರ್ವೆಸ್ಪರಾಚೆ ಪದ್ವೆನ್ ಆನಿ ಆಪ್ಲ್ಯಾ ದೆವಾಚ್ಯಾ ನಾಂವಾಚ್ಯಾ ಪ್ರತಾಪಾನ್ ತೊ ಥಿರ್ ರಾವ್ತಲೊ ಆನಿ ಆಪ್ಲ್ಯಾ ಹಿಂಡಾಕ್ ಚರಯ್ತಲೊ. ತಿಂ ಸುರಕ್ಷಿತ್ ವಸ್ತಿ ಕರ್ತಲಿಂ, ಕಿತ್ಯಾಕ್ ತೆದ್ನಾ ಥಾವ್ನ್ ತಾಚಿ ಪದ್ವಿ ಪೃಥ್ವೆಚ್ಯಾ ಶಿಮಾಂ ಪರ್ಯಾಂತ್ ಪಾವ್ತಲಿ, ಆನಿ ತೊಚ್ ಶಾಂತಿ ಜಾತಲೊ. ಅಸ್ಸೀರಿಯಾಗಾರ್ ಆಮ್ಚ್ಯಾ ದೆಶಾಚೆರ್ ಧಾಡ್ ಘಾಲ್ತಿತ್ ಜಾಲ್ಯಾರ್ ಆನಿ ಆಮ್ಚೆ ಭುಂಯ್ಚೆರ್ ಪಾಂಯ್ ದವರ್ತಿತ್ ಜಾಲ್ಯಾರ್, ಆಮಿ ತಾಂಚೆ ವಿರೋಧ್ ಸಾತ್ ಗೊವ್ಳ್ಯಾಂಕ್ ಆನಿ ರಾಯಾಳ್ ವರ್ಗಾಚ್ಯಾ ಆಟ್ ಫುಡಾರ್ಯಾಂಕ್ ಉಟಯ್ತಲ್ಯಾಂವ್.

4


Sep

ಸಪ್ತೆಂಬರ್ 8 – ಮೊಂತಿ ಫೆಸ್ತ್ – ಕೀರ್ತನ್

ಕೀರ್ತನ್ 13 ಶ್ಲೋಕ್: ಸರ್ವೆಸ್ಪರಾ ಥಂಯ್ ಹಾಂವ್ ಉಲ್ಲಾಸ್ತಾಂ 1. ಪುಣ್ ಹಾಂವ್, ಹಾಂವ್ ತುಜ್ಯಾ ದೃಢ್ ಮೊಗಾಚೆರ್ ಪಾತ್ಯೆವ್ನ್ ಆಸಾಂ, ತುಜೆಂ ತಾರಣ್ ಮ್ಹಾಕಾ ಲಾಬ್ಲೆಂ ಮ್ಹಣ್ ಮ್ಹಜೆಂ ಕಾಳಿಜ್ ಉಲ್ಲಾಸ್ತಲೆಂ. 2. ವ್ಹಯ್, ತಾಣೆಂ ಕೆಲ್ಲ್ಯಾ ಉಪ್ಕಾರಾಂಕ್ ಸರ್ವೆಸ್ಪರಾಚಿ ಹಾಂವ್ ಸ್ತುತಿ ಕರ್ತಲೊಂ, ತಾಚ್ಯಾ ಮಾನಾಕ್ ಸ್ತೊತ್ರಾಂ-ಸದ್ಗಿತಾಂ ಗಾಯ್ತಲೊಂ.

4


Sep

ಸಪ್ತೆಂಬರ್ 8 – ಮೊಂತಿ ಫೆಸ್ತ್ – ದುಸ್ರೆಂ ವಾಚಪ್

ರೊಮಾ 8:28-30 ಹ್ಯಾ ಶಿವಾಯ್, ಆಪ್ಣಾಚೊ ಮೋಗ್ ಕರ್ತಲ್ಯಾಂಕ್, ಮ್ಹಣ್ಜೆ ಜಾಂಕಾಂ ಆಪ್ಣೆಂ ನಿಶ್ಚಿತ್ ಕೆಲ್ಲ್ಯಾ ಶೆವಟಾಕ್ ಸರಿ ಜಾವ್ನ್ ಆಪವ್ಣೆಂ ದಿಲಾಂ ತಾಂಕಾಂ ಸರ್ವ್ ಸಂಗ್ತಿ ದೇವ್ ತಾಂಚ್ಯಾ ಬರ್ಯಾಕ್ ಪಡಶೊ ಕರ್ತಾ ಮ್ಹಣ್ ಆಮಿ ಜಾಣಾಂವ್. ಜಾಂಕಾಂ ವಿಂಚುನ್ ಕಾಡ್ಚೇ ಆದಿಂಚ್ ತೊ ಒಳ್ಕುನ್ ಜಾಣಾ, ತಾಂಕಾಂ ಆಪ್ಲ್ಯಾ ಪುತಾಚ್ಯಾ ಸಾರ್ಕ್ಯಾಚಿಂ ಜಾಂವ್ಕ್ ತಾಣೆಂ ನಿರ್ಮಿಲಾಂ. ಅಶೆಂ, ಜಾಯ್ತ್ಯಾ ಭಾವ್ ಭಾಂವ್ಡಾಂಚ್ಯಾ ಘರಾಂತ್ ಆಪ್ಲ್ಯಾ ಪುತಾನ್ ಮಾಲ್ಗಡೊ ಪೂತ್ ಜಾಯ್ಜಯ್ ಮ್ಹಣ್ ತಾಣೆಂ ಯೆವ್ಜಿಲೆಂ. ಹ್ಯಾ ಪಾಸತ್ ಜಾಂಕಾಂ ತಾಣೆಂ ಅಸಲೇ ಯೆವ್ಜಣೆಕ್ ನಿರ್ಮಿಲಿಂ ತಾಂಕಾಂ ತಾಣೆಂ ಆಪಯ್ಲಿಂ; ಜಾಂಕಾಂ ತಾಣೆಂ ಆಪಯ್ಲಿಂ ತಾಂಕಾಂ ತಾಣೆಂ ನಿತಿವಂತ್ ಕೆಲಿಂ; ಜಾಂಕಾಂ ತಾಣೆಂ ನಿತಿವಂತ್ ಕೆಲಿಂ ತಾಂಕಾಂ ತಾಣೆಂ ಆಪ್ಲೇ ಮಹಿಮೆಂತ್ ಭಾಗಿದಾರಾಂ ಕೆಲಿಂ.

4


Sep

ಸಪ್ತೆಂಬರ್ 8 – ಮೊಂತಿ ಫೆಸ್ತ್ - ಸುವಾರ್ತಾ

ಮಾತೆವ್ 1:1-16, 18-23 ಜೆಜು ಕ್ರಿಸ್ತಾಚಿ ವಂಶಾವಳ್ ಹಿ: ತೊ ಪೂತ್ ದಾವಿದಾಚೊ, ತೊ ಪೂತ್ ಆಬ್ರಾಹಾಮಾಚೊ. ಅಬ್ರಾಹಾಮ್ ಇಸಾಕಾಚೊ ಬಾಪುಯ್, ಇಸಾಕ್ ಜಾಕೊಬಾಚೊ ಆನಿ ಜಾಕೊಬ್ ಜುದಾಚೊ ಆನಿ ತಾಚ್ಯಾ ಭಾವಾಂಚೊ ಬಾಪುಯ್. ಜುದಾ ಫೆರೆಸಾಚೊ ಆನಿ ಜೆರಾಚೊ ಬಾಪುಯ್ (ತಾಮಾರ್ ತಾಂಚಿ ಆವಯ್); ಫೆರೆಸ್ ಹೆಸ್ರೊನಾಚೊ ಆನಿ ಹೆಸ್ರೊನ್ ಆರಾಮಾಚೊ ಬಾಪುಯ್. ಆರಾಮ್ ಆಮಿನದಾಬಾಚೊ ಆನಿ ಆಮಿನದಾಬ್ ನಾಆಸೊನಾಚೊ ಆನಿ ನಾಆಸೊನ್ ಸಾಲ್ಮೊನಾಚೊ ಬಾಪುಯ್. ಸಾಲ್ಮೊನ್ ಬೊಆಜಾಚೊ ಬಾಪುಯ್, (ರಾಹಾಬ್ ತಾಚಿ ಆವಯ್); ಬೊಆಜ್ ಓವೆದಾಚೊ ಬಾಪುಯ್, (ರೂತ್ ತಾಚಿ ಆವಯ್); ಓವೆದ್ ಯೆಸ್ಸೆಚೊ ಆನಿ ಯೆಸ್ಸೆ ದಾವಿದ್ ರಾಯಾಚೊ ಬಾಪುಯ್. ದಾವಿದ್ ಸಾಲ್ಮಾಂವ್ಚೊ ಬಾಪುಯ್ (ಉರಿಯಾಚಿ ಬಾಯ್ಲ್ ಸಾಲ್ಮಾಂವ್ಚಿ ಆವಯ್). ಸಾಲ್ಮಾಂವ್, ರೆಹೊಬೊಆಮಾಚೊ, ರೆಹೊಬೊಆಮ್ ಆಬಿಯಾಚೊ, ಆನಿ ಆಬಿಯಾ ಆಸಾಚೊ ಬಾಪುಯ್. ಆಸಾ ಯೊಸಾಫಾತಾಚೊ, ಯೊಸಾಫಾತ್ ಯೊರಾಮಾಚೊ, ಆನಿ ಯೊರಾಮ್ ಓಸಿಯಾಚೊ ಬಾಪುಯ್. ಓಸಿಯಾ ಯೊತಾಮಾಚೊ, ಯೊತಾಮ್ ಆಖಾಜಾಚೊ ಆನಿ ಆಖಾಜ್ ಹಿಜ್‍ಕಿಯಾಚೊ ಬಾಪುಯ್. ಹಿಜ್‍ಕಿಯಾ ಮಾನಾಸ್ಸೆಚೊ, ಮಾನಾಸ್ಸೆ ಆಮೊಸಾಚೊ, ಆನಿ ಆಮೊಸ್ ಯೊಸಿಯಾಚೊ ಬಾಪುಯ್. ಯೊಸಿಯಾ ಯೆಕೊನಿಯಾಚೊ ಆನಿ ತಾಚಾ ಭಾವಾಂಚೊ ಬಾಪುಯ್ - ಹಾಂಚ್ಯಾ ಕಾಳಾರ್ ಇಸ್ರಾಯೆಲ್ ಪರ್ಜೆಕ್ ಬಾಬಿಲೊನಾಚ್ಯಾ ಗಾಂವಾಕ್ ಗುಲಾಮ್ ಕರ್ನ್ ವ್ಹೆಲ್ಲಿ. ಬಾಬಿಲೊನಾಚೇ ಬಂಧಡೇ ಉಪ್ರಾಂತ್; ಯೆಕೊನಿಯಾ ಶಅಲ್ತಿಯೆಲಾಚೊ ಆನಿ ಶಅಲ್ತಿಯೆಲ್ ಯೆರುಬಾಬೆಲಾಚೊ ಬಾಪುಯ್. ಯೆರುಬಾಬೆಲ್ ಆಬಿಯುದಾಚೊ, ಆಬಿಯುದ್ ಎಲಿಯಾಕಿಮಾಚೊ, ಆನಿ ಎಲಿಯಾಕಿಮ್ ಆಜೊರಾಚೊ ಬಾಪುಯ್. ಆಜೊರ್ ಸಾದೊಕಾಚೊ, ಆನಿ ಸಾದೊಕ್ ಆಖಿಮಾಚೊ ಆನಿ ಆಖಿಮ್ ಎಲಿಯುದಾಚೊ ಬಾಪುಯ್. ಎಲಿಯುದ್ ಎಲೆಯಾಜರಾಚೊ, ಎಲೆಯಾಜರ್ ಮಾದಾನಾಚೊ ಆನಿ ಮಾದಾನ್ ಜಾಕೊಬಾಚೊ ಬಾಪುಯ್. ಜಾಕೊಬ್ ಜುಜೆಚೊ ಬಾಪುಯ್. ಜುಜೆಚಿ ಪತಿಣ್ ಮರಿ ಆನಿ ಮರಿಯೇ ಥಾವ್ನ್ ಜಲ್ಮಲೊ ಜೆಜು, ಜಾಕಾ ಮ್ಹಣ್ತಾತ್ ಕ್ರೀಸ್ತ್. ಕ್ರೀಸ್ತಾಚೆಂ ಜನನ್ ಹೇ ಪರಿಂ ಜಾಲೆಂ: ತಾಚೇ ಮಾತೇ ಮರಿಯೆಕ್ ಜುಜೆಲಾಗಿಂ ಕರಾರ್ ಜಾಲ್ಲೆಂ. ಪುಣ್ ತಾಂಚ್ಯಾ ಲಗ್ನಾ ಪಯ್ಲೆಂ ತಿ ಪವಿತ್ರ್ ಅತ್ಮ್ಯಾ ವರ್ವಿಂ ಗರ್ಭೆಸ್ತ್ ಜಾಲಿ. ತಿಚೊ ಪತಿ ಜುಜೆ ನಿತಿವಂತ್ ಮನಿಸ್. ತರಿ ಮರಿಯೆಕ್ ಅಪಕೀರ್ತ್ ಹಾಡುಂಕ್ ತಾಕಾ ಖುಶಿ ನಾತ್ಲಿ. ದೆಕುನ್ ತಾಣೆಂ ತಿಕಾ ಗುಪ್ತಿಂ ಸೊಡ್ಚಿ ಮ್ಹಣುನ್ ಚಿಂತ್ಲೆಂ. ಪುಣ್ ತಾಣೆಂ ಅಶಿ ಆಲೋಚನ್ ಕೆಲಿ ತಿತ್ಲಿಚ್, ತಾಕಾ ಸೊಪ್ಣಾಂತ್ ಸರ್ವೆಸ್ಪರಾಚೊ ಎಕ್ ದೂತ್ ದಿಷ್ಟಿ ಪಡ್ಲೊ ಆನಿ ಮ್ಹಣಾಲೊ: “ಜುಜೆ, ದಾವಿದಾಚ್ಯಾ ಪುತಾ, ಮರಿಯೆಕ್ ತುಜಿ ಪತಿಣ್ ಮ್ಹಣ್ ತುಜ್ಯಾ ಘರಾ ಹಾಡುಂಕ್ ಭಿಯೆನಾಕಾ, ಕಿತ್ಯಾಕ್ ತಿಚೆ ಥಂಯ್ ಗರ್ಭ್‍ಸಂಭವ್ ಪವಿತ್ರ್ ಅತ್ಮ್ಯಾ ವರ್ವಿಂ ಜಾಲಾ. ತಿ ಏಕ್ ಪುತಾಕ್ ಪ್ರಸುತ್ ಜಾತಲಿ; ತುವೆಂ ತಾಕಾ ಜೆಜು ಮ್ಹಣ್ ನಾಂವ್ ದವರುಂಕ್ ಜಾಯ್; ಕಿತ್ಯಾಕ್ ತೊ ಆಪ್ಲೇ ಪರ್ಜೆಕ್ ತಿಚ್ಯಾ ಪಾತ್ಕಾಂತ್ಲಿ ಸೊಡಯ್ತಲೊ.” ಹೆಂ ಸಗ್ಳೆಂ ಘಡ್ಲೆಂ ಪೂರ್ಣ್ ಜಾವ್ಚ್ಯಾಕ್ ಪ್ರವಾದ್ಯಾ ಮಾರಿಫತ್ ಸರ್ವೆಸ್ಪರಾನ್ ಮ್ಹಳ್ಳೆಂ ತೆಂ : “ಏಕ್ ಆಂಕ್ವಾರ್ ಚಲಿ ಗರ್ಭೆಸ್ತ್ ಜಾತಲಿ ಆನಿ ಏಕ್ ಪುತಾಕ್ ಪ್ರಸುತ್ ಜಾತಲಿ ಆನಿ ತಾಕಾ ‘ಇಮ್ಮಾನುಎಲ್’ಮ್ಹಣುನ್ ಆಪಯ್ತಲೆ.”